NGÜNECHEN ñi pu kona, rupale wedake dungu ñi mongen mu, trokiwle engün ñi rupameken, ¿püntütripalafuyngün Ngünechen mu? Job pingechi wentru rupay feychi dungu. ¿Chum tripay? Peafiyiñ.

Job, Abraam ñi pu che ngerkefuy mülelu kiñe mapu, Arabia pingey famülke mew. Feychi antü mu, tati pu israelche mülekefuyngün Egipto mapu mu. Kiñe antü mu, Jewba trawülfi tañi pu werken püllü wenu mapu mu, ka mülefuy Satana. Feymew, Jewba püramyefi ta Job ñi trürümfalnochi püntütripanon, femngechi pengeli ñi rume (mütre) maneluwkeel kidu mu. Welu Satana dalluntukufi ta Job ñi poyefiel ta Ngünechen ñi kümelkamekeetew ka ngüneytuetew. Rüf feypi müntuñmangele kom ñi nieel, malisiayafi ta Jewba.

Ngünechen eluñmay ti Weküfü ñi müntuñmayafiel Job kom ñi nieelchi dungu, inangechi tañi pu fotüm, ka tañi tremolen. Job kimnolu am Satana ñi wedalkaetew, feymew kimlay chumngelu (chemu) Ngünechen eluñmay feychi dungu. Welu chumkawnorume (chumngechi no ume) famentulafi ta Jewba.

Feymew küla koylangechi weni amuyngün ñi pemeafiel ta Job, ka ngülamtufi fentren wewpitun mu. Tüfachi dungu wirintukungey chi lifru yenielu ñi üy. Ayüyngün ñi trokituwafiel ta Job Ngünechen ñi kastigaetew ellka yafkalelu. Ka feypingün Ngünechen duamtunielafi ka maneluwlafi rume tañi pu kona. Welu ¡Re koyla tati! Job pilay ñi llowal ñi weda rakiduamken engün, ka rüf feypi tunte puwle ñi mongen püntütripalayafun ta Ngünechen mu.

Welu Job rume (mütre) welulkay ñi rakiduam kidu ñi ingkawün mu. Fey kiñe weche wentru Eliu pingelu kom allkütulefuy, feymew newen mu ngülamtufi ta Job, tüfa kay doy falintulu kidu ñi üy, welu newe falintulay Jewba ñi üy ka ñi ngünenien. Ka newen mew, katrütudungufi kom Job ñi weni.

Af mew, Jewba norümfi ta Job. Feymew pengelelfi ñi küme adngechi fillke dewman. Femngechi kimeltufi tüfachi falin dungu: tati pu wentru trürümfalnolu Ngünechen ñi fütra pepiluwün. Job ñom piwkengekefuy ka llowi ti ngülam. Ka Jewba, “rume kuñillchekelu ka kutranduamyechekelu”, tremoltufi ka kümelkafi epu rume chemkün mu, ka elufi kake mari fotüm (Santiaw 5:11). Job ñi püntütripanon Jewba mew, rume küme llowdunguy tati koyla dalluntukun Satana ñi feypikeel, ka pengeli tati pu che rupale wedake dungu tañi mongen mew, püntütripalayafuy Ngünechen mu.

(Tuwlu Job ñi lifru.)