ENUKPLAKPLA 5
Susu ci yí taɖo Mawu wa nyigban lɔɔ?
1. Nyi yí taɖo Mawu wa nyigban lɔɔ?
Yehowa sɔ nyigban na agbetɔwo. Mìwo xwe enyi. Déwa Adamu koɖo Ɛva mɔ woaji aɖɔ jeŋkwimɛ o. Ðoɔ, Mawu wa mawudɔlawo do jeŋkwimɛ xoxoxo. (Job 38:4, 7) Mawu sɔ agbetɔ ŋkɔtɔ do Paradiso ci woyɔ mɔ Edɛn kpa mɛ. (Gɔnmɛjeje 2:15-17) Yehowa na Adamu koɖo yi jijimɛviwo mɔnukpɔkpɔ mɔ woanɔ agbe tɛgbɛɛ le jijɔ mɛ le nyigban ji.—Hlɛn Ehajiji Wema 37:29; 115:16.
Le gɔnmɛjeje mɛɔ, Edɛn kpa ɖekɛ kpaŋ yí nyi paradiso. Asu koɖo ashi ŋkɔtɔ yí aji aɖɔ nyigban lɔ ji. Le ŋkɔyiyi mɛɔ, woana yí nyigban lɔ pleŋ atrɔ paradiso. (Gɔnmɛjeje 1:28) Nyigban dagu kpɔ gbeɖe o. Anyi agbetɔwo nɔxu tɛgbɛɛ.—Hlɛn Ehajiji Wema 104:5.
Kpɔ video ci yí nyi Nyi yí taɖo Mawu wa nyigban lɔɔ?
2. Nyi yí taɖo nyigban denyi paradiso le egbɛmɛɔ?
Adamu koɖo Ɛva gbe tonusese nɔ Mawu. Eyi taɖo Yehowa nya wo ti le Edɛn kpa lɔ mɛ. Paradiso lɔ bu, yí mɛɖekpokpui detɛnŋ trɔɖui o. So hwenɔnu yí amɛ baɖawo vaɖɔ nyigban lɔ ji.—Hlɛn Gɔnmɛjeje 3:23, 24.
Yehowa tashi susu ci yí eɖo do agbetɔwo nu le gɔnmɛjeje mɛa? Oo! Ŋsɛnwopleŋtɔ yí enyi. Ŋɖekpokpui datɛnŋ aglui o. (Ezai 45:18) Ána yí enuwo avanɔ nɔ agbetɔwo shigbe lé eji do le gɔnmɛjejeɛ mɛ nɛ.—Hlɛn Ehajiji Wema 37:11, 34.
3. Lé woatrɔ aɖo paradiso lɔ doɔ?
Woatrɔ aɖo paradiso do nyigban ji le Yesu cɛkpakpa hwenu. Le ahwa ci woyɔnɔ mɔ Harmagedɔn mɛɔ, Yesu anɔ ŋkɔ nɔ mawudɔlawo yí woagu amɛ ciwo yí fɔn gu do Mawu ji. Le yi goduɔ, Yesu ale Satana do gamɛ nanɔ exwe 1 000. Yesu acɔn alɔ Mawu mɛwo ji, yí woaci agbe le ahwa lɔ mɛ. Woanɔ agbe tɛgbɛɛ le jijɔ mɛ le paradiso mɛ le nyigban ji.—Hlɛn Enyɔdasɛ 20:1-3; 21:3, 4.
4. Hwenu efunkpekpewo avɔɔ?
Hwenu yí Mawu agu enubaɖawawa le nyigban jiɔ? Yesu na “jeshidu” ciwo yí adasɛ mɔ mìle xexe lɔ vɔvɔnu. Enuvwin ciwo yí jɔkɔ le xexe lɔ mɛ na yí agbetɔwo gbe le afɔku mɛ. Wogbedasɛ mɔ mìle “xexe lɔ [vɔvɔnu].”—Hlɛn Matie 24:3, 7-14, 21, 22.
Le exwe 1 000 nɔ Yesu cɛkpakpa so jeŋkwimɛ va nyigban ji hwenuɔ, áɖe efunkpekpewo pleŋ si. (Ezai 9:6, 7; 11:9) Yesu danyi Efyɔ ɖekɛ o. Ágbenyi Vɔsatɔgan ci yí aɖe mɛ ciwo yí lɔn Mawu nuvɔnwo pleŋ si. Le kleŋ mɛɔ, Mawu ato Yesu ji agu edɔ̀lele, nyɔxokuku, koɖo eku.—Hlɛn 1 Korɛntitɔwo 15:26; Ezai 33:24.
5. Miwo yí avanɔ agbe le paradiso mɛɔ?
Le Fyɔɖuxuxɔwo mɛɔ, àdogo mɛ ciwo yí lɔn Mawu yí gbekplanɔ lé woawɛ nɔ wowo nu ajɔ ji ni
Amɛ ciwo yí se tonu nɔ Mawu anɔ paradiso mɛ. (1 Ӡan 2:17) Yesu dɔ yi nukplaviwo mɔ wo le ji amɛ fafawo, keŋ akpla wo lé woawɛ nɔ́ Mawu akpɔ jijɔ do wo nu. Egbɛmɛɔ, Yehowa kpekpeɛdo amɛ linlɔn (miliɔn) nɛniɖe nu nɔ woavanɔ agbe le paradisonyigban ji le esɔmɛ. (Zefania 2:3, nwt) Le Yehowa Kunuɖetɔwo Fyɔɖuxuxɔwo mɛɔ, wokplanɔ lé woawɛ anyi asu koɖo vida nywi, ashi koɖo vinɔ nywi. Ðeviwo koɖo wowo jilawo sɛnnɔ Mawu doju, yí gbeplanɔ lé woawɛ akpɔ nyɔna so eŋɛnywi lɔwo mɛ.—Hlɛn Mishe 4:1-4.
