¿DULLIAFUIMI MAI ÑI CHUMLERPUAL TAMI MONGEN? Quiñeque che feipiquei ñi deu elcünungeel chem tañi rupayal, feimu rüf quisutu dullinoafulu troquiuquei. Caquelu che femürpunolu ñi ayünieel engün, “¡chumngeafui cai!” piquei, “femngechi elcünungei müten”.

Caquelu che huesa duamquei ngüneduamlu tañi pepi famentuquenofiel ñi huesalcangequen. Ayüniefui ñi cüme mongeleal engün, huelu felerpuquelai tüfa mülelu cai hueichan, hueñen, cutran, nüyün, cürüftucu mahun ca fillque huesaque dungu. Feimu, ¡felei müten ta mongen! piqueingün.

Rüfcünu mai, cüme pepicacünuliyiñ rume taiñ chumal, com huesa ruparumeafuiñ (Eclesiastés 9:11). Huelu cüme dulliliyiñ taiñ chumal, rumel cümelcalerpuaiñ cüpalechi antü mu. Doi mai, Biblia quimeltuquei cümelcalerpuafuiñ cam huesalcalerpuafuiñ chem taiñ dulliel mu. Doi ngüneduamaiñ tüfa.

Epe concülefulu pu cuifique Israel che ti cüme mapu ñi llohual engün, Chau Dios feipieyu: ‘Elcünuleluhuiyiñ tamün dullial ti mongen ca ti lan, tamün cümelcangeal cam huesalcangeal, feimu mülei tamün dullial ti mongen tamün mongeleal, eimün ca tamün cüpanche, tamün piuqueyeniefiel meu tamün Chau Ngünechen Jehová, tamün allcütuniefiel tañi dungun, ca tamün püntütripaquenon quisu meu’ (Deuteronomio 30:15, 19, 20).

‘Elcünuleluhuiyiñ tamün dullial ti mongen ca ti lan, tamün cümelcangeal cam huesalcangeal, feimu mülei tamün dullial ti mongen tamün mongeleal’ (Deuteronomio 30:19).

Chau Dios montulfi pu Israel che ñi esclavongehuenoal Egipto mu, fei cüme feletuafuingün ca ayüucületuafui feichi cüme mapu mu. Huelu tañi llohual engün ñi feipicünuleteu Chau Dios, mülefui tañi “dullial ti mongen”. ¿Chumngechi am? Mülefui ñi ‘piuqueyenieafiel tañi Chau Ngünechen Jehová, allcütunieafiel tañi dungun ca püntütripanoal quisu meu’.

Famülque mu, eimi ca dulliafuimi tami chumal, fei tami dulliel mu cümelcalerpuafuimi cam huesalcalerpuafuimi. Dullilmi piuqueyenieafiel ta Chau Ngünechen, allcütunieafiel tañi dungun ca püntütripanoal quisu meu, fei dulliaimi tami rumel mongeleal mapu meu. Huelu, ¿chem coneltulei tüfachi cüla dungu mu?

Biblia feipi: “Chau Ngünechen fei ta piuqueyen”, tüfa pengeli Chau Dios doi quimfalngequei tañi piuqueyechen mu (1 Juan 4:8). Ramtungelu Jesús chem huercün dungu doi falin-ngei, quisu feipi: “Piuqueyefinge tami Chau Ngünechen Jehová com tami piuque mu, com tami mongen ca com tami raquiduam meu” (Mateo 22:37). Feimu taiñ rüf hueniyeafiel Chau Jehová, duamfali taiñ piuqueyenieafiel. Llicaniefuliyiñ cam raquiduamnon mu feyentufuliyiñ, turpu fülmaucülelayafuiñ Jehová mu. Huelu, ¿chumngelu am felei taiñ piuqueyeafiel?

Jehová ñi piuqueyefiel pu che trürümngeafui pu chau ñi piuqueyeniefiel tañi pu pichiqueche. Pu chau ca pu ñuque huelulcauquelu rume, ayüniei tañi pu yall ca püñeñ ñi cüme feleal ca ayüucüleal, feimu piuqueyen mu quimeltuquefi, ngülamtuquefi, quelluquefi ca norümquefi engün. Fei, ¿chem ayüquei pu chau ñi femal tañi pu yall?  Ayüniei ñi piuqueyeaeteu ca inanieñmayaeteu ñi feipin tañi cümelcaleal engün. Ca femngechi taiñ Fütra Chau ayüniei taiñ piuqueyeafiel ca mañumtuafiel com ñi femqueel iñchiñ mu.

Cüpa allcütufiliyiñ ta Chau Ngünechen, mülei taiñ quimürpual ca inanieal com tañi feipin. Pepi allcütuquelafiyiñ ta Chau Dios chumngechi taiñ allcütuquefiel pu che, huelu allcütuñmayafuiñ ñi dungun papeltuliyiñ ta Biblia ca femliyiñ taiñ quimürpuqueel (1 Juan 5:3).

Ñi pengelal fente ñi falin-ngen allcütuafiel ta Chau Dios, Jesús feipi: “Re cofque meu müten mongelequelai ta che. Huelu mongelequei inale com ñi feipiel Chau Jehová” (Mateo 4:4). Falin-ngei taiñ iyal, huelu doi falin-ngei taiñ quimürpuafiel Chau Ngünechen ñi dungu. ¿Chumngelu am? Biblia feipi: “Ti quimün am cuñiutucuchequei chumngechi ñi cuñiutucuchequen ta plata, huelu doi cümei ta quimün, tüfa montulquefilu am tati pu nielu quimün” (Eclesiastés 7:12). Feimu ti quimün cüpalu Chau Dios mu cuñiutucuqueiñmu famülque mu ca quelluafeiñmu taiñ cüme dullial, femngechi taiñ rumel mongeleal cüpalechi antü mu.

Ca loncontucuaiñ Jesús ñi feipiel: “Pichi rupai ti conhue ca cüdaungei ñi inangeal ti rüpü yequefilu ta che ñi rumel mongeleal, fei pichin che pequei tüfachi rüpü” (Mateo 7:13, 14). Miyaufuliyiñ femngechi rüpü mu, cümeafui taiñ fülmanieafiel quiñe che adümniefilu ti rüpü fei taiñ quelluaeteu. Ca femngechi duamfali fülmaucüleal Chau Dios mu taiñ cüme amuleal tüfachi rüpü mu, fei taiñ rumel mongeleal (Salmo 16:8). ¿Chumngechi femafuiñ tüfa?

Fill antü fentren duam niequeiñ ca alün dungu ayüafuiñ ñi femal. Feimu chi elantücünulayafuiñ taiñ raquiduamal Ngünechen ñi ayüqueel. Feimu Biblia ngülamtuqueiñmu: “Rume cuñiutuculemün, huedhued che reque miyaulayaimün, quimche reque miyahuaimün. Cuñihun-ngechi antü mu müleiñ, feimu ngünamcaquelayaimün tamün tiempo” (Efesios 5:15, 16). Feimu llemai, com taiñ piuque mu doyümniefiliyiñ hueniyeafiel ta Chau Ngünechen, fülmaucüleaiñ quisu meu (Mateo 6:33).

Huelucünutulayafuiñ taiñ femün cuifi, huelu cüme dulliafuiñ chem chumal famülque mu, fei rumel cümelcalerpual taiñ pu che iñchiñ. Biblia quimeltuquei taiñ Huenu Chau Jehová müna piuqueyenieiñmu ca feipiquei chem taiñ femal. Ngüneduamaiñ ñi chem pin ti profeta Miqueas Biblia mu:

“Ahuem huentru, quisu feipieimeu chem am tati cümelu. Fei Jehová, ¿chem feipieimu tami femal? ¡Tüfa müten: tami femal norngechi dungu, falintuafiel ti nor piuquengen ca miyahual tami Chau Ngünechen engu ñom piuque mu!” (Miqueas 6:8).

Jehová feipinieimu reque: ‘Mür miyahuayu, fei rumel cümelcanieayu’. ¿Chumaimi cai? ¡Eimi dulliafuimi llemai!