Бу брошюрада айдылганыла, Агару Бичикте слерге ле слердиҥ билегерге тузалу болгодый ас эмес јӧптӧр бар. Иегова слерди ырысту болзын деп кӱӱнзейт. Слердиҥ јӱрӱмигерде Кудайдыҥ ижи баштапкы јерде болзо: «Мыныҥ ончозы слерге ӱзеери берилер» — деп, Агару Бичик бӱдӱмјилейт (Матфей 6:33). Иегова слерле најылажып аларга сӱреен тыҥ кӱӱнзейт. Оныла најылажатан аргалардыҥ ончозын тузаланыгар. Кудайдыҥ најызы болоры — эҥ јаан кӱндӱ болот (Матфей 22:37, 38).

АГАРУ БИЧИК НЕНИ АЙДАТ. «„Мен слерге Ада болорым, слер Мениҥ уулдарым ла кыстарым болорыгар“ — деп, Кайракан айдат» (2 Коринфтегилерге 6:18). Кудай слерле јуук најылажып аларга кӱӱнзейт. Кудайла најылажарга, мӱргӱӱл болужат. Оныҥ учун Иегова: «Туркаары [јаантайын, ЈТ] мӱргигер» — деп кычырат (1 Фессалоникадагыларга 5:17). Ол слердиҥ санааркаштараарды ла кӧгӱстеги санаалараарды угарга јаантайын белен (Филиппыдагыларга 4:6). Слер билегерле кожо Иеговага мӱргӱп турзагар, тӧрӧӧндӧрӧӧр слердиҥ Кудайга алаҥзу јогынаҥ бӱдӱп турганыгарды кӧрӧр.

Је Кудайга јӱк ле мӱргӱӱр эмес, оныҥ сӧзин угар керек. Кудайды угуп турарга, оныҥ Сӧзин ле Агару Бичикке тайанган бичиктерди ӱренерге јараар (Сарын 1:1, 2). Билип алганаарды шӱӱп сананыгар (Сарын 77:11, 12). Анайда ок, христиан туштажуларга јаантайын барып туругар (Сарын 122:1—4).

Ого ӱзеери, улуска Иегова керегинде куучындап турзагар, Кудайла колбулараарды тыҥыдарыгар. Канча ла кире кӧп куучындазаар, ончо ло кире Иеговага јуук болорыгар (Матфей 28:19, 20).

ТУЗАЛУ ЈӦПТӦР

• Агару Бичикти кажы ла кӱн кычырып, мӱргӱп турарга, ӧй табып туругар

• Слердиҥ билегерде баштапкы јерде амыраш ла соот-јыргалдар эмес, је кӧгӱс керектер болзын деп албаданыгар

АГАРУ БИЧИК НЕНИ АЙДАТ. «Кудайга јууктагар, Ол слерге јууктаар» (Иаковтыҥ самаразы 4:8). Билелик бажырышты кандый ӧйдӧ ӧткӱрерин тургузып алзагар, ӧйин буспагар (Башталганы 18:19). Анайда ок Кудайды кӱнӱҥ сайынгы да керектереерде ундыбагар. «Олорды [Кудайдыҥ сӧстӧрин] айлыҥда да отурзаҥ, јолдо до болзоҥ, јатсаҥ да, турзаҥ да айдып тур» — деген кычыртуны бӱдӱрип турзагар, билегердиҥ Кудайла колбузы бек болор (Јаҥды такыганы 6:6, 7). Јакшы темди Иисус Навин кӧргӱскен, ол: «Мен ле мениҥ айылым Иеговага иштеерис» — деп айткан (Иисус Навин 24:15).

ТУЗАЛУ ЈӦП

• Билегердиҥ кажы ла кижизиниҥ сурактарын ајаруга алып, билелик бажырышта нени ӱренерин озодоҥ сананып туругар