Каандыктыҥ Туралары Иеговага учурлалган, оныҥ учун олорды ару тудуп, кажы ла неме бойыныҥ јеринде болорына јӧмӧшкӧни биске кӱндӱ болот. Каандыктыҥ Туразын арутаары ла керектӱ иштерин эдери — бистиҥ агару ижибистиҥ јаан учурлу бӧлӱги. Мындый иштерге бастыра кӱӱнзеп тургандар туружар аргалу.

Јуунныҥ кийнинде арутаарына артадыс. Кажы ла јуунныҥ кийнинде Каандыктыҥ Туразында јаан эмес арутаары эдилет. Неделеде бир катап Тура јазап аруталып јат. Аксагалдардыҥ эмезе болушчы ишчилердиҥ бирӱзи арутаарыныҥ башкартузыла тузаланып, јакылталарды ӱлештирип берет. Јаҥжыккан аайынча акалар ла эјелер полды јалмап, јунгылап эмезе тоозынын соордырып арчыйт, отургыштарды тӱзеде тургузат, туалетти јунат ла дезинфекция эдет, сӱре чыгарат ла Каандыктыҥ Туразыныҥ айландыра јерди арутап јадылар. Јыл туркунына, ас ла салза, бир катап Тураныҥ ичи-тыштын быжулап јунат. Кезик јакылталарды балдарга берип, олорды туштажулар ӧткӱрилип турган јерди тооп турзын деп ӱредедис (Јарлыкчы 5:1).

Јазаарына болужадыс. Кажы ла јыл Каандыктыҥ Туразын план аайынча кӧрӧри ӧткӱрилет. Керектӱ иштерди ӧй-ӧйинде эдери, ару эдип кичеерине болужат (2 Летопись 24:13; 34:10). Бу кереги јок чыгымдар этпеске болужат. Каандыктыҥ Туразы ару болуп, ончо неме чынык иштеп турза, бистиҥ Кудайыска бажырарына јарамыкту јер болот. Каандыктыҥ Туразын арутап јазаарына туружып, бис Иегованы сӱӱп турганысты ла Оныҥ адыла адалып турган јерди тооп турганысты кӧргӱзедис (Сарын 122:1). Анайда ок Каандыктыҥ Туразы ару ла јараш болзо, айландыра јаткан улустыҥ санаазына јакшы салтарын јетирер (2 Коринфтегилерге 6:3).

• Каандыктыҥ Туразын ару-чек тудары нениҥ учун јаан учурлу?

• Каандыктыҥ Туразы ару болзын деп, канайып јӧмӧжӧдис?