Биле тӧзӧлгӧн кийнинде јаҥы кӱчтер башталат. Андый кӱчтер јӱрӱмге ле кандый бир немеге эки башка кӧрӱмдӱ болгоныгардаҥ улам болот. Эмезе слердеҥ камаанду эмес шылтактардаҥ ла сакыбаган јанынаҥ солынган айалгалардаҥ улам болот.

Уур-кӱчтердиҥ аайына чыгары јеҥил неме эмес, је Агару Бичик олордыҥ аайына чыгып турзын деп кӱӱнзедет (Матфей 5:23, 24). Кӱчтердиҥ аайына чыгарга, библиялык принциптер эҥ јакшы болуш болот.

АГАРУ БИЧИК НЕНИ АЙДАТ. «Сӧс айдатан ӧй» бар (Јарлыкчы 3:1, 7). Уур-кӱчти кожо шӱӱжерге, ӧй таап алыгар. Шӱӱжилип јаткан сурак аайынча санаагарды ла сезимигерди эш-нӧкӧрӧӧргӧ ачыгынча айдып туругар. Эжеерге јаантайын «чынды айдыгар» (Ефестегилерге 4:25). Керек дезе ич бойыгар чугулданып та турза, бойыгарды тудунарга албаданыгар. Куучын блааш-тартыжуга кӧчӧ бербезин деп, карууны јобош болуп берзе јакшы (Укаа сӧстӧр 15:4; 26:20).

Слерге кандый бир неме јарабай да турган болзо, куучыныгар јымжак болзын, эш-нӧкӧригерди сӱӱп турганаар ла тооп турганаар јаантайын кӧрӱнзин (Колоссыдагыларга 4:6). Оҥдошпостордыҥ аайына чыгарга, ӧйди чӧйбӧгӧр лӧ суу ууртанган чылап унчукпай јӱрбегер (Ефестегилерге 4:26).

ТУЗАЛУ ЈӦПТӦР

• Уур-кӱчтиҥ аайына чыгарга, эптӱ ӧй талдап алыгар

• Эш-нӧкӧригердиҥ айдып јатканына киришпей, учына јетире угугар. Слерде де айдатан ӧй болор

АГАРУ БИЧИК НЕНИ АЙДАТ. «Бой-бойыгарга карындаштар чылап эрке карузыгар, бой-бойыгарга кӱндӱ эдеринде баштапкы болыгар» (Римдегилерге 12:10). Слердиҥ канайып угуп турганыгар јаан учурлу болот. Эш-нӧкӧригердиҥ кӧрӱмин оҥдоп аларга, јобош ло јымжак болорго албаданыгар (Петрдыҥ 1-кы самаразы 3:8; Иаковтыҥ самаразы 1:19). Эш-нӧкӧригердиҥ айтканын угаачы болуп тӧгӱнденери јастыра болор эди. Канча кире аргагар бар керектереердиҥ ончозын туураладып, эш-нӧкӧрӧӧрдиҥ айдып турганын лаптап угугар ол эмезе куучынды ӧскӧ ӧйдӧ шӱӱжерге куучындажып алыгар. Маргыжардыҥ ордына, карын бир команда болгоныгарды ундыбай турзагар: «Ачынарга меҥдебе» — деген принципле јӱрерге јеҥил болор (Јарлыкчы 7:9).

ТУЗАЛУ ЈӦПТӦР

• Эш-нӧкӧрӧӧрдиҥ айдып турганы јарабай да турза, сӧс блаашпай угугар

• Эжеердиҥ айдарга турганын оҥдоп аларга албаданыгар. Оныҥ чырайына ла ӱнине ајарып туругар

АГАРУ БИЧИК НЕНИ АЙДАТ. «Кандый ла иштеҥ туза бар, је кайда куру куучын, анда тӱреҥи» (Укаа сӧстӧр 14:23). Уур-кӱчтиҥ аайына чыгарга, јӱк ле јӧптӧжип алганыла болорзынбас керек, је јӧптӧжип алганын бӱдӱрер керек. Мынайып эдерге јеҥил эмес болордоҥ айабас, је оноҥ јаан туза болор (Укаа сӧстӧр 10:4). Слер бир командадый бирлик болзоор, «ижигер учун јакшы кайрал» алараар (Јарлыкчы 4:9).

ТУЗАЛУ ЈӦПТӦР

• Уур-кӱчтиҥ аайына чыгарга, кажыгар ла нени эдерин куучындажып алыгар

• Бир эмеш ӧйдӧҥ неге јединип алганаарды шӱӱжип туругар