28 JUNIE 2024
RUSLAND

Drie susters skuldig bevind in Republiek van Kalmikia, Rusland

SPEEL

Op 24 Junie 2024 het die Elista-stadshof van die Republiek van Kalmikia suster Tsagan Chalgaewa, Jekaterina Menkowa en Kisjta Toetinowa skuldig bevind. Tsagan en Jekaterina het albei ’n opgeskorte tronkvonnis van twee jaar gekry. Kisjta het ’n opgeskorte tronkvonnis van drie jaar gekry. Hulle hoef nie op hierdie stadium tronk toe te gaan nie.

Profiel

Tsagan Chalgaewa

Gebore: 1978 (Lagan, Republiek van Kalmikia)

Agtergrond: Het as ’n naaldwerkster gewerk

Het in verskillende godsdienste gesoek na antwoorde op haar vrae. Het die Bybel saam met Jehovah se Getuies begin studeer en bevredigende antwoorde in die Bybel gekry

Gedoop in 2004

Persoonlike kommentare

Waarvoor is jy veral dankbaar gedurende hierdie moeilike tyd?

Ek is veral dankbaar vir die gebede wat my broers en susters namens my doen. Wanneer ek partykeer mismoedig voel, voel dit asof ek net kan huil wanneer ek tot Jehovah bid. Dit is moeilik om die regte woorde te vind. Maar ek weet dat ander ook vir my bid, en ek kan sien hoe Jehovah hierdie gebede beantwoord. Dit motiveer my ook om meer spesifiek vir ander te bid wat deur moeilike tye gaan. Die ondersteuning wat ons mekaar kan gee, is baie vertroostend. Dit herinner my dat ons verenig is terwyl ons deur hierdie moeilike tye gaan.

Jekaterina Menkowa

Gebore: 1982 (Tawn-Gasjoen, Republiek van Kalmikia)

Agtergrond: Het as ’n laboratorium-assistent gewerk

Trou in 2009. Het ’n seun

Was beïndruk om te sien hoe Jehovah se Getuies in ooreenstemming met die Bybel lewe en hoe dit haar lewe verbeter het om Bybelbeginsels toe te pas. Gedoop in 2017

Persoonlike kommentare

Watter tekste in die Bybel het jou vertroue in Jehovah versterk?

Die woorde in Psalm 8:3, 4 versterk my: “Wanneer ek u hemel sien, die werke van u vingers, die maan en die sterre wat u gemaak het, wat is die sterflike mens dat u aan hom dink, en ’n mensekind dat u vir hom sorg?” In ’n figuurlike sin het Jehovah sy vingers gebruik om die heelal en alles daarin te skep. Deur hieraan te dink, verseker dit my dat ek met Jehovah se kragtige ondersteuning niks hoef te vrees nie.

Kisjta Toetinowa

Gebore: 1961 (Nowolesnoi, Astrakan-streek)

Agtergrond: Het as ’n naaldwerkster gewerk. Het as ’n enkelma twee seuns grootgemaak

Kom uit ’n familie wat Boeddhiste is. ’n Kliënt wat een van Jehovah se Getuies is, het haar gehelp om oor die Bybel te leer. Kisjta was bly om te leer hoe om God sonder tradisies en bygelowe te aanbid. Gedoop in 2003

Persoonlike kommentare

Wat het jou gehelp om positief te bly?

Terwyl ek onder huisarres was, moes ek vier maande lank binne die huis bly. Dit was baie moeilik omdat ek ’n woonstel met een vertrek met my seun en sy gesin gedeel het. Ons was sewe mense wat daar gebly het. Omdat ek in so ’n klein plek was en nie die huis kon verlaat nie, het dit ’n negatiewe uitwerking op my gesondheid gehad. Maar dit het my gehelp om na te dink aan die woorde in Spreuke 24:10. Dit sê: “As jy mismoedig word in moeilike tye, sal jy min krag hê.” Ek het besef dat ek moes kies tussen om te fokus op dit wat negatief is of om te soek na dit wat positief is. Ek het nagedink oor die voorbeeld van Josef. Terwyl hy in die tronk was, het hy nie toegelaat dat sy omstandighede hom bitter maak nie. Daarom het ek besluit om te dink aan die positiewe dinge in my lewe en kon ek my vreugde behou.

Ons waardeer hierdie hedendaagse voorbeelde van geloof. En ons is dankbaar om te weet dat Jehovah bewus is van die moeilike tye wat ons deurmaak en ons sal beloon vir ons getrouheid. – Psalm 37:18.

Tydlyn

16 Februarie 2023

Kriminele saak word teen Kisjta gemaak
28 Februarie 2023

Huise word deursoek. Kisjta word na ’n tydelike detensiesentrum gestuur
1 Maart 2023

Tsagan verloor haar werk omdat baie mense weet dat sy as ’n misdadiger aangekla word. Kisjta word uit die tydelike detensiesentrum vrygelaat en onder huisarres geplaas
21 Julie 2023

Kisjta word uit huisarres vrygelaat
19 Desember 2023

Kriminele saak word teen Jekaterina en Tsagan gemaak. Albei word onder reisbeperkings geplaas
9 Februarie 2024

Kisjta word onder reisbeperkings geplaas
1 April 2024

Kriminele verhoor begin
24 Junie 2024

Word skuldig bevind en opgeskorte tronkvonnisse gegee

Sien ook

NUUSBERIGTE

In die tronk weens hulle geloof – Rusland

Jehovah se Getuies in Rusland is in die tronk weens hulle geloof. Vind uit wat hulle geskiedenis is, en kry ’n lys van al die Getuies wat tans in die tronk is.

NUUSBERIGTE