Bibliajj taqe jiwasanakatakiwa, Diosan arunakapanirakiwa. Qellqayiripar uñtʼañatakejj wali amuyumpiw Biblia estudiañasa (Juan 17:3; 2 Timoteo 3:16). Jehová Diosajj kuna amtanis jaqenakatakisa aka oraqetakisa ukaw Biblian qhanañchasiraki (Génesis 3:15; Apocalipsis 21:3, 4).

Janiw Bibljamajj kuna libros jaqenakarojj vidapan yanaptʼkiti. Ukanwa Jehová Diosajj kunja munasirisa, khuyaptʼayasirisa, sinttʼasirisa uk qhanañchi, ukanak yateqasiñasatakiw Bibliajj yanaptʼarakistu. Ukatsti sinti jan wali tʼaqesiñanak aguantañatakis jaqenakarojj mä suytʼäwi churaraki. Ukhamarus kunanakatï aka oraqen jan Diosan munañaparjam luraski ukanaksa qhanstayarakiwa (Salmo 119:105; Hebreos 4:12; 1 Juan 2:15-17).

Bibliajj hebreo, arameo, griego arunakanwa qellqasïna, jichhajj 3.000 jila arunakaruw phoqatpachasa jan ukajj mä partekis traducitäjje. Biblia mayakiw walja arunakar traducitajja, ukakirakiw jukʼamp lakirasi. Ukajj Biblian mä profeciaparjamaw phoqasiski, uka profeciajj akham siwa: “Reinon aka suma yatiyäwinakapajja, aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mateo 24:14).

Diosan arunakapan wali importantëtap amuyasajja, nayra qellqatanakajj kunjamäkitejj uka pachpäñapataki, jan kun yaptʼasa, jan kun apaqasa traduciñatak amtamp luratawa, ukhamarak facilak liytʼasiñapataki amuytʼasiñapatak traducitawa. “Biblia traduciñatakejj kunanakas amuytʼasiwayi”, “Aka Bibliajj kunjam lurtʼatasa”, “¿Kunjamatsa Bibliajj jichhakam utjaskaki?” siski uka apendicenakajja, aka Bibliajj kunjam traducitasa ukwa qhanañchi, ukatsti kuna yaqha yanaptʼanakas aka qellqatan utji uksa qhanañcharakiwa.

Jehová Diosar munasipki jupar adorapki ukanakajja, Diosan yaqha arur traducit Arupajj jan kuna yaptʼatäspa, jan kuna apaqatäspa, amuykayäspa ukhamwa munapjje (1 Timoteo 2:4). Uka amtampiw aymar arur traducitaraki, ukhamat Machaq Mundon Jakirinakataki Bibliajj walja arunakan utjañapataki. Diosar thaqeri munat liytʼiri, aka Sagrado Qellqatanakat suma yatichäwinak apsusma ukwa munapjjta, Diosarus ukatakiw oracionan mayipjjarakta, ukhamat jupar uñtʼañamataki (Hechos 17:27).