¿Chem piafuymi eymi? ¿Küdawngey femal Jewba tañi ayükeel?... Fentren che feypiafuy “müna küdawngey”. Biblia ta nütrameleiñmew kiñe pichi wentru (püchü kampu), Josia pingelu. Kidu müna küdawngefuy ñi femal Jewba tañi ayükeel. Welu niekefuy kümeke weni, ka kidu engün kellukefeyew. Feymu fewla kimaiñ ta Josia ka tañi kümeke weni.

Josia tañi chaw Amon pingefuy, ka longko ülmen-ngefuy Juda mapu mew. Amon rume (mütre) weda chengefuy, ka poyekey tati koylake dio ñi pu adentun. Lalu Amon, Josia longko ülmen-ngerpuy Juda mapu mu. ¿Chumten tripantu niefuy Josia longko ülmen-ngerpulu? ¡Pura tripantu nie­fuy müten! Welu ¿weda chengefuy, tañi chaw reke?... Femlay tati.

Petu pichi wentrungelu (püchü kampungelu), Josia ayüy ñi poyeafiel Jewba. Feymu kintuy kümeke weni. Kidu weniyefi re che poyekefilu Chaw Ngünechen, ka kidu engün kellukefeyew ñi feyentuafiel (müngeltuafiel) Jewba. ¿Iney (iñi) engün am weniyeniefi Josia?

Josia weniyefi ta Sofonia. Fey pelon wentrungefulu am, ka mülefuy ñi feypiafiel tati pu judache: ‘Amulelmün tamün poyeafiel ti koylake dio,  weda tripayay tamün dungu’. ¿Chumi Josia? Kidu feyentufi (müngeltufi) ta Sofonia, feymew poyekelafuy tati pu koylake dio ñi adentun, welu may poyekefi ta Jewba.

Josia ka weniyefi Jeremia. Pichi wentrungelu engu (püchü kampungelu engu), püllelechi waria mu tremingu, ka feychi tripantu nielu Josia ka fente niepelafuy Jeremia. Kidu engu epuñpüle kelluwingu poyeafiel ta Jewba, ka feyentuafiel (müngeltuafiel). Müna küme weniyewingu, feymew lalu Josia, Jeremia nentuy kiñe ülkantun ta pengelal ñi weñangkün.

¿Chem kimeleleymu Josia ñi inafalchi femün?... Petu pichi wentrungelu (püchü kampungelu) ayüy ñi feyentuafiel (müngeltuafiel) ta Chaw Ngünechen. Feymu dulli (ngümintuy) kümeke weni poyekefiel Jewba. Ka femngechi eymi ayülmi poyeafiel ta Jewba, kintuaymi kümeke weni tami kelluaetew.