Gbɔxwe woaɖo afi kɔkwɛ tɔxu nɔ gbedoxɔ lɔɔ, woɖo ato exɔ hwɛhwɛ ɖeka mɛ. Sɔ koɖo Ŋɔŋlɔ Kɔkɔeawo—Xexe Yeye Gɔmeɖeɖe Bibla ci woɖe ti doŋkɔ nɔ exwe 2023 ɔ, “exɔ hwɛhwɛ ci yí le ŋkɔ nɔ gbedoxɔ lɔ jinjin kude 20 ci yí nyinyiɛ kekemɛ nɔ xɔ lɔ, yí eji yiyimɛ yɛ nyi kude 120.” (2 Kro. 3:4) Bibla gɔnmɛɖeɖe buwo can gbenu mɔ exɔ lɔ yi ji kude “120 ” yí ewa mɛta 53 ci nyinyiɛ afɔgba (175)!

Vɔ, le Xexe Yeye Gɔmɛɖeɖe Bibla ci woɖe ti le 2023 mɛɔ, woxo nuxu so exɔ ci yí le ŋkɔ nɔ Salomɔ gbedoxɔ lɔ nu yí nu mɔ: “Eyi ji kude 20,” alo mɛta 9 han (afɔgba 30). a Mìakpɔ enu ciwo yí dɔ wowa trɔtrɔ cɛ.

Wodenu ejiyiyimɛ nɔ exɔ ci yí le ŋkɔ nɔ gbedoxɔ lɔ le 1 Efyɔwo 6:3 mɛ o. Le kpukpui ŋtɔ́ mɛɔ, Ʒeremi xo nuxu so citocitomɛ koɖo kekemɛ nɔ exɔ ci mɛ woato ayi gbedoxɔ lɔ mɛ, vɔ dexo nuxu so ejiyiyi mɛ ni o. Le eta ci yí kplɔɛdo mɛɔ, éxo nuxu so enuvevi buwo nu nɔ gbedoxɔ lɔ, axu ci wosɔ gamu wa, koɖo ahwahunvi amɛ́wo, koɖo ekpemɛmɛ amɛve ciwo yí lénɔ xɔ do te ci wosɔ gamu wa ci yí le ŋkɔ nɔ exɔ ci mɛ woato yí ayi gbedoxɔ lɔ mɛ. (1 Efy. 7:​15-37) Nɔ exɔ ci yí le ŋkɔ nɔ gbedoxɔ lɔ yi ji wu mɛta 50 yí gbeyi ji wu gbedoxɔ lɔ ŋtɔ ɖe, nyi yí taɖo Ʒeremi dexo nuxu so ejiyiyi yitɔ nuɔ? Ci exwe sanŋdi nɛniɖewo vayi can ɔ, Ʒuifuwo xolɔtɔwo ŋwlɛ mɔ exɔ ci yí le ŋkɔ nɔ gbedoxɔ lɔ dejinjin wu exɔ ci Salomɔ wa o.

Wemanyatɔwo dekando ji mɔ gbedoxɔ lɔ gliwo atɛnŋ ahɛn exɔ ci yí le ŋkɔ nɔ gbedoxɔ lɔ ci yí jinjin kude 120 o. Wosɔnɔ ekpe ganganwo koɖo Bliki ganganwo yí sɔ cunɔ exɔwo le sasa hwenu. Le kpɔwɛ mɛ, Eʒipti gbedoxɔ gbowo kekenɔ sugbɔ so le gɔnmɛ keke vaɖo ji. Vɔ Salomɔ gbedoxɔ yɛ to akpo. Wemanyatɔwo nu mɔ yi gliwo yi ji wu kude 6 alo mɛta 2.7 alo 2 koɖo fan enu le ji alo (afɔgba 9). Exolɔtɔ ci yí tanɔ nyigbanwo Theodor Busink cu ta nɔ nyɔ lɔ yí nu mɔ: “Nɔ wokpɔ do fini yí egli lɔwo sɛn ɔ, exɔ ci yí [le ŋkɔ nɔ gbedoxɔ lɔ] datɛnŋ ayi Kude 120 o.”

Ewa shigbe mɔ wodeŋwlɛ 2 Kronika 3:4 nywiɖe nɛ. Ci alɔnu wema xoxuitɔwo ŋwlɛ “120” le kpukpui cɛ mɛ can ɔ, alɔnu wema xoxui buwo shigbe Codex Alexandrinus ci wowa le exwe sanŋdi amatɔntɔ lɔ mɛ koɖo Codex Ambrosianus ci wowa le exwe sanŋdi amadɛntɔ lɔ mɛ, ŋwlɛ mɔ yɛnyi kude “20.” Nyi yí taɖo yí amɛ lɔwo wa afɛn ŋwlɛ nu lɔ yí ŋwlɛ “120” ɔ? Nyɔgbe “sanŋdi ɖeka” koɖo “kude” jinɔ mɔ yewoaɖyi ŋɖekɛ ŋmɛ le Ebregbe mɛ. Eyi taɖo, alɔnuwemaŋwlɛtɔ lɔwo ŋwlɛ “sanŋdi ɖeka” do dumɛ nɔ “kude.”

Le nyɔnɔnwi mɛ, ci mìjejeɛ agbla mɔ mìamɔŋje lé enu lɔwo le do teŋ yí kpɔ lé Salomɔ gbedoxɔ lɔ le doɔ, mìsɔ susu ɖo lé gbɔngbɔnmɛ gbedoxɔ lɔ le do ji koŋ. Ejɔ ji nɔ mì sugbɔ mɔ Yehowa yɔkɔ yi sɛntɔwo pleŋ mɔ woavasɛn ye le gbedoxɔ ŋtɔ́ lɔ mɛ!—Ebre. 9:​11-14; Enyɔ. 3:12; 7:​9-17.