Salmos 119:1-176
-
Diosan wali valorani arupar munasiña
-
“¿Kunjamsa wayn tawaqonakajj thakinakapan qʼomäsipkakispa?” (9)
-
“Amtayäwinakamarojj walpun nayajj munasta” (24)
-
“¡Leyimarojj wal nayajj munasta!” (97)
-
“Taqe yatichirinakajat sipansa jukʼamp suma amuytʼasir jaqëtwa” (99)
-
“Arunakamajja kayujatakejj mä lamparjamawa” (105)
-
“Taqpach arunakamajj cheqawa” (160)
-
Khitinakatï Diosan leyipar munasipki ukanakatakejj sumankañaw utji (165)
-
א [álef]
119 Khitinakatï thakipan jan juchanïpki* ukanakajj kusisitäpjjewa,khitinakatï Jehová Diosan leyiparjam sarnaqapki ukanakajj kusisitäpjjewa.+
2 Khitinakatï Diosan amtayäwinakap phoqapki ukanakajj kusisitäpjjewa,+khitinakatï taqe chuyma jupar thaqapki ukanakajj kusisitäpjjewa.+
3 Kunatï jan cheqapäki ukjja janiw jupanakajj lurapkiti.
Diosan thakinakapanwa jupanakajj sarnaqapjje.+
4 Jumaw mä orden churapjjestajja,ukhamat ordenanakam wali sum phoqapjjañajataki.+
5 ¡Jumar istʼañpunwa nayajj munta,+ukhamat leyinakam phoqañajataki!
6 Ukhamatwa taqe mandamientonakam yatjjatkä ukhajja,jan phenqʼachat uñjaskäti.+
7 Cheqaparjam amtatanakam yateqatajatjja,cheqap chuymampiw jumar jachʼañchäma.
8 Leyinakamwa nayajj phoqäjja.
Janipun apanukustati.
ב [bet]
9 ¿Kunjamsa wayn tawaqonakajj thakinakapan qʼomäsipkakispa?
Wali amuyasisa ukhamarak arunakamarjam sarnaqasa.+
10 Nayajj taqe chuymajampiw jumar thaqsma.
Janikiy mandamientonakamat saranukuñaj munamti.+
11 Arunakamjja chuymajaruw nayajj wali sum imastjja,+ukhamat juma contra jan juchachasiñajataki.+
12 Jehová Dios Tata, jumaruw nayajj jachʼañchsma,leyinakam yatichita.
13 Lakajampiw nayajj yatiyta,jumajj arskayäta taqe uka mandamientonakata.
14 Amtayäwinakamatjja nayajj wal kusista,+kunanakatï wali valoranïki ukanakat kusisiñat sipansa jukʼampiw nayajj kusista.+
15 Ordenanakamatwa nayajj amuykiptʼäjja,*+thakinakamatjja nayajj yatjjataskakïwa.+
16 Leyinakamarojj nayajj wal munasta.
Janiw arunakamat armaskäti.+
ג [guímel]
17 Servirimarojj khuyapayasiñamp uñjam,ukhamat jakañajataki ukhamarak arunakam phoqañajataki.+
18 Nayranakaj jistʼarita, ukhamat qhanpach uñjañajataki,kuna musparkañanakatï leyiman qellqatäki ukanak qhanpach uñjañajataki.
19 Oraqenjja nayajj extranjero jaqekïtwa.+
Janikiy mandamientonakam nayat imantamti.
20 Kunanaktï jumajj Juezjamajj amtktaukanak wal yatiñ munañaw tukuntitu.
21 Jachʼa jachʼa tukurinakarojj jumajj toqenoqtawa,mandamientonakamat saranukupki uka maldisit jaqenakarojj toqenoqtawa.+
22 Jan jukʼampejj nayat burlasipjjpanti, jan jukʼampejj jiskʼachapjjetpanti,kuna laykutejj amtayäwinakamjja nayajj phoqtwa.
23 Kunapachatï principenakajj mä juntuk qontʼasipjje, naya contra parlapjjaraki ukhajja,leyinakamatwa servirimajj amuykiptʼi.*
24 Amtayäwinakamarojj walpun nayajj munasta,+amtayäwinakamajj nayan ewjjtʼirinakajawa.+
ד [dálet]
25 Nayasti laqʼa polvonwa jaqosiskta.+
Arsutamarjamajj jakayaskakitaya.+
26 Thakinakajatwa nayajj jumar yatiysma, jumasti nayarojj jaysistawa,leyinakam yatichita.+
27 Ordenanakamajj kamsañsa muni uk amuytʼayita,ukhamat musparkañ luräwinakamat amuykiptʼañajataki.*+
28 Wali llakitätaj laykojja, janiw ikiñ puedkayätti.
Arsutamarjamay chʼam churita.
29 Engañjir thakjja nayat jayar jitheqtayam,+leyinakamat yatichasay nayar sum uñjita.
30 Diosat jan saraqañwa nayajj ajlliwayta.+
Amtatanakamajj cheqapätap nayajj sum amuyta.
31 Amtayäwinakamarojj nayajj sum katuntasta.+
Jehová Dios Tata, janikiy chuymas pʼakintat* uñjasiñaj munamti.+
32 Mandamientonakaman thakipjja taqe chuymaw arkäjja,kuna laykutejj jumaw chuymaj jistʼartajja.
ה [he]
33 Jehová Dios Tata, leyinakaman thakip yatichita,+tukuykamaw nayajj arkäjja.+
34 Amuytʼasiñajatak yanaptʼita,ukhamat leyimar istʼañajatakiukhamarak taqe chuymajamp leyim phoqañajataki.
35 Mandamientonakaman thakipnam irpita,*+kuna laykutejj ukajj wal nayar kusisiyitu.
36 Amtayäwinakam toqer chuymaj altʼayam,naya pachpatak taqe kun munañ toqerojj janikiy chuymaj altʼayamti.+
37 Kunatï jan servirïki ukanak jan uñjañajatak yanaptʼita,+thakiman sarnaqayita, ukhamat jakaskakiñajataki.
38 Servirimar arskayäta uka promesam phoqam,ukhamat jaqenakajj jumar ajjsarapjjañapataki.*
39 Phenqʼachat uñjasitajajj walpun ajjsarayitu, uk apaqtʼakitaya,kuna laykutejj amtatanakamajj sumawa.+
40 Ordenanakam phoqañjja nayajj walpun munta.
Cheqapar uñjir Diosätam laykojj jakayaskakitaya.
ו [waw]
41 Jehová Dios Tata, munasirïtamsa jan jaytjasirïtamsa uñachtʼayita,+promesa luratamarjamay salvirïtam uñachtʼayita.+
42 Ukhamatwa nayat burlasiritakejj arsusëjja,kuna laykutejj arumaruw nayajj confiyta.
43 Janikiy cheqa arunakjja lakajat apaqamti,kuna laykutejj kuntï jumajj amtkta ukaruw nayajj suytʼayäta.*
44 Juman leyimjja phoqapunïwa,wiñayans wiñayapataki.+
45 Mä seguro lugaranwa nayajj sarnaqäjja,+kuna laykutejj juman ordenanakamwa nayajj thaqta.
46 Reyinak nayraqatanwa amtayäwinakamat parläjja,janiw phenqʼaskäti.+
47 Mandamientonakamarojj nayajj wal munasta,jïsa, wal munasta.+
48 Nayajj munaskta uka mandamientonakam toqeruw amparanakaj aytäjja,+leyinakamatwa nayajj amuykiptʼäjja.*+
ז [zayin]
49 Servirimar arskayäta uka arunakamat* amtasim,uka arunak taypiw mä suytʼäwi churistajja.*
50 Kunapachatï nayajj tʼaqeskta ukhajj ukaw chuymachtʼitu,+kuna laykutejj arunakamaw jakayaskitu.
51 Jachʼa jachʼa tukurinakajj walpunsa nayat burlasipkchejja,janiw leyimat saranukkti.+
52 Jehová Dios Tata, kunanaktï nayrajj amtkayäta ukanakatwa nayajj amtasta,+ukanakaw nayarojj chuymachtʼitu.+
53 Jan wali jaqenak kawsajj nayajj wali coleratätwa,jupanakajj leyimwa apanukupjje.+
54 Kawkjanakantï nayajj jakta ukjanakanjja,leyinakamajj nayatakejj cancionanakjamawa.
55 Jehová Dios Tata, arumajj sutimatwa nayajj amtasta,+ukhamat leyim phoqañajataki.
56 Ukaw nayan costumbrejajja,kuna laykutejj ordenanakamwa nayajj phoqta.
ח [jet]
57 Jehová Diosajj nayan herenciajawa,+arunakam phoqañwa nayajj amtawayta.+
58 Taqe chuymajampiw nayajj jumar ruwtʼasinsma.*+
Promesa luratamarjamay sum uñjita.+
59 Thakinakajwa nayajj uñakiptʼasta,ukhamat kayunakajajj amtayäwinakamar kuttʼaniñapataki.+
60 Nayajj apurtʼasisa, jan tardasisawmandamientonakam phoqta.+
61 Jan wali jaqenakan pitanakapaw* nayarojj muyuntitu,ukampis janiw nayajj leyimat armaskti.+
62 Jumar yuspärañatakejj chika arumaw nayajj sartasta,+cheqaparjam amtatanakamat yuspärañataki.
63 Nayajj taqe khitinakatï jumar ajjsarapktam ukanakan amigopätwa,ordenanakam phoqapki ukanakan amigoparakïtwa.+
64 Jehová Dios Tata, munasirïtamasa jan jaytjasirïtamas oraqpach phoqanti,+leyinakam yatichita.
ט [tet]
65 Servirimarojj wali sum jumajj uñjtajja,Jehová Dios Tata, promesa luratamarjamaw* juparojj sum uñjtajja.
66 Suma amuytʼasirïñ yatichita, yatiñsa churarakita,+kuna laykutejj mandamientonakamaruw nayajj confiyta.
67 Janïr tʼaqesiyatäkayäta ukhajja, saranukutaw nayajj sarnaqayäta,*ukampis jichhajj arunakamwa nayajj phoqta.+
68 Jumajj suma Diosätawa,+ luratanakamas sumarakiwa.
Arunakam yatichita.+
69 Jachʼa jachʼa tukurinakajj walja kʼarinakwa nayat parlapjje,ukampis nayajj taqe chuymajampiw ordenanakam phoqta.
70 Chuymanakapajj jan sinttʼasiriwa,+ukampis nayajj leyimarojj wal munasta.+
71 Walikjjay nayajj tʼaqesiyat uñjaschiyäta,+ukhamatwa leyinakam yateqta.
72 Jumajj yatiykta uka leyejja nayatakejj sumawa,+walja qorita walja qollqet sipansa jukʼamp sumawa.+
י [yod]
73 Amparanakamaw nayarojj luritu, wakichtʼarakitu.
Amuytʼasiñajatak yanaptʼita,ukhamat mandamientonakam yateqañajataki.+
74 Jumar ajjsarapktam ukanakajja nayar uñjasajj kusisipjjewa,kuna laykutejj juman arumajj mä suytʼäwi churitu.+
75 Jehová Dios Tata, amtatanakamajj cheqapätap nayajj yattwa,+jan jaytjasirïtam laykuw nayarojj cheqañchistajja.+
76 Mirä amp suma, munasirïtamasa jan jaytjasirïtamas+ chuymachtʼitpan,promesa luratamarjamay servirimarojj chuymachtʼam.
77 Jakaskakiñajatakejj khuyaptʼayasikitaya,+kuna laykutejj nayajj leyimar wal munasta.+
78 Jachʼa jachʼa tukurinakajj phenqʼachat uñjasipjjpan,kuna laykutejj ina chʼusatakwa* nayarojj jan wal lurapjjetu.
Ukampis nayajj ordenanakamatwa amuykiptʼäjja.*+
79 Jumar ajjsarapktam ukanakajj nayan ukar kuttʼanipjjpan,amtayäwinakam uñtʼapki ukanakajj nayan ukar kuttʼanipjjpan.
80 Leyinakamarojj chuymajajj jan kuna juchani arkpan,+ukhamat nayajj phenqʼachat jan uñjasiñajataki.+
כ [kaf]
81 Juman salvatäñwa nayajj wal munta,+kuna laykutejj juman arumajj mä suytʼäwi churitu.
82 Nayranakajajj arunakam phoqasiñapwa suyasipki,+ukañkamasti nayajj akham sistwa: “¿Kunapachas chuymachtʼitäta?”+ sasa.
83 Nayajja jewqʼemp wañsuta lipʼichit lurat wayaqar uñtasitätwa,ukampis janiw nayajj leyinakamat armaskti.+
84 ¿Qhawqha urunakarak servirimajj suyanisti?
Nayar arknaqerinak contrajj kuntï jumajj amtkta ukjja, ¿kunapacharak phoqasiyätasti?+
85 Jachʼa jachʼa tukurinakajja nayatakejj pʼiyanakwa allipjje,*leyimarjam jan sarnaqapki ukanakajja nayatakejj pʼiyanakwa allipjje.
86 Taqe mandamientonakamajj confiykañawa.
Jaqenakajj ina chʼusatwa arknaqapjjetu, ¡yanaptʼita!+
87 Jupanakajj niyapuniw oraqet chhaqtayapjjetu,ukampis nayajj janiw ordenanakam apanukkäti.
88 Munasirïtamatsa jan jaytjasirïtamatsa jakayaskakitaya,ukhamat jumajj arskayäta uka amtayäwinak phoqañajataki.
ל [lámed]
89 Jehová Dios Tata, wiñayatakiwarunakamajj alajjpachanakankani.+
90 Jan apanukusirïtamajj jutïr taqe jaqenakatakïniwa,+oraqjja sumwa jumajj uttʼaytajja, ukhamat utjaskakiñapataki.+
91 Ukanakasti* amtatamarjamaw jichhakamajj utjaski,taqe ukanakajj juman servirinakamawa.
92 Nayatï leyimar jan munasiriskayäta ukhajja,tʼaqesitaj laykojj jiwiriskayätwa.+
93 Janipuniw nayajj ordenanakamat armaskäti,uka ordenanak utjipanwa jumajj jakayaskistajja.+
94 Nayajj jumanktwa, salvakitaya,+kuna laykutejj ordenanakamwa nayajj thaqayäta.+
95 Jan wali jaqejj nayar tukjañatakiw suyaski,ukampis nayajj amtayäwinakamatwa wal lupʼta.*
96 Kunanakatï perfectöki ukanakjja waljanakwa nayajj uñjta,ukampis mandamientonakamaw ukanakat sipansa jukʼamp sumajja.
מ [mem]
97 ¡Leyimarojj wal nayajj munasta!+
Uru jurnälaw leyimat amuykiptʼta.*+
98 Mandamientomajj enemigonakajat sipansa jukʼamp yatiñan jaqeruw tukuyitu,+kuna laykutejj mandamientomajj wiñayatakiw nayamp chikäski.
99 Taqe yatichirinakajat sipansa jukʼamp suma amuytʼasir jaqëtwa,+amtayäwinakamat amuykiptʼataj layku.*
100 Jilïr jaqenakat sipansa jukʼamp sum amuytʼasisaw nayajj kuns lurta,ordenanakam phoqataj layku.
101 Jan wali thakin sarnaqañjja janipuniw nayajj munkti,+ukhamat arunakam phoqañajataki.
102 Kunanaktï jumajj Juezjam amtkta ukanakatjja nayajj janiw saranukkti,kuna laykutejj jumaw nayar yatichistajja.
103 ¡Arunakamajja lakajatakejj wali mosqʼawa,miskʼit sipansa jukʼamp mosqʼawa!+
104 Ordenanakam utjatap laykojja sum amuytʼasisaw nayajj kuns lurta.+
Ukatwa nayajj taqe jan wali thakinak uñista.+
נ [nun]
105 Arunakamajja kayujatakejj mä lamparjamawa,thakijatakis mä qhanarakiwa.+
106 Kunanaktï Juezjamajj cheqaparjam jumajj amtkta ukanak phoqañatakejjanayajj mä juramento lurta, ukanaksti phoqarakïwa.
107 Nayarojj wal tʼaqesiyapjjetu.+
Jehová Dios Tata, arsutamarjamajj jakayaskakitaya.+
108 Jehová Dios Tata, mirä amp suma, voluntadajat jachʼañchksma uk*+ kusisitay katoqtʼasim,kunanaktï jumajj Juezjam amtkta ukanak yatichtʼita.+
109 Jakañ vidajajj sapa kutiw peligron uñjasi,ukampis nayajj janiw leyimat armaskti.+
110 Jan wali jaqenakajj mä trampa nayatakejj uskupjje,ukampis nayajj janiw ordenanakamat saranukkti.+
111 Amtayäwinakam janipuniw nayajj apanukkäti,*amtayäwinakamajj chuymajaruw kusisiyi.+
112 Leyinakam phoqañwa nayajj amtta,taqe tiempona, tukuykama.
ס [sámekh]
113 Pä chuymäpki ukanakarojj nayajj uñistwa,+ukampis leyimarojj wal munasta.+
114 Jumaw imantasiñajätasa escudojätasa,+kuna laykutejj juman arumajj mä suytʼäwi churitu.+
115 Jan wali jaqenaka, nayat jayankapjjam,+ukhamat Diosajan mandamientonakap phoqañajataki.
116 Arsutamarjamay yanaptʼita,+ukhamat jakaskakiñajataki.
Nayajj jumaruw suytʼasksma, janikiy chuymas pʼakintat uñjasiyistati.*+
117 Salvatäñajatak yanaptʼita,+ukhamatwa nayajj leyinakamar chuym uchäjja.+
118 Leyinakamat saranukupki taqe ukanakarojj jumajj apanuktawa,+kuna laykutejj jupanakajj falsonakäpjjewa, engañjirïpjjarakiwa.
119 Taqe jan wali jaqenakarojj jan kunatak servir basuräkaspas* ukhamwa oraqet apanuktajja.+
Ukatwa amtayäwinakamarojj wal munasta.
120 Jumar ajjsarataj laykojja cuerpojajj khatatiwa,amtatanakamarojj nayajj ajjsartwa.
ע [ayin]
121 Nayajj cheqaparupuniw juzgta, kunatï cheqapäki ukwa lurarakta.
¡Tʼaqesiyañ munapkitu ukanakan amparanakaparojj janikiy apanukustati!
122 Servirimar taqe kunas sum sarañapatakejj mä garantía churam,jachʼa jachʼa tukurinakajj janikiy tʼaqesiyapjjetpanti.
123 Juman salvatäñ suykäwirojj nayranakajajj qaritäjjewa,+confiykañ promesam phoqasiñap suykäwejj nayranakajajj qaritäjjewa.+
124 Munasirïtamsa jan jaytjasirïtamsa servirimar uñachtʼayam,+leyinakam yatichita.+
125 Nayaw juman servirimätjja, amuytʼasiñajatak yanaptʼita,+ukhamat amtayäwinakam uñtʼañajataki.
126 Jehová Diosajj jupanakar castigkani uka tiempojj purinjjewa,+kuna laykutejj jupanakajj leyimwa pʼakintapjje.
127 Ukatwa mandamientonakamar nayajj wal munasta,qorit sipansa suma qorit sipansa* jukʼampwa munasta.+
128 Ukatwa nayatakejj taqe yatichäwinakamajj* cheqapajja.+
Taqe jan wali thakinakjja nayajj uñistwa.+
פ [pe]
129 Amtayäwinakamajj musparkañawa.
Ukatwa nayajj amtayäwinakam phoqta.
130 Arunakaman qhanañchäwipajj qhantʼiwa,+jan experiencianïpki ukanakarus amuytʼayiwa.+
131 Wali jachʼwa lakaj jistʼarta, wal samaqerakta,mandamientonakam istʼañ wal munataj layku.+
132 Nayan ukar kuttʼanim, sum uñjarakita,+kunjamtï jumajj sutimar munasirinakatak amtkayäta ukhama.+
133 Arunakamarjamay irpita, ukhamat mä seguro thakin sarnaqañajataki.
Janikiy kuna jan walis nayar apnaqetpanti.+
134 Tʼaqesiyapkitu uka jaqenakat salvita,nayasti ordenanakamwa phoqäjja.
135 Ajanumjja servirimjjar qhantʼayanim,+leyinakam yatichita.
136 Nayranakajatjja jawiranakar uñtataw jachanakajajj jalaraski,kuna laykutejj jaqenakajj janiw leyim phoqapkiti.+
צ [sadé]
137 Jehová Dios Tata, jumajj cheqapar uñjiri Diosätawa,+amtatanakamajj cheqapawa.+
138 Jumajj churkta uka amtayäwinakajj cheqapawa,wali confiykañarakiwa.
139 Jumar munasiñaw tukuntitu,+kuna laykutejj naya contra saytʼasirinakajj arunakamat armasipjjewa.
140 Arunakamajj wali qʼomawa,+servirimajj arunakamar wal munasi.+
141 Nayajj janiw kunäktsa, jiskʼachatarakïtwa,+ukhamäkchisa nayajj janiw ordenanakamat armaskti.
142 Cheqapar luratanakamajj wiñayatakiwa,+leyimas cheqarakiwa.+
143 Llakimpi jan waltʼäwinakampis nayjjar jutkchejja,mandamientonakamarojj munasiskaktwa.
144 Amtayäwinakamajj cheqapawa, wiñayatakirakiwa.
Amuytʼasirïñatak yanaptʼita,+ ukhamat jakaskakiñajataki.
ק [qof]
145 Taqe chuymajampiw nayajj jawsta. Jehová Dios Tata, jaysakitaya.
Nayasti leyinakamaruw istʼäjja.
146 Nayajj jumaruw artʼasinsma, ¡salvakitaya!
Amtayäwinakamjja nayajj phoqäwa.
147 Janïr qhanjtankipanwa nayajj sartasta, ukhamat artʼasis yanap jumar mayisiñajataki,+kuna laykutejj arunakamajj mä suytʼäwi churitu.
148 Nayranakajajj janïr chika arumäkipanwa uñatati,ukhamat arunakamat amuykiptʼañajataki.*+
149 Munasirïtamatsa jan jaytjasirïtamatsa aruj istʼakimaya.+
Jehová Dios Tata, cheqapar uñjir Diosätamat jakayaskakitaya.
150 Khitinakatï jan phenqʼani jan walinak lurapki* ukanakajj niyaw jakʼachasinipjje,jupanakajj leyimat wali jayankapjjewa.
151 Jehová Dios Tata, jumajj naya jakʼanktawa,+taqe mandamientonakamajj cheqawa.+
152 Walja tiempo nayraw amtayäwinakamat nayajj yateqta,ukanaksti wiñayatakiw jumajj uttʼaytajja.+
ר [resh]
153 Kunja tʼaqesiyatas uñjasta uk uñtanisin salvakitaya,+kuna laykutejj janiw leyimat armaskti.
154 Arjjatita,* salvarakita,+promesa luratamarjamajj jakayaskakitaya.
155 Jan wali jaqenakatjja salvasiñajj wali jayankiwa,kuna laykutejj jupanakajj janiw leyinakam thaqapkiti.+
156 Jehová Dios Tata, khuyapayasirïtamajj wali jachʼawa.+
Cheqapar uñjir Diosätamat jakayaskakitaya.
157 Nayar arknaqerinakasa naya contra saytʼasirinakas waljanïpjjewa,+ukampis nayajj janiw amtayäwinakamat saranukkti.
158 Traicioneronakarojj ajjtasisaw nayajj uñtta,kuna laykutejj jupanakajj janiw arunakam phoqapkiti.+
159 ¡Kunjamsa nayajj ordenanakamar wal munasta uk uñjakimaya!
Jehová Dios Tata, munasirïtamatsa jan jaytjasirïtamatsa jakayaskakitaya.+
160 Taqpach arunakamajj cheqawa,+taqe kunanaktï jumajj cheqaparjam amtkta ukanakajj wiñayatakiwa.
ש [sin] jan ukajj [shin]
161 Principenakajj ina chʼusatakwa arknaqapjjetu,+ukampis arunakamarojj nayajj wal respetta.+
162 Arunakamatjja nayajj wal kusista,+kunjamtï maynejj guerrar sarasajj wal saqueysusin kusiski ukhama.
163 Kunatï jan cheqäki ukarojj uñistwa, ajjtasiraktwa.+
Ukampis leyimarojj munastwa.+
164 Urunjja paqallq kutiw nayajj jumar jachʼañchsma,cheqaparjam amtatanakam layku.
165 Khitinakatï leyimar munasipki ukanakajj walja sumankañampiw kusisipjje,+janiw kunas jupanakarojj lanktʼasiykaspati.*
166 Jehová Dios Tata, kunanaktï salvañatak lurkäta ukwa nayajj suytʼaskta,mandamientonakamsa phoqaraktwa.
167 Amtayäwinakamjja nayajj phoqtwa,ukanakarojj wal munasirakta.+
168 Ordenanakamsa amtayäwinakamsa nayajj phoqtwa,taqe kunanaktï nayajj lurkta ukanakjja jumajj sum uñjasktajja.+
ת [taw]
169 Jehová Dios Tata, yanap mayiñatak artʼasitajarojj istʼakimaya.+
Arunakamarjamay amuytʼayita.+
170 Ruwtʼasitajajj juma nayraqataruy purinpan.
Kunjamtï arskta ukarjam salvita.
171 Lakajajj sapa kutiw jumarojj jachʼañchätam,+leyinakam nayar yatichatam layku.
172 Lajjrajajj arunakamjjat cantpan,+kuna laykutejj taqe mandamientonakamajj cheqapawa.
173 Amparamajj nayar yanaptʼañatakejj listokïpan,+kuna laykutejj ordenanakamar istʼañwa nayajj ajlliwayta.+
174 Jehová Dios Tata, juman salvatäñjja nayajj wal munta,leyimarus wal munasirakta.+
175 Jumar jachʼañchañajatakejj jakayaskakitaya,+kunanaktï jumajj Juezjam amtkta ukanakay nayar yanaptʼitpan.
176 Chhaqat mä ovejar uñtataw nayajj saranukta.+
Servirimar thaqer jutakimaya,kuna laykutejj janiw nayajj mandamientonakamat armaskti.+
Notanaka
^ Jan ukajja, “taqpach chuymamp servipki”.
^ Jan ukajja, “yatjjatäjja”.
^ Jan ukajja, “yatjjati”.
^ Jan ukajja, “yatjjatañajataki”.
^ Jan ukajja, “phenqʼachat”.
^ Jan ukajja, “sarnaqayita”.
^ Ukajja, “jumar ajjsarapktam ukanakar arskayäta uka promesam phoqam” sasaw jaqokipasirakispa.
^ Jan ukajja, “suytʼta”.
^ Jan ukajja, “yatjjatäjja”.
^ Jan ukajja, “promesa luratamat”.
^ Jan ukajja, “mä suytʼäwi churkista ukat amtasim”.
^ Jan ukajja, “ajanum kusisiyañ thaqta”.
^ Variante: “kawuyanakapaw”.
^ Jan ukajja, “arsutamarjamaw”.
^ Jan ukajja, “jan amuyasisaw juchachasiyäta”.
^ Ukajja, “kʼarisisaw” sasaw jaqokipasirakispa.
^ Jan ukajja, “yatjjatäjja”.
^ Variante: “jatʼsupjje”.
^ “Ukanakasti” sasinjja, Diosan taqpach luratanakapatwa parlaski.
^ Jan ukajja, “piensta”.
^ Jan ukajja, “yatjjatta”.
^ Jan ukajja, “yatjjatataj layku”.
^ Hebreo arunjja, “lakajat misturi voluntadat churat ofrendanakaj”.
^ Jan ukajja, “Amtayäwinakamajj wiñay herenciajawa”.
^ Jan ukajja, “phenqʼachat uñjasiyistati”.
^ Hebreo arun uñstki uka arojja, kunanakatï qollqetsa qoritsa umatatayatäsajj jalaqtki uka jan servirinakatwa parlaski.
^ Jan ukajja, “ninamp qʼomachat qorit sipansa”.
^ Jan ukajja, “ordenanakamajj”.
^ Jan ukajja, “yatjjatañajataki”.
^ Jan ukajja, “ajjtaskañ qʼañu juchanak lurapki”.
^ Jan ukajja, “Naya toqet saytʼasim”.
^ Jan ukajja, “jupanakatakejj janiw kuna lanktʼasiyir qalas utjkiti”.
