«Gwati ámizey naʼnuʼ neyka aʼzarunhʉn nusi zagʉn nukʉndi, anugwéseʼri asin tinku anunika unáy mikaw nʉnko». (Mateo 5: 28)

IARI MIGɄNKUKWARI DU NANɄNNO

Foto, widew awiri libro tinku sí wasʉyari pin zʉnáykʉchʉ kwʉya ni. Niwipáw zeyzey aʼkusi ayeygwi meʼzanʉn meʼɉunʉndi, aseʼ ema sí azi aʼchʉya nanʉnno izatakamʉ kawa ni.

BIBRIASEʼ WÁSɄYA NEYKA

Bibriáseʼri gaʼkʉnamʉ pornografía aʼnikuʼ neyka neki, emeyna wanisi azoya neykari Niwipawseʼ eméy aʼchʉya nanʉnno meʼzanʉkwéy neyka ni.

Ey awi nʉ́nkʉri, iʼngwi cheyrwa ʉnkachwi neyka «gwati ámizey naʼnuʼ neyka aʼzarunhʉn nusi zagʉn nukʉndi» asin tinku unika awkwéy kʉnika awʉngwa ni wásʉya ni. Ey ʉwameʼ ʉnkachwi kwa nanuʼ neyka nenanʉnki, foto, widew awiri libro tinku sí wásʉya aʼzarunhi chwʉn nukʉndi, Bibriaseʼ wásʉya du aʼzarunhamʉ kawa ni. Emeyna chwʉkwari Niwipawseʼ aguzanuʼ neyka ni.

«Ey ʉweʼri gʉcha mikʉnari [...] ʉwa neyka tinku nikʉkwa neyka, twi mikʉkúsʉkwa neyka, tinku níkʉkwa neyka ingumʉ́n kawʉ mekʉwáʼkuma awkwa neyka, du nanuʼ neyka miguzari keywʉ inʉ ámizey nanuʼ neyka kari aʼchwʉkwari inki nʉpáw nʉnáy aʼchwi kaʼmʉkari zweingwa niga nʉngwa kʉchunha awkwa». (Colosenses 3:5)

IʼNGWISEʼ WARUNHɄYA NEYKA

Ima sí kʉriwí winizatʉga ɉinari foto, widew awiri libro tinku sí wásʉya chwʉn nuga unika auʼ nanʉnno winaʼzʉna ni. Ey awʉndi, imari waʼmʉ niwinpasuʼ nariza gwasi ki nanʉnno.

BIBRIASEʼ WÁSɄYA NEYKA

Bibriáseʼri «gʉmeysi áziki ya» nikʉkwari anugweseʼ twi meʼkúsʉkwa neyka ni wásʉya ni (Efesios 5:3,4). Ey awʉndi, foto, widew awiri libro tinku sí wásʉya chwʉn nukʉndi, dúkʉchʉ kawáy ni meʼzanʉkwéy ki nanʉnno. Emeynari ikʉ tinku nikʉn nuga, cheyrwa kwa aʼmía gunti tinku nikʉn nuga awiri bema ɉuna neki, widew bori aʼchunhakumana neyka ni. Imari unikʉn nukwáy meʼzari chwʉkwari, gʉmeysi áziki ya nikʉkwa gwasi Niwipáw osʉn kʉkúsʉya ni.

Ima sí kʉriwí winizatʉga ɉinari pornografía chwʉyari unikákʉchʉ auʼ nanʉnno winaʼzari kinki zwein nuga ni. Ey ʉweʼki, Bibriáseʼri imari anugweseʼ waʼmʉ niwinpasi keywʉ Niwipáwseʼri aguzanúkʉchʉ neyka ni wásʉya ni. Ey ʉwameʼ azʉkunsamʉseʼ eméy yeyka ni: «Ey ʉweʼri gʉcha mikʉnari [...] ʉwa neyka tinku nikʉkwa neyka [awiri] tinku níkʉkwa neyka ingumʉ́n kawʉ mekʉwáʼkuma awkwa neyka, [...] kʉchunha awkwa». Emeyna chwʉyari, kʉchunha neki auʼ nari tinku nikʉkwa neyka ingumʉ́n kawʉ ekʉwáʼkuma awʉngwa zʉn reʼgáwʉya ni.

«Duna neyka tasiri du nanuʼ neyka takuʼ nánʉkwa [...]. Du nanuʼ neyka miguzanuʼ nánʉkwa awiri duna neyka miguzánʉkwa». (Amós 5:14,15)

BIBRIASEʼ WÁSɄYA NEYKA

Bibriáseʼri ikʉ bemasin neki tinku niga nʉnna, weyru aʼgi agumʉchʉya nʉnna awiri zágʉya nʉnneki ʉnchusa una wásʉya ni (1 Corintios 6:9-11). Azi nisi eméy nari zweykwa winchusa unʉnno. Niwipáw zʉgaʼkʉnámʉseʼ kʉriwí winzoyaygwi du nanuʼ neyka unikuʼ nanʉnʉngwa aʼzari winzoya narín.

Foto, widew awiri libro tinku sí wasʉyari waʼmʉ niwinpa awkwéy nanʉnno aʼzarunhʉndi, chuʼ nanʉkwasi niwikaʼmʉkana awʉngwa ni. Universidad del Estado de Utahseʼ gaʼkʉnamʉ kʉriwí winizatana eméy in, emeyna chwʉyari depresión aʼzari, ikʉnʉ zʉn nanʉn aʼɉuri, cheyrwasin kwa aʼmiasin du ʉnkʉnanuʼ nari zoriri chʉwi aʼzanʉngwa niga ni in. Ey awi nʉ́nkʉri, pornografía-ri Niwipáw osʉn kʉkúsʉya ni, ey ʉwameʼ emeyna chwʉyari Niwipawseʼ pari peykʉ kʉnisi zweingwa niga ni.

Bibriari duna neyka miguzʉn awkwasi niwiwia ʉwa ni. Ingumʉ́n aʼgwasi zoyaygwi azʉkunsamʉ ingumʉngwi miguzari zweykwa nʉngwa ni. Duna neyka miguzari zweykwari foto, widew awiri libro tinku sí wásʉya chuʼ nanʉkwasi niwikaʼmʉkana awʉngwa ni, ey awi salmista yanáy meʼzánʉkwa nʉngwa ni: «Bema ɉuna kineki aʼmʉkanuʼ neykari nʉhumʉseʼ chuʼ nanʉngwa reʼgow awʉnʉngwa ni» (Salmo 101:3).