1-3. (a) Mɛni nɔ hyɛmi nɔ́ kpakpa Yoshua pee kɛ ha wɔ? (b) Ke e he hia kaa waa mwɔ wa yi mi kpɔ ngɛ nɔ́ ko he ɔ, mɛni e sa nɛ e hi wa juɛmi mi?

MUNYUNGU nɛ ji “tsɔɔ” aloo hla a hɛɛ sisi numi nɛ mi kuɔ. Nɔ́ nɛ nɔ ko maa hla kaa e maa pee ɔ lɛ tsɔɔ bɔnɛ nɔ ɔ suɔ kaa e ba e je mi ha. Moo ngɔ lɛ kaa nɔ ko ngɛ blɔ ko nɔ nyɛɛe nɛ e ya su blɔ gbla ko nya. Jije e maa gu? Atsinyɛ jemi ko be he kaa e maa gu blɔ nɛ yaa he nɛ e yaa a, se pi blɔ nɛ yaa he kpa ko.

² Baiblo ɔ tu nihi fuu nɛ a kɛ si himi ko kaa kikɛ ɔ kpe ɔ a he munyu. Kaa nɔ hyɛmi nɔ́ ɔ, e sa nɛ Kain nɛ hla kaa e maa ye e we abofu ɔ nɔ aloo e maa da e we abofu ɔ nɔ kɛ pee níhi. (1 Mose 4:6, 7) E he ba hia nɛ Yoshua nɛ hla kaa e ma sɔmɔ anɔkuale Mawu ɔ loo e ma ja lakpa mawuhi. (Yosh. 24:15) Oti nɛ Yoshua kɛ ma e hɛ mi ji kaa e maa hi Yehowa kasa nya; enɛ ɔ he ɔ, e hla nɔ́ nɛ ma ha nɛ e maa pee jã. Se Kain lɛɛ nɔ́ nɛ e hla a je lɛ kɛ je Yehowa he.

³ Be komɛ ɔ, e he maa hia kaa wɔ hu waa hla níhi nɛ ma ha nɛ wa maa ya nɔ maa nyɛɛ dami blɔ ɔ nɔ. Ke e ba jã a, e sa nɛ oti nɛ o kɛ ma o hɛ mi kaa o maa wo Yehowa hɛ mi nyami ngɛ nɔ́ tsuaa nɔ́ nɛ o maa pee ɔ mi ɔ nɛ hi o juɛmi mi, nɛ́ o yu o he ngɛ níhi nɛ ma je mo kɛ je Yehowa he ɔ a he. (Kane Hebribi 3:12.) Wa ma susu níhi kpaago nɛ wa peeɔ ngɛ wa si himi nɛ e sɛ nɛ wa ha nɛ a je wɔ kɛ je Yehowa he ɔ a he ngɛ munyu nɛ ɔ kɛ nɔ́ nɛ nyɛɛ se ɔ mi.

4. Mɛni heje nɛ e he hia kaa wa tsu ní ɔ?

⁴ E ji Kristofoli a blɔ nya nítsumi kaa a hyɛ a kɛ a weku mi bimɛ a nɔ. Baiblo ɔ tsɔɔ kaa ke nɔ ko sume kaa e maa hyɛ e we mi bimɛ ɔ, afani nɔ nɛ he we yi ngɛ jamɛatsɛ ɔ he. (2 Tes. 3:10; 1 Tim. 5:8) Enɛ ɔ he ɔ, e he hia nɛ o tsu ní. Se ke o hyɛ we nɛ hi ɔ, lɔɔ ma nyɛ  ma je mo kɛ je Yehowa he. Ngɛ mɛni blɔ nɔ?

5. Ke o ná nítsumi ko nɛ o ma tsu ɔ, mɛni ji ní komɛ nɛ e sa kaa o susu he loko o tsu?

⁵ Moo ngɔ lɛ kaa o ngɛ nítsumi hlae. Ke nítsumi nami yeɔ ngɛ he nɛ o ngɛ ɔ, eko ɔ, e maa pee mo kaa nítsumi saisaa nɛ o nine maa su nɔ ɔ, o ma tsu. Se ke nítsumi ɔ kɛ Baiblo sisi tomi mlaahi kpa we gbi hu nɛɛ? Nɛ ke nítsumi ɔ ngɔɔ o be babauu nɛ o ná we be fuu kɛ tsu Mawu jami mi nítsumihi, loo o ná we be fuu kɛ ha o weku mi bimɛ ɔmɛ hu nɛɛ? Anɛ e sa kaa o kplɛɛ nítsumi ko kaa jã a nɔ kɛ susumi kaa jã a hi pe nɛ o maa hi si nɛ o be nɔ́ ko tsue lo? Mo kai kaa ke o hla blɔ nɛ dɛ ɔ, lɔɔ ma nyɛ ma je mo kɛ je Yehowa he. (Heb. 2:1) Ke o ngɛ nítsumi hlae jio, o ngɛ hlae nɛ o tsake nítsumi nɛ o ngɛ tsue amlɔ nɛ ɔ jio, mɛni blɔ nɔ o maa gu kɛ mwɔ o yi mi kpɔ ngɛ nile mi?

6, 7. (a) Mɛni yi mi tomihi a heje nɛ eko ɔ, nɔ ko ma tsu ní ngɛ? (b) Yi mi tomi nɛ ɔmɛ a kpɛti te nɛ lɛ e ma ha nɛ o hi Yehowa kasa nya, nɛ mɛni heje?

⁶ Kaa bɔnɛ a tsɔɔ kɛ sɛ hlami ɔ, e sa nɛ o kai oti nɛ o kɛ ma o hɛ mi ɔ. Mo bi o he ke, ‘Mɛni se i suɔ nɛ ma ná ngɛ nítsumi nɛ ma tsu ɔ mi?’ Ke mo nitsɛ o he nɛ o maa hyɛ, aloo o weku mi bimɛ a nɔ nɛ o maa hyɛ konɛ a nyɛ nɛ a sɔmɔ Yehowa a ji yi mi tomi heje nɛ o ngɛ ní ɔ tsue ɔ, lɛɛ Yehowa maa jɔɔ o mɔde bɔmi ɔ nɔ. (Mat. 6:33) Ke o nítsumi puɛ tlukaa, aloo si himi ɔ mi wa ha mo ɔ, Yehowa le blɔ nɔ nɛ e maa gu kɛ ye bua mo. (Yes. 59:1) E “le bɔnɛ e peeɔ nɛ e jeɔ nihi nɛ peeɔ nɔ́ nɛ da kɛ jeɔ ka mi.”—2 Pet. 2:9.

⁷ Nɛ ke yi mi tomi titli heje nɛ o ngɛ ní tsue ɔ ji nɛ o ná sika babauu hu nɛɛ? Eko ɔ, o ma nyɛ ma ná sika fuu. Se ke sika babauu nɛ o ma ná a pɛ heje nɛ o ngɛ ní tsue ngɛ ɔ, lɛɛ oslaa ngɛ he. (Kane 1 Timoteo 6:9, 10.) Ke o kɛ o juɛmi ma sika kɛ nítsumi nɔ tsɔ ɔ, lɔɔ ma je mo kɛ je Yehowa he.

8, 9. Mɛni sane bimihi e sa kaa fɔli nɛ bi a he kɛ kɔ a nítsumi he, nɛ mɛni heje?

⁸ Ke o ji fɔlɔ ɔ, mo susu nɔ́ nɛ o bimɛ ɔmɛ maa kase kɛ je o ngɔ ɔ he. Mɛni lɛ o bimɛ ɔmɛ naa kaa e he hia mo pe kulaa? O nítsumi, aloo huɛ bɔmi nɛ ngɛ o kɛ Yehowa nyɛ kpɛti ɔ? Ke a na kaa nɔ́ nɛ he hia mo pe kulaa ji blɔ nya nami, biɛ hemi, kɛ ní nami ɔ, anɛ o susuu we kaa ke a wa a, mɛ hu a maa nyɛɛ jamɛ a blɔ yaya a nɔ lo? Anɛ bumi nɛ a ngɛ kɛ ha mo kaa fɔlɔ ɔ nɔ ma gbɔ lo? Kristofono wayoo ko de ke: “Benɛ ye hɛ mi maa tɛ̃ ɔ, nítsumi nɔ pɛ nɛ ye papaa ngɛ. Sisije ɔ, e ngɛ kaa nɔ́ nɛ e tsuɔ ní wawɛɛ konɛ e nyɛ nɛ e ha weku ɔ ní kpakpahi. E suɔ nɛ e hyɛ wa nɔ saminya. Se lingmi nɛ ɔ, níhi tsake. E tsuɔ ní wawɛɛ nɛ e ngɔɔ níhi nɛ a he jua wa nɛ a he hia we weku ɔ kɛ baa we mi. Enɛ ɔ ha nɛ nihi le wɔ kaa weku nɛ e ngɛ sika, se pi weku ko nɛ e woɔ nihi he wami konɛ a ya a hɛ mi ngɛ Mawu jami mi. Ye bua maa jɔ ke ye papaa maa ye bua wɔ nɛ huɛ bɔmi gbagbanii nɛ hi waa kɛ Yehowa wa kpɛti mohu pe nɛ e ma tsu ní wawɛɛ konɛ e ná sika fuu.”

⁹ Fɔli, nyɛ ko ngɔ nyɛ juɛmi kɛ ma nítsumi nɔ tsɔ nɛ́ lɔɔ nɛ ba je nyɛ kɛ je Yehowa he. Nyɛɛ pee nɔ hyɛmi nɔ́ kpakpa kɛ ha nyɛ bimɛ ɔmɛ konɛ a na kaa ní nami nɛ pe kulaa ji huɛ bɔmi kpakpa nɛ maa hi waa kɛ Yehowa wa kpɛti, se pi helo nya níhi a nya nɛ wa ma bua.—Mat. 5:3.

10. Loko niheyo loo zangmayo ko maa hla nítsumi nɛ e ma tsu ɔ, mɛni he e sa kaa e susu?

¹⁰ Ke o ji niheyo aloo zangmayo nɛ o ngɛ nítsumi nɛ o ma tsu hwɔɔ se he susue ɔ, kɛ o ma plɛ kɛ pee juɛmi nɛ da kɛɛ? Kaa bɔnɛ wa susu he kɛ sɛ hlami ɔ, e sa nɛ o le oti nɛ o kɛ ma o hɛ mi ɔ. Ke o ngɛ nítsumi nɛ o maa kase konɛ o tsu ɔ he susue ɔ, moo hyɛ kaa anɛ jamɛ a nítsumi ɔ maa ye bua mo konɛ o ngɔ Yehowa sɔmɔmi kɛ pee nɔ́ titli ngɛ o si himi mi lo, aloo  e ma je mo kɛ je Yehowa he? (2 Tim. 4:10) Anɛ o suɔ kaa o maa pee kaa nihi nɛ a ngɛ je ɔ mi nɛ́ ke a ná sika fuu loko a náa bua jɔmi ɔ lo? Aloo o kɛ o hɛ maa fɔ Yehowa nɔ kaa bɔnɛ David pee ɔ lo? E de ke: ‘Kɛ je ye nihe be mi kɛ ba si ye wami si nɛ ɔ, i nɛ kaa Yehowa kua nɔ ko nɛ peeɔ nɔ́ nɛ da. E bimɛ hu, i nɛ kaa a ngɛ ní bae.’ (La 37:25) Mo kai kaa blɔ ɔ kake ma je mo kɛ je Yehowa he, nɛ kake hu ma ha nɛ o ná si himi kpakpa. (Kane Abɛ 10:22; Malaki 3:10.) Blɔ ɔ te nɛ nɔ nɛ o maa gu? *

11. Mɛni Baiblo ɔ de ngɛ fiɛmi kɛ hɛja jemi he, se mɛni e sa kaa wa ha nɛ e hi wa juɛmi mi?

¹¹ Baiblo ɔ de we ke wa ko je wa hɛja, nɛ e tsɔɔ we hu kaa e ji be puɛmi kaa wa ma fiɛ aloo wa ma je wa hɛja. Paulo ngma womi ya ha Timoteo nɛ e de lɛ ke: “Nɔmlɔtso ɔ he mi kami ɔ, se nami bɔɔ kɛkɛ lɛ ngɛ he.” (1 Tim. 4:8) Baiblo ɔ de hu kaa “muɔmi be ngɛ” nɛ “domi be ngɛ,” nɛ e woɔ wɔ he wami konɛ waa jɔɔ wa he bɔnɛ sa. (Fiɛlɔ 3:4; 4:6) Ke o hyɛ we nɛ hi ɔ, fiɛmi kɛ hɛja jemi ma nyɛ ma je mo kɛ je Yehowa he. Ngɛ mɛni blɔ nɔ? Kɛ gu fiɛmi kɛ hɛja jemi yaya nɛ o maa hla kɛ be fuu nɛ o ma puɛ ngɛ he ɔ nɔ.

12. Ke o ngɛ níhi nɛ o kɛ ma je o hɛja hlae ɔ, mɛni he e sa kaa o susu?

¹² Kekleekle ɔ, e sa nɛ wa susu fiɛmi kɛ hɛja jemi nɛ wa maa hla a he. Mo ná nɔ mi mami kaa o ma nyɛ maa na ní kpakpahi nɛ o kɛ ma je o hɛja. Se níhi babauu nɛ́ nihi kɛ jeɔ a hɛja ngɛ je ɔ mi ɔ ji níhi nɛ Mawu sume. Ní ɔmɛ ekomɛ ji yi mi wami, mumihi a tsɛmi, kɛ ajuama bɔmi ní peepeehi. Enɛ ɔ he ɔ, e sa nɛ o hyɛ níhi nɛ o kɛ jeɔ o hɛja a saminya. Mɛni he wami níhi nɛ o kɛ jeɔ o hɛja a náa ngɛ o nɔ? Anɛ e haa nɛ o kɛ o he woɔ yi mi wami ní peemihi a mi, aloo e woɔ mo he wami konɛ o kɛ nihi nɛ si koli, aloo e haa nɛ o kɛ o he woɔ ma he suɔmi ní peepeehi a mi lo? (Abɛ 3:31) Anɛ e haa nɛ o puɛɔ sika fuu lo? Anɛ e ma nyɛ maa tɔ̃tɔ̃ nihi a nane lo? (Rom. 14:21) Mɛnɔmɛ nɛ o kɛ bɔɔ ngɛ fiɛmi kɛ hɛja jemi nɛ o hla a heje? (Abɛ 13:20) Anɛ e tsitsɛɛ o kuɛ se mi konɛ o ya pee nɔ́ ko nɛ dɛ lo?—Yak. 1:14, 15.

13, 14. Mɛni heje nɛ e sa kaa o susu be abɔ nɛ o puɛɔ ngɛ fiɛmi kɛ hɛja jemi he ɔ he?

 ¹³ Mo susu be abɔ nɛ o puɛɔ ngɛ fiɛmi kɛ hɛja jemi he ɔ hu he. Mo bi o he ke, ‘Anɛ i puɛɔ be babauu kɛ jeɔ ye hɛja nɛ enɛ ɔ he ɔ, be bɔɔ ko pɛ nɛ i náa kɛ tsuɔ Mawu jami mi nítsumihi lo?’ Ke o puɛɔ be babauu tsɔ ngɛ fiɛmi kɛ hɛja jemi he ɔ, o be bua jɔmi náe. Ngɛ anɔkuale mi ɔ, nihi nɛ a puɛ we be fuu ngɛ fiɛmi kɛ hɛja jemi he ɔ mohu nɛ a náa bua jɔmi wawɛɛ. Mɛni heje? Akɛnɛ jamɛatsɛmɛ ɔmɛ le kaa a tsu níhi nɛ a he hia pe kulaa a he ní heje ɔ, ke a ngɛ a he jɔe ɔ, a yi mi kojo we mɛ.—Kane Efesobi 5:10.

¹⁴ E ngɛ mi kaa eko ɔ, e maa pee mo kaa ke o puɛ be fuu ngɛ fiɛmi kɛ hɛja jemi he ɔ o ma ná bua jɔmi mohu lɛɛ, se lɔɔ ma nyɛ ma je mo kɛ je Yehowa he. Nyɛmiyo ko nɛ a tsɛɛ lɛ ke Kim nɛ e ye jeha 20 ɔ ná enɛ ɔ he níhi a si kpami. E de ke, “Be ko nɛ be ɔ, i yaa okplɔɔ ngmɛmihi tsuo a sisi. Daa Soha, Hɔ, kɛ Hɔgba a, nɔ́ ngua ko yaa nɔ. Amlɔ nɛ ɔ, i na kaa níhi fuu ngɛ nɛ a he hia nɛ e sa kaa ma pee. Kaa nɔ hyɛmi nɔ́ ɔ, akɛnɛ i ji blɔ gbalɔ heje ɔ, i yaa fiɛɛmi mɔtu ngmlɛ ekpa, enɛ ɔ he ɔ, i be nyɛe nɛ ma hi he nya buamihi a sisi kɛ ya si makɛ ngmlɛ kake loo enyɔ. I le kaa tɔmi ko be hɛja jemi he mohu lɛɛ, se e ma nyɛ ma je nɔ juɛmi kɛ je níhi nɛ a he hia a nɔ wawɛɛ. E sɛ nɛ wa puɛ be babauu tsɔ ngɛ fiɛmi kɛ hɛja jemi he.”

15. Mɛni fɔli ma nyɛ maa pee kɛ ye bua a bimɛ konɛ a hla fiɛmi kɛ hɛja jemi kpakpa?

¹⁵ E ji fɔli a blɔ nya nítsumi kaa a ma ha a weku mi bimɛ ɔmɛ níhi nɛ hia mɛ ngɛ helo nya, kɛ Mawu jami mi, kɛ níhi nɛ ma ha nɛ a ma ná bua jɔmi. Enɛ ɔ tsɔɔ kaa e sa nɛ a je a hɛja. Ke o ji fɔlɔ ɔ, ko susu kaa fiɛmi kɛ hɛja jemihi tsuo hí. Se moo hyɛ nɛ o bimɛ ɔmɛ nɛ a ko ngɔ a he kɛ wo hɛja jemihi nɛ ma puɛ mɛ ɔ a mi. (1 Kor. 5:6) Ke o susu níhi a he saminya a, o ma nyɛ maa na fiɛmi kɛ hɛja jemi nɛ ma ha nɛ o weku ɔ ma ná bua jɔmi nitsɛnitsɛ. * Ke o pee jã a, o kɛ o weku ɔ maa nyɛɛ blɔ nɛ ma ha nɛ nyɛɛ hi Yehowa kasa nya a nɔ.

16, 17. Mɛni aywilɛho si himi nɛ fɔli babauu kɛ kpe, nɛ kɛ wa plɛ kɛ le kaa Yehowa le si himi mi nɛ a ngɛ ɔ ha kɛɛ?

¹⁶ Suɔmi nɛ ngɛ fɔlɔ kɛ e bi a kpɛti ɔ mi wa wawɛɛ, enɛ ɔ he ɔ, Yehowa ngɔ suɔmi nɛ ɔ kɛ to suɔmi nɛ e ngɛ kɛ ha e webi ɔ he. (Yes. 49:15) Lɔɔ he ɔ, ke nɔ ko weku no ko kpa Yehowa sɔmɔmi ɔ, tɔmi ko be he kaa nɔ ɔ maa ye aywilɛho. Nyɛmiyo ko nɛ a fiee e biyo ngɛ asafo ɔ mi ɔ de ke: “I hao wawɛɛ. I bi ye he ke, ‘Mɛni heje nɛ ye bi ɔ kpa Yehowa sɔmɔmi ɔ?’ I nu he kaa i ye fɔ, nɛ i pia ye he.”

¹⁷ Ke o ngɛ si himi ko kaa jã a mi ɔ, Yehowa le. Benɛ Adam, kɛ lɔɔ se ɔ, nihi nɛ a hi si loko Nyu Afua a ba a tsɔ e hɛ mi atua a, “e dɔ lɛ.” (1 Mose 6:5, 6) Eko ɔ, nihi nɛ a fiee we a nɔ ko kɛ ji asafo ɔ mi hyɛ ɔ be lee bɔnɛ ke a fiee nɔ ko bi kɛ je asafo ɔ mi nɛ e dɔɔ nɔ ha. Se nile be mi kaa o ma ha nɛ nɔ́ yaya nɛ o weku no ɔ pee nɛ lɔɔ he ɔ, a fiee lɛ ngɛ asafo ɔ mi ɔ nɛ je mo kɛ je Yehowa he. Ke jã a, lɛɛ kɛ o ma plɛ kɛ da aywilɛho nɛ a yeɔ ke weku nɔ ko kpa Yehowa sɔmɔmi ɔ nya kɛɛ?

18. Mɛni heje nɛ e sɛ nɛ fɔli nɛ pia a he ke a bi ko kpa Yehowa sɔmɔmi ɔ?

¹⁸ Ko pia o he ngɛ nɔ́ nɛ ba a he. Weku mi bimɛ ɔmɛ a ti nɔ tsuaa nɔ nɛ e jɔɔ e he nɔ ha Yehowa nɛ a baptisi lɛ ɔ “maa tloo lɛ nitsɛ e tlomi,” nɛ e maa hla kaa e ma sɔmɔ Yehowa aloo e be lɛ sɔmɔe. (Gal. 6:5) Yehowa buɔ yayami peelɔ ɔ kaa lɛ ji nɔ nɛ maa bu nɔ́ nɛ e pee ɔ he akɔtaa kɛ ha lɛ Yehowa, se pi mo. (Eze. 18:20) Jehanɛ se hu ɔ, ko pia ni kpahi. Moo  kplɛɛ tsɔsemi nɛ Yehowa to blɔ nya nɛ a kɛ haa nihi nɛ a tɔ̃ɔ ɔ nɔ. Ko pia asafo mi nikɔtɔma amɛ nɛ a ngɛ asafo ɔ he bue ɔ, mohu ɔ, moo tsi Abosiami blɔ.—1 Pet. 5:8, 9.

19, 20. (a) Mɛni blɔ nɔ fɔli nɛ a fiee a bi ko ngɛ asafo ɔ mi ɔ maa gu kɛ da aywilɛho ɔ nya? (b) Mɛni hɛ kɛ nɔ fɔmi lɛ e sa nɛ fɔli nɛ a ngɛ si himi kaa jã a mi ɔ nɛ a ná?

¹⁹ Ke o ná Yehowa he abofu ngɛ nɔ́ nɛ o bi ɔ pee ɔ he ɔ, lɔɔ ma ha nɛ mo nitsɛ o ma je o he kɛ je Yehowa he. Ngɛ anɔkuale mi ɔ, e sa nɛ o weku no nɛ o suɔ lɛ wawɛɛ ɔ nɛ le kaa o mwɔ o yi mi kpɔ kaa o maa suɔ Yehowa pe o weku mi bimɛ ɔmɛ po. Enɛ ɔ he ɔ, bɔnɛ pee nɛ o nyɛ nɛ o da si himi ko kaa jã a nya a, mo ha nɛ huɛ bɔmi kpakpa nɛ hi o kɛ Yehowa nyɛ kpɛti. Ko je o he ngɛ o nyɛmimɛ Kristofoli nyumuhi kɛ yihi anɔkualetsɛmɛ ɔmɛ a he. (Abɛ 18:1) Moo sɔle nɛ o de Yehowa níhi nɛ ngɛ mo haoe. (La 62:7, 8) Koo ngɔ níhi kɛ je o nya nɛ́ o kɛ o weku no nɛ a fiee lɛ ngɛ asafo ɔ mi ɔ nɛ hi ní sɛɛe ngɛ tɛlifoo aloo Internet nɔ. (1 Kor. 5:11) O kɛ o he nɛ wo Mawu jami mi nítsumihi a mi wawɛɛ. (1 Kor. 15:58) Nyɛmiyo ɔ nɛ a wo e ta kɛ sɛ hlami ɔ de ke, “I le kaa e sa nɛ ma pee babauu ngɛ Yehowa sɔmɔmi mi, nɛ́ ma ha nɛ huɛ bɔmi kpakpa nɛ hi i kɛ Mawu wa kpɛti konɛ ke ye biyo ɔ kpale ba ngɛ Yehowa sɔmɔe ɔ, ma nyɛ nɛ ma ye bua lɛ.”

²⁰ Baiblo ɔ de ke suɔmi “haa nɔ heɔ nɔ́ tsuaa nɔ́ yeɔ.” (1 Kor. 13:4, 7) Tɔmi ko be he kaa o ma ná hɛ kɛ nɔ fɔmi kaa o suɔlɔ ɔ maa kpale kɛ ba Yehowa ngɔ. Daa jeha a, yayami peeli fuu piaa a he nɛ a kpaleɔ kɛ baa Yehowa asafo ɔ mi. Ke a pia a he ɔ, Yehowa mi mi fu we mɛ hu. Mohu ɔ, e pee klaalo kaa e kɛ ‘a yayami ɔ maa pa mɛ.’—La 86:5.

21, 22. Mɛni o mwɔ o yi mi kaa o maa pee ngɛ o si himi mi?

²¹ Yehowa ha adesahi he blɔ konɛ mɛ nitsɛmɛ nɛ a hla níhi nɛ a maa pee ngɛ a si himi mi. (Kane 5 Mose 30:19, 20.) Se enɛ ɔ tsɔɔ kaa e sa nɛ waa hla nɔ́ kpakpa. E sa nɛ Kristofono tsua Kristofono nɛ bi e he ke: ‘Anɛ níhi nɛ i hla a ha nɛ i ngɛ blɔ nɛ da a nɔ nyɛɛe lo? Anɛ i ngmɛ blɔ nɛ nítsumi, fiɛmi kɛ hɛja jemi, loo ye wekuli je mi kɛ je Yehowa he lo?’

²² Suɔmi nɛ Yehowa ngɛ kɛ ha e webi ɔ se pui gblegbleegble. Ja wa pee nɔ́ ko nɛ dɛ loko lɔɔ ma ha nɛ wa maa je Yehowa he. (Rom. 8:38, 39) Se e sɛ nɛ waa ngmɛ blɔ nɛ nɔ́ ko kaa jã nɛ ba! Moo mwɔ o yi mi kpɔ kaa o be hae nɛ nɔ́ ko nɛ je mo kɛ je Yehowa he. Wa ma susu níhi eywiɛ nɛ maa ye bua wɔ konɛ waa mwɔ wa yi mi kpɔ kaa wa be hae nɛ nɔ́ ko nɛ je wɔ kɛ je Yehowa he ɔ a he ngɛ munyu nɛ nyɛɛ se nɛ wa maa kase ɔ mi.