RIWIɄKWEYNA 3
Duna gaʼkʉnamʉ Bibriaseʼ aʼnikwʉyari Niwipáw arúnhʉya ki nanʉnno
1. Bibriari ínʉseʼ aʼsʉngwaʼsana nanʉnno
Duna gaʼkʉnamʉ Kaʼseʼ aʼkwa akwʉngwa ni neykari Bibriaseʼ aʼnikwʉn nuga ni (Salmo 37:29). Bibriari 66 ribru neyka ni awiri Niwipawseʼ kingwi 40 cheyrwa ʉnkaʼguka awʉn nusi akumana neyka ni. Ipesʉyaʼba asewa ribru neykari Moiseseʼ aʼsana 3.500 kʉgi ʉnzaniga ni; aniwisiyékʉri, apóstol Juanseʼ aʼsanari 1.900 kʉgi ʉnzaniga ni. Bibriaseʼ gaʼkʉnamʉ aʼnikwʉn nugari Niwipawseʼ niwikugaʼsana neyka ni. Niwipawri Bibria winaʼsʉn nugari ánugwe seymʉkesin igunámʉsa una ni (2 Samuel 23:2). Bibria wináʼsʉya ɉinari ikʉnha winarúnhʉya neki winaʼsuʼ nari Niwipáw arúnhʉya zʉʼn winaʼsana ni. Ey ʉwameʼgwʉn, Bibriari Jeuwaseʼ aʼsʉngwaʼsana neyka ni. 2 Timoteo 3:16; 2 Pedro 1:20, 21 aʼgwa ú.
Widew Bibria inʉseʼ aʼsʉn gwaʼsana nanʉ́nno chwa ú
2. Azi nameʼri Bibria ta yeyka ná niweʼzanʉnno
Bibriari Niwipawseʼ niwikugaʼsana nameʼ, ta yeyka ná niweʼzʉna ni. Ikʉseʼri eméy zanʉngwa ni yʉkwari niweʼzanakuʼ neyka neki, Bibriaseʼ eméy zanʉngwa ni wasʉyari zanʉngwʉkin wásʉya ni (Josué 23:14). Niwipawseʼ nʉʼkin eméy zanʉngwa ni aʼzʉn ʉwa ni. Isaías 42:9; 46:10 aʼgwa ú.
Bibriari Niwipawseʼ niwikugaʼsana nameʼ, awʉtari aʼzʉna neyka ni. Ey ʉwameʼ, diwʉ́n diwʉ́n aseykumʉya reʼzagikumana pin zʉnáy kwʉn nuga ni. Birin aʼkumana neki, inʉ ʉnkʉrigawí izatasi azoyásinri akingwi wásʉya ni. Awiri 40 cheyrwa neykaseʼ winaʼsi nareʼri, ʉnkʉrigʉnsi kinare awanʉkwéy kawi aʼnikwʉn nuga ni. Aʼnikwʉyáʼbari Niwipawri niwinhaguzʉna naʼnó kinki awanʉkwéy yeyka ni, awiri íkʉri du arunhi zweingwasi igunámʉsa awkwéy kʉnʉna ni. Ey ʉwameʼgwʉn, ikʉ sʉmʉ neykaseʼ Bibriari Niwipáw Zʉgaʼkʉnamʉ naʼnó gunti izanʉn nuga neyka ni. 1 Tesalonicenses 2:13 aʼgwa ú.
Widew Azi nameʼri Bibria taʼ yeykaná niweʼzanʉnno chwa ú
3. Bibriáseʼri inʉ ingumʉ́n wásʉya no
Bibriaseʼ gaʼkʉnamʉ duna aʼnikwʉn nugari, Niwipawri ikʉ du aʼzari aʼkwa kwʉndi aʼzʉna neyka ingumʉ́n wásʉya ni. Eʼ ikʉ paraísu zʉnaʼba aʼkwa kwʉngwa nʉnnari auʼ nʉn uneʼki, eméy nari du zanika awi aʼkwa kukwéy kʉnika awʉngwa ni wásʉya ni. Apocalipsis 21:4, 5 aʼgwa ú.
Bibriáseʼri Niwipawseʼ gaʼkʉnamʉ aʼgowna neyka ni awiri kunsamʉ niwikaʼmʉkana awkwéy neyka wásʉya ni. Jeuwari ikʉ igunamʉsʉyaʼba gunti, eméy neyka ni aʼchukwéy neyka ni. Bibriari Niwipáw ɉwaʼsa awiri kaʼmʉkana awkwéy nanʉngwasi mikaʼmʉkana awiza ni. Salmo 19:7, 11; Santiago 2:23; 4:8 aʼgwa ú.
4. Azi nisi Bibriaseʼ eymí gwasi igugʉn meʼzanʉkwéy nanʉnno
Jesú Bibria sí zawía ukweʼri, azey azey reʼnikwʉyari eymí gwasi ni í gaʼkʉnámʉri reʼgʉrʉsa ʉnteʼ una ni. Emeygwi nari, ema paperi yʉkweynari Bibriaseʼ wásʉya ingumʉ́n aʼnoʼkʉkwéy nʉngwasi neyka ni. Luka 24:27, 45 aʼgwa ú.
Duna gaʼkʉnamʉ Bibriaseʼ aʼnikwʉn nuga ingumʉ́n nʉɉwaʼsi nʉzoya unigeʼri, zeyzey meʼzanʉngwa ni. Ey ʉweʼki, iʼngwiseʼri kuwasey awkwa kineki aguzanuʼ neyka ni. Ey ʉwáʼkʉcha, riwiuʼ nʉn awʉnʉngwa neki reʼkusuʼ nánʉkwa. Bibriaseʼ kingwi wasʉyari, Niwipáw sí riwí zoya ʉwari, aʼkwa kwʉngwa ni wásʉya ni. Juan 17:3 aʼgwa ú.
