LE EXWE 670 hanwo D.Y. mɛɔ, Asiri vanyi eju ci yí kpa cɛ do eju sugbɔ ji wu le xexeɛ pleŋ mɛ. Blemanuwoɖoxu ɖeka ci yí le Grande-Bretagne nu mɔ: “Asiri cɛkpakpa tɔ so Shipru ci yí le weɖoxɔxu ni keke va ɖo Iran ci yí le wezexu ni, ékpa cɛ do Eʒipti can ji hweɖekanu.” Ninivu yí nyi yi fyɔju hwenɔnu yí gangan wu ejuwo pleŋ le xexeɛ mɛ. Ekpa nyakpɔkpɔ sugbɔ le nɔ, efyɔxwe gangan nyakpɔkpɔwo koɖo wemawoɖoxu ganganwo le nɔ. Enu ciwo woŋwlɛ do Ninivu gliwo nu dasɛ mɔ, Efyɔ Ashurbanipal koɖo Asiri fyɔ buwo yɔ wowoɖekiwo mɔ yewonyi “xexeɛ mɛ fyɔ.” Le hwenɔnuɔ, ewa shigbe mɔ eju ɖekɛ dakpe ji yí aɖu Asiri koɖo Ninivu ji hannɛ.

Vɔ ci Asiri sɛnŋ hwenɔnu ahan can ɔ, Yehowa to yi nyɔnuɖɛtɔ Zefania ji yí nu ɖɛ mɔ: “[Yehowa] . . . agu Asiri. Áwɛ yí mɛɖe dagbenɔ Ninivu kpɔ o, áxu kplakpla shigbe zogbeji hannɛ.” Gbesɔ ta niɔ, Yehowa nyɔnuɖɛtɔ Naxumu nu ɖɛ mɔ: “Mílɔ egajun, mílɔ shika le wo shi! . . . Wogban jugan lɔ yí eci totu, mɛɖe dele mɛ o! . . . Mɛɖekpokpui ci yí akpɔ eo ashi le eo gbɔ yí anu mɔ: ‘Wogban Ninivu!’” (Zef. 2:13, NWT; Nax. 2:9, 10; 3:7, NWT) Ci amowo se nyɔnuɖɛ cɛwoɔ, taŋfuin wotɛnŋ biɔ wowoɖekiwo se mɔ: ‘Nyɔnuɖɛ cɛwo atɛnŋ ajɔ nyaoa? Woatɛnŋ agu Asiri ju sɛnŋ lɔa?’ Agbɔnnu mɔ woakando nyɔ cɛwo ji.

Ci ele nɛnɛ can ɔ, enumaɖoŋdonu lɔ vajɔ! Gbɔxwe woaɖo vɔvɔnu nɔ exwe 700 D.Y. ɔ, Babilonitɔwo koɖo Mɛditɔwo vagu Asiri. Le yiyi mɛɔ, amowo mi Ninivu jugan lɔ mɛ nɔnɔ yí woŋlɔbe keŋkeŋ mɔ jugan ɖe ni ahan kpɔ! Wema ɖeka ci Musée métropolitain d’art ci yí le New York ŋwlɛ nu mɔ: “Woŋlɔbe jugan lɔ keŋkeŋ yí Bibla ɖekɛ yí na amowo vanya mɔ eju ɖe ni kpɔ yí tɔ mɔ Ninivu.” Dɔwaxu ci yí jinɔ nu gɔnmɛ so texwe ciwo nu Bibla xo nuxu so nu mɔ: “Mɛɖe denya sa mɔ Asiri fyɔju gangan ŋtɔ́ ni vayi nyɔnɔnwi o.” Vɔ le xwe 1845 mɛɔ, nyigbanmɛnumɛkutɔ Austen Henry Layard vatɔ nyigban mɛ kuku le fini yí Ninivu jugan lɔ nɔ sa. Enu ciwo yí ekpɔ le egli gbangban lɔwo mɛ dasɛ mɔ Ninivu nyi eju ɖeka ci yí je dɔku vayi nyao.

Lé enyɔ ci wonu ɖɛ so Ninivu nu vamɛ do pɛpɛpɛ do do ŋsɛn kankandoji ci mìɖo mɔ enyɔnuɖɛ ciwo yí le Bibla mɛ yí mɔ woagu acɛkpakpa senŋ ciwo yí li gbɛ ajɔ do ji kokoko.—Dan. 2:44; Enyɔ. 19:15, 19-21.