Rebeka pingechi domo piwkeyekefuy ta Jewba. Tañi füta Isaak ka femngechi femkefuy. Tüfachi nütram mu kimaiñ epu ramtun: ¿Chumngechi kimuwingu Rebeka ka Isaak? Ka ¿chumngechi Rebeka ayüwelfi ta Jewba? Inaduamafiyiñ.

Isaak ñi chaw Abraam pingefuy, ka tañi ñuke Sara pingefuy. Fey engün mülekefuyngün Kanaan mapu mu, welu tati pu che mülelu fey mu poyekelafuyngün ta Jewba. Abraam ayüy tañi fotüm Isaak ñi nieal kiñe domo poyekelu ta Jewba. Feymu werküy kiñe kona amualu Aran waria mew, amuy kiñe kona Eliasar pingelu peno. ¿Chumngelu am (chemu) müley ñi amual feychi waria mu? Aran waria mu mülepuy Abraam ñi pu reñma (pu che), üyew Eliasar peafuy kiñe küme domo Isaak ngealu.

Fey Eliasar fütra kamapu amuy tañi pu chaf kona engün. Yeniey mari kamellu, ka fentren iyael ka fillke yewün. Welu ¿chumngechi Eliasar dulliafuy (ngümintuafuy) kiñe küme domo Isaak ngealu? Eliasar kimi tati pu domo ñi amuken kiñe rünganko (posoko) mew entumeal ko. Feymew akulu engün Aran waria mew, amuyngün feychi rünganko mu. Fey ngillatun mu feypifi ta Jewba: ‘Ngillatuafiñ kiñe üllcha domo ­tañi eluaetew ko. Ka kidu feypile: “Pütokonge eymi, fey ka eluafiñ ko tami pu kamellu”, fey kimtukuan feychi domo tami dulliel (ngümintuel)’.

Fey akurumey Rebeka feychi rünganko mew. Biblia ta feypi tüfachi üllcha domo ñi küme adngen. Eliasar feypifi: ‘Eluafen ko’, ka  Rebeka llowdungueyew: ‘Feley, eluaeyu ko ka entulelafiñ tañi pütokoal tami pu kamellu’. Rakiduamnge: tati pu kamellu müna pütokokeyngün, feymu Rebeka mülefuy ñi entual alün ko, ¡fentren rupa amuy ti rünganko mu! Adkintufinge ti adentun. ¿Chummekey am ta Rebeka?... Eliasar müna afmatulewey pelu fente ñi küdawün ta Rebeka. Feyngey, Jewba elueyew fey ñi ngillatuel.

Eliasar elufi ta Rebeka fillke küme adngechi yewün. Ka chi üllcha domo mangelfi ta Eliasar ka tañi pu chaf kona amual engün Rebeka tañi chaw ñi ruka mu. Fey Eliasar feypi chumngelu (chemu) ñi werküetew ta Abraam üyew. Kafey nütramelfi chumngechi ñi llowdunguetew Jewba tañi ngillatun. Rebeka ñi pu che rume (mütre) ayüwingün tañi fütangeal Isaak engu.

¿Ayüy Rebeka ñi fütayeafiel ta Isaak? ¿Chem piafuymi kay?... Rebeka ñi pu che ramtueyew: ‘¿Küpa amuymi Kanaan mapu mu tami fütayeafiel ta Isaak?’. Ka kidu llowdungufi: ‘¡May, küpa amun!’. ¿Chumngelu am (chemu)? Rebeka kimniefuy Jewba ñi werküfiel ta Eliasar. Feymew amuy Kanaan mapu mew, ka fütayefi ta Isaak.

Rebeka feyentukefi (müngeltukefi) ta Jewba, feymu kidu kümelkaeyew. Fey ­llemay, Jesu ñi tuwünche ngetuy. Feymew feyentufilmi (müngeltufilmi) ta Jewba Rebeka reke, femngechi ayüwülafimi tami Wenu Chaw. Ka kidu kümelkayaymu tati.