Quiñe quim huentru Alan Duthie pingelu feipi: “Ayülmi tami quelluaeteu Biblia fill antü, mülei tami papeltuafiel feichi quehun mu tami dunguquen fill antü” (entungei tati lifru Bible Translations and How to Choose Between Them).

Ca femngechi raquiduamquei fentren che rume falintuquefilu tati Biblia. Fei engün quimnieingün “Chau Ngünechen adcünui ñi huirintucungeal tañi dungu. Feimu tüfachi huirintucun cümei ñi quimeltucheal, ngülamtucheal, norümtual com dungu ca pepicayafiel pu che tañi cüme femal” (2 Timoteo 3:16). Cuifi tuhun-ngefui rume, huelu ti Biblia quelluqueiñmu taiñ mongen mu. Fei, “Chau Ngünechen ñi dungu niei mongen ca nehuen-ngei” (Hebreos 4:12). Huelu ñi adümngeal tati Biblia ca ñi puhual pu che tañi piuque mu, mülei ñi rulpadungungeal chumngechi ñi dunguquen tati pu che.

Feimu feichi 5 conchi junio cüyen 2022 tripantu, pu mapuche falintuquefilu Biblia rume ayühuingün ñi llohun mu tati Biblia Mapudungun. Traducción del Nuevo Mundo Mateo-Apocalipsis. Tüfachi Biblia trürümfal-lai caquelu Biblia mu. Adümfali ca manelfali, fei com pu mapuche tañi quimal Chau Dios tañi ayüqueel. Ramtuhuafuimi chi: “¿Inei engün am deumai tüfachi fente cüme Biblia?”.

Feula müten ñi tripan ti Biblia Mapudungun. Mateo-Apocalipsis, huelu gringodungun mu tripai 1950 tripantu mu. Feichi troquiñ Biblia entueyu quiñe troquiñche, Watch Tower Bible and Tract Society pingelu. Ti revista La Atalaya tripalu 1 conchi febrero, 1951 tripantu feipi: “Tati pu huentru rulpadungulu tüfachi Biblia ayülaingün tañi quimüñmangeal tañi üi mongelefule rume engün cam deu lallefule. Doi mai tüfachi Biblia entungei ñi püramyengeal Chau Dios tañi fütra üi”.

Puulu 1961 tripantu, tüfachi pu huentru entuingün com tati Biblia gringodungun mu. Tüfa, Traducción del Nuevo Mundo de las Santas Escrituras pingei. Quimüñmangelai rume ñi üi tati pu rulpadungulu, huelu quimfali tañi rüf poyequefiel ta Chau Dios. Rupalu quiñeque tripantu, huiño ngüneduamngei tati Traducción del Nuevo Mundo, fei tripai 2013 tripantu mu. Tati pu rulpadungulu tüfachi Biblia feipingün: “Fente falin-ngelu am ñi feipin tati Biblia, cuñiutucun mu eluhuiyiñ taiñ ca huiño ngüneduamafiel tüfachi rulpadungun. [...] Feimu rulpadungufiel mu tati Biblia, mülei ñi adümngeal ca manelfalngeal ñi feipin”.

Fanten mu, tati Traducción del Nuevo Mundo entuhuiringei doi 245 millon. Com tati Traducción del Nuevo Mundo cam quiñeque troquiñ deu rulpadungungei 224 quehun dungun meu. ¿Chumngelu fentren che ayüquefi tüfachi Biblia? Peafiyiñ.

Jesús quimeltufi tañi pu discipulo ñi femngechi llellipual: “Taiñ Chau huenu mülelu, rume yamniengepe tami üi” (Mateo 6:9). Tati Biblia feipi Chau Ngünechen Jehová pingei. Tüfachi üi tripai epe 7.000 rupa Biblia mu (Éxodo 3:15; Salmo 83:18). Pu hunenque cristiano ñi antü mu, quiñeque judio huelu raquiduamingün ñi cümenon tañi üitungeal Chau Dios quisu tañi üi mu. Quiñeque cristiano ca femngechi raquiduam inanierpuingün (Hechos 20:29, 30; 1 Timoteo 4:1). Rupachi antü mu, pu huentru copiañmafilu ti Griego Huirintucun entuñmatufingün Chau Dios tañi üi Biblia mu. Fei “Dios” ca “Señor” pitufingün tañi huirintucun mu.

Tati Traducción del Nuevo Mundo mu huiño tucungetui Chau Ngünechen ñi üi cheu ñi mülequefel ellaca. Feimu ti lifru Mateo puulu Apocalipsis, a tripai Chau Jehová tañi üi 241 rupa. Huelu re femngechi müten tucungetulai Ngünechen tañi üi. Doi mai cüme ngüneduamngei ti dungu ñi quimal cheu tañi müleafel. Raquiduamnge tüfachi ejemplo. Hebreo quehun mu Isaías 61:1 tripai Chau Jehová tañi üi. Ñi feipin tüfachi versiculo ca huirintucungei Lucas 4:18 mu, feimu ca mülefui ñi tripayal Ngünechen tañi üi. Feimu tati Traducción del Nuevo Mundo, Lucas 4:18 mu feipi: “Iñche nien Jehová ñi nehuen. Fei dullieneu ñi amuldungulelafiel cümeque dungu tati pu pofre”.

Ñi tucungetun Ngünechen tañi üi cheu tañi mülequefel, quimfalcünulelfi pu papeltuquelu Chau Jehová ñi trürnon tañi Fotüm Jesús mu. Raquiduamnge quiñe ejemplo mu. Tati Biblia Ngünechen tañi Küme Dungu pingelu, Mateo 22:44 mu feipi: “Ñidol Ngünechen feipifi iñche tañi Ñidol”. Huelu pu papeltuquelu tüfachi versiculo ramtuhuafui: “¿Inei nütramcamequefi Ngünechen? ¿Quisu nütramcaumequei am?”. Ñi feipin Mateo 22:44 mu, entungei Salmo 110:1 mu. Feichi versiculo mu hebreo quehun mu mülequefui Ngünechen tañi üi. Feimu tati Traducción del Nuevo Mundo mu, Mateo 22:44 femngechi rulpadungungei: “Jehová feipifi tañi Ñidol”. Rume falin-ngei taiñ quimal Jehová ca Jesús ñi trürnon engu (Marcos 13:32; Juan 8:17, 18; 14:28). ¿Chumngelu? Femngechi müten ta llohuafuiñ ti rumel mongen. Hechos 2:21 feipi: “Com tati maneluulu Chau Jehová ñi üi meu, montulngeai”.

Pu rulpadungulu tüfachi Biblia mapudungun mu yafüluhuingün ñi cüme adümafiel chem ñi rüf cüpa feipifel ti Biblia ellaca mu, feimu tati Traducción del Nuevo Mundo adümfali ca manelfali. Femngechi pu papeltuquelu ñi huelu adümnoafiel ñi feipin ti Biblia. Raquiduamnge tüfachi ejemplo. Ti feipin espiritu santo, ti Biblia Ngünechen tañi Küme Dungu rulpadungungei “Lif Cüme Püllü”. Tüfa raquiduamelafui pu papeltuquelu ti espiritu santo fei ta rüf quiñe püllü. Feichi Biblia Hechos 1:8 mu, feipingei Jesús ñi pu discipulo: “Acule ti Lif Cüme Püllü eimün meu, llohuaimün nehuen”. Quiñe che raquiduamafui rüf quiñe püllü ñi puhual tati pu discipulo mu, huelu fei no fel. Griego huirintucun mu cüpa feipifui Chau Dios ñi eluaeteu ñi nehuen engün. Feimu ti Traducción del Nuevo Mundo mu, tüfachi versiculo feipi: “Elungelmün Chau Ngünechen ñi nehuen, yafüluhuaimün”. Ñi femngechi rulpadungungen tüfachi feipin, quelluquefi tati pu papeltuquelu ñi adümafiel chem ñi rüf cüpa feipifel ti Biblia ellaca mu.

Feula müten ñi tripan tati Biblia Mapudungun. Mateo-Apocalipsis. Huelu ca antü tripayai com tati Biblia. Tati Traducción del Nuevo Mundo gringodungun mu fente cüme deumangei, ca femngechi tüfachi Biblia mapudungun mu com cüme rulpadungungei. ¿Chumngelu maneluhuafuiñ tüfa?

Ñi rulpadungungeal tati Biblia, rume cüme inaniengei com ñi feipin ti Troquiñ Adniequefilu pu Dunguquelu Ineingen Jehová (Cuerpo Gobernante). Quisu engün feipicünui quiñe che müten ñi rulpadungunoal tati Biblia, doi mai quiñe pichi troquiñche (Proverbios 11:14). Femngechi huall Mapu püle adcünungei fillque troquiñche ñi rulpadungual ti Biblia quisuque ñi quehun meu engün. Tañi quellungeal engün, tati Cuerpo Gobernante elfalcünufi quiñeque quimque che tañi adnieafiel ti rulpadungun cüdau. Chem ramtun rume niele tati pu rulpadunguquelu, ramtuafuingün feitachi pu quimque che. Ca femngechi pu Dunguquelu Ineingen Jehová computador mu deumaingün quiñe programa, fei ñi doi cüme deumangeal chi cüdau. Huelu tati computador quisu rulpadunguquelai. Tati pu rulpadunguquelu rume yafüluuquei ñi femal tañi cüdau engün. Huelu ñi nien ta computador, quelluqueyu ñi doi pürüm deumayal ñi cüdau ca ñi cüme enturpuafiel. Feimu maneluhuafuiñ llemai tüfachi Biblia mapudungun mu fente cüme adümfali ca manelfali chumngechi ñi deumangen ti Biblia gringodungun mu.

Feimu lle yafüluunge tami papeltuafiel ti Biblia Mapudungun. Traducción del Nuevo Mundo Mateo-Apocalipsis. Papeltuafuimi internet mu, taiñ aplicacion JW Library. Cam feipiafuimi quiñe Dunguquelu Ineingen Jehová tami eluaeteu. Tüfachi Biblia niei fillque quellu. Tati letra cüdaungelai ñi papeltungeal. Deu ellaconlu quiñe lifru Biblia mu pengeli chem ñi nütramcangeal feichi lifru mu, femngechi doi pürüm peafuimi tami quintuyahulfielchi texto. Ca fentepun mu tati Biblia mülei quiñe diccionario. Doi mai com ñi feipin tüfachi Biblia rüfngei ca manelfalngei. Feimu ayühunquechi papeltuafuimi ñi puhual tami piuque mu.

Diccionario: Quimfalcünuquei Biblia mu tripachi dungu.