Gbami 6. Je Kɛ Wɛ Fiɛɛmi Ní Tsumi ɔ
Gbami 6. Je Kɛ Wɛ Fiɛɛmi Ní Tsumi ɔ
‘A maa fiɛɛ sane kpakpa nɛ ɔ nɛ kɔɔ matsɛ yemi ɔ he ɔ ngɛ zugba a nɔ hehi tsuo nɛ nimli ngɛ ɔ.’—MATEO 24:14.
● Vaiatea ngɛ Pacific zugba kpɔhi nɛ wo bɔle mɛ ngɛ Tuamotu Archipelago ɔ eko nɔ. Nimli bɔɔ ko nɛ a yibɔ maa su 16,000 lɛ a ngɛ zugba kpɔ nɛ ɔ nɔ. Se kɛ̃ ɔ, Yehowa Odasefohi ya slaa Vaiatea kɛ nihi nɛ a ngɛ e kpɔ ɔ mi ɔ. Mɛni he je? Ejakaa Odasefohi suɔ nɛ a fiɛɛ sane kpakpa nɛ kɔɔ Mawu Matsɛ Yemi ɔ he ɔ kɛ ha nihi tsuo ngɛ he fɛɛ he.
MƐNI LƐ AMANIƐ BƆMI TSƆƆ? A ngɛ sane kpakpa a fiɛɛe ngɛ je kɛ wɛ. Ngɛ jeha 2010 a mi pɛ ɔ, Yehowa Odasefohi ngɔ ngmlɛfia nɛ hiɛ pe ayɔ akpe kake kɛ e nya ayɔ ekpa kɛ fiɛɛ sane kpakpa a ngɛ mahi 236 mi. Enɛ ɔ tsɔɔ kaa ke a gba to kpa he ɔ, Odasefo no fɛɛ Odasefo no ngɔɔ hɛngmɛfia 30 kɛ fiɛɛɔ sane kpakpa a daa ligbi. Ngɛ jeha 10 nɛ be ɔ mi ɔ, a pee womihi nɛ a kɛ kaseɔ Baiblo ɔ nɛ́ hiɛ pe ayɔ akpe 20, nɛ a gba kɛ ha nihi.
NÍ KOMƐ NƐ NIHI DEƆ? A bɔni sane kpakpa nɛ ɔ fiɛɛmi jeha akpehi abɔ ji nɛ ɔ.
ANƐ NƆ́ NƐ A DEƆ Ɔ JI ANƆKUALE LO? E ji anɔkuale kaa nihi fiɛɛɔ Baiblo ɔ mi munyu ɔ be komɛ. Se behi fuu ɔ, a peeɔ jã be kpiti ko, ngɛ mahi bɔɔ komɛ pɛ a nɔ. Se Yehowa Odasefo ɔmɛ lɛɛ, a to a he blɔ nya saminya nɛ a ngɛ sane kpakpa nɛ ɔ fiɛɛe ha nihi ayɔ lafahi abɔ ngɛ je kɛ wɛ. E ngɛ mi kaa blɔ nya tomi komɛ kɛ ni komɛ hu nɛ a hɛɛ blɔ nya nɛ́ a yi mi wa a ngɛ si tee kɛ ngɛ Yehowa Odasefo ɔmɛ woe mohu lɛɛ, se loloolo ɔ, a ngɛ sane kpakpa a fiɛɛe. * (Maako 13:13) Ngɛ anɔkuale mi ɔ, a wui Yehowa Odasefohi hiɔ ngɛ fiɛɛmi ní tsumi nɛ a ngɛ tsue ɔ he. Mohu ɔ, a ngɔɔ a be kɛ sãa afɔle, nɛ a kɛ a womi ɔmɛ hu haa faa nɛ a he we sika. Nihi jeɔ a tsui mi nɛ a haa nɔ́ ko kɛ fĩɔ ní tsumi nɛ a ngɛ tsue ɔ se.
KƐ O SUSU KƐƐ? Anɛ a ngɛ ‘sane kpakpa nɛ kɔɔ Matsɛ Yemi ɔ he ɔ’ fiɛɛe ngɛ je kɛ wɛ lo? Anɛ gbami nɛ ɔ nɛ ngɛ mi bae ɔ tsɔɔ kaa e be kɛe nɛ nɔ́ kpakpa ko maa ya nɔ lo?
[Sisi ningma]
^ kk. 6 Ke o suɔ nɛ o le babauu ɔ, hyɛ videohi etɛ nɛ ji “Faithful Under Trials,” “Purple Triangles,” kɛ “Jehovah’s Witnesses Stand Firm Against Nazi Assault,” nɛ Yehowa Odasefohi pee ɔ.
[Munyu nɛ a ma nɔ mi]
“Si abɔ nɛ Yehowa ngmɛ blɔ nɛ ɔ, wa maa ya nɔ maa gu blɔ fɛɛ blɔ nɛ wa ma nyɛ nɔ kɛ fiɛɛ sane kpakpa a kɛ ha nihi.”—2010 YEARBOOK OF JEHOVAH’S WITNESSES.