BƆHƆ́ ƆZƲLƆ BƆWƖƐNƖ!
2023: Ɔlʋbɔ Mɔɔ Ɩvalɩ Adwɩnɩndwɩnɩ Sʋ̃maa Ɩɣalɩ—Mɩnla Yɛ Bayɩbʋlʋ Yɩ Kã a?
2023 ɔlʋbɔ yɩ nu nɩ, nninyeni sʋ̃maa zizili wɔ oyuwadɩ yɩ nu mɔɔ idi dasɩlɛ petee kɛɛ yɛda mmɩlɩ mɔ Bayɩbʋlʋ yɩ fʋlɔ yɩ kɛɛ “awielɩyɛ mmɩlɩ” nɩ nu. (2 Timoti 3:1) Kila kezimɔ Bayɩbʋlʋ yɩ hanlɩ nninyeni mɔɔ isizii wɔ nnɛ nɩ nwʋ odwokɔ.
Mɔɔ Bayɩbʋlʋ yɩ hanlɩ nɩɩ mɔɔ isizii wɔ nnɛ
‘Kʋnɛ nɩɩ kʋnɛ nwʋ amanɩyɛwɔlɛ.’—Matiyu 24:6.
“Kʋnɛ nɩɩ basabasayɛlɛ ɩkɔɔ yɩ anyunu wɔ oyuwadɩ yɩ nu nnɩka sʋ̃maa.” a
Kila ndwokɔ eyimmɔ “Aninyia Yɛ Ikele Manlɩmaa Yɩ a?” nɩɩ “Kakɛ Mɔɔ Aɣanɩ Azʋlɔtʋ Bɔwɔ Wɔ Kʋnɛ Nwʋ Nɩ Bʋ 2 Trillion Dɔla.”
“Azɩlɛwʋsʋlɛ ɩkɛɣa nnɩka nnɩka.”—Maakɩ 13:8.
“Ɔzʋmɩ kɛɛ yɛwɔlɩ 2023 ɔlʋbɔ yɩ tʋ nɩ, azɩlɛwʋsʋlɛ 13 mɔɔ ɩyɛ ɛyɛlɛ paa yɛ izizi a. Azɩlɛwʋsʋlɛ mɔɔ izizili wɔ ɔlʋbɔ eyi nu nɩ zʋnlɩ tɛla mmɩlɩ bela mɔɔ ɩɣa ɩzɩ̃ ɩhɔ wɔ abakɔsɛmɩ nu.” b
Kila odwokɔ eyi “Azɩlɛwʋsʋlɛ Kezile Be Izi Wɔ Turkey Nɩɩ Syria.”
‘Nninyeni ɛyɛlɛ ɛyɛlɛ kɛɣa.’—Luuku 21:11.
“Kezimɔ oyumi bʋwayɛlɛ yɛ ɛhyɩmɛ nɩ, sʋlɔ la yɛ ɩkɔɔ a.”—António Guterres, UN bɛ ɛhɛlɛlɛvʋlɔ ebani. c
Kila odwokɔ eyi “Oyumi Bʋwabɩlɛ Mɔɔ Ɩyɛ Ɛhyɩmɛ Aɣile Asã Yɩ.”
“Kɔmɩ ikezi.”—Matiyu 24:7.
“2023: Ɔlʋbɔ mɔɔ nɩ ɩyɛ sɩ kɛɛ mmenii kenyia alɩyɛ kɛma bo mmusunwamaa.” d
Kila odwokɔ eyi “Oyuwadɩ Munwala Alɩyɛ Kɔmɩ Mɔɔ Kʋnɛ Nɩɩ Oyumi Nzɩnzanlɩyɛ Va Ɣa Nɩ.”
“Mmɩlɩ mɔ numɔ yɛ sɩ kɛɣa.”—2 Timoti 3:1.
“Wɔ oyuwadɩ munwala nɩ, sɛ ɛyɩ mmenii awɔtwɛ bela kyina ahanlɩ a, bo nu ɔkʋ̃ wɔ adwɩnɩ nu adimakɛlɛ.” e
Kila odwokɔ eyi “Mmɩlantɩyɛ Nɩɩ Nɣɛdɛkɛ Mɔɔ Benyiaa Adwɩnɩ Nu Adimakɛlɛ Nɩ Ɩkɔɔ Sʋlɔ.”
Mɩnla yɛ yɛkɔhʋla yekehila yɩ ɔhʋanɩ wɔ 2024 a?
Abiyela ízi dɩyɛ pɔkyɩɩ mɔɔ ikezi wɔ 2024 ɔlʋbɔ yi nu. Naasʋ̃ nninyeni mɔɔ isizii nɩ kile kɛɛ ɩlɛ́kyɛ, Nyamɩnlɩ yɩ Bulombunlililɛ, anzɛnyɩɩ sʋlɔ aɣanɩ nɩ kɛɣa keziye enii yɩ aɣanɩ yɩ agyia nu na ikodu debela mɔɔ ɩfa adwɩnɩndwɩnɩ nɩɩ amanɩyɛnwʋnlɛ ɩba nɩ yɩ tʋ kʋlaa kʋlaa.—Danɩyɛlɩ 2:44; Yikile 21:4.
Mmɩlɩ mɔ yɛdɩkɛ kɛɛ eyi kɛɣa numɔ nɩ, sɛ adwɩnɩndwɩnɩ hyɛ yɛ zʋ a, sa yɛkʋla yɛfa yɛ nwʋ yetiã Nyamɩnlɩ zʋ ma ɩbʋwa yɛ. Bayɩbʋlʋ yɩ kã kɛɛ:
“Sɛ bɔlɔ kã mɩ a, mɩfa mʋ nwʋ mitiã wʋ zʋ.”—Ndwomi 56:3.
Kɛ yɛkɛyɛ na yɛahile kɛɛ yɛlɛ Nyamɩnlɩ nu anwʋlazʋ a? Yɛtʋʋ salɛ yɛfʋlɔ wʋ kɛɛ suma sʋ̃maa falɩ mɔɔ Bayɩbʋlʋ yɩ kã falɩ eɣile be mɔɔ amanɩyɛnwʋlɛ bela íni numɔ nɩ nwʋ. Yɛ nɩɩ mmenii suma Bayɩbʋlʋ yɩ mɔɔ yɛále hwɩɩ. Sɛ osuma Bayɩbʋlʋ yɩ a, ɔkɔnwʋ kezimɔ ɛ nɩɩ wʋ abusunwa bekenyia Bayɩbʋlʋ yɩ anʋhʋba zʋ mfasʋ.
a Foreign Affairs, “A World at War: What Is Behind the Global Explosion of Violent Conflict?” by Emma Beals and Peter Salisbury, October 30, 2023.
b Earthquake News, “Year 2023: Number of Major Earthquakes on Course for Record,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” October 10, 2023.
You May Also Like
ESSENTIAL BIBLE TEACHINGS
Nyamɩnlɩ Bulombunlililɛ Nɩ, Mɛyɩ Yɛ Lɛ Mɩnla?
Gyisɛsɩ ihilehileli Nyamɩnlɩ yɩ Bulombunlilɛ nɩ nwʋ ndwokɔ ɩdɛlalɩ dɩyɛ bela. Alʋbɔ sʋ̃maa yɛ dɩ yɛ yɩ adʋwavʋlɔ bɔwɔ ɔzɔ Bulombunlililɛ nɩ nwʋ mpayɩ kɛɛ ɩɣɩla a.
YƐ NWƲ NDWOKƆ
Ma Abiye Ɩɣa Igyela Wʋ
Sa enyia Bayɩbʋlʋ nu odwokɔɣizialɛ nwʋ munwalɩyɛ anzɛnyɩɩ sa osuma sʋ̃maa ɛfalɩ Gyehova Dasɩvʋlɔmaa bɔ nwʋ.
