Nihi babauu nɛ a ngɛ je ɔ mi ɔ hia niye ní kɛ hwɔ he. Ni komɛ lɛɛ, nɔ́ nɛ a hia pɛ ji hwɔɔ se he hɛ nɔ kami. Ke wa bɔ mɔde nɛ wa ye bua nihi kaa jã a, Mawu bua maa jɔ wa he nɛ e maa jɔɔ wɔ.

‘Ke o na ohiatsɛ mɔbɔ ɔ, e ngɛ kaa o pa nɔ́ ko ha Yehowa; nɛ nɔ́ nɛ o pee ɔ, e maa to nane mi ha mo.’​—ABƐ 19:17.

Yesu tu nɔ́ he tomi nɔ́ ko nɛ kɔɔ nyumu ko nɛ ojo fiali ya tua lɛ nɛ a kongo lɛ, nɛ́ a je e he konɛ e gbo ngɛ lejɛ ɔ he munyu. (Luka 10:29-37) Nibwɔ ko nɛ bee ngɛ jamɛ a blɔ ɔ nɔ ɔ na nyumu ɔ nɛ plaa wawɛɛ ɔ nɛ e ye bua lɛ. E ngɛ mi kaa e je ma kpa mi mohu lɛɛ, se e ye bua nyumu ɔ nɛ plaa a.

Ngɛ tsopa nɛ nibwɔ nɛ mi mi jɔ ɔ ngɔ kɛ to nyumu ɔ nɛ plaa a pa amɛ a nɔ ha lɛ, kɛ he lo nya níhi nɛ e kɛ ye bua lɛ ɔ se ɔ, e wo e bua nɛ enɛ ɔ ha nɛ nyumu ɔ tsui nɔ e mi.

Mɛni wa kaseɔ ngɛ nɔ́ he tomi nɔ́ nɛ ɔ mi? Yesu ngɛ tsɔɔe kaa e sa nɛ waa pee nɔ́ fɛɛ nɔ́ nɛ wa ma nyɛ kɛ ye bua nihi nɛ e fĩ mɛ ɔ. (Abɛ 14:31) Ngmami Klɔuklɔu ɔmɛ tsɔɔ kaa e be kɛe nɛ Mawu ma je nɔ́ nami kɛ ohia kɛ je. Eko ɔ, o ma bi ke, ngɛ mɛni blɔ nɔ nɛ Mawu maa gu kɛ tsu e yi mi tomi nɛ ɔ he ní? Nɛ mɛni be e maa pee jã? Munyu nɛ nyɛɛ se ɔ maa tsɔɔ jɔɔmihi nɛ wa Bɔlɔ nɛ ngɛ suɔmi ɔ wo si kaa e kɛ ma ha wɔ.