Ti Biblia cüme elcünutueyu ñi mongen

¿CHUMNGELU quiñe rastafari cupiluhui ca üdehuelafi tati lig che? Quiñe hueche huentru quehuafengelu ca cüdahuelquefilu pu traficante de droga, ¿chem quellueyu ñi elcünutual ñi huesa mongen? Allcütuñmayafiyiñ ñi nütramel engu.

“Üdechehuelan” (HAFENI NGHAMA)

TUNTEN TRIPANTU NIEI: 34

CHEU ÑI TUHUN: ZAMBIA

ÑI RUPAN: RASTAFARI NGEQUEFUI

TAÑI CUIFI MONGEN: Hueichan ñi duam mu, tañi ñuque lefmahui Namibia mu. Ca tañi ñuque coneltui quiñe troquiñche hueichafilu ti gobierno ngüneniefilu Namibia mapu. Tañi ñuque mülepui quiñe campo de refugiados mülelu Zambia mapu mu, fei mu choyüeneu.

Rupan tañi hunen mari quechu tripantu hueluque campo de refugiados mu. Taiñ pu huechequechengen feiti campo de refugiados mu, quimeltungequefuiñ taiñ caiñetuafiel ti ngünenielu Namibia ca taiñ üdeafiel tati lig che.

Nielu mari quiñe tripantu, ayüfun ñi cristianongeal ca coneltuleal tati iglesia mülelu tati campo de refugiados mu. Huelu tati pastor mülelu feiti iglesia mu pilaeneu ñi femal. Feimu fente ñi huesa duameleteu, feyentuhuelan ñi mülen quiñe Dios. Nielu mari quechu tripantu, rume ayürpufiñ feiti musica reggae pingelu. Ca cüpa quelluntucufun ñi huesalcangenoal tati curüque che, feimu coneltun tati pu rastafari engün. Elcünun ñi tremal tañi cal lonco ca mahuellcünuquefuiñ, eluhun ñi pütremtual marihuana ca ilotuhuelan. Ca nütramcaquefuiñ caquelu pu che ñi lifrengeal tati pu curüque che. Huelu cacünutulan tañi pod mongen yenieel. Petu peniequefun pelicula quehuan dungu pengelquelu ca huesa entuquen tañi hun.

TI BIBLIA CÜME ELCÜNUTUENEU ÑI MONGEN: Fei 1995 tripantu mu nielu 20 tripantu, raquiduamün ñi chem cüpa femün tañi mongen mu. Feichi püle inaduamquefuiñ fillque chillcatun ñi entuqueel pu rastafari. Quiñequentu feiti chillca niequefui quiñeque troquiñ tripalu Biblia mu, huelu iñche pepilquelafuiñ, feimu eluhun ñi quisutu chillcatuafiel ti Biblia.

Rupachi antü quiñe hueni rastafari ngelu elueneu quiñe lifru quimeltuquelu Biblia, ñi entuqueel pu Dunguquelu Ineingen Jehová, feimu eluhun ñi inaduamafiel Biblia engu. Ca rupalu ti antü, quintufiñ pu Dunguquelu Ineingen Jehová tañi doi quimeltuaeteu. Huelu petu ñi chillcatulnoeteu engün, eluhun tañi doi cüme yenieal ñi mongen.

Cüdautuhun mu eluhun ñi pütremtuhuenoal ca putuhuenoal (2 Corintios 7:1). Cüme elcünutun tañi ad ca cupiluhun. Pequentuhuelan pornografia ca pelicula nielu quehuan dungu. Ca huesa entuhuelan tañi hun (Efesios 5:3, 4). Rupachi antü mu üdechehuelan, feimu üdehuelafiñ tati pu lig che (Hechos 10:34, 35). Tañi femal com tüfa, ca eluhun allcütuhuenoal ti musica feipiquelu ñi üdeafiel pu lig che. Ca hueniyehuelafiñ feiti che ayünolu iñche ñi cüme elcünutual ñi mongen.

Deu elcünulu fentren huesaque dungu tañi mongen mu, quintun pu Dunguquelu Ineingen Jehová ñi Trahunhue Ruca. Fei hula quimeltungen chem feipiquei tati Biblia. Ca rupalu chi antü ayün tañi fautizahual, huelu tañi pu che ayüucülelafuingün. Tañi ñuque feipieneu ñi coneltual chem religion mu rume, huelu coneltunoal pu Dunguquelu Ineingen Jehová mu. Quiñe tañi pariente coneltuquefulu ti gobierno mu, epe fill antü chaftudunguqueneu ñi Dunguquelu Ineingen Jehová ngenoal.

Eluhun ñi inayentuafiel Jesús tañi cüme femün, feimu afeluulan caiñetueteu ca ayentueteu rume tañi pu familia. Cafei ngüneduamün pu Dunguquelu Ineingen Jehová ñi quimeltun ñi com nüucülen Biblia mu, femngechi quimtucun ñi rüf religion-ngen engün. Quisu engün inaniefingün Biblia ñi feipin ñi amuldungucheal (Mateo 28:19, 20; Hechos 15:14). Ca coneltuquelaingün politica dungu mu (Salmo 146:3, 4; Juan 15:17, 18).

CHEM CÜMELCAN LLOHUN: Inaniefiel mu ñi feipin Biblia rume cümelcaeneu. Pütremtuhuelan marihuana, femngechi ngünamcamequehuelan tañi plata. Huesa duamelhuelaeneu tati droga, doi mai tüngcülei tañi raquiduam ca doi cüme duamcületun.

Petu pichicalu iñche ayüquefun ñi ayühun mongen yenieal, feula diturpufiñ. Huelu ti doi falin dungu: feula fülcülen tañi Chau Dios mu (Santiago 4:8).

“Quim ngünehun ñi illcufe chengehuenoal” (MARTINO PEDRETTI)

TUNTEN TRIPANTU NIEI: 43

CHEU ÑI TUHUN: AUSTRALIA

ÑI RUPAN: QUEHUATUCHEFENGEFUI CA FENDEQUEFUI DROGA

TAÑI CUIFI MONGEN: Pichicalu iñche, tañi pu familia rumel huiñamtuuquefui. Feimu mülequefuiñ pichique huaria mu ca quiñe fütra huaria mu, ca quiñe camapulechi lof mu. Rume cüme rupaquefun tañi pu primo engün ca tañi pu huecu, entuquefuiñ challhua ca nüquefuiñ culliñ.

Tañi chau boxeador ngequefui, feimu pichicalu müten iñche quimeltueneu tañi ca quehuayal. Hueche huentrungelu iñche, rume amuquefun bar mu tañi putucahual. Iñche ca tañi pu hueni quintucaduamquefuiñ pu che taiñ quehuayal. Miyahulquefuiñ cuchillo ca caroti taiñ quehuayal. Quiñeque mu doi 20 che engün cütu quehuaquefuiñ.

Tañi nieal plata, fendequefun droga ca fendequefun fillque chemcün hueñequelu caquelu che. Ca cüdahuelquefuiñ pu traficante de droga, inei rume tañi defenieteu iñche aneltuquefuiñ tralca mu. Iñche feipiuquefun: “Tami langümngenoal, eimi mai hunelu mu langümcheaimi”. Ayüquefun ñi langümchefengeal.

TI BIBLIA CÜME ELCÜNUTUENEU ÑI MONGEN: Petu pichicalu müten iñche, quimquefun pu Dunguquelu Ineingen Jehová. Nielu iñche doi 20 tripantu, ramturumefiñ tañi ñuque quisu engün mu. Epu antü müten rupalu, acui tañi ruca mu quiñe Dunguquelu Ineingen Jehová, Dixon pingelu. Pichi nütramcayu, fei mangeleneu quiñe trahun mu. Amun tati, fei deu yenien 20 tripantu tañi amumequen. Com ñi ramtuquefiel, pu Dunguquelu Ineingen Jehová huiñoldunguquefeneu Biblia mu.

Quimürpun Chau Dios ñi duamtuquefiel com che, feiti huesa chengelu cütu (2 Pedro 3:9). Ca quimürpun Chau Jehová quiñe cüme Chaungei ca cuñiutucuafeneu caquelu che femnoelimeu rume. Rume yafültucueneu quimürpulu cüme elcünutuli tañi mongen, quisu com rulpacünuafui tañi culpan. Ñi feipin Efesios 4:22-24 puhui tañi piuque mu. Feiti mu feipilei “taiñ famentuafiel taiñ chumngechi chengefel cuifi”, feimu mülei ñi “huengetual taiñ chumngechi chengen”.

Iñche rume cüdautun ñi elcünual tañi cuifi mongen. Epe fill antü drogatuquelafun, huelu aculu afchi semana mülelu tañi pu hueni engün, ca huiño drogatuquefun. Fei inaduamün: cüme elcünutual ñi mongen, mülefui ñi püntütripayal tañi huesaque compañ mu. Feimu huiñamtuhun cañpüle. Quiñeque tañi hueni compañeneu petu huiñamtuulu iñche. Huelu amulelu iñchiñ, ayüfuingün tañi ca drogatual iñche. Feipifiñ iñche ñi turpu drogatuhuenoal, feimu elcünufiñ engün ca quisu amuletun. ¡Müna cümelcan ñi femün! Pichi rupalu, tañi pu hueni tralcatulen hueñepuingün quiñe banco mu.

CHEM CÜMELCAN LLOHUN: Iñche elcünulu tañi pu huesaque hueni, doi cüdautulan ñi cüme elcünutual tañi mongen. Fei 1989 tripantu mu fautizahun, quiñe Dunguquelu Ineingen Jehová ngerpun. Ca rupalu chi tripantu, ca femürpui tañi lamngen ca tañi pu chau.

Yenien mari regle tripantu ñi curengen. Nien cüla pichiqueche: epu huentru ca quiñe domo. Quim ngünehun ñi illcufe chengehuenoal quintucaduamngeli rume. Ca piuqueyerpufiñ fillque tuhun-ngechi che caque rume quehun nielu (Apocalipsis 7:9). Jesús ñi feipin iñche mu femtripai troquiquefiñ, feipilu: “Inaniefilmün ñi quimeltun, rüfcünu llemai iñche tañi pu inanieteu pingeaimün. Quimafimün tati rüf dungu, fei tüfachi rüf dungu lifrecünutuaimünmeu” (Juan 8:31, 32).

[Feipin]

Ca eluhun allcütuhuenoal ti musica feipiquelu ñi üdeafiel pu lig che.

[Feipin]

Iñche ca tañi pu hueni quintucaduamquefuiñ pu che taiñ quehuayal. Miyahulquefuiñ cuchillo ca caroti taiñ quehuayal.