1. Mɛni munyuhi nɛ Mawu webi pɔɔ a he ní kasemi, nɛ mɛni blɔ nɔ wa náa munyu nɛ ɔmɛ a mi nɛ wa nylɔɔ ɔ he se ngɛ?

‘WA KASE munyu nɛ ɔ hyɛ.’ Anɛ o tu munyu ko kaa kikɛ ɔ hyɛ benɛ o ngɛ o he dlae kɛ ha Hwɔɔmi Mɔ Nikasemi ɔ lo? Ke o bɔni Yehowa Odasefoli a kpehi yami be saii ji nɛ ɔ, eko ɔ, o ma yɔse kaa munyu komɛ ngɛ nɛ a pɔɔ a mi timi. Munyu nɛ ɔmɛ ekomɛ kɔɔ Mawu Matsɛ Yemi ɔ, kpɔmi nɔ́ ɔ, fiɛɛmi nítsumi ɔ, kɛ su komɛ kaa suɔmi kɛ hemi kɛ yemi he. Munyu nɛ ɔmɛ a mi nɛ wa nylɔɔ ɔ, haa nɛ wa hemi kɛ yemi ɔ mi waa, nɛ e yeɔ bua wɔ nɛ wa peeɔ ‘munyu ɔ nɔ yeli, se pi munyu ɔ tue buli kɛkɛ.’—Yak. 1:22.

2. (a) Mɛni ji Mawu kaimi munyu ɔmɛ ɔ? (b) Mɛni blɔ nɔ e slo Mawu mlaa amɛ ngɛ adesahi a mlaahi a he ngɛ?

² Behi fuu ɔ, Hebri munyu nɛ a tsɔɔ sisi ke “kaimi munyu” ɔ, kɔɔ mlaahi, famihi, kɛ blɔ tsɔɔmihi nɛ Mawu kɛ haa e webi ɔ a he. Yehowa mlaa amɛ be kaa adesahi a mlaahi. Adesahi a mlaahi hí kɛ pi si, enɛ ɔ he ɔ, a pɔɔ tsakemi peemi ngɛ he. Mawu mlaa amɛ lɛɛ a hi kɛ pi si, nɛ wa náa he se be tsuaa be. Mawu wo e webi mlaa komɛ blema nɛ mwɔnɛ ɔ, e he hia we nɛ Kristofoli nɛ a ye jamɛ a mlaa amɛ a nɔ hu. Se lɔɔ tsɔɔ we kaa tɔmi ngɛ jamɛ a mlaa amɛ a he. La polɔ ɔ de ke: “O mlaa amɛ da kɛ yaa neneene.”—La 119:144.

3, 4. (a) Be komɛ ɔ, mɛni piɛɛ Yehowa kaimi munyu ɔmɛ a he? (b) Ke Israelbi ɔmɛ ye Yehowa mlaa amɛ a nɔ ɔ, mɛni se a náa?

³ Be komɛ ɔ, kɔkɔ bɔmi piɛɛɔ Yehowa kaimi munyu ɔmɛ a he. Mawu guu e gbali ɔmɛ a nɔ kɛ bɔɔ Israelbi ɔmɛ kɔkɔ daa. Kaa nɔ hyɛmi nɔ́ ɔ, benɛ e piɛɛ bɔɔ nɛ Israelbi ɔmɛ maa su Si Womi Zugba a nɔ ɔ, Mose bɔ mɛ kɔkɔ ke: ‘Nyɛɛ hyɛ nɛ e hi kɛkɛ, konɛ a ko mlɔɔ nyɛ kɛ je Yehowa he kɛ ya ja mawu kpahi, nɛ nyɛ sɔmɔ mɛ. Ke nyɛ pee jã a, Yehowa mi mi ma fu nyɛ.’ (5 Mose 11:16, 17) Baiblo ɔ ha nɛ wa na kaa  Mawu wo e webi ɔmɛ mlaahi fuu nɛ ma nyɛ maa ye bua mɛ.

⁴ Behi fuu ɔ, Yehowa woɔ Israelbi ɔmɛ he wami konɛ a ye lɛ gbeye, a bu e gbi tue, nɛ a tsɔ e biɛ ɔ he. (5 Mose 4:29-31; 5:28, 29) Mawu wo mɛ si kaa ke a ye e mlaa amɛ a nɔ ɔ, e maa jɔɔ mɛ babauu.—3 Mose 26:3-6; 5 Mose 28:1-4.

5. Mɛni heje nɛ Yehowa kpata Asiriabi ɔmɛ a hɛ mi ha Matsɛ Hezekia a?

⁵ Ngɛ Israelbi ɔmɛ a yinɔ sane mi tsuo ɔ, Mawu ye si nɛ e wo mɛ ɔ nɔ. Kaa nɔ hyɛmi nɔ́ ɔ, benɛ Asiria matsɛ nɛ ji Matsɛ Senakerib ba tua Yuda nɛ e wo Matsɛ Hezekia he gbeye ɔ, Yehowa tsɔ bɔfo ko nɛ e ba ye bua e webi ɔmɛ. Ngɛ nyɔ kake pɛ mi ɔ, Mawu bɔfo ɔ kpata Asiria “ta buli ɔmɛ” a hɛ mi, nɛ Senakerib kɛ zo kpale kɛ ho e ma mi ya. (2 Kron. 32:21; 2 Ma. 19:35) Mɛni heje nɛ Mawu kpata Asiriabi ɔmɛ a hɛ mi ha Matsɛ Hezekia a? Ejakaa ‘Hezekia ngɔ e he ngɔ fɔ Yehowa nɔ; e ye lɛ anɔkuale, nɛ mlaahi nɛ Yehowa wo Mose ɔ, e ye lɛ tsuo pɛpɛɛpɛ nɔ.’—2 Ma. 18:1, 5, 6.

6. Mɛni Yosia pee kɛ tsɔɔ kaa e ngɛ hɛ kɛ nɔ fɔmi ngɛ Yehowa mi?

⁶ Nɔ kpa ko hu nɛ e ye Yehowa mlaahi a nɔ ji Matsɛ Yosia. ‘E pee Yehowa suɔmi nya ní, nɛ e ye Mawu mlaa amɛ tsuo a nɔ sisiisi’ kɛ je e jokuɛ mi. (2 Kron. 34:1, 2) Yosia tsɔɔ kaa e ngɛ hɛ kɛ nɔ fɔmi ngɛ Yehowa mi nɛ e ywia amagahi nɛ ngɛ ma a mi ɔ tsuo. Enɛ ɔ nɛ Yosia pee ɔ ha nɛ Yehowa jɔɔ e kɛ Israel ma a tsuo.—Kane 2 Kronika 34:31-33.

7. Ke Israelbi ɔmɛ yi Yehowa mlaahi a nɔ ɔ, mɛni jeɔ mi kɛ baa?

⁷ Se aywilɛho sane ji kaa pi be tsuaa be nɛ Yehowa webi yeɔ e mlaahi a nɔ. A gbo Yehowa nɔ tue si abɔ. Ke a hemi kɛ yemi ɔ mi gbɔjɔ ɔ, nihi nyɛɔ sisiɔ mɛ nɛ a ya jaa lakpa mawuhi. (Efe. 4:13, 14) Ke a kɛ a hɛ fɔɛ Mawu nɔ ɔ, a naa nɔ́ kaa bɔnɛ Mawu de to ɔ.—3 Mose 26:23-25; Yer. 5:23-25.

8. Mɛni wa ma nyɛ maa kase ngɛ nɔ́ nɛ Israelbi ɔmɛ pee ɔ mi?

⁸ Mɛni wa ma nyɛ maa kase ngɛ nɔ́ nɛ Israelbi ɔmɛ pee ɔ mi? Kaa bɔnɛ Yehowa wo Israelbi ɔmɛ ga nɛ e tsɔse mɛ ɔ, jã kɛ̃ nɛ e woɔ e webi nɛ a ngɛ mwɔnɛ ɔ hu ga nɛ e tsɔseɔ mɛ. (2 Pet. 1:12) Be tsuaa be nɛ wa maa kane Baiblo ɔ, Mawu kaiɔ wɔ e mlaa amɛ. Akɛnɛ Yehowa bɔ wɔ nɛ wɔ nitsɛmɛ wa nyɛɔ tsɔɔ nɔ́ nɛ wa suɔ kɛ nɔ́ nɛ wa sume heje ɔ, wa ma nyɛ maa hla kaa wa maa bu lɛ tue aloo wa maa pee  wɔ nitsɛmɛ wa tsui nya ní. (Abɛ 14:12) Nyɛ ha nɛ wa susu nɔ́ heje nɛ e sa kaa waa ye Yehowa mlaahi a nɔ, kɛ bɔnɛ wa náa Yehowa mlaahi a he se ha a he nɛ waa hyɛ.

9. Benɛ Israelbi ɔmɛ ngɛ nga a nɔ ɔ, mɛni Yehowa pee kɛ tsɔɔ kaa e piɛɛ a he?

⁹ Benɛ Israelbi ɔmɛ je Egipt nɛ a kɛ jeha 40 maa nyɛɛ “nga kplanaa” a nɔ ɔ, Yehowa tsɔɔ we mɛ blɔ pɔtɛɛ nɛ e maa gu nɔ kɛ kudɔ mɛ, kɛ bu a he, kɛ blɔ pɔtɛɛ nɛ e maa gu nɔ kɛ hyɛ a nɔ. Se kɛ ɔ, e tsɔɔ mɛ si abɔ kaa a ma nyɛ ma ná hɛ kɛ nɔ fɔmi ngɛ e mi konɛ a bu e blɔ tsɔɔmihi tue. Yehowa haa nɛ bɔku nyɛɛɔ Israelbi ɔmɛ a hɛ mi piani, nɛ nyɔ mi lɛɛ e haa nɛ la nɛ ngɛ tsoe nyɛɛɔ a hɛ mi. Yehowa pee jã kɛ tsɔɔ kaa e piɛɛ Israelbi ɔmɛ a he kɛ nyɛɛ blɔ nɛ haomihi fuu ngɛ nɔ ɔ nɔ. (5 Mose 1:19; 2 Mose 40:36-38) Yehowa ha mɛ a hiami níhi tsuo. “A tadehi gba we ngɛ a he, nɛ a nanehi hu fuu we.” Niinɛ, e “ha mɛ nɔ́ tsuaa nɔ́ nɛ he hia mɛ.”—Neh. 9:19-21.

10. Mɛni blɔ nɔ Yehowa guɔ kɛ kudɔɔ e webi mwɔnɛ ɔ?

¹⁰ E be kɛe kulaa nɛ Mawu sɔmɔli nɛ a ngɛ mwɔnɛ ɔ hu maa su je ehe nɛ a peeɔ dami ní ngɛ mi ɔ mi. Anɛ wa ngɛ hɛ kɛ nɔ fɔmi ngɛ Yehowa mi kaa e ma ha wɔ nɔ́ tsuaa nɔ́ nɛ he hia wɔ konɛ wa ná yi baami ngɛ ‘amanehlu ngua’ a nɛ ma a mi lo? (Mat. 24:21, 22; La 119:40, 41) Ngɛ anɔkuale mi ɔ, Yehowa ha we nɛ bɔku ko aloo la ko nɛ ngɛ tsoe nɛ nyɛɛ wa hɛ mi kɛ ya je ehe ɔ mi. Se e ha nɛ e we asafo ɔ ngɛ wɔ ye buae konɛ wa hɛ nɛ hi wa he nɔ. Kaa nɔ hyɛmi nɔ́ ɔ, a woɔ wɔ he wami kaa wa ha nɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa, kɛ gu Baiblo ɔ nɛ waa maa kase, gbɔkuɛ Weku Mawu Jami nɛ wa maa pee, kɛ asafo mi kpehi kɛ fiɛɛmi nɛ wa maa ya a nɔ. Anɛ wa pee tsakemihi ngɛ wa si himi mi konɛ wa nyɛ nɛ waa kɛ blɔ tsɔɔmi nɛ ɔmɛ nɛ tsu ní lo? Ke wa pee jã a, lɔɔ maa ye bua wɔ nɛ wa ma ná hemi kɛ yemi nɛ mi wa nɛ ma ha nɛ a baa wa yi kɛ sɛ Mawu je ehe ɔ mi.

11. Mɛni blɔhi a nɔ nɛ Yehowa tsɔɔ kaa e susuɔ wa he ngɛ?

¹¹ Jehanɛ se hu ɔ, Yehowa we asafo ɔ yeɔ bua wɔ nɛ wa mwɔɔ wa yi kpɔ ngɛ nile mi ngɛ wa daa ligbi si himi mi. Kaa nɔ hyɛmi nɔ́ ɔ, a woɔ wɔ he wami konɛ wa ko ha nɛ helo nya níhi nɛ a tsi wa Mawu jami nya konɛ waa pee wa si himi hlɛhlɛɛhlɛ, nɛ́ wa ko pee yeyeeye tsɔ ngɛ si himi mi. Jehanɛ se hu ɔ, a ha wɔ blɔ tsɔɔmihi nɛ kɔɔ he dlami kɛ tade womi, hɛja jemi nɛ e sa kaa waa hla, kɛ sukuu yami kɛ ya tsitsaa he. Mo susu gahi nɛ a wo wɔ kɛ kɔ bɔnɛ e sa kaa waa hyɛ wa wehi, wa lɔlehi, wa Matsɛ Yemi Asahi, kɛ bɔnɛ e sa kaa wa dla wa he kɛ to oslaahi nɛ ma nyɛ maa ba a he ha a he nɛ o hyɛ. Ga womi nɛ ɔmɛ tsɔɔ kaa Yehowa susuɔ wa he nɛ e suɔ kaa e hi ha wɔ.

12. (a) Mɛni he munyu nɛ Yesu tu si abɔ kɛ tsɔɔ e kaseli ɔmɛ? (b) Mɛni he si bami su nɛ Yesu je kpo nɛ e tlɔ Petro juɛmi mi, nɛ mɛni e sa kaa waa kase ngɛ mi?

¹² A kɛ blɔ tsɔɔmi haa Mawu webi nɛ a hi si ngɛ kaseli ɔmɛ a be ɔ mi ɔ daa. Yesu de e kaseli ɔmɛ si abɔ kaa e he hia nɛ a ba a he si. E tsɔɔ we e kaseli ɔmɛ kɛkɛ kaa a ba a he si, mohu ɔ, e pee he si bami he nɔ hyɛmi nɔ́ kɛ tsɔɔ mɛ. Nyɔ mi nɛ e nɔ jena nɛ e ma gbo ɔ, e bua e kaseli ɔmɛ a nya kɛ ha Hetsɔmi gbijlɔ ɔ yemi. Benɛ Yesu bɔfo ɔmɛ ngɛ ní yee ɔ, Yesu te si kɛ je niye ní ɔ se nɛ e fɔ e bɔfo ɔmɛ a nanehi a he ha mɛ. Sɔmɔli nɛ a tsuɔ jamɛ a nítsumi ɔ. (Yoh. 13:1-17) He si bami su nɛ Yesu je kpo ɔ tlɔ e bɔfo ɔmɛ a  juɛmi mi. Maa pee jeha 30 se ɔ, bɔfo Petro nɛ lɛ hu e piɛɛ Yesu bɔfo ɔmɛ a he kɛ ye jamɛ a ní ɔ benɛ Yesu fɔ a nane he ɔ, wo e nyɛmimɛ Kristofoli ga kaa a ba a he si. (1 Pet. 5:5) E sa kaa nɔ hyɛmi nɔ́ nɛ Yesu peeɔ nɛ ha nɛ wɔ tsuo wa je he si bami kpo ngɛ bɔnɛ waa kɛ wa nyɛmimɛ hiɔ si ha a mi.—Filip. 2:5-8.

13. Mɛni su nɛ he hia Yesu tsɔɔ e kaseli ɔmɛ kaa a ná?

¹³ Yesu pɔɔ e kaseli ɔmɛ demi hu kaa e he hia nɛ a hemi kɛ yemi ɔ mi nɛ wa. Be ko nɛ kaseli ɔmɛ nyɛ we nɛ a tsa nyumuyo ko nɛ daimoniohi ngɛ e mi ɔ, a bi Yesu ke: “Mɛni heje wɔɔ lɛɛ wa nyɛ we nɛ waa hia mumi yayami ɔ?” Yesu ha mɛ heto ke: ‘Ejakaa nyɛ hemi kɛ yemi pi. Niinɛ, i ngɛ nyɛ dee ke, ke nyɛ ngɛ hemi kɛ yemi nɛ kle kaa sinapi wu ɔ, nɔ́ ko nɔ́ ko peemi be wae ha nyɛ!’ (Mat. 17:14-20) Ngɛ Yesu sɔmɔmi nítsumi ɔ mi tsuo ɔ, e tsɔɔ e kaseli ɔmɛ kaa e he hia wawɛɛ nɛ a ná hemi kɛ yemi. (Kane Mateo 21:18-22.) Anɛ wa yaa kpe nguahi, kpe wawi, kɛ asafo mi kpehi tsuo konɛ wa hemi kɛ yemi ɔ mi nɛ wa lo? Pi bua jɔmi kɛkɛ nɛ wa náa ngɛ kpe nɛ ɔmɛ a sisi, mohu ɔ, kpe nɛ ɔmɛ yeɔ bua wɔ nɛ hɛ kɛ nɔ fɔmi nɛ wa ngɛ ngɛ Yehowa mi ɔ mi waa.

14. Mɛni heje nɛ e he hia nɛ wa je suɔmi nɛ haa nɛ nɔ ngɔɔ e he kɛ sãa afɔle ɔ kpo mwɔnɛ ɔ?

¹⁴ Mlaahi fuu ngɛ Kristofoli a Hela Ngmami ɔ mi nɛ tsɔɔ kaa e sa nɛ waa suɔ wa sibi. Yesu de ke mlaa enyɔne nɛ kle pe mlaa amɛ tsuo ji, moo “suɔ o nyɛmi nɔmlɔ kaa bɔnɛ o suɔ mo nitsɛ o he” ɔ. (Mat. 22:39) Yesu nyɛminyumu Yakobo hu tsɛ suɔmi ke “matsɛ yemi ɔ mi mlaa.” (Yak. 2:8) Bɔfo Yohane ngma ke: “Ye nyɛmimɛ nɛ i suɔ, mlaa nɛ i ngɛ ngmae nɛ nyɛɛ ye nɔ nɛ ɔ, pi mlaa he; mlaa momo ɔ nɛ nyɛ ná kɛ je sisije ɔ, lɔɔ nɔuu.” (1 Yoh. 2:7, 8) Mɛni Yohane tsɔɔ kaa e ji “mlaa momo”? E ngɛ mlaa nɛ tsɔɔ kaa waa suɔ wa sibi ɔ he munyu tue. E ji mlaa “momo,” ejakaa Yesu wo mlaa nɛ ɔ jehahi fuu nɛ sɛ hlami ɔ, nɛ tsɔɔ kaa “kɛ je sisije” tɔɔ nɛ e wo mlaa nɛ ɔ. Se e ji mlaa “he” hulɔ, ejakaa e ma bi nɛ kaseli ɔmɛ nɛ a je suɔmi nɛ haa nɛ nɔ ngɔɔ e he kɛ sãa afɔle ɔ kpo ngɛ si himi ehehi nɛ a kɛ maa kpe ɔ mi. Akɛnɛ wɔ hu wa ji Kristo kaseli heje ɔ, anɛ wa bua jɔɛ he kaa wa nine suɔ kɔkɔ bɔmihi nɛ maa ye bua wɔ konɛ wa ko fo wɔ pɛ wa nɔ mi kaa bɔnɛ nihi fuu nɛ a ngɛ je ɔ mi ɔ peeɔ ɔ lo?

15. Mɛni ji nɔ́ titli heje nɛ Yesu ba zugba a nɔ?

¹⁵ Yesu susu nihi a he wawɛɛ. Wa na enɛ ɔ ngɛ bɔnɛ e je e suɔmi mi nɛ e tsa hiɔtsɛmɛ, kɛ nihi nɛ a gbɔjɔ, nɛ e tle gbogboehi hu si ɔ mi. Se tsa pi hiɔtsɛmɛ a tsami heje titli nɛ Yesu ba zugba a nɔ ngɛ. Nihi ná munyu nɛ e fiɛɛ kɛ ní  nɛ e tsɔɔ mɛ ɔ he se wawɛɛ. Ngɛ mɛni blɔ nɔ? Kaa nɔ hyɛmi nɔ́ ɔ, nihi nɛ Yesu tsa mɛ kɛ ni nɛmɛ nɛ e tle mɛ si ɔ, ba bwɔ nɛ a gbo. Se nihi nɛ a kplɛɛ e sɛ gbi nɛ e fiɛɛ ɔ nɔ ɔ, ma nyɛ ma ná neneene wami.—Yoh. 11:25, 26.

16. Mwɔnɛ ɔ, kɛ Matsɛ Yemi sɛ gbi ɔ kɛ kaselɔ peemi nítsumi ɔ yi bli ha kɛɛ?

¹⁶ Mwɔnɛ ɔ, fiɛɛmi nítsumi ɔ nɛ Yesu je sisi ngɛ kaseli ɔmɛ a be ɔ mi ɔ yi ba bli wawɛɛ nitsɛ. Ee, Yesu fã e kaseli ɔmɛ ke: “Lɔɔ he ɔ, nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli.” (Mat. 28:19) Kristofoli nɛ a hi si ngɛ kaseli ɔmɛ a be ɔ mi ɔ tsa nítsumi nɛ Yesu je sisi ɔ nɔ, nɛ mwɔnɛ ɔ, wɔ hu wa ngɛ fiɛɛe kɛ ngɛ nihi babauu hae pe bɔnɛ a pee be ko nɛ be ɔ! Yehowa Odasefoli nɛ a yibɔ hiɛ pe ayɔ kpaago ɔ, kɛ kã ngɛ Mawu Matsɛ Yemi sɛ gbi ɔ fiɛɛe ngɛ mahi nɛ hiɛ pe 230 a nɔ, nɛ Odasefoli ɔmɛ kɛ nimli ayɔhi abɔ kaseɔ Baiblo ɔ daa. Fiɛɛmi nítsumi nɛ ɔ ha nɛ wa ná nɔ mi mami kaa wa ngɛ nyagbe ligbi ɔmɛ a mi.

17. Mɛni ga Paulo kɛ Petro wo Kristofoli nɛ a hi si ngɛ kaseli ɔmɛ a be ɔ mi ɔ?

¹⁷ E ngɛ heii kaa mlaahi nɛ a wo ɔ ha nɛ Kristofoli nɛ a hi si blema a, a hemi kɛ yemi mi wa. Kaa nɔ hyɛmi nɔ́ ɔ, benɛ a wo Paulo tsu ngɛ Roma a, e de Timoteo ke: “Anɔkuale ɔ nɛ i tsɔɔ mo ɔ, pɛtɛ he kaa nɔhyɛ nɔ́.” (2 Tim. 1:13) Munyu nɛ ɔ wo Timoteo he wami wawɛɛ nitsɛ. Jehanɛ se hu ɔ, benɛ Petro wo Kristofoli he wami konɛ a bɔ mɔde nɛ a to a tsui si, a je nyɛmi suɔmi kpo, nɛ a ye a he nɔ ɔ se ɔ, e de hu ke: “E ngɛ mi kaa nyɛ le kikɛmɛ a ní nɛ ɔmɛ momo, nɛ anɔkuale ɔ hu nyɛ pɛtɛ he lɛɛ, se kɛ̃ i to kaa ma ya nɔ ma hi nyɛ kaie ngɛ ní nɛ ɔmɛ a he.”—2 Pet. 1:5-8, 12.

18. Kɛ Kristofoli nɛ a hi si ngɛ kaseli ɔmɛ a be ɔ mi ɔ buɔ mlaahi ha kɛɛ?

¹⁸ Ngɛ anɔkuale mi ɔ, nɔ́ nɛ Paulo kɛ Petro ngma asafo ɔmɛ ɔ ngɛ kaa “munyuhi nɛ gbali klɔuklɔu ɔmɛ tu blema lokoo ɔ.” (2 Pet. 3:2) Anɛ ga womi nɛ ɔ ha nɛ wa nyɛmimɛ Kristofoli nɛ a hi si ngɛ kaseli ɔmɛ a be ɔ mi ɔ a mi mi fu lo? Dɛbi, a le kaa Mawu ngɔ blɔ tsɔɔmi kɛ ngɛ mɛ hae, ejakaa e suɔ mɛ, nɛ e suɔ kaa e maa ye bua mɛ konɛ ‘a ya nɔ nɛ a wa ngɛ dloomi ɔ mi, nɛ́ a le wa Nyɔmtsɛ, kɛ wa Kpɔlɔ Yesu Kristo ɔ saminya.’—2 Pet. 3:18.

19, 20. Mɛni heje nɛ e sa kaa waa ye Yehowa mlaa amɛ a nɔ ɔ, nɛ mɛni se wa náa ngɛ he?

¹⁹ Mwɔnɛ ɔ, wa ngɛ yi mi tomi kpakpahi a heje nɛ e sa kaa waa ye mlaahi nɛ Yehowa wo ngɛ e Munyu nɛ ji Baiblo ɔ mi ɔ nɔ. Mlaahi nɛ ngɛ Baiblo ɔ mi ɔ da kɛ pi si. (Kane Yoshua 23:14.) Ngɛ Baiblo ɔ mi ɔ, wa naa bɔnɛ Mawu kɛ adesahi nɛ a yi mluku ɔ hi si jeha akpehi abɔ ha. A ngma munyu nɛ ɔmɛ kɛ fɔ si konɛ wa ná he se. (Rom. 15:4; 1 Kor. 10:11) Wa na bɔnɛ Baiblo gbamihi ba mi ha. A kɛ gbamihi ma nyɛ maa to níhi nɛ maa ba hwɔɔ se nɛ a de wɔ to momo ɔ, a he. Kaa nɔ hyɛmi nɔ́ ɔ, nimli ayɔhi abɔ ba plɛ Yehowa jali kaa bɔnɛ a gba kɛ fɔ si kaa e maa ba “hwɔɔ se,” aloo nyagbe be ɔmɛ a mi ɔ. (Yes. 2:2, 3) Ní yayahi nɛ ngɛ nɔ yae ngɛ je ɔ mi ɔ hu ji Baiblo gbami nɛ ngɛ mi bae. Nɛ kaa bɔnɛ a de kɛ sɛ hlami ɔ, fiɛɛmi nítsumi ɔ yi nɛ ngɛ blie ngɛ je kɛ wɛ ɔ hu tsɔɔ kaa Yesu gbami ɔ ngɛ mi bae nitsɛnitsɛ.—Mat. 24:14.

²⁰ Wa Bɔlɔ ɔ tsɔɔ heii kaa e ji nɔ ko nɛ waa kɛ wa hɛ ma nyɛ maa fɔ e nɔ. Anɛ wa ngɛ e mlaa amɛ a he se náe lo? E he hia nɛ waa ye e mlaa amɛ a nɔ. Jã ji bɔnɛ Rosellen pee. E de ke: “Benɛ i kɛ ye hɛ bɔni Yehowa nɔ fɔmi wawɛɛ ɔ, i ba na kaa e suɔmi, nɛ e woɔ mi he wami.” Nyɛ ha nɛ wɔ hu waa ye Yehowa mlaa amɛ a nɔ konɛ wa ná he se.