Бойысты јебрен Иерихон калада деп сананып ийек, бу кала Ханаа́нныҥ јеринде турган. Ондо јаткан албаты Иеговага бӱтпейдилер. Бу калада Раав деген ӱй кижи јуртайт.

Качан Раав кичинек кызычак болордо, Кызыл талайды Моисе́й канайып эки јара бӧлӱп, Израиль албатыны Египеттеҥ чыгарганы керегинде куучындарды уккан болгон. Ол, Иегова израиль калыкка ӧштӱлерин јеҥерге болушканын база уккан. Је бат, Израиль калык Иерихонныҥ јанында одуланып тура бергенин угуп ийди.

Бир кӱн эҥирде, эки израиль эрлер Иерихонды кайып кӧрӧргӧ баргандар. Качан олор Раавтыҥ айлына келерде, ол олорды кӱӱнзеп туразына кийдирип, кондырып салган. Калада кайучылар бар, олор Раавтыҥ айылында деп, тӱнде Иерихонныҥ каанына тил јетиргендер. Ол ло ӧйдӧ каан олорды тудуп алзын деп, бойыныҥ улузын ийген. Раав эки кайучыны туразыныҥ јабынтызында јажырып јат (ондо јабынтылар тӱс болгон). «Эйе, кайучылдар мында болгон, је тургуза ӧйдӧ олор каладаҥ јӱре берген. Капшайлап кийнинеҥ сӱрӱжип барзагар, олорды једижип аларыгар!» — деп, ол каанныҥ улузына айтты. Раав кайучылдарды нениҥ учун корулап алган сен билериҥ бе?~ Нениҥ учун дезе ол Иеговага бӱткен. Анайда ок Кудай Ханаанныҥ јерин израиль албатыга берер деп билер болгон.

Кайучылдар Раавтыҥ айылынаҥ барардаҥ озо, ол бойы ла оныҥ ончо билези Иерихонныҥ јемирилер ӧйинде аргадалар деп, сӧзин бергендер. Олор Раавка нени этсин деп, айтты?~ «Кызыл бууны алып, кӧзнӧгиҥниҥ тыш јанында буулап сал. Мынайып этсеҥ, сениҥ айылыҥда болгон ончо улус аргадалар» — деп, олор айдат. Кайучылдар ого нени айтканын Раав анайып ла эдет. Је мынаҥ ары не болгонын билериҥ бе?~

Бир канча кӱннеҥ израиль эрлер каланы айландыра унчукпай, базып баштагылады. Алты кӱнниҥ туркунына каланы кажы ла кӱн бир катаптаҥ эбире баскылады. Је јетинчи кӱнде олор каланы јети катап айландыра базып, тыҥ кыйгырып јадылар.  Ол тушта каланы курчап турган стенелерди Иегова јемирип ийди. Је кӧзнӧгинде кызыл буулу тура јемирилбеди! Јурукта оны кӧрӱп туруҥ ба?~ Раав ла оныҥ билези аргадалып тирӱ артты!

Раавтыҥ теми сени неге ӱредер аргалу?~ Раав Иеговага бӱткен, нениҥ учун дезе Кудайдыҥ бастыра эткен кайкалдарын билген. Сен база Иегованыҥ кайкамчылу керектерин билип турар аргалу. Сен Раав чылап Иеговага бӱдӱп тургаҥ ба?~ Эйе деп, бис те алаҥзыбайдыс!