Proverbios 25:1-28
25 Aka arunakajja Salomón+ chachan yatiñampi arsut arunakaparakiwa, uka arunakjja Judá markankir Ezequías+ reyin servirinakapaw copiaqapjjäna.*
2 Kunapachatï Diosajj mä kuns jan yatiyki ukhajja jupajj jachʼañchatawa,+kunapachatï reyinakajj mä toqet sum yatjjatapki ukhajja jupanakajj jachʼañchatäpjjewa.
3 Kunjamtï alajjpachanakajj wali altökejja oraqes wali manqhäkarakejja,reyinakan chuymanakapajj ukham jan yatjjatkayarakiwa.
4 Qollqe metalan qʼañunakap apaqam,ukhamatwa qollqe metalajj wali suma qʼomachatäni.+
5 Jan wali jaqerojj reyin nayraqatapat alisnukum,ukhamatwa reyin tronopajj wali suma uttʼayatäni, kunatï cheqapäki uk lurañataki.+
6 Reyi nayraqatanjja jan jachʼañchasimti,+janirak wali importante jaqenak taypinkamti.+
7 Reyitejj “akar makatanim” siristam ukhajja jukʼamp walïspawa,pʼeqtʼir jaqe nayraqatan reyimp jiskʼachayasiñat sipansa.+
8 Jan jankʼakejj tribunalar quejasir saramti,maynitejj pantjatätam uñachtʼayätam ukhajj ¿kamachätasa?+
9 Jumatï jaqe masimamp quejanksta ukhajja askicham,+ukampis kuntï jan arsuñamatak confiyapktam ukjja jan arsumti,+
10 jumatï arsüta ukhajja, khititï istʼktam ukajj phenqʼachätamwa,kuna jan walinaktï yaqhanakat parlkta ukasa janiw chhaqtkaniti.
11 Kunjamtï qori manzananakajj mä qollqe bandejar uchatajj wali sum uñtaskejja,ukham sumarakiw tiempopar arsut arunakajja.+
12 Istʼasir jiñchunïki uka jaqetakejja,yatiñampi cheqañchir jaqejj qori areter uñtasita ukhamarak suma qorit lurat adornor uñtasitawa.+
13 Kunjamtï chʼuchʼu umajj cosecha urun phajttʼaykejja,ukhamarakiw confiykaña yatiyirejja khititï jupar khitki ukatakejja,kuna laykutejj uka confiykañ yatiyirejja patronaparojj chʼamañchtʼiwa.+
14 Jan churat regalot jachʼa jachʼa tukur jaqejja,jallu jan apanir qenayanakampiru thayampir uñtasitawa.+
15 Pacienciampiw mä comandanterojj iyawsayasi,suma arunakajja mä chʼaksa pʼakjaspawa.+
16 Jumatï miskʼi jikjjatäta ukhajja, qhawqhatï wakiski ukakwa manqʼañama,jumatï walja manqʼäta ukhajja, kapasakiw kutsuyanjjasma.+
17 Jaqe masiman utaparojj jan sapa kutejj taktʼamti,ukhamat jumat jan aburrisiñapataki, janirak jumar uñisiñapataki.
18 Jaqe masip contra falso testigot saytʼir jaqejja,guerran nuwasiñatak jawqʼañaru, espadaru, afiltʼat flechar uñtasitawa.+
19 Jan wali tiemponakan jan confiykañ jaqer* confiyañajja,pʼakjat lakanïñampi cojo kayunïñampi sasiwa.
20 Llakit jaqer cancionanak cantir jaqejja,thaya urun isip issusir jaqer uñtasitawa,jan ukajj álcali jayuru vinagrempi warjjatir jaqer uñtasitawa.+
21 Enemigomatï* manqʼat awtjatächi ukhajja, manqʼañapatakejj tʼantʼa churam,umat pharjatächi* ukhasti, umtʼañapatakejj um churam,+
22 ukhamatwa jupan pʼeqepjjarojj nina sankʼanak montontʼäta,*+ukatsti Jehová Diosajj bendisïtamwa.
23 Alay toqet* thaytʼanir thayajja jallu apani,arunak apnaqer lakajja mayninakarojj colerayiwa.+
24 Terraza* esquinan jakañaw jukʼamp sumajja,jiskhisir* esposampi mä pachpa utan jakañat sipansa.+
25 Jaya cheqat purinir suma yatiyäwinakajja,qarit jaqer* phajttʼayiri chʼuchʼu umar uñtasitawa.+
26 Jan wali jaqempi apayasir* cheqap sarnaqer jaqejja,jalir qoñchu umar uñtasitawa, qʼañu phujur uñtasitarakiwa.
27 Walja miskʼi manqʼañajj janiw walïkiti,+mä jaqen jupa pachpa jachʼañchasiñ thaqañapajj janirakiw walïkiti.+
28 Colerap jan controlasir jaqejja,jan murallani katuntat markar uñtasitawa.+
Notanaka
^ Jan ukajja, “mayaruk apthapipjjäna”.
^ Ukajja, “traicionero jaqer” sasaw jaqokipasirakispa.
^ Hebreo arunjja, “Uñisirimatï”.
^ Variante: “wañjatächi”.
^ Ukajja, sumaptayañata, colerapsa apaqañatwa parlaski.
^ Jan ukajja, “Norte toqet”.
^ Jan ukajja, “kʼumisiri; quejasiri”.
^ Jan ukajja, “Uta patjja”.
^ Hebreo arunjja, “Jan wali jaqen nayraqatapan khatatir”.
