FÜTRA cuifi mu, pu israelita nütramcaquefuingün ca feipicünuuquefuingün chumngechi ñi cureyehual quiñe huentru quiñe domo engu. Deu nütramcalu tüfachi dungu, tati nofio cam tañi pu familia culliquefi tati nofia ñi pu che. ¿Chem culliquefuingün? Falinque fillem, culliñ cam plata. Quiñeque mu, culliquefuingün cüdau mu. Femngechi femi ta Jacob. Quisu cüdahuelfi regle tripantu Raquel tañi chau, femngechi tañi cureyehual Raquel engu (Gén. 29:17, 18, 20). Pu israelita, ¿chumngelu culliquefuingün ti nofia mu?

Quiñe domo fente cüme quimnielu Biblia ñi feipin, Carol Meyers, feipi: “Pu familia cüdauquefuingün ti mapu, fei amutule quiñe ñahue niehuetulayafuingün quiñe cüdaufe. Tüfa rume fütra perdidangeafui, feimu tati nofia ñi pu che mülefui ñi cullingeal. Tüfachi cullitun ca quelluquefui ti epu familia ñi doi hueniyehual ca quiñeucüleal. Femngechi ti epu familia quelluhuafui rupale huesaque dungu mu engün. Ti cullitun ca pengelquefui ti huentru ti domo engu ñi cureyehual. Ca pengelquefui ti chau ñi cuidahuetunoafiel tañi ñahue, feula ti füta mülei ñi femal tüfa”.

Ñi cullingeel ti chau ñi ñahue mu, tüfa pengelquelai quiñe chemcün reque fendengelu. Ti lifru Instituciones del Antiguo Testamento feipi: “Quiñeque che raquiduamafuingün pu israelita ngillaquefuingün ti nofia, huelu feingelai. Ti cullitun mu ti nofia ñi pu che quellungequei, ngillañmangequelafui ti nofia”.

Fachantü quiñeque pais mu, pu che petu inaniequei tüfachi huimtun ñi cullingeal quiñe nofia mu. Pu cristianongechi chau feipiquelai: “Alün plata cullingean ñi fütangeal tañi ñahue” piquelai. Femngechi pengelqueingün ñi ngünefalchengen ca ñi diñmatuquenofiel ta plata (1 Cor. 10:32, 33; Filip. 4:5; 2 Tim. 3:2). Cafei pu cristianongechi chau pedinole fentren plata ñi fütangerpual ñi ñahue, femngechi ti nofio cüdautulayai ñi trapümal plata ca doi matu cureyehuafuingu. Cafei ti nofio precursor ngele, elcünulayafi ti amuldungun.

Quiñeque pais mu, tati ley feipiquei tunte tañi cullingeafel quiñe nofia mu. Pu cristianongechi chau mülelu feichi pais mu, inaquefi feichi ley. ¿Chumngelu femqueingün tüfa? Tati Biblia feipiquei pu cristiano “felei ñi yamnieafiel tati mülechi pu autoridad” ca inayafiel tati ley caiñetuquenofilu Chau Dios ñi dungu (Rom. 13:1; Hech. 5:29).