INU NKWEEN̄ 13
Keke Ore Ata Etip Ofolek Uwu Uriaak?
1. Ire otutuuk uwu uriaak onwọn ni?
Ata ife emaan̄ me emen otutuuk uwu uriaak. Ire ata etip irọriọọn̄ ibe ke Awaji ikekimun̄ ife cha mè ikikpọchieen̄ me lek kiban̄. Ire, isak enenen imumun̄ ibe ke ebi ikisi uwu uriaak eyaka ikirọ mkpikpak me erieen̄ uwu uriaak. (Ebi Kọrint Eyi Oso Iba 4:3, 4; 11:13-15) Igọọk me lek etip ekibọkọ, usini uwu uriaak mitap lek me lek inu afa, ikpakpan ene, akọn̄, mè ichachaka nsabọn. Eyi ikifieek ejit ebi ikakaan̄ ulọk irọrọ nkeek Awaji!—Fuk Matiyu 24:3-5, 11, 12.
Ata uwu uriaak ikimin erieen̄ Awaji, ire, uwu uriaak ataak ikakimin erieen̄ Awaji. Inu ema ekebijeen̄ ikakinan̄a me Baibul, echi igọbọ ataak ijejeen̄ ofolek Awaji mè ebi ikwukwu. Ire, Jioba iweek ibe ebi ene eriọọn̄ atikọ ofolek kan̄.—Fuk Ijikien 18:4; Timọti Eyi Adasi 2:3-5.
2. Eke ore ata etip ofolek uwu uriaak?
Me atikọ, uwu uriaak ataak kpebekọt ifiaan̄ Awaji ibe ke mima ọmọ, me mgbọ ema emabe inyọn̄ Setan yi. (Jemis 4:4) Usem Awaji ikitọ ubọk ifolek otutuuk uwu uriaak ataak ibe ke ire “Babilọn ama ile.” Babilọn ire ama ilile me ukot ikaan̄, ere uwu uriaak ataak obenebe me mgbọ mun̄ ile usen kè Nuwa orakabe. Sọnja mgbọ, Awaji motap uyaka me lek uwu uriaak ataak, echi okifiaan̄ mè ikitutuku ebi ene.—Fuk Ichichili 17:1, 2, 5, 16, 17; 18:8.
Ire, ofifi ata etip omowa si. Jioba ikawuuk ebi ata ife ikup me uwu uriaak ataak me otutuuk linyọn̄ yi. Ikigbaan̄ ife chi ititiin̄ sa me ikekijeen̄ ema atikọ ofolek kan̄.—Fuk Maika 4:2, 5.
3. Keke ke ebi ikakaan̄ ata ejit eberọ ni?
Ata uwu uriaak okisun̄ ebi ene me obọp ge
Jioba ikikpọchieen̄ me lek ebi imama atikọ mè inu onwọnwọn. Ikitumu inyi ema ibe enan̄a esibi me uwu uriaak ataak. Ebi imama Awaji mibem lek irọrọ unwene ifuna Awaji ibele ejit.—Fuk Ichichili 18:4.
Me adasi ukot, mgbọ ebi ikaan̄ ata ejit enọbe ata etip inan̄a me otu ebi udun̄ kè Karais, misa me unwọọn̄ ibọkọ itap. Mikween̄ aya oniin̄ iluk ugwem me ubọk Jioba, irek iluk ugwem eyi unwọọn̄ mè ikpọchieen̄. Ema ire ata akpat ukot inyi eji me chereyi mije ebọkọbe atikọ itap sa me itoto Awaji me isi sabum inu geelek me ugwem kiban̄.—Fuk Ebi Teselonaika Eyi Adasi 1:8, 9; 2:13.
Jioba ikibọkọ ebi geelek inanan̄a isibi me emen uwu uriaak ataak itap me urum ebi ikitọbọ ebum inyi ọmọ. Ire obọkọ ata ogwen kè Jioba yi itap, omore ogwu unene kan̄, mè ire ge me lek ebi ikup kubọk ototun̄ ukan̄ ikisa me ima itọbọ ebum inyi Jioba, mè ikaan̄ si ugwem ikakaan̄ge itata.—Fuk Mak 10:29, 30; Ebi Kọrint Eyi Oso Iba 6:17, 18.
4. Ike owa ke Awaji oborọ ibe otutuuk linyọn̄ yi ekaan̄ unwọọn̄?
Itip oyerebet okinu inyi uwu uriaak ataak ire ata etip. Mosan̄a otutuuk linyọn̄ yi me ukeme. Uwu uriaak ataak ikpoyaka ikọt ifiaan̄ mè iche ebi ene. Otutuuk ebi ibeluk megbaan̄ ikup me obọp ge ikitọbọ ebum inyi ata Awaji gaalek.—Fuk Ichichili 18:20, 21; 21:3, 4.
