Benɛ Yohane Nɔ Baptisilɔ ɔ je e fiɛɛmi ní tsumi ɔ sisi ɔ, nyɔhiɔ ekpa se ɔ, Yesu ya e ngɔ ngɛ Yordan Pa a he. Jamɛ a be ɔ mi ɔ, Yesu ye maa pee jeha 30. Mɛni he je nɛ e ya lejɛ ɔ? Pi nɛ e yaa slaa Yohane kɛkɛ, nɛ pi nɛ e yaa hyɛ bɔ nɛ Yohane ní tsumi ɔ ngɛ nɔ yae ha hulɔ. Yesu ya konɛ Yohane nɛ baptisi lɛ.

Yohane sume kaa e maa baptisi Yesu, nɛ e de Yesu ke: ‘Imi mohu nɛ́ e hia kaa o baptisi mi ɔ, nɛ moo o ma ye ngɔ nɛ ɔ?’ (Mateo 3:14) Yohane le kaa Yesu ji Mawu bi nɛ e fiɛ we e he kulaa. Tse o kai kaa benɛ Maria hɛɛ Yesu hɔ nɛ e ya slaa Elizabet ɔ, Yohane tuu ngɛ e nyɛ Elizabet fɔmi kotoku mi kɛ bua jɔmi. Atsinyɛ jemi ko be he kaa Elizabet bɔ Yohane amaniɛ pee se. Eko ɔ, e de lɛ bɔ nɛ bɔfo ko ba de kaa a ma fɔ Yesu, kɛ bɔ nɛ bɔfohi ya je a he kpo kɛ tsɔɔ to hyɛli komɛ nɛ a ngɛ nga nɔ nyɔ mi nɛ a fɔ Yesu ɔ.

Yohane le kaa yayami peeli nɛ a tsake a tsui lɛ e sa nɛ e baptisi mɛ. Se Yesu lɛɛ e pee we yayami ko. E ngɛ mi kaa Yohane kplɛɛ we mohu lɛɛ, se Yesu de lɛ ke: “Oo, moo kplɛɛ kɛkɛ, ejakaa kikɛmɛ a blɔ nɔ nɛ wa maa gu kɛ pee Mawu suɔmi nya ní.”​—Mateo 3:15.

Mɛni he je nɛ e sa nɛ a baptisi Yesu ɔ? Yesu baptisimi ɔ tsɔɔ we kaa yayami peelɔ ji lɛ nɛ e tsake e tsui. Mohu ɔ, e baptisimi ɔ tsɔɔ kaa e kɛ e he ngɛ hae kaa e maa pee e Tsɛ ɔ suɔmi nya ní. (Hebri Bi 10:5-7) Kapitɛ ji Yesu, se amlɔ nɛ ɔ, be su nɛ e maa je fiɛɛmi ní tsumi ɔ nɛ e Tsɛ nɛ ngɛ Hiɔwe ɔ tsɔ lɛ kaa e ba tsu ngɛ zugba a nɔ ɔ sisi. Anɛ o susu kaa Yohane ngɛ blɔ hyɛe kaa nyakpɛ nɔ́ ko maa ya nɔ ke e ngɛ Yesu baptisie lo?

Yohane bɔ amaniɛ pee se ke: ‘Nɔ nɛ tsɔ mi ke ma ba baptisi nihi ngɛ nyu mi ɔ lɛ de mi ke, “Nɔ nɛ nɔ nɛ mumi ɔ ma ba ma a, lɛ ji nɔ nɛ maa ngɔ mumi klɔuklɔu ɔ kɛ baptisi nihi.”’ (Yohane 1:33) Enɛ ɔ he ɔ, Yohane ngɛ blɔ hyɛe kaa Mawu mumi ɔ maa ba nihi nɛ e ngɛ mɛ baptisie ɔ a kpɛti nɔ ko nɔ. Lɔ ɔ he ɔ, benɛ Yesu je kpo ngɛ nyu ɔ mi nɛ Yohane na ‘Mawu mumi ɔ nɛ ngɛ si kplee kaa okpo nɛ ma e nɔ mami’ ɔ, e pee we lɛ nyakpɛ.​​—Mateo 3:16.

Se benɛ a baptisi Yesu ɔ, pi lɔ ɔ pɛ nɛ ya nɔ. ‘A bli hiɔwe nya ha lɛ.’ Mɛni lɔ ɔ tsɔɔ? Eko ɔ,  benɛ a ngɛ Yesu baptisie ɔ, e kai níhi nɛ e pee ngɛ hiɔwe ɔ. E kai benɛ e ngɛ hiɔwe kaa Yehowa bi, kɛ anɔkualehi nɛ Mawu tsɔɔ lɛ loko e ba zugba a nɔ ɔ.

Jehanɛ hu ɔ, gbi ko je hiɔwe de ke, “Imi nitsɛ ye bi nɛ i suɔ ji nɛ ɔ nɛ! Ee, i ngɛ e he bua jɔmi saminya.” (Mateo 3:17) Mɛnɔ lɛ tu munyu kɛ je hiɔwe ɔ? E be nyɛe maa pee Yesu; ejakaa e kɛ Yohane tsuo nɛ a daa si ngɛ lejɛ ɔ nɛ gbi ɔ pɛ ɔ nɛ. Mawu lɛ tu munyu ɔ nɛ. Enɛ ɔ tsɔɔ heii kaa Yesu ji Mawu Bi. Pi lɛ ji Mawu.

E ngɛ mi kaa nɔmlɔ ji Adam mohu lɛɛ, se Baiblo ɔ tsɛ lɛ ke Mawu bi. Jã a kɛ̃ nɛ benɛ a fɔ Yesu kaa nɔmlɔ ɔ, lɛ hu e ba pee Mawu bi. Benɛ Luka de nɔ́ nɛ ya nɔ ngɛ Yesu baptisimi ɔ se ɔ ta a, e ya nɔ nɛ e de ke: “Benɛ Yesu je e ní tsumi sisi ɔ, e ye maa pee jeha nyingmi etɛ, nɛ bɔ nɛ nihi susuɔ ji e tsɛ ji Yosef, Heli bi ɔ, . . . David bi ɔ, . . . Abraham bi ɔ, . . . Noa bi ɔ, . . . Adam bi ɔ, Mawu bi ɔ.”​​—Luka 3:23-38.

Kaa bɔ nɛ Adam ji “Mawu bi” ɔ, jã a kɛ̃ nɛ benɛ Yesu ba zugba a nɔ kaa adesa a, e ji Mawu bi. Benɛ a baptisi Yesu ɔ, e kɛ Mawu ba ná huɛ bɔmi ehe, nɛ e ba pee Mawu Bi ngɛ mumi mi. Enɛ ɔ he ɔ, Yesu ma nyɛ maa tsɔɔ wɔ Mawu he anɔkualehi, kɛ blɔ nɛ kɛ nɔ yaa wami mi ɔ. Amlɔ nɛ ɔ, Yesu ma si himi ko nɛ ma ha nɛ e ngɔ e wami kɛ sã afɔle kɛ ha adesahi tsuo ɔ sisi jemi.