Falintuafuiñ kiñe yewün taiñ eluetew kiñe che doykülelu iñchiñ mu kam taiñ falintukefiel. Kakelu ngünam yewün trokingeafuy, welu elueliyiñmu kiñe taiñ pu che kam kiñe küme weni, müna falintuafiyiñ. Tüfa rakiduami Jordan, taiñ dew inaduampefiel. Welu, ¿chumngechi tüfa nüwküley Chaw Dios ñi yewün mu taiñ montulaetew?

Wüne, Biblia feypi: “Ngünechen pengeleleiñmew taiñ piwkeyeetew feychi werkülu tañi kiñen Fotüm ta tüfachi mapu mew femngechi taiñ nieael rumel mongen ta kisu ñi Fotüm mew” (1 Juan 4:9). Feymu fente falin-ngey tüfachi yewün. Iney no rume doykülelay Chaw Ngünechen mew. Kiñe wirintukulu ti Biblia feypi: “Eymi müten tami Alüpüralen itrokom Mapu mu, Jewba pingey tami üy” (Salmo 83:18). Ngelay iney no rume doykülelu taiñ eluafetew kiñe yewün.

Epu, Ngünechen fey “taiñ Chaw” (Efesio 1:2). ¿Chumngelu? Kidu elueiñmu ti mongen. Kafey nor piwke mu dapikeeiñmew, kiñe küme chaw reke. Nütramkalu reke ta Efrain mu, feypi tañi trokiñche mu: “¿Poyen fotüm yekelafiñ am ta Efrain, kiñe sakin pichiche reke? [...] Feymu kidu ñi duam mu nengümuwi ñi piwke. Ka rüfngey llemay, iñche kutranpiwkeyeafiñ” (Jeremías 31:20). Famülke mew, Chaw Ngünechen ka femngechi rakiduamkey tañi pu che mu. Kidu kom pepiluwün niey ka dewmaeiñmew, welu kafey chawyefiyiñ ka weniyefiyiñ. Feymu chem yewün rume küpalu kidu mew, müna falintukefiyiñ.

Iñchiñ falintukefiyiñ kiñeke yewün taiñ elungeel ayüwün mu, fente taiñ piwkeyekeetew ti che. Tati küme piwke mu wülkelu, rakiduamkelay chem ñi llowal.

Chaw Ngünechen wüli tañi Fotüm fente taiñ piwkeyekeetew. Biblia feypi: “Ngünechen pengeleleiñmew taiñ piwkeyeetew feychi werkülu tañi kiñen Fotüm ta tüfachi mapu mew femngechi taiñ nieael rumel mongen ta kisu ñi Fotüm mew” (1 Juan 4:9). Chaw Dios, ¿weda duam mu werküfi tañi Fotüm? ¡Femlay tati! Jesus ñi lan mu, pengelngey Chaw Ngünechen “tañi kutranduamyechen” (Romanu 3:24).

¿Chumngelu? Biblia feypi: ‘Kimfali Ngünechen taiñ piwkeyenieetew, feychi petu kulpafengelu ta iñchiñ, Cristo lay iñchiñ taiñ duam’ (Romanu 5:8). Chaw Dios ñi rüf piwkeyechen mu, kellueiñmew, kom iñchiñ yafüngenolu rume, nienolu maneluwün ka kulpafengelu. Chem no rume femlayafuiñ taiñ füreneaetew, ka turpu kullilayafuiñ kütu. Feymu Chaw Dios ñi yewün, pengeli ñi fütra piwkeyechen, iney no rume femngechi femkelafuy.

Kimliyiñ chem ñi elkünuel kiñe che taiñ eluaetew kiñe yewün, fey doy falintuafiyiñ. Kiñe che ayüwün mu elueliyiñmu kiñe dungu ñi rume falintufiel, sakin yewün trokiafiyiñ.

Chaw Dios wüli tañi doy piwkeyenieel, “ñi kiñen Fotüm” (Juan 3:16). Kidu rume piwkeyefi ta Jesus, fentreñma mu ñi kelluetew am dewmalu kom tati müleyelu (Proverbios 8:30). Jesus, fey ta Chaw Dios “ñi sakin Fotüm”, ka kidu mew “pengey ñi chumngen ta Ngünechen” (Kolosense 1:13-15). Rakiduamlayafuiñ tunte ñi kiñewkülen Chaw Dios engu Jesus.

Welu Jewba eluwi ñi wültukual “kisu tañi kiñen Fotüm” (Romanu 8:32). Iñchiñ mu wüli tañi doy falintuniefiel. Turpu femngechi kutrankawlafuy ñi wülal kiñe yewün.

Kiñe yewün elueliyiñmu taiñ duamnieel, pürüm duamnieliyiñ taiñ kellungeal chi, fey doy falintuafiyiñ. Rakiduamnge, weda kutrankülelmi, welu nienolmi plata, ¡müna mañumküleafuymi kiñe che kullile tami lawentuñmangeal! Rume falintuafimi llemay feychi yewün.

“Fey chumngechi ta Adan mew itrokom che lakey, fey ka femngechi ta Cristo mew itrokom che wiñomongetuay” (1 Korintio 15:22). Kom tuwiyiñ Adan mu, feymu lakeiñ, montuluwlayafuiñ ti kutran ka lan mu, ka taiñ duam mu kümelkawlayafuiñ Chaw Ngünechen engu kam nor che trokilayafeiñmew. Taiñ kulpafe chengen mu, elulayafiyiñ mongen iney no rume, kidutu eluwlayafuiñ rume. Biblia feypiley: “Kiñe no rume kidu engün mew pepi montulkelafi ka kullikelafi Ngünechen ñi montulafiel kiñe che no rume [...] fey turpu diturpufal-lay” (Salmo 49:7, 8). Kullilayafuiñ taiñ montulngeal, feymu pürüm duamnieiñ taiñ kellungeal. Nielayafuiñ maneluwün taiñ duam mu.

Ti wentru reke kullilu tami lawentuñmangeal, Jewba ñi fütra piwkeyechen mu, kulli taiñ montual. Feymu nieafuiñ mongen Jesus mew. Welu Jesus ñi lan, ¿chumngechi kelluafeiñmew? ‘Jesucristo, Ngünechen ñi Fotüm, tañi mollfüñ liftutueiñmew kom kulpan mew’. Feymu, mupiltuliyiñ Jesus ñi lan mu, kelluaeiñmew ñi  wiñoduamatungeal taiñ kulpan ka nieal afnoachi mongen (1 Juan 1:7; 5:13). Chaw Dios ñi elkünuel taiñ montulaetew, ¿ka kelluafi taiñ pu che layelu? May, ‘chumngechi ta kiñe wentru ñi duam müley ta kulpan mapu mew, ka femngechi ta kiñe wentru [Jesus] ñi duam müley ñi wiñomongetuael tati pu layelu’ (1 Korintio 15:21). *

Chaw Dios ñi elkünuel taiñ montulaetew, kiñe trürümfalngenochi yewün tati. Ngelay iney no rume doykülelu kam fente piwkeyechekelu taiñ eluafetew femngechi yewün. Kafey iney no rume kutrankawlafuy Chaw Dios reke taiñ eluaetew kiñe yewün. Ka tüfachi yewün müten elueiñmew taiñ rume duamnieel ñi montulngeal kulpan ka lan mu. Femi llemay, chem yewün no rume trürümfalngelayafuy Chaw Dios ñi yewün mu.