Yesu kã Farisi bi ɔmɛ a hɛ mi ngɛ Kapernaum. Jamɛ a ligbi ɔ nɛ e je Farisi bi ɔmɛ a ngɔ ɔ, e nyɛɛ kɛ ya Galilea Wo ɔ nya, nɛ nihi ba bu e nɔ. Yesu ya sɛ lɛ ko mi nɛ e hlui lɛ ɔ kɛ ya pa a nɔ bɔɔ, kɛkɛ nɛ e bɔni ni ɔmɛ hiɔwe Matsɛ Yemi ɔ he ní tsɔɔmi. E ngɔ nɔ́ hetomi nɔ́ slɔɔtohi kɛ tsɔɔ mɛ Matsɛ Yemi ɔ he ní. Nihi nɛ a ngɛ Yesu tue bue ɔ le níhi nɛ e ngɛ he munyu tue ɔ, kɛ si fɔfɔɛhi nɛ e kɛ to he ɔmɛ. Enɛ ɔ he ɔ, a nyɛ nɛ a nu bɔ nɛ Yesu tsɔɔ Matsɛ Yemi ɔ he ní ngɛ blɔ slɔɔtohi a nɔ ɔ sisi.

Kekleekle ɔ, Yesu tu ní dulɔ ko nɛ e ya fĩa wu he munyu. Wu ɔ nɛ e fĩa a ekomɛ ya pue blɔ he nɛ lohwe pɛlitsɛmɛ ya ye. Ekomɛ hu ya pue tɛ zugba mi ngɛ he nɛ zu pi ngɛ. A sipokuhi nyɛ we nɛ a sɛ zu mi kɛ ya tsitsaa ejakaa zu ɔ mi kuɔ we, nɛ pu sãa mɛ nɛ a gbo. Wu ɔ ekomɛ hu ya pue miohi a mi, se mio ɔmɛ mia ní ɔmɛ, nɛ a gbo. Jehanɛ hu ɔ, ekomɛ ya pue zugba kpakpa nɔ. Wu ɔmɛ puɛ, nɛ a wa, nɛ a wo yiblii, ‘ekomɛ 100, ekomɛ 60, nɛ ekomɛ hu wo 30.’​​—Mateo 13:8.

Ngɛ nɔ́ hetomi nɔ́ kpa hu mi ɔ, Yesu ngɔ Matsɛ Yemi ɔ kɛ to nyumu ko nɛ e ya du ní he. Ngɛ enɛ ɔ mi ɔ, ní dulɔ ɔ hwɔ mahe jio, e hwɔ we mahe jio, wu ɔmɛ maa puɛ nɛ a maa wa. Bɔ nɛ e maa pee ha kɛ wa a lɛɛ, “e li.” (Marko 4:27) Ní ɔmɛ nitsɛmɛ maa wa, nɛ a maa wo ní, nɛ pee se ɔ, a ma kpa.

Enɛ ɔ se ɔ, Yesu ngɔ nɔ́ hetomi nɔ́ etɛne nɛ kɔɔ ní dumi he kɛ tsu ní. E tsɔɔ kaa nyumu ko ya du wu kpakpa, se “nyɔ mi benɛ nɔ tsuaa nɔ hwɔ si ɔ,” he nyɛlɔ ko ba du hu kɛ futu ngma a.  Nyumu ɔ tsɔli ya bi lɛ kaa e suɔ nɛ a ya hiaa hu ɔ lo. Se e de mɛ ke: ‘Dɛbi, eko ɔ, ke nyɛ ngɛ hu ɔ hiae ɔ, nyɛ maa hia ngma a kɛ futu mi. Nyɛ ha ngma a, kɛ hu ɔ tsuo nɛ wa kɛ yaa si ngma kpami be ɔ. Ke ngma kpami be ɔ su ɔ, ma de ní tsuli ɔmɛ ke a bua hu ɔ nya kekle nɛ a fi, konɛ a sã. Lɔ ɔ se loko ma ha nɛ a bua ngma a nya kɛ wo ye gba a mi.’​​—Mateo 13:24-30.

Nihi nɛ a ngɛ Yesu tue bue ɔ a kpɛti nihi fuu le ngmɔ humi. Lɔ ɔ he ɔ, e tu sinapi wu nyafii nɛ nihi fuu le ɔ he munyu. E de ke: “Hiɔwe matsɛ yemi ɔ ngɛ kaa kikɛ nɛ ɔ: Nyumu ko kɛ̃ sinapi wu, nɛ e ya du ngɛ e ngmɔ mi.” (Mateo 13:31) Pi tsohi a he ní nɛ Yesu ngɛ mɛ tsɔɔe. Mohu ɔ, e ngɛ hlae nɛ e tsɔɔ mɛ kaa nɔ́ nyafii ma nyɛ maa wa kɛ pee nɔ́ ngua ngɛ nyakpɛ blɔ nɔ.

Enɛ ɔ se ɔ, Yesu tu nɔ́ kpa ko nɛ e tue buli ɔmɛ a le wawɛɛ hu he munyu. E ngɔ hiɔwe Matsɛ Yemi ɔ kɛ to ‘yo ko nɛ e ngɔ masa kɛ futu kplolo mamu lita nyingmi eywiɛ kɛ ya su benɛ lɛ tsuo sa’ a he. (Mateo 13:33) E ngɛ mi kaa wa be nyɛe maa na bɔ nɛ masa saa ma ha kɛ wa hɛngmɛ mohu lɛɛ, se masa a futuɔ ma a tsuo, nɛ e fuɔ. Enɛ ɔ yaa nɔ bɔɔbɔɔbɔɔ, se nyagbenyagbe ɔ tsakemi ngua baa ma a mi.

Benɛ Yesu gbe e munyu ɔ nya a, e wo ma kpekpemi ɔ blɔ, nɛ lɛ hu e ho we mi ya. E kɛ we kulaa nɛ e kaseli ɔmɛ ya e ngɔ kaa e tsɔɔ mɛ nɔ́ he tomi nɔ́ ɔmɛ a sisi.

Kaseli ɔmɛ le kaa Yesu ngɔɔ nɔ́ hetomi níhi kɛ tsɔɔ ní, se nɔ́ hetomi níhi nɛ e kɛ tsu ní nɛ ɔmɛ lɛɛ, a juɛmi kpi he. Enɛ ɔ he ɔ, a bi lɛ ke: ‘Mɛni he je nɛ o kɛ ni ɔmɛ hii munyu tue ngɛ abɛ gbi mi ɔ?’​​—Mateo 13:10.

Jã nɛ e pee ɔ ha nɛ Baiblo mi gbami ko ba mi. Mateo bɔ amaniɛ ke: “Abɛhi lɛ Yesu bu nɛ e kɛ tsɔɔ ma kpekpemi ɔ ní nɛ ɔmɛ tsuo. Niinɛ, e de we mɛ nɔ́ ko nɛ e bui abɛ kɛ tsɔɔ nya. E pee enɛ ɔ, konɛ e kɛ ha nɛ nɔ́ nɛ gbalɔ ɔ de ɔ nɛ ba mi ke, ‘I kɛ mɛ maa tu munyu ngɛ abɛ gbi mi. Níhi nɛ a ngɔ kɛ laa kɛ je benɛ a to je ɔ sisi ɔ, ma fiɛɛ kɛ tsɔɔ mɛ.’”​​—Mateo 13:34, 35; La 78:2.

Se nɔ́ kpa ko hu he je nɛ Yesu ngɔ nɔ́ hetomi níhi kɛ tsu ní ɔ nɛ. E kɛ nɔ́ hetomi ní ɔmɛ je nɔ́ nɛ ngɛ ni ɔmɛ a tsui mi ɔ kpo. A ti ni komɛ ngɛ nɛ a tue mi ngɔɔ mɛ nɛ a suɔ nɛ a maa bu Yesu tue, nɛ́ a hyɛ nyakpɛ níhi nɛ e ngɛ pee ɔ kɛkɛ. A nɛ́ Yesu kaa e ji Nyɔmtsɛ nɛ e sa nɛ a bu lɛ tue nɛ a nyɛɛ e se. (Luka 6:46, 47) A sume nɛ a ma tsake a susumihi kɛ a ní peepeehi, mohu ɔ, a suɔ nɛ a maa pee mɛ nitsɛmɛ a tsui nya ní. A sume nɛ e munyu ɔ nɛ ná a nɔ he wami.

Yesu ha e kaseli ɔmɛ heto ke: ‘Nɔ́ he je nɛ i kɛ ni ɔmɛ ngɛ munyu tue ngɛ abɛ gbi mi ji: a ngɛ hyɛe se a nɛ, a ngɛ tue bue se a nui, nɛ a nui sisi hulɔ. Lɔ ɔ he ɔ, gbami nɛ Yesaya gba a kɔɔ a he niinɛ. Yesaya gba ke: “Nimli nɛ ɔmɛ kplii a tsui.”’​​—Mateo 13:13-15; Yesaya 6:9, 10.

Enɛ ɔ tsɔɔ we kaa nihi nɛ a ngɛ Yesu tue bue ɔ tsuo kplii a tsui. E ya nɔ nɛ e de ke: “Se nyɛɛ lɛɛ a gbaa nyɛ pɛ! Nyɛ hɛngmɛ ngɛ nɔ́ hyɛe, nɛ nyɛ tue ngɛ nɔ́ nue. Niinɛ, i ngɛ nyɛ dee ke gbali, kɛ Mawu bimɛ fuu hla kaa a maa na níhi nɛ nyɛ ngɛ hyɛe nɛ ɔ, se a nɛ́; a hla kaa a maa nu níhi nɛ nyɛ ngɛ nue nɛ ɔ, se a nui.”​​—Mateo 13:16, 17.

Bɔfo 12 ɔmɛ kɛ Yesu kaseli kpa amɛ lɛɛ a ngɛ tsui kpakpa. Lɔ ɔ he ɔ, Yesu de e kaseli ɔmɛ ke: “Nyɛɛ lɛɛ a kɛ hiɔwe matsɛ yemi ɔ mi laami sane ɔ ha nyɛ; se mɛɛ a kɛ ha we mɛ.” (Mateo 13:11) Akɛnɛ kaseli ɔmɛ suɔ nɛ a maa nu Matsɛ  Yemi ɔ he níhi a sisi he je ɔ, Yesu tsɔɔ mɛ nɔ́ hetomi níhi nɛ e kɛ tsu ní ɔ a sisi.

Yesu de mɛ ke: “Wu ɔ ji Mawu munyu ɔ.” (Luka 8:11) Zu ɔ ji tsui ɔ nɛ. Ní enyɔ nɛ ɔmɛ maa ye bua mɛ konɛ a nu nɔ́ hetomi nɔ́ ɔ sisi.

Ngɛ wuhi nɛ ya pue blɔ mi ɔ blɔ fa mi ɔ, Yesu de ke: “Abosiami baa nɛ e ba jeɔ munyu ɔ ngɛ a tsui mi, konɛ a ko he ye, nɛ a ko he a yi wami.” (Luka 8:12) Benɛ Yesu ngɛ wuhi nɛ ya pue tɛ zugba mi ɔ he munyu tue ɔ, e tsɔɔ kaa ni ɔmɛ a bu munyu ɔ tue kɛ bua jɔmi se e sɛ we a tsui mi. E de kaa ‘ke haomi, loo yi mi wami ba ngɛ munyu ɔ he ɔ,’ kɛkɛ a nane tɔtɔ. Nɛ tsɔɔ kaa ke ‘haomi ko’ ba, kaa eko ɔ, a weku li te si kɛ wo mɛ, loo ni kpahi te si kɛ wo mɛ ɔ, a nane kpataa.​​—Mateo 13:21; Luka 8:13.

Nɛ wu ɔ nɛ ya nɔ miohi a mi ɔ hu nɛɛ? Yesu de e kaseli ɔmɛ kaa lɔ ɔ hu kɔɔ nihi nɛ a buɔ munyu ɔ tue se “je nɛ ɔ mi he nya gbami, kɛ sika suɔmi gbee sɛ gbi ɔ” ngɛ a tsui mi ɔ a he. (Mateo 13:22) Munyu ɔ ngɛ a tsui mi, se je nɛ ɔ mi he nya gbami kɛ sika suɔmi nɛ ngɛ kaa mio ɔ gbɔɔ munyu ɔ, nɛ lɔ ɔ he ɔ, a nyɛ we nɛ a wo yiblii.

Nyagbe zu nɛ Yesu tu he munyu ji zu kpakpa a. Zu nɛ ɔ daa si ha nihi nɛ a nuɔ munyu ɔ, nɛ a kplɛɛɔ nɔ ngɛ a tsui mi nɛ a kɛ tsuɔ ní ɔ. Mɛni lɛ jeɔ mi kɛ baa? A “woɔ yiblii.” Akɛnɛ e slo mɛ tsuo a si fɔfɔɛhi, a jehahi, kɛ a nɔmlɔ tso mi he wami he je ɔ, yiblii nɛ mɛ tsuo a woɔ ɔ sɔɛ; ni komɛ woɔ 100, ni komɛ 60, nɛ ni komɛ hu 30. Ngɛ anɔkuale mi ɔ, Mawu jɔɔ nihi nɛ a tsui mi hi nɛ mɛɛ lɛɛ ‘ke a nu Mawu munyu ɔ, a tsuɔ he ní hluu kɛ ya siɔ a woɔ yiblii’ ɔ.​​—Luka 8:15.

Bɔ nɛ Yesu tsɔɔ níhi a mi ha a ha nɛ kaseli ɔmɛ a nya kpɛ a he! Jehanɛ lɛɛ a nu nɔ́ hetomi  ní ɔmɛ a sisi saminya. Yesu suɔ nɛ a nu nɔ́ hetomi ní ɔmɛ a sisi, konɛ a nyɛ nɛ a tsɔɔ ni kpahi anɔkuale ɔ. Enɛ ɔ he ɔ, Yesu bi mɛ ke: ‘Anɛ nɔ ko suɔ kane kɛ maa sowe, loo sa tso sisi lo? Anɛ pi kane tso nɔ nɛ e kɛ maa lo?’ Yesu wo mɛ ga ke: “Nɔ nɛ ngɛ tue nɛ nuɔ nɔ́ ɔ, e nu.”​​—Marko 4:21-23.

Benɛ Yesu tsɔɔ mɛ nɔ́ hetomi nɔ́ nɛ kɔɔ ní dulɔ ɔ he ɔ sisi ta a, loloolo ɔ, e kaseli ɔmɛ ngɛ hlae nɛ a maa le níhi fuu. Lɔ ɔ he ɔ, a de Yesu ke: “Abɛ ɔ nɛ kɔɔ hu ɔ nɛ ngɛ ngmɔ ɔ mi ɔ he ɔ, tsɔɔ wɔ sisi.”​​—Mateo 13:36.

Bɔ nɛ kaseli ɔmɛ ngɛ hlae nɛ a le níhi fuu ha a peeɔ lɛ heii kaa a ngɛ slɔɔto ngɛ ni kpahi nɛ a bu munyu ɔ tue ngɛ wo ɔ nya a a he. E ngɛ heii kaa ni ɔmɛ a nu nɔ́ nɛ Yesu de ɔ, se a hɛ wi a he kaa a ma bi nɛ e tsɔɔ mɛ nɔ́ nɛ e de ɔ sisi, kɛ bɔ nɛ a kɛ ma tsu ní ha. Nɔ́ nɛ a nu ngɛ nɔ́ hetomi nɔ́ ɔmɛ a mi ɔ pɛ hiɛ ha mɛ. Yesu je e kaseli ɔmɛ a yi ngɛ níhi fuu nɛ a ngɛ hlae kaa a maa le ɔ he. E de ke:

‘Nyɛ susu nɔ́ nɛ nyɛ ngɛ nue nɛ ɔ he saminya! Susumi nɔ́ nɛ nyɛɛ kɛ susuɔ haa nihi ɔ, lɔ ɔ nɔuu nɛ a kɛ ma susu ha nyɛ; ngɛ anɔkuale mi ɔ, a maa ngmɛ nɔ ha nyɛ.’ (Marko 4:24) Yesu kaseli ɔmɛ a bu níhi nɛ Yesu de ɔ tue saminya. Enɛ ɔ tsɔɔ kaa kaseli ɔmɛ a ngɔ susumi nɔ́ ko kɛ susu ha Yesu, nɛ lɛ hu e susu ha mɛ nɛ e be nɔ kɛ gu níhi a mi nɛ e tsɔɔ mɛ fitsofitso ɔ nɔ. E ha sane nɛ a bi lɛ ngɛ nɔ́ hetomi nɔ́ nɛ kɔɔ ngma a kɛ hu ɔ he ɔ heto ke:

‘Nɔ nɛ du wu kpakpa a ji Nɔmlɔ Bi ɔ nɛ. Ngmɔ ɔ ji je ɔ; wu kpakpa a ji Matsɛ Yemi ɔ mi bimɛ ɔmɛ; hu ɔ ji nɔ yayami ɔ bimɛ. He nyɛlɔ ɔ nɛ du hu ɔ ji Abosiami. Ngma kpami be ɔ ji je nɛ ɔ nyagbe be, nɛ ngma kpali ɔmɛ ji hiɔwe bɔfo ɔmɛ.’​​—Mateo 13:37-39.

Enɛ ɔ se ɔ, e tsɔɔ mɛ nɔ́ nɛ maa je mi kɛ ba. E de kaa ngɛ nyagbe be ɔ mi ɔ, ngma kpali ɔmɛ loo hiɔwe bɔfo ɔmɛ maa hiaa hu ɔ, nɛ ji lakpa Kristofohi kɛ je “Matsɛ Yemi ɔ mi bimɛ ɔmɛ” a kpɛti. ‘A ma bua dali ɔmɛ a nya’ nɛ “a ma kpɛ kaa pu ngɛ a Tsɛ ɔ hiɔwe matsɛ yemi ɔ mi.” Se mɛni maa ba “nɔ yayami ɔ bimɛ” ɔmɛ a nɔ? Mɛɛ lɛɛ ‘a maa wo yana, nɛ a ma kpe a lungu nya’ ejakaa a ma kpata a hɛ mi.​​—Mateo 13:41-43.

Jehanɛ ɔ, Yesu ya nɔ nɛ e de e kaseli ɔmɛ nɔ́ hetomi níhi etɛ kɛ piɛɛ nɔ́ nɛ e de mɛ momo ɔ he. Kekleekle ɔ, e de mɛ ke: “Hiɔwe matsɛ yemi ɔ ngɛ kaa kikɛ nɛ ɔ: Nyumu ko ya na juetli ngɛ zugba ko mi. Benɛ e na juetli ɔ, e ngɔ laa ekohu. Bua jɔmi sɔuu nɛ e ná he je ɔ, e ho nɛ e ya jua nihi tsuo nɛ e ngɛ ɔ, nɛ e kɛ he jamɛ a ngmɔ ɔ.”​​—Mateo 13:44.

 Yesu ya nɔ nɛ e de ke: “Hiɔwe matsɛ yemi ɔ ngɛ kaa kikɛ nɛ ɔ: Jua yelɔ ko lɛ ngɛ adiagba saminyawiiwi hlae. Benɛ e na adiagba saminyayoo kake nɛ he jua wa a, e ho nɛ e ya jua níhi tsuo nɛ e ngɛ ɔ, nɛ e kɛ he.”​​—Mateo 13:45, 46.

Ngɛ nɔ́ hetomi níhi enyɔ nɛ ɔmɛ tsuo a mi ɔ, Yesu ngɛ tsɔɔe kaa nihi a bua jɔɔ kaa a maa ngɔ a níhi kɛ sã afɔle ngɛ ní kpakpahi a he. Jua yelɔ ɔ ya jua “níhi tsuo nɛ e ngɛ ɔ” oya nɔuu bɔ nɛ pee nɛ e nyɛ nɛ e he adiagba saminyayoo ɔ. Benɛ Yesu ngɛ nɔ́ hetomi nɔ́ enyɔne ɔ dee pɛ kɛkɛ nɛ e kaseli ɔmɛ a na nɔ́ nɛ e ngɛ tsɔɔe ɔ. Ejakaa ngɛ nɔ́ hetomi nɔ́ nɛ kɔɔ nyumu ɔ nɛ e ya na juetli ngɛ zugba ko mi ɔ hu mi ɔ, e ho nɛ “e ya jua níhi tsuo nɛ e ngɛ ɔ,” nɛ e kɛ he jamɛ a zugba a. Ngɛ nɔ́ hetomi níhi enyɔ ɔmɛ tsuo a mi ɔ, nyumu ɔmɛ na nɔ́ ko nɛ he jua wa nɛ a suɔ kaa a ma ná. Wa ma nyɛ maa ngɔ enɛ ɔ kɛ to níhi nɛ nihi kɛ sãa afɔle ngɛ Mawu jami he ɔ he. (Mateo 5:3) Nihi nɛ a ngɛ Yesu tue bue ɔ, a kpɛti ni komɛ ngɔ a ní komɛ kɛ sã afɔle nɛ a bɔni Yesu se nyɛɛmi momo po.​​—Mateo 4:19, 20; 19:27.

Nyagbe ɔ, Yesu ngɔ hiɔwe Matsɛ Yemi ɔ kɛ to ya nɛ a fɔ ngɛ wo mi, nɛ e gbe lo slɔɔtoslɔɔtohi babauu he. (Mateo 13:47) Benɛ a hla lo ɔ mi ɔ, a bua kpakpa amɛ a nya, se yaya amɛ lɛɛ a sake kɛ pue he. Yesu tsɔɔ kaa jã nɛ níhi maa ya nɔ ngɛ nyagbe be ɔ mi​—hiɔwe bɔfo ɔmɛ ma gba dali ɔmɛ kɛ nimli yaya amɛ a mi.

Yesu nitsɛ je nimli a hɛmi ní tsumi ɔ sisi benɛ e tsɛ e kaseli ɔmɛ kaa a ba pee ‘nimli a hɛli’ ɔ. (Marko 1:17) Se e tsɔɔ kaa nɔ́ hetomi nɔ́ nɛ kɔɔ ya a he ɔ maa ba mi ngɛ ‘je nɛ ɔ nyagbe be ɔ mi.’ (Mateo 13:49) Enɛ ɔ ha nɛ bɔfo ɔmɛ kɛ kaseli kpa amɛ nɛ a ngɛ Yesu tue bue ɔ na kaa ní kpakpahi fuu ngɛ blɔ nɔ kɛ ma.

A ti ni nɛmɛ nɛ a bu Yesu tue benɛ e ngɔ nɔ́ hetomi ní ɔmɛ kɛ tsu ní ngɛ wo ɔ nya a ná he se wawɛɛ. Ní komɛ ngɛ nɛ Yesu suɔ kaa “ke e piɛ e kɛ e kaseli ɔmɛ pɛ” loko e ma de. (Marko 4:34) Yesu ngɛ kaa “wetsɛ ko nɛ jeɔ ní hehi, kɛ ní momohi kɛ jeɔ e nito he.” (Mateo 13:52) Pi nɛ Yesu ngɛ fĩae, mohu ɔ, e ngɛ e kaseli ɔmɛ tsɔɔe kaa anɔkualehi nɛ e ngɛ mɛ tsɔɔe ɔ a he jua wa pe nɔ́ tsuaa nɔ́. Se ngɛ anɔkuale mi ɔ, nɔ ko be zugba nɛ ɔ nɔ nɛ e ‘le ní tsɔɔmi’ kaa Yesu.