Eko ɔ, Yesu ngɛ Samaria loo Galilea loloolo. Farisi bi ɔmɛ ya bi Yesu bɔ nɛ Matsɛ Yemi ɔ ma plɛ kɛ ba ha a he sane. Jinɛ a susu kaa Matsɛ Yemi ɔ maa ba kɛ hɛ mi nyami, nɛ nihi maa na. Se Yesu de mɛ ke: ‘Mawu Matsɛ Yemi ɔ be bae kaa nɔ́ ko nɛ a maa na kɛ hɛngmɛ; Nɔ ko hu be dee ke, “O nɛ, e ngɛ hiɛ ɔ” aloo “E ngɛ lejɛ ɔ”; ejakaa Mawu Matsɛ Yemi ɔ ngɛ nyɛ kpɛti.’​​—Luka 17:20, 21.

Ni komɛ susu kaa nɔ́ nɛ Yesu de ɔ tsɔɔ kaa Matsɛ Yemi ɔ ngɛ Mawu sɔmɔli a tsui mi. Se pi jã nɛ Yesu ngɛ tsɔɔe, ejakaa Matsɛ Yemi ɔ be nyɛe maa hi Farisi bi nɛ Yesu kɛ mɛ tu munyu ɔ a tsui mi. Se kɛ̃ ɔ, Matsɛ Yemi ɔ ngɛ a kpɛti, ejakaa jamɛ a be ɔ mi ɔ, Yesu nɛ e ji Mawu Matsɛ Yemi ɔ nya Matsɛ ɔ ngɛ a kpɛti.​​—Mateo 21:5.

Benɛ Farisi bi ɔmɛ je ɔ, Yesu tsɔɔ e kaseli ɔmɛ níhi fuu kɛ kɔ bɔ nɛ Matsɛ Yemi ɔ ma plɛ kɛ ba ha a he. Yesu bɔ kaseli ɔmɛ kɔkɔ ngɛ Matsɛ Yemi nɛ a kɛ ma ha lɛ ɔ he ke: “Be ma nɛ nyɛ ma hla kaa nyɛ maa na be ɔ nɛ Nɔmlɔ Bi ɔ maa ba ngɛ e hɛ mi nyami mi ɔ we ligbi kake pɛ, se nyɛ be nae.” (Luka 17:22) Yesu ngɛ mɛ tsɔɔe kaa nɔmlɔ Bi ɔ Nɔ Yemi ɔ be bae ngɛ a be ɔ mi, mohu ɔ, e maa ba hwɔɔ se. Loko jamɛ a be ɔ maa su ɔ, kaseli ɔmɛ maa hyɛ e bami ɔ blɔ hluu, se e sa nɛ a ya nɔ nɛ a mlɛ kɛ ya si be nɛ Mawu to kɛ ha nɔmlɔ Bi ɔ bami ɔ.

Yesu ya nɔ nɛ e de mɛ ke: “Ni komɛ ma de nyɛ ke, ‘Hyɛ e ngɛ lejɛ ɔ’, aloo, ‘Hyɛ, e ngɛ hiɛ ɔ!’ Se nyɛ ko ya nyɛɛ jamɛ a ni ɔmɛ a se. Nɔmlɔ Bi ɔ maa ba, nɛ a maa na lɛ paa kaa bɔ nɛ oslabai kpɛɔ ngɛ hiɔwe nɛ e haa je ɔ tsuo la a.” (Luka 17:23, 24) Mɛni maa ye bua Yesu kaseli ɔmɛ konɛ a ko ya nyɛɛ lakpa mesiahi a se? Yesu tsɔɔ kaa Mesia a bami ɔ maa pee kaa bɔ nɛ oslabai gbaa nɛ nihi naa ngɛ he tsuaa he ɔ. Okadihi nɛ maa tsɔɔ kaa a wo Kristo matsɛ ɔ maa je kpo ngɛ he tsuaa he, nɛ nihi nɛ a kɔɔ nɔ́ se ɔ maa na.

Yesu ngɔ e bami ɔ kɛ to nɔ́ ko nɛ ba blema a he konɛ e kaseli ɔmɛ nɛ a na bɔ nɛ nihi maa pe a ní ha hwɔɔ se. E de ke: ‘Loko nɔmlɔ Bi ɔ maa ba a, níhi nɛ ya nɔ ngɛ Noa be ɔ mi ɔ, maa ba mi jã nɔuu. Jehanɛ hu, níhi nɛ ya nɔ ngɛ Lot be ɔ mi ɔ, maa ba mi jã nɔuu: Kikɛ nɛ ɔ a ngɛ ní yee, nɛ a ngɛ ní nue; a ngɛ ní hee, nɛ a ngɛ ní juae; a ngɛ tsohi due, nɛ a ngɛ tsuhi mae. Ligbi ɔ nɛ Lot je Sodom ɔ, Mawu ha nɛ la nɛ ngɛ tsoe gegeege je hiɔwe ba kpata mɛ tsuo a hɛ mi. Ligbi ɔ nɛ nɔmlɔ Bi ɔ hu maa ba kɛ e hɛ mi nyami ɔ, níhi maa ba mi kikɛ nɛ ɔ nɔuu.’​​—Luka 17:26-30.

Ngɛ Noa kɛ Lot a be ɔ mi ɔ, nihi ye ní, nɛ a nu ní, a he ní, nɛ a jua ní, a du ní, nɛ a ma tsuhi. Se Yesu tsɔɔ we kaa ní nɛ ɔmɛ a he je nɛ a kpata a hɛ mi ngɛ. Ejakaa Noa kɛ e weku ɔ, kɛ  Lot kɛ lɛ hu e weku ɔ pee ní nɛ ɔmɛ eko. Nihi nɛ a hi si ngɛ Noa kɛ Lot a be ɔ mi ɔ kɛ a juɛmi mɛ Mawu suɔmi nya ní peemi nɔ, nɛ a ma a hɛ kɛ fɔ níhi nɛ ngɛ nɔ yae ngɛ a be ɔ mi ɔ nɔ. Enɛ ɔ he ɔ, Yesu wo e kaseli ɔmɛ ga kaa a ha nɛ Mawu suɔmi nya ní peemi he nɛ hia mɛ pe nɔ́ tsuaa nɔ́. Yesu tsɔɔ mɛ nɔ́ nɛ e sa kaa a pee konɛ Mawu kó kpata a hɛ mi hwɔɔ se.

E he maa hia nɛ e kaseli ɔmɛ nɛ a hyɛ saminya konɛ je ɔ mi níhi nɛ bɔle mɛ ɔ kó sisi mɛ nɛ “a kpale a se” kɛ ya je ɔ mi. Yesu de ke: “Jamɛ a ligbi ɔ, nɔ nɛ ngɛ e tsu yi mi ɔ, e ko kple si ba kukuɔ níhi ngɛ we ɔ mi. Jã kɛ̃, nɔ nɛ ngɛ ngmɔ si hu e ko kpale e se kɛ ba we mi. Nyɛ kai Lot yo ɔ!” (Luka 17:31, 32) E plɛ pee ngo kpɔ.

Yesu ya nɔ nɛ e tsɔɔ bɔ nɛ níhi maa ya nɔ ha ke nɔmlɔ Bi ɔ bɔni Matsɛ yemi ɔ. E de e kaseli ɔmɛ ke: “Jamɛ a nyɔ ɔ mi ɔ, ni enyɔ maa hwɔ sa kake nɔ; a maa ngɔ nɔ kake kɛ je, nɛ a ma si nɔ kake ngɛ se.” (Luka 17:34) A ma he ni komɛ a yi wami, se a ma kpata ni komɛ a hɛ mi.

Kɛkɛ nɛ kaseli ɔmɛ bi Yesu ke: “Nyɔmtsɛ, jije?” Yesu ha mɛ heto ke: “He nɛ nɔ́ gbogboe fɔɔ si ngɛ ɔ, lejɛ ɔ okpokuhi [‘kɔlehi,’ NW] ma bua a he nya ngɛ.” (Luka 17:37) Ngɛ anɔkuale mi ɔ, kaseli ɔmɛ maa pee a ní kaa kɔlehi nɛ a hyɛɛ ní kɛ yaa tsitsaa. A ma bua a he nya kɛ wo nɔmlɔ Bi ɔ he. Jamɛ a be ɔ mi ɔ, Yesu ma ha mɛ yi wami hemi munyuhi nɛ a ngɔ kɛ to kɛ ha nihi nɛ a ngɛ hemi kɛ yemi ɔ.