Ye Womi nɛ Sɛɛɔ Baiblo Mi Sanehi nɛ a tsɔɔ sisi kɛ ya Pangasinan gbi mi ngɛ jeha 2012 ɔ mi ɔ ngɛ jokuɛwi nɛ a ngɛ sukuu yae ngɛ Philippines nɛ a tuɔ jamɛ a gbi ɔ ye buae. Womi nɛ ɔ sa saminya, ejakaa amlaalo ní tsumi he nɛ hyɛɛ sukuuhi a nɔ ngɛ Philippines ɔ kɛ blɔ tsɔɔmi ha sisije sukuuhi kaa a tsɔɔ jokuɛwi ní ngɛ mɛ nitsɛmɛ a je gbi mi.

Gbihi nɛ a tuɔ ngɛ Philippines ɔ hiɛ pe 100, se a juɛmi pee we kake ngɛ gbi nɛ a kɛ maa tsu ní ngɛ sukuu ɔ he. Ngɛ jeha 2012 ɔ mi ɔ, ní tsumi he nɛ hyɛɛ sukuuhi a nɔ yɔse kaa “ke a kɛ gbi nɛ jokuɛ ɔmɛ tuɔ ngɛ we ɔ mi ɔ tsɔɔ mɛ ní ɔ, a leɔ ní mla.” Lɔ ɔ he ɔ, a to blɔ nya konɛ a tsɔɔ jokuɛwi ní ngɛ a je gbi mi.

Gbihi nɛ a to kaa a kɛ maa tsɔɔ mɛ ní ɔ eko ji Pangasinan gbi ɔ. Se nyagba ko ngɛ. Sukuu nɔ hyɛlɔ ko tsɔɔ kaa a be womihi fuu nɛ a kɛ maa tsɔɔ jokuɛwi ní ngɛ Pangasinan gbi ɔ mi. Enɛ ɔ he ɔ, womi nɛ ji, Ye Womi nɛ Sɛɛɔ Baiblo Mi Sanehi nɛ Yehowa Odasefohi je lɛ kpo ngɛ November 2012 kpokpa nɔ kpe ɔ sisi ngɛ Pangasinan gbi mi ɔ ba ngɛ be nya.

A gba womi nɛ ɔ maa pee 10,000 ngɛ kpe ɔ sisi. Jokuɛ tsɔwi kɛ a fɔli bua jɔ kaa a ná womi ɔ ngɛ mɛ nitsɛmɛ a je gbi mi. Nyumu ko kɛ e yo de ke: “Wa bimɛ ɔmɛ a bua womi ɔ he ejakaa a nuɔ sisi saminya.”

Benɛ a gbe kpe ɔ nya a, Odasefohi komɛ ngɔ a Baiblo Mi Sanehi womi ɔ kɛ ya sukuu ko mi ngɛ Dagupan City. Tsɔɔli nɛ a ngɛ lejɛ ɔ be womihi fuu ngɛ Pangasinan gbi ɔ mi, enɛ ɔ he ɔ, a bua jɔ womi nɛ ɔ he wawɛɛ. Fiɛɛli ɔmɛ gba womihi nɛ hiɛ pe 340. Oya nɔuu nɛ tsɔɔli ɔmɛ kɛ womi ɔ bɔni jokuɛ ɔmɛ bɔ nɛ a kaneɔ ní ha ngɛ mɛ nitsɛmɛ a je gbi mi tsɔɔmi.

Yehowa Odasefohi bua jɔ kaa womi nɛ ɔ ngɛ jokuɛwi ye buae. Gbi sisi tsɔɔlɔ ko nɛ ye bua kɛ tsɔɔ Ye Womi nɛ Sɛɛɔ Baiblo Mi Sanehi sisi ɔ de ke: “Pi mwɔnɛ ɔ nɛ wa yɔse se nami nɛ ngɛ womihi nɛ a peeɔ ngɛ nihi a je gbi mi, konɛ e sɛ a tsui mi ɔ he. Lɔ ɔ he ɔ, Odasefohi bɔɔ mɔde kaa a maa tsɔɔ Baiblohi, kɛ Baiblo kasemi níhi a sisi kɛ ya gbihi babauu a mi.”