Kɛ je ye jokuɛwi a si tɔɔ nɛ ye bua jɔ adebɔ níhi a he. Hue tsohi nɛ a mi ngɛ fɛu, kɛ pahi ngɛ wa ma nɛ ji Jyväskylä nɛ ngɛ Central Finland ɔ mi, nɛ ye weku ɔ pɔɔ si slaami ngɛ lejɛ ɔmɛ. I ji nɔ ko nɛ i suɔ lohwehi hulɔ. Benɛ i wɛ ɔ, gbe fɛɛ gbe aloo anɔ fɛɛ anɔ nɛ ma na a, e peeɔ mi kaa ma wo lɛ kɛ fɔ ye gugue mi. Benɛ i ngɛ wae ɔ, ke i na bɔ nɛ nihi peeɔ lohwehi basabasa ha a, e gbaa ye nya wawɛɛ. Pee se ɔ, i ya piɛɛ kuu ko nɛ a fãa lohwehi a he ɔ he, nɛ i ya na nihi nɛ a suɔ lohwehi kaa bɔ nɛ imi hu i suɔ lohwehi ɔ ngɛ lejɛ ɔ.

Wa pee níhi fuu nɛ maa po lohwehi a he piɛ. Wa bɔɔ mɔde kaa wa maa gu blɔ slɔɔtohi a nɔ kɛ tsɔɔ nihi lohwehi a he ní, nɛ wa teɔ si kɛ woɔ nihi nɛ a juaa níhi nɛ a kɛ lohwehi a he womi pee, kɛ nihi nɛ a gbuu tsopa kɛ haa lohwehi kɛ peeɔ níhi a mi hlami ɔ. Wa to kuu kpa ko nɛ poɔ lohwehi a he piɛ ɔ hu sisi. Akɛnɛ wa peeɔ níhi nɛ poɔ blɔ mi he je ɔ, polisi ɔmɛ pɔɔ wɔ numi. A nu mi kɛ ya kojomi he si abɔ.

Ngɛ lohwehi nɛ i suɔ nɛ ma fã a he ɔ se ɔ, ní kpa komɛ nɛ yaa nɔ ngɛ je ɔ mi ɔ hu gbaa ye nya. Nyagbenyagbe ɔ, i kɛ ní tsumi kuu slɔɔtohi ya tsu ní. Ekomɛ ji Amnesty International kɛ Greenpeace. I kɛ ye he wami tsuo fĩ a se. I tuɔ munyu kɛ fãa nihi kaa ohiatsɛmɛ, nihi nɛ a hwɔɔ hwɔ, kɛ nihi nɛ a be yemi kɛ bualɔ ko ɔ a he.

Bɔɔbɔɔbɔɔ ɔ, i ba yɔse kaa i be nyɛe ma tsake níhi ngɛ je ɔ mi. E ngɛ mi kaa ní tsumi he nɛ ɔmɛ bɔ mɔde nɛ a tsu nyagba nyafinyafi komɛ a he ní mohu lɛɛ, se nyagba ngua amɛ lɛɛ a nyɛ we nɛ a pee he nɔ́ ko; a ngɛ nɔ puee mohu. E ngɛ kaa nɔ́ nɛ mumi yayami ɔmɛ ngɛ je ɔ kudɔe, nɛ nɔ ko nyɛ we nɛ e pee he nɔ́ ko. Ye kɔni mi ba jɔ̃.

Akɛnɛ i nyɛ we si fɔfɔɛ nɛ ɔ he nɔ́ ko peemi he je ɔ, i hao, nɛ lɔ ɔ ha nɛ i bɔni Mawu kɛ Baiblo ɔ he susumi. Be ko nɛ be ɔ, i kɛ Yehowa Odasefohi kase Baiblo ɔ. E ngɛ mi kaa ye bua jɔ bɔ nɛ a mi mi jɔ nɛ́ a susuɔ ye he ɔ he mohu lɛɛ, se jamɛ a be ɔ mi ɔ, i pee we klaalo kaa ma tsake ye je mi bami ɔ. Amlɔ nɛ ɔ lɛɛ, i suɔ kaa ma pee tsakemi.

I wo ye Baiblo ɔ nɛ i bɔni kanemi. E wo ye bua wawɛɛ. I na ngmamihi fuu nɛ tsɔɔ kaa e sa nɛ waa hyɛ wa lohwehi a nɔ saminya. Kaa nɔ hyɛmi nɔ́ ɔ, Abɛ 12:10 de ke “nɔmlɔ kpakpa hyɛɛ e lohwehi a nɔ saminya.” (Ngmami Klɔuklɔu ɔ) I ba na hu kaa pi Mawu nɛ e ha nɛ níhi yɛ nɔ saminya ngɛ je ɔ mi. Mohu ɔ, Mawu blɔ tsɔɔmi nɛ́ adesahi kɛ tsu we ní ɔ lɛ ha nɛ níhi ngɛ puɛe kulaa a nɛ. Benɛ i kase kaa Yehowa ngɛ suɔmi, nɛ e toɔ e tsui si kɛ haa wɔ ɔ, ye bua jɔ wawɛɛ.​—La 103:8-14.

Benɛ i ngɛ Mɛni Tutuutu Ji Baiblo ɔ Tsɔɔmi? womi ɔ kanee ɔ, i na adrɛs komɛ ngɛ mi, nɛ i ngma kɛ bi konɛ a kɛ mi nɛ ba kase Baiblo ɔ ekohu. E kɛ we nɛ Odasefo no ko kɛ e yo ba ye ngɔ kaa a kɛ mi maa kase Baiblo ɔ, nɛ i kplɛɛ nɔ. I bɔni Kristofohi a kpehi yami ngɛ Matsɛ Yemi Asa a nɔ hulɔ. Enɛ ɔ ha nɛ anɔkuale ɔ nɛ ngɛ Baiblo ɔ mi ɔ bɔni ye tsui mi sɛ mi.

Baiblo ɔ ye bua mi nɛ i pee tsakemihi babauu ngɛ ye si himi mi. I kpa sigaleti numi, nɛ i kpa dã demi. I pee tsakemi ngɛ ye tade womi kɛ ye munyu tutui mi. I bɔni bu kpo jemi ha ma nikɔtɔmahi. (Roma Bi 13:1) Jinɛ i kɛ ye he woɔ ajuama bɔmi mi wawɛɛ, se i bɔ mɔde nɛ i kpa.

I bɔ mɔde nɛ i kɛ kuuhi nɛ jinɛ i kɛ mɛ tsuɔ ní ɔ kpa ní tsumi. Se ngɛ anɔkuale mi ɔ, i nɛ lɛ gbɔjɔɔ. Sisije ɔ, e pee mi kaa ke i de mɛ ke i kɛ mɛ be ní tsue hu ɔ, a maa nu he kaa i ha nɛ a nine nyɛ si. Se i ba ná nɔ mi mami kaa Mawu Matsɛ Yemi ɔ pɛ lɛ ma nyɛ ma tsu nyagbahi nɛ ngɛ je ɔ mi ɔ he ní. I ma ye juɛmi nya si kaa ma ngɔ ye he wami tsuo kɛ fĩ Matsɛ Yemi nɛ ɔ se, nɛ́ ma ye bua ni kpahi konɛ a kase e he ní.​—Mateo 6:33.

Ní tsumi nɛ i tsu sa a he je ɔ, jinɛ i gbaa nihi a mi. I naa ni komɛ kaa a ji nimli kpakpahi, nɛ i naa ni komɛ hu kaa a ji nimli yayamihi, nɛ i teɔ si kɛ woɔ nihi nɛ i susu kaa a ji nimli yayami ɔmɛ. Se Baiblo ɔ ye bua mi nɛ i ná we nɔ ko he ninyɛ hu. Amlɔ nɛ ɔ, i bɔɔ mɔde kaa ma je Kristofohi a suɔmi kpo kɛ ha nihi tsuo. (Mateo 5:44) Blɔ kake nɛ i guɔ nɔ kɛ jeɔ suɔmi kpo ji kaa i fiɛɛɔ Mawu Matsɛ Yemi ɔ he sane kpakpa a kɛ tsɔɔ nihi. Ke i na bɔ nɛ fiɛɛmi ní tsumi nɛ ɔ ha nɛ nihi ngɛ tue mi jɔmi, bua jɔmi kɛ hɛ kɛ nɔ fɔmi nae ha a, ye bua jɔɔ wawɛɛ.

Amlɔ nɛ ɔ, níhi gba we ye nya hu, ejakaa i le kaa Yehowa ma tsu je ɔ mi nyagba amɛ a he ní. I ngɛ nɔ mi mami kaa Bɔlɔ ɔ be blɔ ngmɛe nɛ a ya nɔ nɛ a pee lohwehi kɛ nimli nisɛ níhi kɛ ya neneene, nɛ e be blɔ ngmɛe nɛ a puɛ wa zugba nɛ ngɛ fɛu nɛ ɔ hulɔ. E be kɛe nɛ e ma ha nɛ e Matsɛ Yemi ɔ nɛ ba dla níhi tsuo nɛ adesahi puɛ ɔ. (Yesaya 11:1-9) Pi anɔkuale ɔ nɛ i ba le ɔ pɛ nɛ haa nɛ ye bua jɔɔ, mohu ɔ, ni kpahi nɛ i nyɛɔ yeɔ bua mɛ nɛ a ba kaseɔ anɔkuale ɔ hu haa mi bua jɔmi. I nui he hu kaa e sa nɛ ma tsake je ɔ.