OZUMALƐDƖYƐ 3
Ɣɩlahabɩ Ileli Gyehova Ilili
Ma yɛva yɩ kɛɛ yɛwɔ Gyɛlɩko twonwa yi nu. Twonwa eyi ɩwɔ Kenaanɩ azɩlɛ zʋ, mɔɔ numɔ mmenii nɩ bɛále Gyehova bedi. Baalɛ be mɔɔ bɔfʋlɔ yɩ Ɣɩlahabɩ nɩ ɩda ɛkɩhyɩ.
Mmɩlɩ mɔɔ nɩ Ɣɩlahabɩ ɩdɩ kuakula baalɛ nɩ, ɩdɩlɩ ndwokɔ be mɔɔ ɩfalɩ kezimɔ Mosisi ibukoli ngyemvile kɔkɔlɔ yi nu anwɩ̃, na ilili Yizilayamaa nɩ bɛ anyunu ma bɔzʋ̃ Igyibiti bɛyɩlɩ bɔnwʋ nɩ. Izialɩ sʋ̃ ɩdɩlɩ kezimɔ Gyehova ɩwʋwalɩ bɛ ma belili nkunimi wɔ bɛ adamvʋlɔ bɔzʋ wɔ ahʋnɛ nu. Sikalɛ yɩ mɛyɩ, ɩdɩ kɛɛ Yizilayamaa bɛɣa bohunwahunwa bo munwa wɔ dɩka be mɔɔ ibike Gyɛlɩko!
Ɣɩlahabɩ ɩwɔlɩ ɛdɩdɛlɛmaa nɩ bɔnwʋ banɩ iluwakɛɛ nɩ ide Gyehova idi
Nunuma ɔkʋ̃ be nɩ, Yizilayamaa anwɩ̃ be bɔhɔlɩ Gyɛlɩko kɛɛ bɛkehilahila twonwa yi nu na bɛahɔ bɛahã. Bɛɣalɩ Ɣɩlahabɩ yɩ awudo. Na ileli bɛ. Awulo idwoli nɩ, Gyɛlɩko bulombunli nɩ ɩdɩlɩ kɛɛ ɛdɩdɛlɛmaa be bɛɣa twonwa yi nu ɛkɛnɩ na bɔhɔ Ɣɩlahabɩ yɩ awudo. Meti, bulombunli ɩzʋ̃manlɩ mmenyia be kɛɛ bɔhɔ́ bɛhyɩ bɛ. Ɣɩlahabɩ ɩvalɩ bɛ iziyeli yɩ aliyia yi tisʋlɔ na ɩhanlɩ ihileli bulombunli yɩ mmenii nɩ mmɔ kɛɛ: ‘Nɩ ɛdɩdɛlɛmaa yɩ nɩ wɔ ɛkɩhyɩ, naasʋ̃ bɔzʋ̃ twonwa yi nu bɔhɔ dada. Sɛ bɔtʋwa bɛ sikalɛpɛyɩ yɩ a, sa bɔkʋla bɛkyɩ bɛ!’ Ezi sianti mɔɔ Ɣɩlahabɩ ɩbɔɔ ɛdɩdɛlɛmaa nɩ bɔnwʋ banɩ yɩ a?— Iluwakɛɛ ileli Gyehova ilili na nɩ izi kɛɛ Gyehova ɩkɛva Kenaanɩ azɩlɛ yɩ nɩ ɩkɛma Yizilayamaa.
Ansaana ɛdɩdɛlɛmaa yɩ nɩ bɔzʋ̃ Ɣɩlahabɩ yɩ awudo bɛ bɛahɔ nɩ, bɔwɔlɩ anʋhʋba yɩ kɛɛ, bekele ɩ nɩɩ yɩ abusunwamaa nɩ mmɔ mmɩlɩ mɔɔ bɛbazɩkɛ Gyɛlɩko nɩ. Ezi mɔɔ bɛhanlɩ behileli yɩ kɛɛ ɩyɛ a?— Bɛhanlɩ kɛɛ: ‘Dé ɛyɛma kɔkɔlɔ eyi, na fa kyingyeni wʋ tokulo yi munwa. Sɛ ɛyɛ ɔzɔ a, abiyela mɔɔ ɩwɔ wʋ awudo ɛkɩhyɩ nɩ ikenyia nnwʋanlɩ.’ Ɣɩlahabɩ ɩyɛlɩ mɔɔ ɛdɩdɛlɛmaa nɩ bɛhanlɩ kɛɛ ɩyɛ nɩ pɛpɛɛpɛ. Ezi mɔɔ izili aɣinzi nɩ a?—
Gyehova ileli Ɣɩlahabɩ nɩɩ yɩ abusunwamaa nɩ mmɔ
Wɔ eɣile ɛgyɩkɩ̃ɩ̃ be mɛda nɩ, Yizilayamaa nɩ bodualɩ twonwa yɩ nwʋ beyiyialɩ mɔɔ bɛáyɛ dede bela. Wɔ eɣile ɔkʋ̃ bela nɩ, nɩ botua twonwa nɩ nwʋ beyiyia ɔkʋ̃, bɛyɛlɩ ɔzɔ aɣile ahyiã. Naasʋ̃ wɔ eɣile mɔɔ ɩtɔ ɔzʋlɔ asunwa nɩ, bodualɩ ɔnwʋmɔ beyiyialɩ mbɔmɩ asunwa. Na akʋ̃, bo munwatĩĩ bedɩnyɩanlɩ numɔ kezile. Gyehova ɩmanlɩ twonwa yɩ banɩ nɩ igolɔlɩ igualɩ azɩ. Naasʋ̃ aliyia nɩ mɔɔ bɛvalɩ ɛyɛma kɔkɔlɔ begyingyenli yɩ tokulo yi munwa nɩ iábubu! Asʋ̃ ɔnwʋ yɩ wɔ mfonyini yi nu a?— Beleli Ɣɩlahabɩ nɩɩ yɩ abusunwamaa nɩ mmɔ!
Mɩnla yɛ ɔkɔhʋla okozuma wɔ mɔɔ Ɣɩlahabɩ ɩyɛlɩ yi nu a?— Ɣɩlahabɩ ileli Gyehova ilili iluwa nninyeni mɔɔ nɩ ɩyɛ nnwʋánlɩ mɔɔ izumanlɩ ɩvalɩ ɩnwʋ nɩ ti. Wʋzawʋ sʋ̃ osumaa nnwʋánlɩ nninyeni sʋ̃maa mɔɔ ɩfalɩ Gyehova ɩnwʋ. Asʋ̃ ede Gyehova edi kɛmɔ Ɣɩlahabɩ ileli yi ilili nɩ a?— Yezi kɛɛ ede yɩ edi!
