Билени ончо керектӱ немелерле јеткилдеп турарга, акча-манат керек (Укаа сӧстӧр 30:8). Акча-манат кору берет деп Агару Бичикте айдылат (Јарлыкчы 7:12). Эш-нӧкӧрлӧргӧ акчала колбулу сурактарды шӱӱжерге јеҥил эмес болордоҥ айабас, је андый да болзо, мынаҥ улам биледе оҥдошпостор болбозын деп албаданар керек (Ефестегилерге 4:32). Эмеен-ӧбӧӧн акчаны канайып тузаланарында јӧптӧжип, бой-бойына бӱдӱмјилӱ болор учурлу.

АГАРУ БИЧИК НЕНИ АЙДАТ. «Кажы бирӱгер бакана (башня) тудар кӱӱндӱ болзын. Ол озо отурып алып, оны бӱдӱре тударга не-немези јеткил бе деп, тоолоор эмес пе?» (Лука 14:28). Акчаны канайып тузаланарын кожо шӱӱжип турза јакшы (Амос 3:3). Канча акча ӱреерин ле нени аларын јӧптӧжип алыгар (Укаа сӧстӧр 31:16). Акча ла бар дейле, болор-болбос неме албас керек. Тӧлӱге кирбеске албаданыгар. Акчагар јетпегедий неме албагар (Укаа сӧстӧр 21:5; 22:7).

ТУЗАЛУ ЈӦПТӦР

• Акча айдыҥ учына артып калза, оны канайып тузаланарын кожо шӱӱп алыгар

• Акча јетпей калза, нени албаза торт болор эди деп јӧптӧжип алыгар. Темдектезе, акчаныҥ чыгымын астадарга, полуфабрикаттар алардыҥ ордына, курсакты бойоор азып туругар

АГАРУ БИЧИК НЕНИ АЙДАТ. Акча-јӧӧжӧни «јаҥыс та Кайраканныҥ алдында эмес, улустыҥ да алдында јакшы кылынарга» тудуныгар (2 Коринфтегилерге 8:21). Иш-јалыгарды ла чыгымдараарды эш-нӧкӧрӧӧрдӧҥ јажырбагар.

Акча-јӧӧжӧ јанынаҥ јаан сурактарды эш-нӧкӧригерле јаантайын јӧптӧжип туругар (Укаа сӧстӧр 13:10). Эмеен-ӧбӧӧн акча јанынаҥ ачыгынча куучындажып турза, олордыҥ ортозында амыр болор. Бойыгардыҥ иш-јалыгарды мензинбегер, карын оны билениҥ акчазы деп тузаланыгар (1 Тимофейге 5:8).

ТУЗАЛУ ЈӦПТӦР

• Кажыгар ла таҥынаҥ бойы канча кире акча ӱреерин јӧптӧжип алыгар

• Акча-манат јанынаҥ сурактарды кӱчтердеҥ озо шӱӱжигер