1, 2. (a) Mɛni Mawu pee ha Adam? (b) Mɛni he je nɛ Mawu ha Adam yo ɔ? (Moo hyɛ foni nɛ ngɛ ni kasemi ɔ sisije ɔ.)

YI MI TOMI ko he je nɛ Yehowa bɔ zugba a nɛ. E bɔ zugba a konɛ “nimli nɛ hi nɔ.” (Yes. 45:18) Kekleekle nɔmlɔ nɛ Yehowa bɔ ji Adam. E bɔ lɛ nɛ e ye mluku. Lɔ ɔ se ɔ, Yehowa ngɔ lɛ kɛ wo Eden abɔɔ nɛ mi ngɛ fɛu ɔ mi. Tsohi nɛ a ngɛ fɛu kɛ lohwehi nɛ a he ngɛ bua jɔmi fuu ngɛ abɔɔ ɔ mi. Pahi nɛ a mi tsɔ hu ngɛ lejɛ ɔ. Se Yehowa na kaa e piɛ nɔ́ ko nɛ he hia wawɛɛ nɛ e sa kaa e pee. E de ke: “E hí kaa nyumu ɔ nɔ kake too nɛ hi si; ma ha lɛ he piɛɛlɔ nɛ sa lɛ.” Enɛ ɔ he ɔ, Mawu ha nɛ mahe vii ko ba nɔ Adam nɔ. Benɛ e ngɛ mahe ɔ mi kɛ mwɔɔ ɔ, Mawu je Adam ‘kasa wu kake kɛ pee yo.’ Benɛ Adam hɛ tsɛ ɔ, e bua jɔ wawɛɛ nitsɛ. Enɛ ɔ he ɔ, e de ke: ‘Ɛhɛɛ! Jehanɛ lɛɛ i na ye henɔ tutuutu. Wu nɛ je ye wuhi a mi, kɛ lo nɛ je ye helo mi. A je lɛ kɛ je nyumu mi; a ma tsɛ lɛ yo.’—1 Mose 2:18-23.

² Yo ɔ ji nike ní nɛ Mawu kɛ ha Adam, nɛ e ji he piɛɛlɔ nɛ hi kɛ pi si. Mawu ha lɛ he blɔ klɛdɛɛ ko. Lɔ ɔ ji kaa e ma fɔ bimɛ. Baiblo ɔ de ke: “Adam wo e yo ɔ biɛ ke Hawa, nɛ e de ke, ‘I wo mo kikɛmɛ a biɛ nɛ ɔ, ejakaa nimli adesahi tsuo a nyɛ ji mo.’” (1 Mose 3:20) Moo hyɛ nike ní ngua nɛ Mawu ha Adam kɛ e yo ɔ! Mawu ha mɛ he blɔ konɛ a fɔ bimɛ nɛ́ a ye mluku. Enɛ ɔ tsɔɔ kaa Adam kɛ Hawa kɛ a bimɛ ɔmɛ ma fɔ,  nɛ a he maa hiɛ hluu kɛ yaa si a maa pee zugba a tsuo paradeiso. Adesahi maa hyɛ adebɔ ní kpahi nɛ wami ngɛ a mi ɔ, a nɔ.—1 Mose 1:27, 28.

3. (a) Loko Mawu bua maa jɔ Adam kɛ Hawa a he ɔ, e biɔ nɛ a pee mɛni? Se mɛni mohu nɛ a pee? (b) Mɛni sane bimihi a he wa ma susu?

³ Loko Mawu bua maa jɔ Adam kɛ Hawa a he ɔ, e biɔ nɛ a pee tue bumi ha Yehowa, nɛ a ha nɛ e ye a nɔ. (1 Mose 2:15-17) Ja a pee jã loko yi mi nɛ Mawu to kɛ ha mɛ ɔ maa ba mi. Se aywilɛho sane ji kaa Adam kɛ Hawa pee we tue bumi ha Yehowa. A ya bu Satan mohu tue, nɛ lɔ ɔ ha nɛ a pee yayami kɛ si Mawu. (Kpoj. 12:9; 1 Mose 3:1-6) Kɛ atua nɛ Adam kɛ Hawa tsɔ ɔ sa yihi a he ha kɛɛ? Mɛni yihi anɔkualetsɛmɛ komɛ nɛ a hi si blema a nyɛ pee? Mɛni he je nɛ a ma nyɛ ma tsɛ yihi nɛ a ji Kristofohi nɛ a ngɛ mwɔnɛ ɔ ke “nihi babauu” ɔ?—La 68:11.

4. Mɛnɔ nɛ a ngɔ yayami nɛ Adam kɛ Hawa tsuo pee ɔ ngɔ tloo?

⁴ Benɛ Yehowa bi Adam nɔ́ he je nɛ e pee jã a, nɔ́ nɛ Adam kɛ je e nya a, nui tso. E de ke: “Yo ɔ nɛ o ngɔ ba piɛɛ ye he ɔ, lɛ nɛ ha mi tso ɔ yiblii ɔ eko nɛ i ye.” (1 Mose 3:12) Adam pia we e he ngɛ nɔ́ nɛ e pee ɔ he. Mohu ɔ, e pia Hawa, nɛ e pia Yehowa, nɛ ji nɔ nɛ bɔ yo ɔ kɛ ha lɛ ɔ hulɔ! E ngɛ mi kaa Adam kɛ Hawa tsuo nɛ a pee yayami ɔ mohu lɛɛ, se Yehowa ngɔ nɔ́ nɛ ba a tsuo ngɔ tloo Adam. Enɛ ɔ he ɔ, bɔfo Paulo ngma ke: ‘Nɔ kake lɛ pee yayami, nɛ yayami kɛ gbenɔ ba.’—Rom. 5:12.

5. Mɛni je adesahi nɛ a ngɛ mɛ nitsɛmɛ a nɔ yee ɔ mi kɛ ba?

⁵ Satan sisi Adam kɛ Hawa nɛ a susu kaa e he hia we nɛ Yehowa nɛ ye a nɔ. Ngɛ nɔ́ nɛ a pee ɔ he je ɔ, wa ma bi ke: Mɛnɔ nɛ e sa kaa e ye adesahi a nɔ? Bɔ nɛ pee nɛ wa nyɛ nɛ waa na sane bimi nɛ ɔ heto ɔ, Mawu ngmɛ adesahi blɔ konɛ a ye mɛ nitsɛmɛ a nɔ kɛ ya si be ko. Mɛni je jã nɛ Mawu pee ɔ mi kɛ ba? Haomihi sɔuu nɛ adesahi kɛ ngɛ a sibi a nɔ bae. Maa pee jeha lafa ji nɛ ɔ, ta gbe nimli maa pee 100,000,000 sɔuu. Baiblo ɔ tsɔɔ kaa “pi nɔmlɔ adesa nitsɛ he wami nya ji kaa e maa pee kikɛ nɛ ɔ, aloo kikɛ nɛ ɔ.” (Yer. 10:23) Enɛ ɔ he je nɛ wɔɔ lɛɛ wa ngɔ Yehowa kɛ pee wa Nɔ Yelɔ ɔ nɛ.—Kane Abɛ 3:5, 6.

6. Kɛ nihi buɔ yihi ngɛ ma komɛ a nɔ ha kɛɛ?

⁶ Nyumuhi kɛ yihi tsuo ngɛ nɔ́ nae ngɛ Satan je nɛ ɔ mi. (Fiɛlɔ 8:9; 1 Yoh. 5:19) Se nihi nɛ a peeɔ mɛ yi wu tso ní nguanguahi ji yihi. Kaa nɔ hyɛmi nɔ́ ɔ, ngɛ je ɔ mi tsuo ɔ, ke a je yihi lafa a, a kpɛti nihi 30 ji nihi nɛ a hunomɛ aloo a plãhi peeɔ mɛ yi wu tso ní. Ngɛ ma komɛ hu a nɔ ɔ, nihi a bua jɔɔ binyumuwi a he pe biyiwi. Mɛni he je? Ejakaa a susu kaa ke binyumuwi ɔmɛ wa a, a ma nyɛ maa hyɛ a fɔli, nɛ a be hae nɛ a weku ɔ biɛ nɛ laa hulɔ. Ngɛ he komɛ hu ɔ, nihi buɔ yihi kaa ni komɛ nɛ se nami ko be a he. Enɛ ɔ he ɔ, ke nihi hɛɛ hɔ nɛ a ná le kaa biyo nɛ a ma fɔ ɔ, a jeɔ hɔ ɔ.

7. Kɛ Mawu bɔ Adam kɛ Hawa ha kɛɛ?

⁷ Mawu bua jɔɛ bɔ nɛ nihi peeɔ yihi ha a he kulaa. Mawu kɛ yihi hiɔ si saminya, nɛ e buu mɛ. Yehowa bɔɛ Hawa kaa e ba pee Adam nyɔguɛ. Hawa ye mluku, nɛ e ngɛ suhi fuu nɛ e kɛ maa ye bua Adam saminya. Enɛ ɔ he je ɔ, Baiblo ɔ tsɔɔ kaa benɛ Mawu bɔ níhi ta a, e “na nɔ́ tsuaa nɔ́ nɛ e pee ɔ, nɛ a muɔ e hɛ saminya.” (1 Mose 1:31) Niinɛ, “nɔ́ tsuaa nɔ́” nɛ Yehowa pee ɔ, “muɔ e hɛ saminya.” Enɛ ɔ maa nɔ mi kaa Yehowa bɔ Adam kɛ Hawa saminya, nɛ e ha mɛ si himi kpakpa hulɔ!

8. (a) Kɛ nihi fuu peeɔ a ní ha kɛɛ? (b) Mawu bua jɔɔ mɛnɔmɛ a he nɛ e yeɔ bua mɛ?

⁸ Kɛ je benɛ Adam kɛ Hawa tsɔ atua ngɛ Eden abɔɔ mi kɛ ma nɛ ɔ, adesahi ngɛ nɔ yae ngɛ Yehowa nɔ tue gboe. Adesahi a je mi bami pa puɛ kulaa ngɛ wa be nɛ ɔ mi. Atsinyɛ jemi ko be he kaa wa ngɛ nyagbe ligbi ɔmɛ a mi. Baiblo ɔ tsɔɔ kaa ngɛ “nyagbe ligbi ɔmɛ” a mi ɔ, “je mi maa wa.” (2 Tim. 3:1-5) Se be tsuaa be ɔ, Mawu naa nyumu komɛ kɛ yi komɛ nɛ a peeɔ tue bumi kɛ haa lɛ, nɛ a baa a he si kɛ haa e nɔ yemi ɔ, nɛ a kɛ a hɛ fɔɔ e nɔ. Mawu bua jɔɔ nihi kaa jã a he, nɛ e yeɔ bua mɛ.—Kane La 71:5.

9. Nimli enyɛmɛ nɛ a ná yi baami ngɛ Nyu Kpekpemi ɔ mi, nɛ mɛni he je nɛ Mawu baa a yi ɔ?

⁹ Ngɛ Noa be ɔ mi ɔ, Mawu ngɔ Nyu Kpekpemi kɛ kpata yayami peeli ɔmɛ a hɛ mi, nɛ e baa nimli bɔɔ ko pɛ a yi. Ke Noa nyɛmimɛ nyumuhi kɛ yihi ngɛ je mi jamɛ a be ɔ mi ɔ, lɛɛ nyu ɔ gbe mɛ hulɔ. (1 Mose 5:30) Se nyumuhi nɛ a ná yi baami ngɛ Nyu Kpekpemi ɔ mi ɔ, a he hiɛ pi yihi nɛ a ná yi baami ɔ. Nihi nɛ a baa a yi ɔ ji Noa, kɛ e yo, kɛ a bimɛ nyumuhi etɛ, kɛ mɛ hu a yihi. Nɔ́ he je nɛ a baa a yi ɔ ji, a yeɔ Mawu gbeye, nɛ a peeɔ e suɔmi nya ní. Nimli kpaanyɔ nɛ ɔmɛ nɛ Yehowa baa a yi ɔ, a bimɛ sɔuu ji nimli ayɔ akpehi abɔ nɛ a ngɛ je ɔ mi mwɔnɛ ɔ nɛ.—1 Mose 7:7; 1 Pet. 3:20.

10. Mɛni he je nɛ Yehowa ye bua e sɔmɔli anɔkualetsɛmɛ komɛ a yihi ɔ?

¹⁰ Jeha komɛ a se ɔ, Mawu jɔɔ e sɔmɔli anɔkualetsɛmɛ komɛ hu a yihi. E pee jã, ejakaa a tui munyu huitihuiti. (Yuda 16) Yi nɛ ɔmɛ a kpɛti nɔ kake ji Sara. E kɛ e huno Abraham ngɛ ma ko nɛ a tsɛɛ ke Ur ɔ mi. Nɔ́ ko he hia we mɛ ngɛ lejɛ ɔ. Se benɛ Yehowa de mɛ kaa a hia kɛ je Ur nɛ a ya hi bo tsuhi a mi ɔ, Sara kpɛ we e kuɛ si. Mohu ɔ, “e bu Abraham, nɛ e tsɛ lɛ e nyɔmtsɛ.” (1 Pet. 3:6) Mo susu Rebeka hu he nɛ o hyɛ. Yehowa jɔɔ lɛ nɛ e ba plɛ yogbayo kpakpa. E be nyakpɛ kaa e huno Isak “suɔ lɛ saminya. Rebeka ba pee bua womi nɔ́ pɔtɛɛ ko kɛ ha Isak ngɛ e nyɛ ɔ gbenɔ se.” (1 Mose 24:67) Mwɔnɛ ɔ hu ɔ, yihi anɔkualetsɛmɛ fuu ngɛ Yehowa we bi a kpɛti nɛ a peeɔ a ní kaa Sara kɛ Rebeka!

11. Mɛni Shifra kɛ Pua pee kɛ tsɔɔ kaa a ngɛ kã?

¹¹ Benɛ Israel bi ɔmɛ ngɛ nyɔguɛ tso mi ngɛ Egipt ɔ, a he ba hiɛ babauu. Enɛ ɔ ha nɛ Farao wo mlaa kaa ke Israel no ko fɔ binyumu ɔ, a gbe bi ɔ. Se mo susu nɔ́ nɛ Hebri fɔli yihi enyɔ nɛ ji, Shifra kɛ Pua pee ɔ he nɛ o hyɛ. A bui Farao mlaa a tue. A yeɔ Yehowa gbeye pe Farao, enɛ ɔ he ɔ, a gbi binyumuwi nɛ Israel bi ɔmɛ fɔɔ ɔ. Enɛ ɔ ha nɛ Yehowa jɔɔ mɛ, nɛ e ha mɛ hu bimɛ.—2 Mose 1:15-21.

12. Mɛni Debora kɛ Yael pee nɛ sa kadimi?

¹² Ngɛ Israel manyadali ɔmɛ a be ɔ mi ɔ, Mawu hla yo ko nɛ a tsɛɛ lɛ ke Debora konɛ e sɔmɔ kaa gbalɔyo. Debora wo Manyadalɔ Barak he wami. Lɔ ɔ se hu ɔ, e ye bua Israel bi ɔmɛ nɛ a ye a he ngɛ a he nyɛli ɔmɛ a dɛ mi. E gba kɛ fɔ si kaa ke Israel bi ɔmɛ ye Kanaan bi ɔmɛ a nɔ kunimi ɔ, hɛ mi nyami nɛ maa ba a be Barak nɔ́ pee, mohu ɔ, a kɛ ma ha yo ko. Jamɛ a yo ɔ ji nɔ nɛ gbe Kanaan bi ɔmɛ a tatsɛ nɛ a tsɛɛ lɛ ke Sisera a nɛ. A tsɛɛ yo nɛ ɔ ke Yael. E ha nɛ Israel bi ɔmɛ ye a he nyɛli ɔmɛ a nɔ kunimi.—Many. 4:4-9, 17-22.

13. Mɛni Baiblo ɔ de ngɛ Abigail he?

¹³ Mo susu yo anɔkualetsɛ kpa ko hu nɛ a tsɛɛ lɛ ke Abigail ɔ he nɛ o hyɛ. E hi si maa pee jeha 1,100 loko a fɔ Kristo. Baiblo ɔ tsɔɔ kaa e ngɛ juɛmi, se e huno Nabal lɛɛ, e yi mi wa. E nɔ yaka nɔmlɔ ko be, nɛ kuasiahi a sane pɛ e yeɔ.  (1 Sam. 25:2, 3, 25) David kɛ e we bi ɔmɛ po Nabal tsɔli ɔmɛ a he piɛ. Pee se ɔ, David tsɔ konɛ a ya de Nabal nɛ e ha mɛ niye ní. Se Nabal “kuɛ wo mɛ,” nɛ e ha we mɛ nɔ́ ko. Enɛ ɔ ha nɛ David muklii mi fu wawɛɛ, nɛ e to e yi mi kaa e ma kpata Nabal kɛ e we ɔ hɛ mi. Benɛ Abigail nu nɔ́ nɛ Nabal pee ɔ, e ngɔ niye ní kɛ nike ní kpahi kɛ ya ha David kɛ e we bi ɔmɛ. Enɛ ɔ ha nɛ David yi muɔ he fɔ. (1 Sam. 25:8-18) Pee se ɔ, David de Abigail ke: ‘Yehowa, Israel Mawu ɔ, nɔ nɛ tsɔ mo mwɔnɛ ligbi nɛ ɔ ke o kɛ mi nɛ ba kpe ɔ, a je e yi.’ (1 Sam. 25:32) Benɛ Nabal gbo se ɔ, David ya ngɔ Abigail kɛ pee e yo.—1 Sam. 25:37-42.

14. Mɛni ní tsumi nɛ Shalum biyi ɔmɛ piɛɛ he kɛ tsu? Nɛ mɛni yihi nɛ a ji Kristofohi hu ngɛ pee mwɔnɛ ɔ?

¹⁴ Benɛ Babilon ta buli ɔmɛ ya kpata Yerusalem hɛ mi ngɛ jeha 607 loko a fɔ Kristo ɔ mi ɔ, a gbe nyumuhi, kɛ yihi, kɛ jokuɛwi fuu. Nehemia hyɛ nɛ a fia Yerusalem gbogbo ɔ kɛ ma si ekohu ngɛ jeha 455 loko a fɔ Kristo. Yerusalem zugba a mi dlami fã nɔ yelɔ nɛ a tsɛɛ lɛ ke Shalum ɔ biyi ɔmɛ hu piɛɛ he nɛ a fia gbogbo ɔ kɛ ma si ekohu ɔ nɛ. (Neh. 3:12) A je a tsui mi kɛ tsu ní tsumihi nɛ nihi a bua jɔɛ he kaa a ma tsu. Mwɔnɛ ɔ hu ɔ, wa ngɛ yihi fuu nɛ a ji Kristofohi nɛ a piɛɛ he kɛ ngɛ Matsɛ Yemi Asahi, kɛ Kpe Asahi mae. Wa bua jɔɔ a mɔde bɔmi ɔ he!

15. Mɛni he blɔ Mawu kɛ ha yo ko nɛ a tsɛɛ lɛ ke Maria a?

¹⁵ Loko e su kaseli ɔmɛ a be ɔ mi, kɛ ngɛ kaseli ɔmɛ a be ɔ mi hu ɔ, Yehowa jɔɔ yihi fuu, nɛ e ha mɛ he blɔ klɛdɛɛ komɛ. Nimli nɛ ɔmɛ a kpɛti nɔ kake ji Maria. Yosef wo Maria si kaa e maa ngɔ lɛ. Se benɛ e ná we nɛ e ngɔ lɛ lolo ɔ, mumi klɔuklɔu ɔ ha nɛ Maria hɛɛ hɔ. Mɛni he je nɛ Mawu hla Maria kaa e pee Yesu nyɛ ɔ? Atsinyɛ jemi ko be he kaa Mawu na kaa e ngɛ su kpakpahi, enɛ ɔ he ɔ, e ma nyɛ ma tsɔse e binyumu nɛ e ye mluku ɔ. E ji he blɔ ngua nitsɛnitsɛ nɛ nɔ ko ma ná kaa e maa pee nɔmlɔ ngua nɛ hi si ngɛ zugba a nɔ hyɛ ɔ, e nyɛ!—Mat. 1:18-25.

16. Kɛ Yesu kɛ yihi hi si ha kɛɛ? Mo ha enɛ ɔ he nɔ hyɛmi nɔ́.

¹⁶ Yesu je mi mi jɔmi kpo kɛ tsɔɔ yihi. Kaa nɔ hyɛmi nɔ́ ɔ, mo susu yo ko nɛ muɔ be ngɛ e he jeha 12 sɔuu ɔ he nɛ o hyɛ. E ta Yesu tade ɔ he ngɛ e se nɛ e ná tsami. Yesu kã we e hɛ mi ngɛ nɔ́ nɛ e pee ɔ he. Mohu ɔ, e de lɛ ke: “Biyo, o hemi kɛ yemi tsa mo! O hiɔ ɔ nɛ jɔ! Yaa ngɛ he jɔmi mi.”—Mar. 5:25-34.

17. Mɛni nyakpɛ nɔ́ ko ya nɔ ngɛ Pentekoste jeha 33 ɔ mi?

¹⁷ Yi komɛ sɔmɔ Yesu kɛ e bɔfo ɔmɛ. (Luka 8:1-3) Ngɛ Pentekoste jeha 33 ɔ mi ɔ, Mawu plɛ e mumi ɔ kɛ pue nimli 120 a nɔ ngɛ nyakpɛ blɔ ko nɔ. (Kane Bɔfo Ɔmɛ A Ní Tsumi 2:1-4.) Mumi klɔuklɔu ɔ nɛ Mawu plɛ ngɔ pue a nɔ ɔ ha nɛ gbami nɛ Yehowa gba kɛ nyɛɛ se nɛ ɔ ba mi. Yehowa de ke: ‘Ma plɛ ye mumi ɔ kɛ pue nɔ tsuaa nɔ nɔ; nyɛ binyumu ɔmɛ kɛ nyɛ biyi ɔmɛ maa fiɛɛ ye sɛ gbi ɔ; ma plɛ ye mumi ɔ kɛ pue tsɔli, kɛ mawayihi po a nɔ.’ (Yoel 2:28, 29) Nyakpɛ nɔ́ nɛ ɔ nɛ ba ngɛ Pentekoste ligbi ɔ nɔ ɔ tsɔɔ kaa Yehowa bua jɔ nyumuhi kɛ yihi nɛ a bua a he nya ngɛ lejɛ ɔ a he. Mɛ lɛ a ba plɛ ‘Mawu Israel’ ɔ nɛ. (Gal. 3:28; 6:15, 16) Filipo biyihi eywiɛ ɔmɛ hu piɛɛ Kristofohi nɛ a fiɛɛ sane kpakpa a ngɛ kaseli ɔmɛ a be ɔ mi ɔ a he.—Níts. 21:8, 9.

18, 19. (a) Mɛni he blɔ Mawu ha nyumuhi kɛ yihi tsuo? (b) Kɛ la polɔ ɔ tu yihi nɛ a fiɛɛɔ sane kpakpa a a he munyu ha kɛɛ?

¹⁸ Maa pee jeha 1875 ɔmɛ a mi ɔ, nyumuhi kɛ yihi bɔɔ ko ba bɔni Baiblo mi  anɔkuale ɔ se blɔ hlami. Mɛ ji kekleekle nihi nɛ a fiɛɛ Yesu sɛ gbi ɔ. Mɛ hu a piɛɛ he nɛ gbami nɛ nyɛɛ se nɛ ɔ ba mi. “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ kɛ kpa je ɔ mi tsuo, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.”—Mat. 24:14.

¹⁹ Mwɔnɛ ɔ, Baiblo Kaseli nɛ ɔmɛ a he ba hiɛ nɛ a tsɛɛ mɛ ke Yehowa Odasefohi. A yibɔ miɔ nɛ maa su 8,000,000. Ngɛ Odasefo bi nɛ ɔmɛ a se ɔ, nihi nɛ a hiɛ pe 11,000,000 hu yaa Yesu gbenɔ Kaimi ɔ. Nimli nɛ ɔmɛ a kpɛti nihi hiɛhiɛɛ ji yihi. Jehanɛ se hu ɔ, Odasefohi nɛ a hiɛ pe 1,000,000 ngɔ a he kɛ wo be tsuo sɔmɔmi ní tsumi ɔ mi. Ngɛ mahi fuu a nɔ ɔ, nimli nɛ ɔmɛ a kpɛti nihi hiɛhiɛɛ ji yihi. Mawu ha yihi anɔkualetsɛmɛ he blɔ konɛ a da e nane mi. Enɛ ɔ ha nɛ munyu nɛ nyɛɛ se nɛ ɔ nɛ la polɔ tu ɔ ba mi. E de ke: ‘Yehowa wo gbi, nɛ yihi babauu ngɔ sɛ gbi ɔ kɛ ho.’—La 68:11.

20. Mɛni ji ní komɛ nɛ wa ma nyɛ maa kase ke wa ngɛ weku Mawu jami aloo dɛhe ní kasemi pee?

²⁰ Ke wa ke wa maa wo yihi anɔkualetsɛmɛ nɛ Baiblo ɔ tu a he munyu ɔ tsuo a ta a, du ma bu wɔ. Se wa ma nyɛ maa kane a he ní ngɛ Mawu Munyu ɔ kɛ asafo ɔ womi ɔmɛ a mi. Kaa nɔ hyɛmi nɔ́ ɔ, wa ma nyɛ ma susu anɔkuale nɛ Rut ye ɔ he konɛ waa kase lɛ. (Rut 1:16, 17) Jehanɛ se hu ɔ, ke wa susu nɔ́ nɛ Manyɛ Ester hu pee ɔ he ɔ, lɔ ɔ ma ha nɛ wa hemi kɛ yemi ɔ mi maa wa. Wa ma nyɛ ma susu nimli nɛ ɔmɛ kɛ ni kpahi hu a he ngɛ wa gbɔkuɛ Weku Mawu Jami ɔ mi. Ke wɔ pɛ nɛ wa ngɛ hu ɔ, wa ma nyɛ maa kase nihi kaa jã a he ní ke wa ngɛ wa dɛhe ní kasemi pee.

21. Mɛni yihi anɔkualetsɛmɛ peeɔ kɛ tsɔɔ kaa a yeɔ Yehowa anɔkuale?

²¹ E ngɛ heii kaa Yehowa jɔɔ yihi nɛ a yeɔ lɛ anɔkuale ɔ a fiɛɛmi ní tsumi ɔ nɔ, nɛ e yeɔ bua mɛ ngɛ haomi behi a mi hulɔ. Kaa nɔ hyɛmi nɔ́ ɔ, benɛ a wa Yehowa we bi a yi mi ngɛ Nazi kɛ Kɔmiunisi nɔ yemi ɔ sisi ɔ, Yehowa ye bua yihi nɛ a ye lɛ anɔkuale ɔ. A ti nihi fuu na nɔ́, nɛ a gbe a ti ni komɛ hu akɛnɛ a pee tue bumi kɛ ha Mawu ɔ he je. (Níts. 5:29) Kaa bɔ nɛ yihi anɔkualetsɛmɛ nɛ a hi si blema a pee ɔ, mwɔnɛ ɔ hu ɔ, yihi nɛ a ji Kristofohi baa a he si kɛ haa Mawu konɛ e ye a nɔ. Nɛ kaa bɔ nɛ Yehowa de blema Israel bi ɔmɛ ɔ, jã kɛ̃ nɛ e ngɛ yihi anɔkualetsɛmɛ nɛ ɔmɛ hu dee ke: “Koo ye gbeye. I kɛ mo ngɛ.”—Yes. 41:10-13.

22. Mɛni jɔɔmi wa ma nyɛ ma ná hwɔɔ se?

²² E be kɛe kulaa nɛ nyumuhi kɛ yihi nɛ a yeɔ Mawu gbeye ɔ ma dla zugba a nɔ kɛ pee Paradeiso. A maa ye bua nimli ayɔhi abɔ nɛ a ma tle mɛ si ɔ konɛ a le Yehowa yi mi tomihi. Loko jamɛ a be ɔ maa su ɔ, nyumu ji mo jio, yo ji mo jio, nyɛ ha nɛ wɔ tsuo wa bua nɛ jɔ he blɔ nɛ wa ná kɛ ngɛ Yehowa sɔmɔe ɔ he, nɛ waa ‘pee wa nya kake’ kɛ ja lɛ daa kɛ daa.—Zef. 3:9.