በ1987 የይሖዋ ምሥክሮች የበላይ አካል አባል የሆነው ላይማን ስዊንግል ቫሌንሲያ፣ ቬኔዙዌላ ውስጥ ፕላዛ ሞኑሜንታል በሚባል ከኮርማዎች ጋር የሚደረግ ትግል በሚታይበት ስፍራ ለተሰበሰቡ 63,580 ሰዎች ንግግር አቅርቦ ነበር። ብዙዎች የእሱን ንግግር ለመስማት ሌሊቱን ሙሉ በአውቶቡስ ተጉዘዋል። ወንድም ስዊንግል ለተሰበሰበው ሕዝብ ሲናገር እንዲህ ብሏል፦ “የእናንተ ቅርንጫፍ ቢሮ ትንሽ የሚባል መሆኑ ቀርቷል። አሁን ቅርንጫፍ ቢሯችሁ መካከለኛ ደረጃ ላይ ነው። በዚህ አያያዛችሁ በቅርቡ 100,000 አስፋፊዎች ካሏቸው አገራት መካከል ትሆናላችሁ።”

በ1987 ቬኔዙዌላ ውስጥ የነበሩት አስፋፊዎች ማለትም የአምላክን መንግሥት ምሥራች የሚያውጁ የይሖዋ ምሥክሮች ከ38,000 በላይ ነበሩ። በዚያን ጊዜ ከ100,000 በላይ አስፋፊዎች የነበሯቸው አገሮች ስምንት ብቻ ነበሩ።

የይሖዋ ምሥክሮች በዓለም ዙሪያ አስገራሚ እድገት አድርገዋል። ከአንደኛው የዓለም ጦርነት በኋላ ስለ ይሖዋ መንግሥት የሚሰብኩ ሰዎች ብዛት በጥቂት ሺዎች የሚቆጠር ነበር። ሆኖም ይህ ሁኔታ ተቀየረ። የ1943 የይሖዋ ምሥክሮች የዓመት መጽሐፍ እንዲህ ብሎ ነበር፦ “ከአንዳንድ አካባቢዎች ጋር ያለን ግንኙነት በመቋረጡ የ1942 አጠቃላይ ሪፖርት የተሟላ ባይሆንም እንኳ እንደተባረክን የሚያሳይ ነው . . . ምክንያቱም ሪፖርቱ እንደሚያሳየው በአሁኑ ጊዜ በዓለም ዙሪያ በሥራው [ማለትም ምሥራቹን በመስበኩ ሥራ] እየተካፈሉ ያሉት አስፋፊዎች ከ106,000 በላይ ናቸው።” በሁለተኛው የዓለም ጦርነት ወቅት በነበረው ቀውጢ ጊዜም እንኳ ብዙ ሰዎች ለመጽሐፍ ቅዱስ መልእክት ጥሩ ምላሽ ሰጥተዋል። በ1950 በዩናይትድ ስቴትስ ብቻ እንኳ ከ100,000 በላይ አስፋፊዎች ነበሩ።

ከ100,000 በላይ አስፋፊዎችን ያስመዘገበችው ሁለተኛዋ አገር ናይጄሪያ ስትሆን ይህ ሪፖርት የተመዘገበው በ1974 ነበር።

በቀጣዩ ዓመት ደግሞ ብራዚል እና ጀርመን ከ100,000 በላይ አስፋፊዎችን አስመዝግበዋል። በአራቱም አህጉራት የታየው እንዲህ ያለው እድገት የመጽሐፍ ቅዱስ እውነት በዓለም ዙሪያ ተቀባይነት እንዳገኘ የሚያሳይ ማስረጃ ነው።

ለምሥራቹ ጥሩ ምላሽ የሚሰጡ ሰዎች ብዛት በዓለም ዙሪያ እየጨመረ ሄዷል። ይህም በመጽሐፍ ቅዱስ ውስጥ ከሚገኘው ከሚከተለው ትንቢት ጋር ይስማማል፦“ጥቂት የሆነው ሺህ፣ ትንሽ የሆነውም ኃያል ብሔር ይሆናል። እኔ ይሖዋ፣ ይህን በራሱ ጊዜ አፋጥነዋለሁ።”—ኢሳይያስ 60:22

የ2014 የአገልግሎት ዓመት ሪፖርት እንደሚያሳየው ከ100,000 በላይ የይሖዋ ምሥክሮች ያሏቸው አገሮች ብዛት 24 ደርሷል። ከእነዚህ አገሮች መካከል አንዷ ቬኔዙዌላ ስትሆን እዚህ ቁጥር ላይ የደረሰችው በ2007 ነው። በአሁኑ ጊዜ በዓለም ዙሪያ 115,416 የይሖዋ ምሥክሮች ጉባኤዎች እንዲሁም 8,201,545 አስፋፊዎች ይገኛሉ።