1. Mɛni he bɔfo Yohane wo wɔ he wami kaa wa susu, nɛ mɛni he je?

BƆFO Yohane wo wɔ he wami kaa wa susu suɔmi agbo nɛ Yehowa ngɛ kɛ ha wɔ ɔ he wawɛɛ. Wa kaneɔ ngɛ 1 Yohane 3:1 ɔ ke: ‘Nyɛɛ hyɛ suɔmi sɔuu nɛ Tsɛ ɔ ngɛ kɛ ha wɔ!’ Ke wa susu suɔmi nɛ Yehowa ngɛ kɛ ha wɔ, kɛ níhi nɛ e peeɔ kɛ tsɔɔ kaa e suɔ wɔ ɔ he ɔ, lɔ ɔ haa nɛ huɛ bɔmi gbagbanii hii waa kɛ lɛ wa kpɛti, nɛ suɔmi nɛ wa ngɛ kɛ ha lɛ ɔ mi waa.

2. Mɛni he je nɛ e yee ha ni komɛ kaa a maa kplɛɛ nɔ kaa Mawu suɔ mɛ ɔ?

² Aywilɛho sane ji kaa ni komɛ susu kaa Mawu be nyɛe maa suɔ mɛ. A juɛmi ji Mawu susuu we adesahi a he. Eko ɔ, a susu kaa Mawu woɔ adesahi mlaahi, nɛ e gblaa nihi nɛ a yi e mlaa amɛ a nɔ ɔ a tue kɛkɛ. Lakpa tsɔɔmihi ha nɛ ni komɛ susu kaa Mawu yi mi wa, nɛ adesahi be nyɛe maa suɔ lɛ. Ni komɛ hu susu kaa Mawu suɔ nihi nɛ a peeɔ nɔ́ nɛ da kɛ nɔ́ nɛ dɛ tsuo. Se akɛnɛ o ngɛ Baiblo ɔ kasee he je ɔ, o ba  le bɔ nɛ Yehowa ngɛ ha tutuutu. O ba le kaa ngɛ suhi nɛ Mawu ngɛ ɔ tsuo a kpɛti ɔ, suɔmi ji nɔ́ nɛ pe kulaa. O le hu kaa e ngɔ e Bi ɔ kɛ ha kaa kpɔmi nɔ́ ngɛ o he je. (Yohane 3:16; 1 Yohane 4:8) Se eko ɔ, ngɛ he nɛ o hi kɛ wa he je ɔ, e he wa ha mo kaa o maa le kaa Yehowa suɔ mo wawɛɛ.

3. Mɛni maa ye bua wɔ konɛ waa le kaa Yehowa suɔ wɔ?

³ Loko wa maa le kaa Yehowa suɔ wɔ ɔ, kekleekle ɔ, e he hia nɛ waa le kaa lɛ nɛ e bɔ wɔ. Lɛ nɛ e ha wɔ wami. (Kane La 100:3-5.) Enɛ ɔ he je nɛ Baiblo ɔ tsɛ Adam ke “Mawu bi” ɔ nɛ. (Luka 3:38) Yesu hu tsɔɔ wɔ kaa e sa nɛ wa tsɛ Yehowa ke, “wa Tsɛ nɛ ngɛ hiɔwe.” (Mateo 6:9) Lɔ ɔ he ɔ, Yehowa ji wa Tsɛ, nɛ e suɔ wɔ kaa bɔ nɛ tsɛ kpakpa suɔ e bimɛ ɔ.

4. (a) Mɛni Tsɛ kikɛ nɛ Yehowa ji? (b) Mɛni he wa ma susu ngɛ munyu nɛ ɔ kɛ munyu nɛ nyɛɛ enɛ ɔ se ɔ mi?

⁴ Ni komɛ ngɛ nɛ a tsɛmɛ pee mɛ yi wu tso níhi ngɛ a jokuɛ mi. Enɛ ɔ he ɔ, ke a kai jamɛ a ní ɔmɛ ɔ, e yee ha mɛ kaa a maa kplɛɛ nɔ kaa bitsɛ ko ngɛ nɛ e ngɛ suɔmi. Yehowa be e bimɛ jã pee gblegbleegble. Tsɛ ko be nɛ e kɛ lɛ sɔ. (La 27:10) E suɔ wɔ wawɛɛ, nɛ e peeɔ níhi fuu ha wɔ kɛ tsɔɔ kaa e susuɔ wa he. Ke wa yɔse kaa Yehowa suɔ wɔ ɔ, lɔ ɔ ma ha nɛ wɔ hu wa maa suɔ lɛ wawɛɛ nitsɛ. (Yakobo 4:8) Ngɛ munyu nɛ ɔ nɛ wa ngɛ kasee ɔ mi ɔ, wa ma susu blɔ eywiɛ nɛ Yehowa guu nɔ kɛ tsɔɔ kaa e suɔ wɔ ɔ he. Nɛ ngɛ munyu nɛ nyɛɛ enɛ ɔ se ɔ hu mi ɔ, wa ma susu blɔ eywiɛ nɛ wa ma nyɛ maa gu nɔ kɛ tsɔɔ kaa wa suɔ Yehowa a he.

5. Mɛni Mawu haa nɔ fɛɛ nɔ?

⁵ Benɛ bɔfo Paulo ya Atene ngɛ Hela a, e to he hɛ kaa nihi nɛ a ngɛ lejɛ ɔ jaa wɔhi fuu, nɛ ma mi bi ɔmɛ ngɛ hemi kɛ yemi kaa a wɔ ɔmɛ lɛ ha nɛ a ngɛ wami mi. Enɛ ɔ he ɔ, e tu “Mawu, nɔ nɛ bɔ je ɔ, kɛ e mi níhi tsuo ɔ” he munyu kɛ tsɔɔ mɛ, nɛ e tsɔɔ kaa Mawu “lɛ haa wa hii je mi, nɛ e haa wa yaa nɛ wa baa kaa adesahi.” (Bɔfo Ɔmɛ A Ní Tsumi 17:24, 25, 28) Yehowa haa wɔ nɔ́ fɛɛ nɔ́ nɛ he hia wɔ konɛ wa nyɛ nɛ waa hi je mi nɛ wa bua nɛ jɔ. Mo susu ní komɛ nɛ e pee ha wɔ akɛnɛ e suɔ wɔ ɔ a he nɛ o hyɛ.

6. Kɛ zugba a nɛ Yehowa ha wɔ ɔ ngɛ ha kɛɛ? (Moo hyɛ foni nɛ ngɛ ní kasemi ɔ sisije ɔ.)

⁶ Kaa nɔ hyɛmi nɔ́ ɔ, mo susu zugba a nɛ Yehowa kɛ ha wɔ ɔ he nɛ o hyɛ. E nɔ ngɛ fɛu saminya. (La 115:15, 16) Ngɛ si bɔlemi dodoehi tsuo nɛ Yehowa bɔ ɔ a kpɛti ɔ, zugba a ngɛ slɔɔto. Je mi si kpali kpa níhi a si nɛ a na kaa si bɔlemi dodoehi fuu ngɛ, se a na kaa ngɛ si bɔlemi dodoe nɛ ɔmɛ tsuo a kpɛti ɔ, zugba a pɛ ji nɔ́ nɛ adesahi ma nyɛ maa hi nɔ. Tsa pi níhi nɛ ma ha nɛ wa maa hi wami mi pɛ nɛ Yehowa ha wɔ, mohu ɔ, e dla zugba a nɔ saminyayoo ha wɔ, konɛ waa hi nɔ nɛ wa he nɛ jɔ wɔ, nɛ wa tue mi hu nɛ jɔ wɔ. (Yesaya 45:18) Ke wa susu zugba a nɛ Yehowa nɛ ji wa Tsɛ ɔ kɛ ha wɔ ɔ he ɔ, wa naa kaa e suɔ wɔ wawɛɛ nitsɛnitsɛ.—Kane Hiob 38:4, 7; La 8:3-5.

7. Mɛni blɔ nɔ Yehowa gu kɛ bɔ wɔ nɛ tsɔɔ kaa e suɔ wɔ?

⁷ Nɔ́ kpa ko hu nɛ Yehowa pee nɛ tsɔɔ  kaa e suɔ wɔ ji kaa e bɔ wɔ konɛ wa nyɛ nɛ waa kase lɛ. (1 Mose 1:27) Enɛ ɔ tsɔɔ kaa wa ma nyɛ maa na kaa Yehowa suɔ wɔ nɛ wɔ hu wa ma nyɛ maa suɔ lɛ. E le kaa lɔ ɔ haa wɔ bua jɔmi nitsɛnitsɛ. Ke bimɛ na kaa a fɔli suɔ mɛ ɔ, a bua jɔɔ wawɛɛ. Mo kai kaa Yesu tsɔɔ wɔ kaa ke huɛ bɔmi kpakpa ngɛ waa kɛ wa Tsɛ Yehowa wa kpɛti ɔ, wa bua maa jɔ. (Mateo 5:3) E haa wɔ ‘ní kpakpahi babauu faa.’ E ngɛ heii kaa Yehowa haa nɔ nɔ́ faa, nɛ e suɔ wɔ saminya.—1 Timoteo 6:17; La 145:16.

8. Mɛni he je nɛ wa suɔ kaa Yehowa nɛ tsɔɔ wɔ ní ɔ?

⁸ Bitsɛmɛ suɔ a bimɛ nɛ a sume kaa nihi nɛ mlɔɔ mɛ aloo a sisi mɛ. Se mwɔnɛ ɔ, fɔli fuu ngɛ nɛ a kplɛɛ we Baiblo mlaahi nɛ kɔɔ nɔ́ nɛ da kɛ nɔ́ nɛ dɛ he ɔ nɔ. Enɛ ɔ he ɔ, a nyɛ we nɛ a kudɔ a  bimɛ ɔmɛ saminya. Behi fuu ɔ, enɛ ɔ haa nɛ níhi yɛ nɔ saminya ngɛ weku ɔ mi, nɛ a ná we bua jɔmi hulɔ. (Abɛ 14:12) Se Yehowa tsɔɔ e bimɛ blɔ nɛ hi pe kulaa, ejakaa e ji “Mawu anɔkualetsɛ.” (La 31:5) E suɔ kaa e maa tsɔɔ wɔ anɔkualehi nɛ kɔɔ e he. Jehanɛ se hu ɔ, e tsɔɔ wɔ bɔ nɛ e sa kaa wa ja lɛ ha, kɛ blɔ nɛ hi pe kulaa nɛ wa ma nyɛ maa gu nɔ kɛ ba wa je mi. (Kane La 43:3.) Lɛɛ mɛni Yehowa tsɔɔ wɔ nɛ tsɔɔ kaa e suɔ wɔ?

9, 10. (a) Mɛni he je nɛ Yehowa tsɔɔ wɔ nɔ nɛ e ji ɔ? (b) Mɛni e tsɔɔ wɔ ngɛ yi mi tomi nɛ e ngɛ ha wɔ ɔ he?

⁹ Kekleekle ɔ, Yehowa tsɔɔ wɔ bɔ nɛ e ngɛ ha. E suɔ nɛ waa le lɛ. (Yakobo 4:8) Enɛ ɔ he ɔ, e tsɔɔ wɔ e biɛ. Ngɛ anɔkuale mi ɔ, Baiblo ɔ wo e biɛ ta si abɔ pe biɛ kpahi tsuo. Yehowa tsɔɔ wɔ Nɔ nɛ e ji hulɔ. Ke wa hyɛ níhi nɛ e bɔ ɔ, wa naa kaa e ngɛ he wami nɛ e ngɛ juɛmi hulɔ. (Roma Bi 1:20) Ke wa kane Baiblo ɔ, wa naa kaa e yeɔ dami sane, nɛ e suɔ wɔ. Ke wa kase Yehowa su kpakpa amɛ ɔ, huɛ bɔmi kpakpa hiɔ waa kɛ lɛ wa kpɛti.

¹⁰ Jehanɛ se hu ɔ, Yehowa tsɔɔ wɔ e yi mi tomi. E ha nɛ wa le kaa wa piɛɛ e weku ɔ he. Jehanɛ hu ɔ, e tsɔɔ wɔ nɔ́ nɛ e ngɛ hlae nɛ waa pee konɛ wa nyɛ nɛ waa kɛ nɔ fɛɛ nɔ nɛ ngɛ e weku ɔ mi ɔ, nɛ pee kake kɛ tsu ní ngɛ tue mi jɔmi mi. Baiblo ɔ tsɔɔ heii kaa Mawu bɔɛ wɔ kaa wɔ nitsɛmɛ waa tsɔɔ nɔ́ nɛ ji nɔ́ kpakpa kɛ nɔ́ yayami. (Yeremia 10:23) Yehowa le nɔ́ nɛ hi ha wɔ. Ja wa baa wa he si ha lɛ nɛ wa buɔ lɛ tue loko wa tue mi maa jɔ wɔ, nɛ wa tsui hu maa nɔ wa mi. Anɔkuale nɛ ɔ he hia, nɛ Yehowa tsɔɔ wɔ, ejakaa e suɔ wɔ.

11. Mɛni wa Tsɛ nɛ ngɛ suɔmi ɔ ha nɛ wa le ngɛ nɔ́ nɛ maa ba hwɔɔ se ɔ he?

¹¹ Tsɛ nɛ e suɔ e bimɛ susuɔ e bimɛ a hwɔɔ se si himi he wawɛɛ. E suɔ kaa a tsui nɛ nɔ a mi. Aywilɛho sane ji kaa nihi babauu peeɔ yeyeeye ngɛ nɔ́ nɛ maa ba hwɔɔ se he, nɛ nihi fuu gboɔ dengme ngɛ níhi nɛ be si hie daa a, a he. (La 90:10) Wa bua jɔ kaa wa Tsɛ Yehowa tsɔɔ wɔ bɔ nɛ wa maa hi si ha amlɔ nɛ ɔ nɛ wa tsui maa nɔ wa mi, nɛ e wo wɔ si hu kaa hwɔɔ se ɔ, e maa pee ní kpakpahi ha wɔ!

12. Mɛni Yehowa pee konɛ e kɛ ye bua Kain kɛ Baruk?

¹² Benɛ Yehowa na kaa Kain yaa pee yayami ɔ, e bɔ mɔde kaa e maa ye bua lɛ. E bi Kain ke: “Mɛni he je o mi mi fu nɛ o tu o hɛ mi kikɛ nɛ ɔ? E ji o pee nɔ́ nɛ hi jinɛ i ko ná o he bua jɔmi.” (1 Mose 4:6, 7) Kain ha we nɛ Yehowa nɛ ye bua lɛ, nɛ e na e mi nɔ́. (1 Mose 4:11-13) Be kpa ko hu ɔ, Yehowa to he hɛ kaa Baruk ná juɛmi yaya, enɛ ɔ ha nɛ pɔ tɔ Baruk he, nɛ e kɔni mi hu jɔ̃. Enɛ ɔ he ɔ, Yehowa de Baruk kaa susumi nɛ  e hɛɛ ɔ dɛ, lɔ ɔ he ɔ, e he hia nɛ e tsake e juɛmi. Baruk bu Yehowa tue, nɛ lɔ ɔ he e yi wami.—Yeremia 45:2-5.

13. Mɛni Yehowa sɔmɔli anɔkualetsɛmɛ kase ngɛ kahi nɛ a kɛ kpe ɔ mi?

¹³ Yehowa tsɔɔ wɔ blɔ, nɛ e tsɔseɔ wɔ, ejakaa e suɔ wɔ. Ke e he hia kaa e tsɔse wɔ ɔ, e peeɔ jã, nɛ ke e he hia kaa e tsɔse wɔ hu ɔ, e peeɔ jã. (Hebri Bi 12:6) Ngɛ Baiblo ɔ mi ɔ, wa kaneɔ Yehowa sɔmɔli anɔkualetsɛmɛ nɛ Yehowa tsɔse mɛ nɛ a ba a je mi saminya a, a he ní. Kaa nɔ hyɛmi nɔ́ ɔ, Yosef, Mose, kɛ David kɛ si himihi nɛ a mi wa kpe. Benɛ a ngɛ si himi kaa jã mi ɔ, Yehowa si we mɛ. Níhi nɛ a kase ngɛ kahi nɛ a kɛ kpe ɔ mi ɔ ye bua mɛ benɛ Yehowa ngɔ blɔ nya ní tsumi nguahi kɛ wo a dɛ ɔ. Baiblo ɔ tsɔɔ blɔhi a nɔ nɛ Yehowa guu kɛ yeɔ bua e we bi nɛ e tsɔseɔ mɛ. Ke wa kane enɛ ɔmɛ a he ní ɔ, wa naa kaa Yehowa suɔ wɔ nitsɛnitsɛ.—Kane Abɛ 3:11, 12.

14. Ke wa tɔ̃ ɔ, mɛni Yehowa peeɔ kɛ tsɔɔ kaa e suɔ wɔ?

¹⁴ Ke wa tɔ̃ po ɔ, Yehowa yaa nɔ nɛ e jeɔ suɔmi kpo ha wɔ. Ke wa kplɛɛ nɛ Yehowa tsɔse ɔ nɛ wa tsake wa tsui ɔ, e kɛ wa yayamihi maa ‘pa wɔ.’ (Yesaya 55:7) Mɛni enɛ ɔ tsɔɔ? David tsɔɔ kaa Yehowa ngɔɔ tɔmihi kɛ paa. Munyu nɛ ɔ nɛ e tu ɔ ha nɛ wa na kaa Yehowa ji Tsɛ nɛ naa nɔ mɔbɔ. E de ke: “E kɛ ye he yayamihi tsuo paa mi, nɛ e tsaa ye he hiɔhi tsuo. E heɔ ye yi wami, konɛ ye hɛ mi ko kpata. E jeɔ e suɔmi ɔ kpo kɛ tsɔɔ mi, nɛ e naa mi mɔbɔ daa. E jeɔ wa he yayami ɔmɛ kɛ yaa tsitsaa lokoo kaa bɔ nɛ beleku kɛ bonyoku a kpɛti blɔ kɛ ɔ.” (La 103:3, 4, 12) Yehowa guɔ blɔ slɔɔtohi a nɔ kɛ tsɔseɔ wɔ nɛ e tsɔɔ wɔ blɔ. Ke Yehowa tsɔse mo aloo e tsɔɔ mo blɔ ɔ, anɛ o kɛ oya yemi peeɔ tsakemi lo? Be tsuaa be ɔ, mo kai kaa suɔmi nɛ Yehowa ngɛ kɛ ha wɔ ɔ he je nɛ e tsɔseɔ wɔ ɔ nɛ.—La 30:5.

15. Mɛni blɔ kpa ko hu nɔ Yehowa guɔ kɛ tsɔɔ kaa e suɔ wɔ?

¹⁵ Tsɛ nɛ ngɛ suɔmi ɔ poɔ e bimɛ a he piɛ konɛ nɔ́ ko nɛ ko ye mɛ awi. Jã pɛpɛɛpɛ nɛ wa Tsɛ Yehowa hu peeɔ. La polɔ ɔ tu munyu nɛ nyɛɛ se nɛ ɔ ngɛ Yehowa he. E de ke: “E baa e ni klɔuklɔu ɔmɛ a yi, nɛ e jeɔ mɛ kɛ jeɔ yiwutsotsɛmɛ a dɛ mi.” (La 97:10) Mo susu he nɛ o hyɛ: Kaa bɔ nɛ o hɛngmɛ he jua wa ha mo nɛ o yeɔ oya kɛ poɔ he piɛ ɔ, jã kɛ̃ nɛ Yehowa hu yeɔ oya kɛ poɔ e we bi a he piɛ, ejakaa a he jua wa ha lɛ.—Kane Zakaria 2:8.

16, 17. Kɛ je blema hluu kɛ ba si mwɔnɛ ɔ, mɛni blɔ nɔ Yehowa guɔ kɛ poɔ e we bi a he piɛ?

¹⁶ Kɛ je blema hluu kɛ ba si mwɔnɛ ɔ, Yehowa guɔ e bɔfo ɔmɛ a nɔ kɛ poɔ e we bi a he piɛ. (La 91:11) Bɔfo kake pɛ gbe Asiria ta buli 185,000 ngɛ nyɔ kake pɛ mi kɛ he Mawu we bi a yi wami. (2 Matsɛmɛ 19:35) Ngɛ kaseli ɔmɛ a be ɔ mi ɔ,  bɔfohi ya je Petro, Paulo, kɛ ni kpahi kɛ je tsu womi mi. (Bɔfo Ɔmɛ A Ní Tsumi 5:18-20; 12:6-11) Lingmi nɛ ɔ, a hwu ta ngua ko ngɛ Afrika ma ko nɔ. Ma a mi pee basabasa akɛnɛ nihi ngɛ kunɔ nɔe, nɛ nihi ngɛ jue, nɛ a ngɛ nihi abonua tuae, nɛ a ngɛ nihi gbee ɔ he je. E ngɛ mi kaa nyɛmimɛ ɔmɛ a ti nɔ ko gbo we mohu lɛɛ, se a ti nihi fuu a nihi a hɛ mi kpata. Se mɛ tsuo a na kaa Yehowa suɔ mɛ, nɛ e ngɛ a nɔ hyɛe. A na nɔ́ mohu lɛɛ, se a ngɛ bua jɔmi. Benɛ asafo ɔ ní tsumi yi ɔ nane mi dalɔ ko ya slaa nyɛmimɛ nɛ ɔmɛ nɛ e bi mɛ bɔ nɛ níhi ngɛ nɛ nɔ yae ha a, a de lɛ ke, “Nɔ́ tsuaa nɔ́ ngɛ nɔ yae saminya, wa naa Yehowa si!”

¹⁷ Ngɛ anɔkuale mi ɔ, Yehowa sɔmɔli komɛ kaa kaselɔ Stefano kɛ ni kpahi gbo ngɛ a we anɔkuale yemi ɔ he je. Tsa pi be fɛɛ be nɛ Yehowa tsiɔ si himihi kaa jã a nya. Se e buɔ e we bi a he kaa kuu, nɛ e bɔɔ mɛ kɔkɔ ngɛ níhi nɛ Satan bɔɔ mɔde kaa e ma kɛ sisi mɛ ɔ a he. (Efeso Bi 6:10-12) Wa kaneɔ kɔkɔ bɔmi nɛ ɔmɛ ngɛ Baiblo ɔ kɛ womihi nɛ Yehowa asafo ɔ pee ɔ a mi. Kaa nɔ hyɛmi nɔ́ ɔ, wa kase haomihi nɛ waa kɛ ma nyɛ maa kpe ngɛ bɔ nɛ waa kɛ Intanɛti ɔ tsuɔ ní ha, sika suɔmi, sinihi, womihi, fiɛmihi nɛ je mi bami yaya kɛ yi wu tso ní peepeehi ngɛ mi ɔ a he. E ngɛ heii kaa Yehowa suɔ wɔ, nɛ e suɔ kaa e maa po wa he piɛ.

18. Ke o susu suɔmi nɛ Yehowa ngɛ kɛ ha mo ɔ he ɔ, kɛ e peeɔ mo kɛɛ?

¹⁸ Benɛ Mose susu jeha abɔ nɛ e kɛ sɔmɔ Yehowa a he ɔ, e ná nɔ mi mami kaa Yehowa suɔ lɛ. Mose de ke: “Naa wɔ mɔbɔ daa mɔtu, konɛ wa ná bua jɔmi wa wami be ɔ tsuo.” (La 90:14) E ji jɔɔmi kaa wa nyɛ nɛ wa le kaa Yehowa ngɛ suɔmi, nɛ wa na hu kaa e suɔ wɔ. E ji he blɔ ngua nɛ wa ná kaa Yehowa suɔ wɔ! Wa nuɔ he kaa bɔ nɛ bɔfo Yohane nu he ɔ. E de ke: ‘Nyɛɛ hyɛ suɔmi sɔuu nɛ Tsɛ ɔ ngɛ kɛ ha wɔ!’—1 Yohane 3:1.