1. Кажы ла кижи нени кӱӱнзейт?

СЛЕРДИ јакшы билер кижи, слердиҥ ады-јолыгарды, ол эмезе слерди чек ундып салган болзо, слерге ачынчылу болор, дезеер? Не дезе, бистиҥ кажыбыс ла, улус бисти ундыбай, танып турзын деп кӱӱнзейт. Анайда ок кандый кижи болгонысты ла кандый једимдерге једингенисти улус билип турзын деп кӱӱнзейдис (Тоол. 11:16; Иов 31:6).

2, 3. Улустаҥ јараду алатан кӱӱн, канайып јастыра болуп калардаҥ айабас? (Јӧрмӧлдиҥ бажындагы јурукты кӧрӱгер.)

² Је толо кемдӱ эмезистеҥ улам, улустаҥ макты ла јарадуны аларга турган кӱӱн ӧйи-кеминеҥ ажа берердеҥ айабас. Мындый јастыра кӱӱнди Сатананыҥ телекейи там ары тыҥыдып, бисти теҥеридеги Адабыска, Иеговага, мак јетирбезин деп кӱӱнзедет. Је макты јӱк Иегова аларга јарамык (Ачыл. 4:11).

³ Иисус јерде болордо, кудай јаҥныҥ башчылары мындый макты аларга сӱреен тыҥ кӱӱнзеген.  Иисус бойыныҥ ӱренчиктерине: «Узун эдектӱ кеп кийип базып јӱрерин сӱӱр бичикчилердий болбоско, бойыгарды тудуныгар — деп айткан.— Олор тепсеҥдерде уткыдарын, синагогаларда ичкери ӧдӱп отурарын, той-јыргалда тӧрдӧ кыйын отурарын сӱӱп јадылар». Иисустыҥ оноҥ ары айткан сӧстӧриле — андый улус «там буруга калар» (Лука 20:46, 47). Је Иисус эки оок јес акча салган јокту тул ӱй кижини мактап јат. Оныҥ акча салганын кем де кӧрбӧгӧн болор (Лука 21:1—4). Айдарда, улустаҥ јараду алары јанынаҥ Иисустыҥ кӧрӱми чек башка болгон. Оныҥ учун биске бу јанынаҥ Иегованыҥ кӧрӱмин алынарга, не болужар деп шӱӱжип ийектер.

4. Бис кемниҥ јарадузын аларга кӱӱнзейдис, нениҥ учун?

⁴ Улус бастыра улустыҥ јарадузын аларга болуп, бийик ӱредӱге ӱренерге, бизнесте бийик једимдерге једерге эмезе јарлу болорго албаданат. Је бис кемниҥ јарадузын аларга кӱӱнзейдис? Элчи Павелдиҥ сӧстӧрин эске алып ийектер: «Эмди дезе Кудайды билеригер, чынынча айтса, Кудай слерди билип алган. Андый болзо, бу телекейди башкараачы кӱч јок ло тӱреҥи јасактарга не ойто бурыларга јадыгар, олорго бойыгарды ойто кулданышка берип јадыгар?» (Гал. 4:9). Иегова — Јер-телекейдиҥ Ӱстӱги башкараачызы бисти јакшы билет, бисти сӱӱп јат ла бисти оныла јуук колбуларлу болзын деп кӱӱнзейт. Оныҥ учун ол бисти оныҥ најызы болор аргалу эдип јайаган. Бу сӱреен јаан кӱндӱ! (Јарл. 12:13, 14).

5. Иегова Кудайдыҥ најызы болорго, биске нени эдер керек?

⁵ Иегова Моисейди бойыныҥ најызы деп айткан. Качан Моисей Иегованы ого јолдорын ачсын деп сураарда, Кудай ого: «Эмди де айтканыҥды бӱдӱрип саларым, нениҥ учун дезе сен мениҥ кӧзиме јарагаҥ, мен сени јакшы билерим» — деп каруу берген (Чыг. 33:12—17). Иегова бисти де билзин деп, нени эдер керек? Иегова Кудайды акту јӱректеҥ сӱӱп, ого јӱрӱмисти учурлаар керек. (1 Коринфтегилерге 8:3 кычырыгар.)

6, 7. Бис недеҥ улам Иеговала најылажар арганы јылыйтардаҥ айабазыс?

⁶ Теҥеридеги Адабысла најылажып турганысты баалаар керек. Биске, Галаттагы христиандар чылап, бу телекейдиҥ «кӱч јок ло тӱреҥи јасактарыныҥ» кулдары болбоско, ӧскӧртӧ айтса, јарлу болорго ло бийик једимдерге албаданбаска, ајарыҥкай болор керек (Гал. 4:9). Галат јериниҥ ака-эјелери Иеговала јуук колбуларлу болгон, је соондо куру ла эш-кереги јок керектерге бурылган. Ӧскӧртӧ айтса, Павел олорго: «Слер качан да артыргызып салган тузазы јок, калас керектереерге не кайра бурылып јадыгар?» — деп айткан.

⁷ Бӱгӱнги кӱнде бисте де мындый айалга боло берердеҥ айабас. Бистиҥ  кезигис Иеговала таныжып, Павел ле чилеп, Сатананыҥ телекейинеҥ мак алатан арганы јектеп салган. (Филиппыдагыларга 3:7, 8 кычырыгар.) Кем де бийик ӱредӱге кирбеген, карьера этпеген эмезе бизнеске бастыра санаазыла кирбеген. А кем де кӱӱлик јайалталу эмезе спортчы болгонынаҥ улам бай ла јарлу болор аргазын јектеп салган (Евр. 11:24—27). Мындый аргаларды не тузаланбадым деп сананары ойгор эмес болор. Андый санаалардаҥ улам, бу телекейдиҥ «кӱч јок ло тӱреҥи јасактарына» кайра бурылардаҥ айабазыс *.

8. Иегованыҥ јарадузын аларга биске не болужар?

⁸ Биске бу телекейдиҥ јарадузын эмес, је Кудайдыҥ јарадузын аларга не болужар? Јаан учурлу эки чындыкты шӱӱп сананары болужар. Баштапкызында, Иегова чындык ишчилерин качан да ундыбай јат ла баалап јат. (Еврейлерге 6:10; 11:6 кычырыгар.) Ол кажы ла бойыныҥ ишчизин баалап јат. Оныҥ кӧрӱмиле болзо, чындык ишчизиниҥ ижин кӧрбӧй калганы јаман керек эткенине тӱҥей болот. Иегова «Бойыныҥ улузын билер» (2 Тим. 2:19). Ол «чындык улустыҥ јолын билер», анайда ок олорды ченелтелердеҥ канайып айрыйтанын база билер (Сар. 1:6; 2 Петр 2:9).

9. Иегова бойыныҥ албатызына јарадузын канайып кӧргӱскениниҥ темдерин куучындап беригер.

⁹ Кезикте Иегова албатызына бойыныҥ јарадузын кӧргӱзерге, сӱреен кайкамчылу эдип болушкан (2 Лет. 20:20, 29). Темдектезе, Иегова израильтяндарды Кызыл талайдыҥ јанында, фараонныҥ кӱчтӱ черӱзи јаба једип келедерде, аргадап алган (Чыг. 14:21—30; Сар. 106:9—11). Бу учурал сӱреен кайкамчылу болгон, керек дезе, андагы јаткан улус, бу керегинде 40 кире јыл ӧдӱп те каларда куучындашкан (Иис. Н. 2:9—11). Иегованыҥ сӱӱжи ле мынайып болушкан ийде-кӱчи керегинде шӱӱп сананганы, Магог јериниҥ Гогы биске табару эткен ӧйдӧ јаан болужын јетирер (Иез. 38:8—12). Ол тушта, бис бу телекейдиҥ эмес, је Иегованыҥ јарадузын аларга албаданганыстаҥ јаан сӱӱнчи аларыс.

10. Иегова бойыныҥ јарадузын канайып кӧргӱзер аргалу?

¹⁰ Экинчизинде, Иегова бойыныҥ јарадузын сакыбаган јанынаҥ кӧргӱзер аргалу. Јакшы керектерди улуска јараарга болуп эдип турган кижи, Иегованаҥ кандый да кайрал албас деп, Агару Бичикте айдылат. Нениҥ учун дезе андый кижи кайралды, ӧскӧртӧ айтса, улустыҥ јарадузын алып койгон. (Матфей 6:1—5 кычырыгар.) Је јакшыны эдип,  улустаҥ јараду албай тургандарды Иегова туйказынаҥ кӧрӱп, олорды кайралдап јат деп, Иисус айткан. Эмди кезикте Кудай кайралын сакыбаган јанынаҥ берип турганыныҥ темдерин кӧрӱп ийектер.

11. Иегова Марияга кандый кӱндӱ эткен?

¹¹ Иегова јобош кысты, Марияны, бойыныҥ Уулына энези болзын деп талдап алган. Мария улу ӧргӧӧлӱ Иерусалим каланаҥ ыраагында турган Назарет деген кичинек калада јаткан. (Лука 1:26—33 кычырыгар.) Ого нениҥ учун мындый кӱндӱ эдилген? Гавриил деп ангелдиҥ сӧстӧриле болзо, ол «Кудайдаҥ јараду алган, ЈТ». Мария ла Елизаветаныҥ куучындашканынаҥ Иегова Марияныҥ јуук најызы болгон деп кӧрӱнет (Лука 1:46—55). Кудай Марияныҥ чындык болгонын кӧрӱп, ого сакыбаган јанынаҥ кайрал эткен.

12, 13. Иисус чыгарда, анайда ок оныҥ чыкканынаҥ бери 40 кӱн ӧдӧ берерде, Иегова ого кандый кӱндӱ эткен?

¹² Иисус чыгарда, Иегова уулыныҥ чыкканын Иерусалим ле Вифлеемниҥ башчыларына да, јамылу улузына да айтпай, ангелдер ажыра Вифлеемниҥ јанындагы одорлордо койлор кабырып јӱрген јобош кӱдӱчилерге айткан (Лука 2:8—14). Мыны уккан кийнинеҥ кӱдӱчилер јаҥы чыккан Иисусты кӧрӧргӧ барган (Лука 2:15—17). Мария ла Иосиф, Иисуска эдилген кӱндӱни кӧрӱп, кайкаган болор. Бу ӧйдӧ Дьявол нени эткен? Иисус чыгарда Сатана оныҥ ада-энезине ле Иисуска астрологтор ийген. Бу солун бастыра Иерусалимди тӱйметкен (Матф. 2:3). Оноҥ улам буру јок кӧп балдар божогон (Матф. 2:16).

¹³ Иисустыҥ чыкканынаҥ 40 кӱн ӧдӧ берерде, Мария Вифлеемнеҥ 9 километр ыраагында турган Иерусалимдеги  ӧргӧӧгӧ барып, Иеговага тайылга эдер учурлу болгон (Лука 2:22—24). Оныҥ учун ол Иосифле кожо Иисусты алганча јолго атанган. Мария јолой барып јадала, абыс Иисустыҥ бӱдӱретен ижи керегинде кандый бир сӧс айдар болор деп сананган болор. Је Иегова кӱндӱни база ла сакыбаган јанынаҥ эткен. Иегова чыккан баланы келетен Мессия, ол эмезе Христос болор деп улус алдына айдарга, Симеон деген чындык кижини ле 84 јашту тӱл ӱй кижини, судурчы Аннаны тузаланган (Лука 2:25—38).

14. Иегова Марияга кандый алкыш берген?

¹⁴ Кудай Марияга оныҥ Уулын кичееп, таскатканы учун оноҥ ло ары кӱндӱ эткен бе? Эткен эмей. Марияныҥ айткан сӧстӧри ле эткен керектери Кудайдыҥ тыныла бичилген Агару Бичикте бичилип калган. Иисус ӱч јарым јыл јарлап јӱрерде, Марияга оныла кожо јӱрерге келишпеген болор. Анайда ок ол тул артып каларда, арга-јокто ого Назаретте јадарга келишкен болор. Оныҥ учун ол Иисустыҥ јарлаган ӧйинде болгон кӧп учуралдарды кӧрбӧгӧн. Је Иисус божоп јадарда, ол оныҥ јанында болгон (Иоанн 19:26). Соондо Мария, Беженинчи кӱнди байрамдаган ӧйдӧ, агару тын тӱжердеҥ озо, Христостыҥ ӱренчиктериле кожо Иерусалимде болгон (Ап. ижи 1:13, 14). Ол база агару тынла майлаткан болор, айдарда, Иисусла кожо теҥериде ӱргӱлјиге јӱретен арга алган. Марияга чындык ижи учун сӱрекей јаан кайрал берилген!

15. Иегова, Уулы јерде јадарда, оны баалап турганын канайып кӧргӱскен?

¹⁵ Иисус кудай јаҥныҥ ла политиканыҥ башчыларынаҥ мак аларга  албаданбаган. Је Иегованыҥ теҥеридеҥ ӱч катап уулын јарадып турган сӧстӧрин угарга ого јакшы болгон болор. Иисус Иордан сууда чӧҥӱрилерде ле Иегова: «Бу Мениҥ сӱӱген Уулым, Оныҥ Бойында Мениҥ јакшылыкту табым» — деп айткан (Матф. 3:17). Бу сӧстӧрди, Иисустаҥ башка, јӱк ле Крестеечи Иоанн уккан болор. Соондо Иисустыҥ божоорынаҥ бир јыл кире озо, Иегованыҥ: «Бу Мениҥ сӱӱген Уулым, Оныҥ Бойында Мениҥ јакшылыкту табым. Оны угугар!» — деген сӧстӧрин, оныҥ ӱч элчизи уккан (Матф. 17:5). База бир учуралда, Иегова Иисустыҥ божоорынаҥ канча да кӱн озо, ого теҥеридеҥ база катап баштанган (Иоанн 12:28).

16, 17. Иегова Иисустыҥ ончо эткен керектерин сӱреен баалап турганын кӧргӱзерге нени эткен?

¹⁶ Иисус Кудайды јамандап турган деп буруладарын ла ӧлтӱртип саларын билген де болзо, бойыныҥ табы эмес, Кудайдыҥ табы бӱтсин деп мӱргӱген (Матф. 26:39, 42). Иисус «уйатка каларын керекке албай, керӱ агашта кыйынды чыдажып» ӧткӧн. Ол телекейдиҥ јарадузын эмес, је Кудайдыҥ јарадузын аларга кӱӱнзеген (Евр. 12:2). Иегова ого бойыныҥ јарадузын канайып кӧргӱскен?

¹⁷ Бир катап Иисус Адазынаҥ теҥериде болгон магын сурап мӱргӱген (Иоанн 17:5). Иисус јерде иштегени учун Кудайдаҥ аҥылу кайрал аларга иженген деп, Агару Бичикте кайда да бичилбейт јат. Иегова оныҥ «јамызын бийиктедер» деп, ол иженбеген де. Је Иегова нени эткен? Ол Иисуска сакыбаган јанынаҥ кӱндӱ эткен. Кудай Иисусты тирилтип, теҥериде ӧлбӧй јӱретен сӱрекей бийик кайрал берген. Мындый кайралды Иисустаҥ озо, кем де качан да албаган * (Флп. 2:9; 1 Тим. 6:16). Иегова бойыныҥ Уулын баалап турганын сӱреен кайкамчылу эдип кӧргӱскен.

18. Бу телекейдеҥ јараду аларын кӱӱнзебеске, нени эдер керек?

¹⁸ Бу телекейдеҥ јараду аларын кӱӱнзебеске, нени эдер керек? Иегова бойыныҥ чындык ишчилерин јаантайын кайралдап јат ла кезикте кайралды сакыбаган јанынаҥ эдет деп ундыбас керек. Келер ӧйдӧ бисти јаан алкыштар сакыйт. Је эм тургуза, Сатананыҥ телекейиниҥ кӱчтерине ле ченелтерине учурап та турган болзоос, бу телекей бойы да, оныҥ берип турган јарадузы да чактыҥ-чакка јоголып калар деп ундыбай јӱректер! (1 Иоанн 2:17). Агару Бичикте бистиҥ сӱӱштӱ Иегова Адабыс керегинде мынайып бичилет: «Кудай чындык, Ол эдип јӱргенигерди ле сӱӱжигерди ундыбас» (Евр. 6:10). Ол слерге алкыжын кыйалта јогынаҥ јетирер! Керек дезе, слерди сакыбаган да јанынаҥ кайралдаар болор.