Enyɔbiɔse Ciwo Yí So Yi Hlɛntɔwo Gbɔ
Izraɛliviwo gbeɖu nubuɖe le zogbeji sɔwu mana koɖo takpɛa?
Le exwe 40 ci yí Izraɛliviwo wa le zogbejiɔ, mana yí nyi ŋɖuɖu vevitɔ ci yí woɖu. (Hun. 16:35) Yehowa na wo takpɛ zeve yí woɖu hɛnnɛ. (Hun. 16:12, 13; Amh. 11:31) Vɔ Izraɛliviwo gbeɖu nubuwo.
Le kpɔwɛ mɛ, hweɖewonuɔ, Yehowa kplɔnɔ wo yi “gbɔndomɛ tɔxu” fini wokpɔnɔ eshi koɖo ŋɖuɖu le. (Amh. 10:33, NWT) Gbɔndomɛ tɔxu lɔ ɖeka yí nyi Elimu, fini yí “gumɛshi wive koɖo deci kahowi-howo le,” ewa mɔ datici yí nyi aci lɔwo. (Hun. 15:27) Wema ci woyɔnɔ mɔ Plants of the Bible nu mɔ, “datici nyi aci ci yí minɔ do texwe sugbɔ, . . yí woɖunɔ sɛnsɛn yitɔ sugbɔ le zogbeji, aci lɔ nanɔ ŋɖuɖu, nanɔ ami yí amɛ miliɔn nɛniɖe zinni yí sɔ wanɔ bexu.”
Ewa mɔ Izraɛliviwo ci te do eshitɔxu gangan ɖeka ci woyɔnɔ gbɛ mɔ Feiran, ci yí le Wadi Feiran mɛ. a Wema ci woyɔnɔ mɔ Discovering the World of the Bible nu mɔ, “eshitɔxu cɛ, alo etɔsasa cɛ jinjin kpeci 130 han, ényi eshitɔxu ci yí jinjin wu, nya kpɔkpɔ wu yí amɛwo gbejeshi ɖɛ wu kpɛtɛwo le Sinai. Nɔ èso le Oasis Feiran yí zɔn mɔ kpeci 45 han ɔ, àyi ɖo fini yí etɔsasa lɔ koɖo axu do go do. Eshitɔxu cɛ yi ji mɛta 610 le axu gbɔ yí keke kpeci amɛnɛ koɖo ŋɖe han. Deciwo sugbɔ le nɔ haan yí enya kpɔkpɔ. Edɛn kpa Sinai tɔ yɔ. Na nɔ xwe nɛniɖeɔ, datici kotokun nɛniɖe ci yí le nɔ dɔ yí amɛ sugbɔ ɖyinɔ sa va nɔ.”
Daticiwo le oasis Feiran
Hwenu Izraɛliviwo so le Eʒipti ɔ, wohɛn eɣɔ, kpanu ciwo mɛ woanya eɣɔ do, yí ewa mɔ wohɛn jinuku ɖewo koɖo ami. Nyɔnɔnwi enyi mɔ ŋcɛwo danɔ wo shi jinjinɖe o. Wogbehɛn “lɛngbɔwo, nyibuwo, koɖo elan sugbɔwo gbigbigbi.” (Hun. 12:34-39) Ci nɔnɔmɛ lɔwo denɔnɔ fafɛɖe le zogbejiɔ, adɔ yí elan sugbɔ aku le wo mɛ. Wowoŋtɔwo tɛnŋ ɖu ɖowo yí sɔ ɖowo sa avɔn nɔ ŋsumawuwo ŋtɔkpu can. b (Edɔwawawo 7:39-43) Vɔ, Izraɛliviwo kpɔtɔ ɖo lanku ɖewo, enyɔ ci Yehowa nu nɔ wo hwenu wogbe to yí dɔ mìanu ahan. Énu nɔ wo mɔ: “Míwo viwo a nyi lɛngbɔkplɔtɔwo le elɛ le zogbe mɛ nanɔ exwe eka.” (Amh. 14:33) Taŋfuin wotɛnŋ ɖenɔ nyibunɔshu nɔ wowo nyibuwo, yí ɖunɔ lan lɔwo gaɖowomɛ. Vɔ le nyɔnɔnwi mɛɔ, ŋcɛwo desun yí ahɛn amɛ miliɔn amɛtɔn han na nɔ xwe 40 o. c
Fini elan lɔwo kpɔnɔ ŋɖuɖu koɖo eshi leɔ? d Hwenɔnuɔ, ewa mɔ eshi janɔ sugbɔ yí egbewo minɔ do zogbeji sugbɔ. Wema ci yí nyi Étude perspicace des Écritures, Volume 1, nu mɔ exwe 3500 han vayiɔ, “eshi sugbɔ nɔ fini Izraɛliviwo nɔ hwenɔnu sɔwu egbɛ. Eshidu ciwo mɛ eshi degbele o ciwo yí cito sugbɔ ciwo yí le nɔ nyi etɔsasawo sa. Wonyi kpeɖoji mɔ hweɖekanu vayiɔ, eshi janɔ sugbɔ keke xɔnɔ do afiwo keke anyi etɔ hanwo.” Ele ahan gan, zogbeji nyi afi ɖeka ci amɛwo denɔnɔ o yí egbeɖyinɔ vɔnvɔn. (2 Ese. 8:14-16) Nɔ Yehowa dena shi wo enujiŋtɔ saɔ, Izraɛliviwo fin wowo lankuwo fin woaku.—Hun. 15:22-25; 17:1-6; Amh. 20:2, 11.
Moizi nu nɔ Izraɛliviwo mɔ Yehowa hɛn wo koɖo mana, ɖo “É ji mɔ [wo] le nya mɔ denyi kpɔnnɔ ɖekɛ yí nanɔ agbe amɛ o. Agbetɔ gbenɔnɔ sonɔ Tɔhonɔ nyɔ gbɔ.”—2 Ese. 8:3.
a Kpɔ Jutakpɔxɔ 1er mai 1992, kpashi 24-25.
b Zeve ciwo yí Izraɛliviwo sɔ elanwo sa avɔn nɔ Yehowa le zogbejiɔ, Bibla xo nuxu so nu. Ŋkɔtɔ nyi hwenu yí woɖoɖoɔ avɔnsatɔwo yí evetɔ nyi Paki zanɖuɖu ji. Exwe 1512 D.Y. mɛ yí wosa avɔn lɔwo koɖo ve le, ényinyiɛ xwe ɖeka han godu nɔ ci woso le Eʒipti.—1 Ese. 8:14–9:24; Amh. 9:1-5.
c Le vɔvɔnu nɔ exwe 40 ciwo wowa le zogbeji mɛɔ, Izraɛliviwo kpɔ elan kotokun sanŋdi nɛniɖe yí sɔ le ahwagbe. (Amh. 31:32-34) Ci enyi ahan can ɔ, woɖukɔ mana keke yí je Gbeɖu Nyigban lɔ ji.—Ʒoz. 5:10-12.
d Ŋɖekɛ deli ci yí dasɛ mɔ elanwo ɖu mana o, ɖo Yehowa nu nɔ wo mɔ wo le lɔnɔ mana lɔ do ci mɛɖeka mɛɖeka aɖu nu yí deyɔ elanwo do mɛ o.—Hun. 16:15, 16.
