Ye weku ɔ hi kɔpe ko mi ngɛ France yiti je ngɛ puje he blɔ. A tsɛɛ lejɛ ɔ ke Tellancourt. Ye papaa je France, nɛ ye yayo je Italy. Benɛ i ye jeha kpaanyɔ ɔ, ye weku ɔ hia kɛ ya hi kpɔ ko mi ngɛ Rome ngɛ Italy. Ohiatsɛmɛ lɛ a ngɛ jamɛ a kpɔ ɔ mi. Níhi a mi ba wa ha wɔ ngɛ lejɛ ɔ. Sika he nyagba haa nɛ ye fɔli ɔmɛ pɛɛ wawɛɛ.

Benɛ i ye jeha 15 ɔ, ye yayo de mi ke ma je we mi nɛ ma ya hla huɛmɛ. Lɔ ɔ he ɔ, ke i je kpo ɔ, i bɛ we mi mla. E kɛ we kulaa nɛ i kɛ ye he ya bɔ nimli yayahi. Ligbi ko ɔ, i kɛ nyumu ko kpe. Jinɛ i susu kaa nɔmlɔ kpakpa ji lɛ. Se e ha mi tsopa yaya ko nɛ i ngɔ, ejakaa i suɔ nɛ nihi nɛ a na kaa i wa. E kɛ we nɛ i ngɔ ye he kɛ wo tsopa yaya numi kɛ ajuama bɔmi mi. Nihi nu mi pani nya nɛ a kɛ mi hwɔ si abɔ. Si himi ba gbe ye nya; nɛ i ná nɛ i gbo. I pee mɔbɔmɔbɔ. Benɛ i ye jeha 16 nɛ i pee ye juɛmi kaa ma gbe ye he. Lɔ ɔ he ɔ, i nu dã tɔ kake nɛ i tu kɛ nɔ pa ko mi. I sɛ diblii mi ligbi etɛ.

I ba na kaa wami he jua wa wawɛɛ, se i ya nɔ nɛ i ngɔ ye he kɛ wo basabasa peemi kɛ jumi ní peepeehi a mi. I kɛ nihi ya náa bɔmi ngɛ a wehi a mi, nɛ i haa mɛ tsopa yaya nɛ ma ha nɛ a hwɔ mahe, kɛkɛ i ju mɛ. Juli kpanakuhi ha nɛ i jua tsopa yayahi ha mɛ ngɛ Italy tsuo. Polisihi hla mi hluu pɔtɔ. E ngɛ mi kaa i he we yi kaa a bɔ mi nɛ ma hi si kikɛ mohu lɛɛ, se ye je mi bami ba puɛ kulaa. I sɔle nɛ i kpa Mawu pɛɛ kaa e ha nɛ ma ná tue mi jɔmi kɛ bua jɔmi jeha kake pɛ.

Benɛ i ye jeha 24 ɔ, i hia kɛ ya England. Akɛnɛ i kɛ awi yeli bɔ wawɛɛ he je ɔ, ye wami ya je oslaa mi. Se loko ma je ɔ, i ya slaa ye yayo. Jamɛ a ligbi ɔ, i ya na nyumu ko nɛ a tsɛɛ lɛ Annunziato Lugarà nɛ e kɛ ye yayo ngɛ Baiblo ɔ he ní sɛɛ. * E pee mi nyakpɛ wawɛɛ, ejakaa i le kaa e ji julɔ kpanaku. Enɛ ɔ ha nɛ i ye gbeye, lɔ ɔ he ɔ, i bi lɛ e we amaniɛ. E de mi ke e pee tsakemi ngɛ e si himi mi, nɛ e ba pee Yehowa Odasefo no, nɛ e de mi ke ma wo lɛ si kaa ke i ya su  England ɔ, ma hla Odasefo ɔmɛ a se blɔ. I de lɛ ke ma pee jã. Se benɛ i ya su ɔ, i tsa ye je mi bami yaya a nɔ.

Ligbi ko ɔ, i na Odasefo no ko nɛ e ngɛ Hwɔɔmi Mɔ kɛ Awake! womi tɛtlɛɛ ɔmɛ gbae ngɛ gbɛjegbɛ ko nɔ ngɛ London. Oya nɔuu nɛ i kai si nɛ i wo Annunziato ɔ, nɛ i de Odasefo no ɔ kaa i suɔ nɛ e kɛ mi ba kase Baiblo ɔ.

Níhi nɛ i kase ngɛ Baiblo ɔ mi ɔ ha nɛ ye nya kpɛ ye he. Kaa nɔ hyɛmi nɔ́ ɔ, munyu nɛ ngɛ 1 Yohane 1:9 ɔ ta ye tsui he wawɛɛ. Ngmami ɔ de ke: “Se ke wa jaje wa he yayami ɔmɛ ha Mawu ɔ, e maa ye e siwo ɔ nɔ, nɛ e maa pee nɔ́ nɛ da. E kɛ wa he yayami ɔmɛ maa pa wɔ; e maa tsu wa he.” Ngmami nɛ ɔ si mi wawɛɛ ejakaa i le kaa ye je mi bami puɛ. Amlɔ nɔuu nɛ i bɔni kpehi nɛ Yehowa Odasefohi peeɔ ngɛ a Matsɛ Yemi Asa a nɔ ɔ yami. Odasefo ɔmɛ he mi atuu. Benɛ i na kake peemi nɛ ngɛ a kpɛti ɔ, ye bua jɔ a he wawɛɛ, nɛ i pee ye juɛmi kaa ma piɛɛ a he.

E ngɛ mi kaa e he wɛ ha mi tsɔ kaa ma kpa tsopa yaya numi, kɛ je mi bami yayami mohu lɛɛ, se i gbo dengme wawɛɛ loko i nyɛ nɛ i ngmɛɛ su yaya komɛ a he. I ba yɔse kaa e sa nɛ ma je bumi kpo kɛ tsɔɔ nihi nɛ ma susu a he hulɔ. Ngɛ anɔkuale mi ɔ, loloolo ɔ, i ngɛ mɔde bɔe kaa ma kpa su yaya komɛ. Se kɛ gu Yehowa yemi kɛ buami nɔ ɔ, i nyɛ nɛ i pee tsakemi komɛ. Ngɛ nyɔhiɔ ekpa mi ɔ, i kase Baiblo ɔ, nɛ a baptisi mi kaa Yehowa Odasefo no ngɛ jeha 1997 ɔ mi.

Benɛ a baptisi mi se ɔ, i kɛ yiheyo ko nɛ a tsɛɛ lɛ Barbara nɛ lɛ hu e ba pee Yehowa Odasefo no kɛ we ɔ sɛ gba si himi mi. Benɛ ye huɛ ko nɛ i kɛ lɛ bɔ be ko nɛ be ɔ na bɔ nɛ i tsake ha a, lɛ hu e bɔni Baiblo ɔ kasemi. Bɔɔbɔɔbɔɔ ɔ, e kɛ e nyɛmiyo tsuo ba pee Odasefohi. Ye maa nyɛmiyo nɛ e ye jeha 80 ɔ hu bɔni Baiblo ɔ kasemi, nɛ a baptisi lɛ loko e gbo.

Amlɔ nɛ ɔ, i ngɛ sɔmɔe kaa asafo mi nɔkɔtɔma, nɛ i kɛ ye yo ɔ ngɔɔ be fuu kɛ tsɔɔ nihi nɛ a tuɔ Italy gbi ɔ Baiblo ɔ ngɛ London. Be komɛ ngɛ nɛ i haoɔ ngɛ bɔ nɛ i ba ye je mi ha sa a he, se ye yo Babara woɔ mi he wami. Amlɔ nɛ ɔ, i ná weku si himi kpakpa, kɛ Tsɛ nɛ ngɛ suɔmi nɛ i hla hluu ɔ. I kpa Mawu pɛɛ kaa e ha nɛ ma ná tue mi jɔmi kɛ bua jɔmi jeha kake pɛ, se e ha mi kɛ be nɔ!