Ɩwɔ numɔ kɛɛ ɛyɛɛ mɔɔ ɔkɔhʋla bela kɛɛ ekenyia agyiahʋnlɩ nɩɩ abusunwa nu anyɩnlɩlelɛ dɩyɛ, naasʋ̃, nninyeni be mɔɔ wʋáhila yɩ ɔhʋanɩ ɩkɔhʋla ikezizi ma ɩkɛyɛ ɛzɩzɩbɛ kɛɛ ɔkɔhɔ ɔzʋlɔ la ekenyia anyɩnlɩlelɛ. (Gyemisi 4:13,14) Sɛ yeyiyia ndwokɔ ɛzɩzɩbɛ a, Nyamɩnlɩ ɩzʋ̃ ɔlɔlɛ nu ɩbʋwa yɛ. Sɛ ɛfa Bayɩbʋlʋ nu egyinalɛzʋ-ndwokɔ eyi mɔɔ ilili ɔzʋlɔ nɩ ɛyɛ egyima a, ɩkɔwʋwa wʋzawʋ nɩɩ wʋ abusunwa ma bekegyina wɔ mmɩlɩ po mɔɔ nninyeni ile salɛ nu nɩ.

MƆ BAYƖBƲLƲ YƖ ƖKÃ: “Mʋnlʋmmɔ bɛvá bɛ adwɩnɩndwɩnɩ munwatĩĩ bogua yɩ zʋ, iluwakɛɛ ɩdwɩnɩ mʋnlʋmmɔ bɔ nwʋ.” (1 Pita 5:7) Kakɛ eɣile bela kɛɛ, kɛ Nyamɩnlɩ yɛ ɩfa odwohilalɛ ɩba wʋ zʋ a. (Gyemisi 1:13) Mmɩlɩ mɔ ebike Nyamɩnlɩ nɩ, ɩkɔwʋwa wʋ wɔ ɔhʋanɩ baaba zʋ. (Hibulumaa 13:5, 6) “Mʋnlʋmmɔ bɔwɔ́ mpayɩ eɣile bela.”—1 Tɛsalonikamaa 5:17

Sɛ ɛkɩnga na osuma wʋ Bayɩbʋlʋ yɩ eɣile bela a, sa enyia ɛɣɛɛlɛ yɩkyɩlɛ. Iluwa eyi zʋ nɩ, ɔkɔnwʋ kezimɔ Gyehova “ɩkyɩkyɩ yɛ ɛɣɛɛlɛ wɔ yɛ amanɩyɛnwʋnlɛ munwatĩĩ nu.” (2 Kɔlɛntɩmaa 1:3, 4; Wulomimaa 15:4) Ɩwɔ anʋhʋba kɛɛ ɩkɛva “Nyamɩnlɩ azʋ̃nudwolɩyɛ nɩ mɔɔ ɩtɛla enii yɩ ntɩyasɩ munwatĩĩ nɩ” ɩkɛma wʋ. —Fɩlɩpɩmaa 4:6, 7, 13.

MƆ ƆKƆHƲLA ƐKƐYƐ:

• Bɔ́ Gyehova mpayɩ na ɩma enyia abʋtalɩ na ɔdwɩnɩ nninyeni nwʋ bʋwɔ

• Sia sunzu nninyeni mɔɔ ɔkɔhʋla ɛkɛyɛ nwʋ na yɛ mɔɔ ɩkɔwʋwa wʋ

MƆ BAYƖBƲLƲ YƖ ƖKÃ: “Enii mɔɔ ɩwɔ ntɩyasɩ nɩ, yɩ ahʋnlɩnɩ inyia nnimidi, na nɣɛlɛbɛvʋlɔ yɩ azʋ̃ ɩpɩbɛ nnimidi.” (Proverbs 18:15, NWT) Nwʋ odwokɔ yɩ nɩ yɩ anyɩ zʋ. Bɔ mmɔdɩnɩ na nwʋ mɔɔ wʋ abusunwanii bela ihyinyia. Ɛ nɩɩ bɛ dɩndɛ, na tiye bɛ bʋwɔ.—Proverbs 20:5, NWT.

Na sɛ wʋ dɔvʋlɔ be sʋ̃ iwu ɛ? Máma ɩyɛ wʋ anyɩnlɩdʋnlɛ kɛɛ ekehile kezimɔ ɛtɩ nɣanlɩ. Kakɛ kɛɛ Gyisɛsɩ po “izunli.” (Dwɔɔnʋ 11:35; Ecclesiastes 3:4, NWT) Ɔnwʋmɔ ihyinyia sʋ̃ kɛɛ ekele wʋ mmʋnlɩ na wʋanyia nna baaba. (Maakɩ 6:31) Eyi ɩkɛma ɩkɛyɛ mɛlɛkɛ kɛɛ ekegyina odwokɔ ɛzɩzɩbɛ be yi munwa.

MƆ ƆKƆHƲLA ƐKƐYƐ:

• Ma ɩyɛ wʋ subanɩ kɛɛ mmɩlɩ bela ɛ nɩɩ wʋ abusunwamaa nɩ mmɔ kɔwɔ nkɔmɔ ansaana asianɩ be iazi. Sɛ ɛyɛ ɔzɔ a, ɩlɛ́ma ɩkɛyɛ ɛzɩzɩbɛ kɛɛ bɛ nɩɩ wʋ kɛdɩndɛ wɔ mmɩlɩ mɔɔ ndwokɔ ɛzɩzɩbɛ be idwodwu nɩ

• Ɛ nɩɩ mmenii mɔɔ ebiye a, beyiyia ɔzɔ odwokɔ yɩ be kyɩ̃ nɩ, bɔwɔ ɔnwʋmɔ nkɔmɔ

MƆ BAYƖBƲLƲ YƖ ƖKÃ: “Ɔhɔnwʋ baaba ɩda ɔlɔlɛ ali mmɩlɩ munwatĩĩ, na ɩdɩ aliyema mɔɔ bɔwʋlɩ yɩ bɛmanlɩ anwʋhyɩlɩyɛ mmɩlɩ.” (Proverbs 17:17, NWT) Wʋ ɔhɔnwʋmmɔ bɛkɛbɛ yɩ kɛɛ bɔkɔwʋwa wʋ, naasʋ̃ ebiye a nɩ bézi mɔɔ bɛyɛ. Mɩáfa mɔɔ ehyinyia nɩ siye bɛ. (Proverbs 12:25, NWT) Akʋ̃ sʋ̃, pɩbɛ Bayɩbʋlʋ nu mmʋwalɩyɛ wɔ mmenii mɔɔ bɛtɩ Bayɩbʋlʋ yɩ tʋ nɩ bɛ ɛkɛnɩ. Ɔhʋanɩhilelɛ mɔɔ ɩzʋ̃ Bayɩbʋlʋ yɩ nu mɔɔ bɛkɛva bɛkɛma wʋ nɩ ɩkɔhʋla ɩkɔwʋwa wʋ.—Gyemisi 5:14.

Sa enyia mmʋwalɩyɛ mɔɔ ehyinyia wɔ mmɩlɩ mɔɔ ɔkɔ ɔzʋlɔ ɛ nɩɩ mmenii mɔ bɔwɔ dedi kezile wɔ Nyamɩnlɩ nu na bede yɩ anʋhʋba azʋlɔtʋ nɩ bedi nɩ bɔ nɩ. Sa enyia ɛɣɛɛlɛ yɩkyɩlɛ kezile sʋ̃ wɔ mmɩlɩ mɔɔ ɔbʋwaa mmenii mvʋlɔ sʋ̃ mɔɔ behyinyia ɛzɩzɩbɛhyɛlɛ nɩ. Kã wʋ dedi mɔɔ ɔwɔ wɔ Gyehova ɩ nɩɩ yɩ anʋhʋba azʋlɔtʋ nu nɩ sʋ̃ kile bɛ. Bɔ mmɔdɩnɩ bʋwa mmenii mvʋlɔ mɔɔ behyinyia mmʋwalɩyɛ nɩ, na akʋ̃ sʋ̃ íni mɔɔ ɛtɩ wʋ nwʋ wɔ mmenii mɔɔ bɔdɔ wʋ na bɔdwɩnɩ wʋ nwʋ nɩ bɔ nwʋ.—Proverbs 18:1, NWT; 1 Kɔlɛntɩmaa 15:58.

MƆ ƆKƆHƲLA ƐKƐYƐ:

• Ɛ nɩɩ wʋ ɔhɔnwʋ mɔɔ ibike wʋ paa nɩ dɩndɛ, na ma ɩwʋwa wʋ

• Kã dɩyɛ pɔkyɩ̃ɩ̃ mɔɔ ehyinyia nɩ nwʋ odwokɔ