OZUMALƐDƖYƐ 8
Dwosaya Inyianlɩ Ɔhɔnwʋmmɔ Baaba
Sɛ ekila a, ɩyɛ ɛzɩzɩbɛ kɛɛ ɛkɛyɛ dɩyɛ mɔɔ ɩdɩ baaba a?— Mmenii sʋ̃maa bede betiã numɔ kɛɛ ɩyɛ ɛzɩzɩbɛ. Bayɩbʋlʋ ɩkã ikile yɛ kɛɛ, nɩ ɩyɛ ɛzɩzɩbɛ baaba ɩma kuakula benyia be mɔɔ bʋfʋlɔ yɩ Dwosaya nɩ kɛɛ ɩkɛyɛ dɩyɛ mɔɔ ɩdɩ baaba. Naasʋ̃ inyianlɩ ɔhɔnwʋmmɔ baaba ma bɔwʋwalɩ yɩ. Ma yezuma Dwosaya nɩɩ yɩ ɔhɔnwʋmmɔ bɔnwʋ ndwokɔ sʋ̃maa.
Nɩ Dwosaya yɩ papa lɛ Amɔnʋ, Dwudiyia bulombunli nɩ. Nɩ Amɔnʋ ɩ́dɩ enii baaba na nɩ ɩsʋ̃mɩ awʋzʋmɩ. Mmɩlɩ mɔɔ Dwosaya yɩ papa iwuli nɩ, Dwosaya ɩɣa ɩyɛlɩ Dwudiyia bulombunli. Naasʋ̃ nɩ inyia alʋbɔ awɔtwɛ pɛ la! Sɛ ekila a, nɩ ɩdɩ enii tanɩ kɛɛ yɩ papa a?— Anhã, nɩ ɩdɩ enii baaba!
Zɛfanaya ɩwɔlɩ mmenii yɩ kɔkɔ kɛɛ máma bɔsʋ̃mɩ awʋzʋmɩ
Mmɩlɩ po mɔɔ nɩ ɩdɩ kuakula nɩ, nɩ Dwosaya ɩpɛyɩ kɛɛ itiye Gyehova. Meti ɩyɛlɩ yɩ adwɩnɩ kɛɛ, ɩkɛva mmenii mɔɔ bɔdɔ Gyehova nkʋ̃ʋ̃ la kɛɛ yɩ ɔhɔnwʋmmɔ. Na bɔwʋwalɩ Dwosaya sʋ̃ ma ɩyɛlɩ dɩyɛ mɔɔ ɩdɩ baaba. Dwosaya yɩ ɔhɔnwʋmmɔ bonu be yɛ lɛ aninyiammɔ a?
Nɩ yɩ ɔhɔnwʋmmɔ bonu ɔkʋ̃ yɛ lɛ Zɛfanaya. Nɩ Zɛfanaya ɩdɩ nkɔmɩhyɛnii mɔɔ ɩbɔ mmenii mɔɔ bɔwɔ Dwudiyia nɩ kɔkɔ kɛɛ, sa nninyeni tanɩ ɩtʋdʋ bɛ sɛ bɔsʋ̃mɩ awʋzʋmɩ a. Dwosaya idiyeli Zɛfanaya na ɩzʋ̃mɩnlɩ Gyehova, na ɩásʋ̃mɩ awʋzʋmɩ.
Nɩ Dwosaya yɩ ɔhɔnwʋmmɔ bonu ɔkʋ̃ sʋ̃ yɛ lɛ Gyɛlɩmaya. Nɩ ɩ nɩɩ Dwosaya munwala bɛsɛ atipɛnɩ, na mmɩlɩ mɔɔ nɩ benyii nɩ, nɩ bɛda bebike bɔnwʋ. Nɩ bɛdɩ ɔhɔnwʋmmɔ baaba paa ma ɩzɔ ti mmɩlɩ mɔɔ Dwosaya iwuli nɩ, Gyɛlɩmaya ɩhɛlɛlɩ ndwomi sʋnʋnkʋ̃ be ɩva ihileli kezimɔ yɩ ɛɣɛɛlɛ ɩlɔ Dwosaya nɩ. Gyɛlɩmaya nɩɩ Dwosaya bɔwʋwalɩ bɔnwʋ bɔnwʋ ma bɛyɛlɩ dɩyɛ mɔɔ ɩdɩ baaba na bɛyɛlɩ sutiye bɛmanlɩ Gyehova.
Dwosaya nɩɩ Gyɛlɩmaya bɔwʋwalɩ bɔnwʋ bɔnwʋ ma bɛyɛlɩ dɩyɛ mɔɔ ɩdɩ baaba
Mɩnla yɛ ɔkɔhʋla okozuma wɔ mɔɔ Dwosaya ɩyɛlɩ yi nu a?— Mmɩlɩ po mɔɔ nɩ Dwosaya ɩdɩ kuakula ɛgyɩkɩ̃ɩ̃ po nɩ, nɩ ɩpɛyɩ kɛɛ ɩyɛ dɩyɛ mɔɔ ɩdɩ baaba. Na nɩ izi kɛɛ, ɩsɛ kɛɛ ɩfa mmenii mɔɔ bɔdɔ Gyehova nɩ kɛɛ yɩ ɔhɔnwʋmmɔ. Wʋzawʋ sʋ̃ kila kɛɛ, ɛkɛva ɔhɔnwʋmmɔ mɔɔ bɔdɔ Gyehova na bɔkɔhʋla bɔkɔwʋwa wʋ ma ɛkɛyɛ dɩyɛ mɔɔ ɩdɩ baaba!
