1. ¿Chem doy kimniengeelchi ngillatun ngüneduamaiñ?

FENTREN warangka che kom Mapu mu küme kimnieyngün tüfachi ngillatun Padrenuestro pingelu, tüfa doy kimniengeelchi ngillatun tati. Ka Jesukristo elkünuy tüfachi ngillatun kiñe inayentual reke, feymu müna falintufali. Ngüneduamaiñ küla dungu koneltulelu tüfachi ngillatun taiñ llellipual, feymu küme longkontukuaymi chem rüf kimeltukey ta Biblia.

2. Jesus kimeltufi tañi pu inanieetew küla dungu ñi llellipual, ¿chuchi dungu tüfa?

² Ellaka mu Jesus ñi ngillatun, feypi: “Fey eymün ta famngechi ngillatukeaymün: ‘Taiñ Chaw wenu mapu mu mülelu, yamniengepe tami üy. Küpape tami Ngünenien. Femngepe tami feypin Mapu mu, chumngechi ñi femngeken wenu mapu mu’” (Matew 6:9-13, TNM). ¿Chem küpa feypikeeiñmew ti küla dungu ñi llellipual?

3. ¿Chem fillke dungu Ngünechen ñi Ngünenien mu duamniengey taiñ kimafiel?

³ Dewma kimnieiñ fentren dungu ta Chaw Ngünechen ñi üy Jewba. Kafey ngüneduampeiñ kidu tañi ayükeelchi dungu femkelu ka femürpualu kom pu che ñi küme feleal. Welu, ¿chem am ta Jesus ñi feypin “Küpape tami Ngünenien”?  ¿Chem am Chaw Ngünechen ñi Ngünenien? ¿Chumngechi ti Ngünenien ñi küpan mu yamngeay ka liftungeay Chaw Ngünechen ñi üy? Tati Ngünenien ñi küpan mu, ¿chumngechi nüwküley Chaw Ngünechen ñi ayükeelchi dungu?

4. ¿Chem am ta Ngünechen ñi Ngünenien ka iney am Longko Ülmenküley?

⁴ Chaw Ngünechen Jewba elkünuy kiñe ngünenien. Ka dulli kidu ñi Longko Ülmen ñi ngünenieal, ¿iney am feychi Longko Ülmen? Jesukristo llemay. Kidu doyngelu am kom tati pu wentru ñi ngünenieel, feymu ta feypingekey “tati Longko ülmenkülelu kom longko ülmen mew ka Ñidolkülelu kom ñidol mew” (1 Timotew 6:15). Jesus pepilniey ñi femal alün kümeke dungu doy newen nielu am chuchi pu wentru ñi ngünenien mew, tati doy kümelu kütu.

5. ¿Chew ngüneniey tati Longko Ülmen ka chem mew ngünenieay?

⁵ ¿Chew ngünenieay tati Longko Ülmen? Ka ¿chew müley Jesus? Dewma kimpeiñ langümngelu kiñe orkon mamüll mew, wiñomongetuy, fey meli mari antü rupalu, amutuy wenu mapu mu (Hecho 2:33). Feymu lle, wenu mapu mu müley Ngünechen ñi Ngünenien. Kafey Biblia mu feypingekey “wenu mapu mülechi Ngünenien” (2 Timotew 4:18, TNM). Ti Ngünenien wenu mapu mülele rume, ka longko ülmenküleay ti Mapu mu (papeltunge Apokalipsi 11:15).

6, 7. ¿Chumngelu (chemu) Jesus kiñe trürümfalngenochi Longko Ülmen-ngey?

⁶ Jesus trürümfalngenochi Longko Ülmen-ngey. ¿Chumngelu feypikeiñ tüfa? Fey turpu lanoalu. Ka Biblia feypi trürümngelu pu wentru ñi ngünenieel mew, Jesus ‘kidu ta kiñengey müten tati chumkawnorume lanoalu, mülelu kiñe fütra pelon mew iney no rume tañi pepi fülkonpukenoetew’ (1 Timotew 6:16). Feymu may ta kom kümeke dungu femkelu rumel müleay. Ka fentren dungu femay.

⁷ Ngüneduamnge chem pin ta Biblia Jesus mu: “Kidu mu  müleay Jewba ñi püllü; kim ka küme ngüneduamngelu chi püllü, ngülamkelu ka newen-ngechi püllü, kimün-ngechi püllü ka yamkefilu ta Jewba. Ayüwmaleyew ñi yamkefiel ta Jewba. Ramtukadungulayay re ñi pefiel müten kiñe dungu, ka norümlayay ñi allkütuel müten ti dungu; ka norümdunguafi tati pu fillalelu, ka nor dunguñpeñmayafi ka ngülamtuñmayafi tati pu ñompiwkengelu ñi dungu Mapu mu mülelu” (Isaías 11:2-4). Tüfachi dungu pengeli Jesus nor dungu mu ka kutranduamyechen ngünenieafi tati pu che. ¿Ayüafuymi tami nieal tüfachi Longko Ülmen?

8. ¿Iney engün ngünenieay Jesus engu?

⁸ Peaiñ ka dungu Ngünechen ñi Ngünenien mu: müley kakelu che ngüneniealu Jesus engu, fey kidu ngünenielayay. Feymu Pablo feypifi ta Timotew: ‘Fey kutrankawliyiñ, ka femngechi kiñewün mew ngünenieaiñ Kristo iñchiñ’ (2 Timotew 2:12). Femngechi Pablo, Timotew ka kakelu manelfalchi che Ngünechen ñi dulliel ngünenieay Jesus engün wenu mapu mu. ¿Tunten che koneltuleay tüfa?

9. ¿Chumten che ngünenieay Jesus engün, ka tunten mu Ngünechen eluwi ñi dulliyeniefiel engün?

⁹ Chumngechi peiñ regle chillkatun tüfachi lifru mu, ti apostol Juan pefalelngey tüfachi dungu: ‘Tati Korderu [Jesukristo], witralelu Sion pingechi wingkul mew [Longko Ülmenkülelu wenu mapu mu]. Kompañnieeyew 144.000 che, wirintukunielu tañi tol mew tati Korderu tañi üy ka kisu tañi Chaw ñi üy’. ¿Iney engün am tati 144.000 che? Juan feypi: “Fey tüfa engün ta yamüñmakefi Ngünechen ñi Korderu ñi kümeke dungu. Montulngey engün rangi tati pu che mew kiñe dullin ofrenda reke Ngünechenngealu ka tati Korderungealu” (Apokalipsi 14:1, 4). Tüfachi pu che Jesukristo ñi manelfalchi inaniekeetew dullingelu ñi ngünenieal Jesus engu wenu mapu mu. Fey rupan ñi lan mu ka ñi wiñomongetun wenu mapu mu, fey engün “longko ülmenküleay ta tüfachi mapu mew” Jesus engün (Apokalipsi 5:10). Tati pu apostol ñi antü mu, Chaw Ngünechen amuy ñi dulliyeniefiel tati pu manelfalchi kristiano ñi diturpual 144.000 che.

10. Jewba ñi dullifiel Jesus ka 144.000 che ñi ngünenieal kom pu che, ¿chumngechi pengeli ñi piwkeyechen-ngen?

 ¹⁰ Jewba ñi piwkeyechen mu, dullifi ta Jesus ka 144.000 che ñi ngünenieal kom pu che. Feymu Jesus wentrungepalu am küme kimniey tati pu che ñi kutrankawün. Feymu Jesus mu, Pablo feypi ‘iñchiñ feley taiñ kutranpiwkeyeaetew taiñ kutrankawkeelchi ngañwadün dungu mew, kisu am ka femngechi kutrankawün-ngechi dungu mew rupalu iñchiñ reke, welu kisu turpu kulpalay’ (Ebrew 4:15; 5:8). Ka femngechi tati pu dullingelu ngüneniealu Jesus engün ka rupayngün fill kutrankawün nielu che. Fey chaftukeyngün kidu ñi welulkan mu, kafey fillke kutran mu rupakeyngün. Feymu may tati pu dullingelu küme kimnieayngün chem wedake dungu chaftukey pu che.

11. ¿Chumngelu Jesus feypifi tañi pu inanieetew mülefuy ñi llellipuafiel Jewba ñi femal tañi ayükeelchi dungu wenu mapu mu?

¹¹ Jesus werküfi tañi pu inanieetew ñi ngillatual küpape Ngünechen ñi Ngünenien, kafey feypifi ñi llellipual ñi femürpual Jewba ñi ayükeelchi dungu “Mapu mu, chumngechi ñi femngeken wenu mapu mu”. May Chaw Ngünechen ñi mülen wenu mapu mu, ka tañi pu manelfalchi püllü rumel femkeyngün tañi ayükeelchi dungu. Welu küla chillkatun mu, peiñ kiñe rume weda püllü fentekünuy ñi femken Ngünechen ñi ayükeelchi dungu, ka kidu ñi duam mu Adan engu Eva welulkawingu. Feymu doy kimaiñ mari chillkatun mu, chem kimeltukey tati Biblia tüfachi weda püllü, Satana pingelu. Ngünechen eluñmafi tüfachi weda püllü ka kakelu püllü ñi inanieetew pichiñma mu ñi mülekayal wenu mapu mu, tüfa engün weküfü pingelu. Feymu may Jesus ñi antü mu, kiñeke püllü mülelu wenu mapu mu femkelafuyngün Ngünechen ñi ayükeelchi dungu. Welu tüfa kangeturkealu Jesus longko ülmenkületule Ngünechen ñi Ngünenien mu ka weychayafilu ta Satana (papeltunge Apokalipsi 12:7-9).

12. Apokalipsi 12:10 mu, ¿chem epu falin dungu feypiley?

¹² Tüfachi pelon dungu feypi chem ñi rupayal: “Allkün kiñe newentu dungun ta kallfü wenu mew, feypilu: ‘Dew puwi taiñ  Ngünechen ñi montulcheael, taiñ Ngünechen ñi pengelael ñi fütra pepiluwün ka ñi longko ülmenngeael ka kisu tañi Cristo ñi ngünenieael kom dungu, dew wemünentungelu am [Satana] taiñ dalluntukuñmakeetew taiñ pu peñi ka pu lamngen, tati fill antü dalluntukuchekelu iñchiñ taiñ Ngünechen mew’” (Apokalipsi 12:10). Tüfachi versikulo mu feypiley epu falin dungu, ¿ngüneduamfimi? Wünelu mu, llituy Ngünechen ñi Ngünenien adnielu ta Jesus. Epungelu mu, Satana wemünentungey wenu mapu mew ka ütrüfnakümngepay Mapu mew.

13. Wemünentungelu Satana wenu mapu mu, ¿chem dungu rupay?

¹³ Tüfachi epu dungu mu, ¿chem dungu küpali? Peaiñ chem dungu rupay wenu mapu mu: “¡Ayüwmün, may, kallfü wenu, ka eymün müleyelu tüfey mew!” (Apokalipsi 12:12). Satana ka tañi pu weküfü wemünentungelu am wenu mapu mu, feymu tati pu manelfalchi püllü rume ayüwkületuyngün, femngechi kom kümeke püllü petu mülewelu wenu mapu mu, püntütripakelayngün ta Chaw Ngünechen Jewba, tüngküleyngün ka kiñewküleyngün fey engün mu. Feymu wenu mapu mu femngekey Ngünechen ñi ayükeelchi dungu.

14. Ütrüfnakümngepalu Satana Mapu mew, ¿chem dungu rupay?

¹⁴ Mapu mu kay, ¿chem feypiafuiñ? Biblia feypi: ‘¡Awngeay tati müleyelu Mapu mew ka lafken mew, tati Weküfü, kimnielu am ñi alüñmawenoal, nagpay eymün tamün kayñetuaetew rume fütra lladken mew!’ (Apokalipsi 12:12). Satana wemünentungelu am wenu mapu mu, feymu fütra illkuley ka kimi ñi niewen pichin antü müten. Satana ñi fütra illkulen mu, re wedake dungu femmekey Mapu mew. Kakelu chillkatun mu doy kimaiñ tüfachi wedake dungu, welu chumngechi ngüneduampeiñ nga, ramtuwkeiñ: ¿Chumngechi tüfachi Ngünenien femürpuay Ngünechen ñi ayükeelchi dungu Mapu mew?

15. ¿Chem ayükeelchi dungu niey Ngünechen ta Mapu mu?

¹⁵ Feymu llemay, tukulpaymi chem ayükeelchi dungu niey Chaw Ngünechen Mapu mu. Chumngechi peiñ küla chillkatun mu, Jewba pengeli Eden lof mew, fey ñi ayünieel ti Mapu kiñe küme mülewe ngetual ka ñi müleal fentren norngechi che turpu lanoalu. Feymu Satana femürpulu Adan ka Eva ñi welulkan  engu, fey katrütuy ñi femürpual Ngünechen ñi ayükeelchi dungu Mapu mew, welu tüfa kakünuwlay. Feymu lle Jewba petu ayüniey ñi wechurpual tüfachi dungu: “Tati pu norngechi che lloway ti Mapu ñi ngen-ngeal engün, ka rumel müleayngün fey mu” (Salmo 37:29). ¿Chumngechi Ngünechen ñi Ngünenien femürpuay tüfa?

16, 17. Daniel 2:44 mu, ¿chem kimeltukeeiñmew Ngünechen ñi Ngünenien mu?

¹⁶ Daniel 2:44 mu müley tüfachi pelon dungu: “Tiyechi pu longko ülmen ñi antü mu, tati Ngünechen wenu mapu mülelu elkünuay kiñe ngünenien chumkawnorume teyfükangelayay. Ka tüfachi ngünenien elkünungelayay kake trokiñche mu. Atemkayafi ka apümkayafi kom tüfachi kakelu pu ngünenien, ka kidu müten rumel müleay”. ¿Chem kimeltukeeiñmew tüfachi pelon dungu Ngünechen ñi Ngünenien mu?

¹⁷ Wünelu mu, tüfachi Ngünenien elkünungerkeay “tiyechi pu longko ülmen ñi antü mu”, tüfa küpa feypi petu müleyerkelu kakelu wentru ñi ngünenien. Epungelu mu, tüfachi Ngünenien rumel müleay. Ka chem ngünenien no rume wewlayaeyew ka welukonlayay. Külangelu mu, pengeli Ngünechen ñi Ngünenien ka ti pu wentru ñi longko ülmenkülen ti Mapu mu weychayayngün, ka Ngünechen ñi Ngünenien müten weway. Af mew, tati pu che kiñen Ngünenien müten nieayngün, ka tüfa trürlayay chem ngünenien no rume.

18. ¿Chem üy niey tüfachi weychan Ngünechen ñi Ngünenien ka pu wentru ñi longko ülmenkülen Mapu mew engu?

¹⁸ Biblia kimeltukey fentren dungu tüfachi weychan mu, Ngünechen ñi Ngünenien ka pu wentru ñi longko ülmenkülen ti Mapu mu engu. Peaiñ kiñe dungu, fülkülepalu ti antü feychi weychan, tati pu wedake püllü amultukuayngün koylake dungu ñi ngünenkayafiel ta “itrokom mapu mülechi pu longkolelu”. ¿Chumngechi? Ñi ‘trawülafiel feychi antü tati itrokom pepiluwün niechi Ngünechen ñi feypikünuel’. Fey tati pu longko ülmen trawülngeayngün “kiñe lelfün mew ebrewdungun mew ta Armagedon pingelu” (Apokalipsi 16:14, 16). Chumngechi feypiley tüfachi epu versikulo, tüfachi weychan tati pu wentru  ñi longko ülmen ka Ngünechen ñi Ngünenien engu, ti weychan Armagedon pingelu.

19, 20. Famülke mew, ¿chem dungu katrütuniey ñi femürpual Ngünechen tañi ayükeelchi dungu Mapu mew?

¹⁹ ¿Chem femürpuay Ngünechen ñi Ngünenien ti weychan Armagedon mu? Ka rakiduamaiñ Ngünechen ñi ayükeelchi dungu mu, kiñe küme mülewe ngetuay ti Mapu ka re kulpangenochi che ka norngechi che müleay ñi poyeafiel ta Ngünechen. ¿Chem dungu katrütuniey ñi femürpual Ngünechen tañi ayükeelchi dungu famülke mew? Wünen weda dungu, kom iñchiñ kulpakeiñ, feymu kutrankawkeiñ ka lakeiñ. Welu kechu chillkatun mu kimpeiñ, Jesus lay kom iñchiñ mu taiñ afnoachi mongen nieal. Rüfkünu llemay, tukulpayaymi tüfachi dungu mülelu Juan pingechi Evangelio: “Fey tüfa ta feyngey Ngünechen am rume piwkeyefilu ta kom mapu mew mülechi pu che, feymew wüli ñi kiñen Fotüm femngechi kom tati feyentulu kisu mew chumkawnorume ñi lanoael, welu may ñi nieael ta rumel mongen” (Juan 3:16).

²⁰ Kangelu weda dungu, müley fentren che wedalkamekelu. Fey engün koylatukeyngün, ngünenkakeyngün ka podngechi mongen niekeyngün. Kafey pikelayngün ñi femal Ngünechen ñi ayükeelchi dungu. Welu kom tüfachi che femkelu wedake dungu apümngeay Ngünechen ñi weychan Armagedon mew (papeltunge Salmo 37:10). Ka kiñe dungu, pu wentru ñi ngünenieel kellukelafi tati pu che ñi femal Jewba ñi ayükeel, feymu femngekelay Ngünechen ñi ayükeelchi dungu ti Mapu mew. Fentren tüfa engün pepil-layngün ñi ngünenieel, weda piwkengeyngün ka wedañmangeyngün. Feymu Biblia küme feypi: “Pu wentru ngüneniefi tati pu che kidu ñi wedalkawal” (Eclesiastés 8:9).

21. ¿Chumngechi ti Ngünenien femürpuay Ngünechen ñi ayükeelchi dungu Mapu mu?

²¹ Welu dew rupale Armagedon, tati pu che nieayngün kiñe ngünenien müten, fey tüfa Ngünechen ñi Ngünenien. Feychi Ngünenien femürpuay Ngünechen ñi ayükeelchi dungu ka eluay afmatufalchi kümelkan. Peaiñ kiñe dungu, tüfachi Ngünenien apümafi Satana ka tañi pu weküfü (Apokalipsi 20:1-3).  Kafey tati pu manelfalchi che kutrankawelayay ka lawelayay rume, fey afnoachi mongen nieayngün, femngechi tüfachi Ngünenien eluñmayay ñi femürpual Jesus ñi chalintukuwün (papeltunge Apokalipsi 22:1-3). Kafey ti Mapu kiñe küme mülewe ngetuay. Femngechi tüfachi Ngünenien femürpuay Ngünechen ñi ayükeelchi dungu Mapu mew ka yamüñmayafi Chaw Ngünechen ñi üy. ¿Chem am ta tüfa? Fey Ngünechen ñi Ngünenien mu, kom tati pu che yamnieafi ka püramyeafi Chaw Ngünechen ñi üy, Jewba llemay.

22. Ngünechen ñi Ngünenien küpalay Jesus mülepalu Mapu mu ka wiñomongetulu wüla rume, ¿chumngechi kimkeiñ tüfa?

²² Jesus feypifilu tañi pu inaniekeetew ñi llellipual ta Chaw Ngünechen “Küpape tami Ngünenien”, welu feychi antü mu petu küpalafuy feychi Ngünenien. Feymu, ¿küpapey may püratulu ta Jesus wenu mapu mew? Femlay llemay, tati apostol Pedro ka Pablo feypingu Jesus wiñomongetulu wüla, wechurpuy tüfachi pelon dungu Salmo 110:1 mu mülelu: ‘Fey Jewba feypifi tañi Ñidol: “Anüpange iñche tañi man püle, kom famnagümfili wüla tami pu kayñe miñche tami namun mew”’ (Hecho 2:32-35; Ebrew 10:12, 13). Femngechi Jesukristo mülefuy ñi üngümküleal pichin antü mu.

23. a) Ngünechen ñi Ngünenien, ¿chumül am llituy ñi ngünenieel? b) ¿Chem pengelay inalechi chillkatun mu?

²³ ¿Tunteñma mu mülefuy ñi üngümküleal Jesus? Epe meli mari tripantu petu ñi kon-non 1914 tripantu, kiñe trokiñ manelfalchi che chillkatukelu Biblia kimtukuyngün feychi 1914  tripantu mu Jesus afi ñi üngümkülen. (Tami doy kimal 1914 tripantu mu, peaymi ti Doy Kimngeam pingechi dungu, feypilelu “1914: falin tripantu Biblia ñi pelon dungu mu”). Feychi 1914 tripantu mu, fillke dungu rupamekelu kom Mapu mu, tüfa pengeli pu chillkatukelu Biblia mupiñfali ñi feypin. Feymu Biblia ñi pelon dungu ñi wechurpun, pengeli feychi 1914 tripantu mu, Jewba Longko Ülmenkünufi ta Kristo ka nüy ñi Ngünenietual wenu mapu mu. Feymu may ta müleiñ Satana ñi niewen “pichin antü mu” (Apokalipsi 12:12, TNM; Salmo 110:2). Kafey maneluwküleiñ tüfachi Ngünenien, pichiñma mu femürpuay Ngünechen ñi ayükeelchi dungu Mapu mew. ¡Müna küme dungu! ¿Mupiñ peno? ¿Rüfngepey may? Feymu inalechi chillkatun mu, pengelay chem rüf kimeltukey tati Biblia tüfachi dungu mu.