1, 2. 1) ¿Kuna jan walinsa israelitanakajj uñjasipjjäna? 2) ¿Khitinakas Carmelo sat qollur makatapjjäna?

KUNJAMSA jaqenakajj wali chʼam tukusa Carmelo sat qollur makatasipkäna ukwa Eliasajj uñjäna. Jukʼakis qhanstaskchïnjja, qhanapuniw jaqenakajj qʼala tukusitäpjjäna. Kimsa mara chikatani machʼa tiempojj jan walinakwa utjayäna.

² Baal diosan 450 sacerdotenakapaw jachʼa jachʼa tukusa jaqenak tayp sarapjjarakïna. Jupanakajj Elías profetar wal uñisipjjäna. Niya taqe cheqa servirinakaruw Jezabel reinajj jiwarayäna, ukampis Eliasajj jan pächasisaw cheqa yupaychäw arjjataskakïna. Ukampis ¿aguantaskakisapänti? Jupa sapakejj kunarak jiwas contra luraspasti sasaw uka kʼari profetanakajj amuyapjjpachäna (1 Rey. 18:4, 19, 20). Eliasar wal uñisiri Acab reyis ukar purirakïnwa.

3, 4. 1) ¿Kunatsa Eliasajj ajjsarayaspachäna? 2) ¿Kuna jisktʼanakarus qhanañchasiskani?

³ Elías profetatakejj uka urojj wali muspharkañapunïñapänwa. Uka qollur makatirinakajja, khitis jukʼamp chʼamanejj ukwa uñjapjjañapäna, Jehová Diosacha, jan ukajj jan wali lurir jaqenakacha. ¿Kunjamakis Eliasajj jikjjataspachäna? Kunjamtï Biblian siskejja, jupajj “jiwasjam jaqekirakïnwa,” ukhamajj ajjsarayaspachänwa (Santiago 5:17 liytʼasiñapawa). Diosat jitheqtir jaqenaka, Diosar kutkatasir mä rey ukat jaqe jiwayir sacerdotenakaw ukankapjjäna, ukhamajj sapakiw Eliasajj amuyaspachäna (1 Rey. 18:22).

⁴ ¿Kunjamatsa israelitanakajj ukhamar purtʼasipjjäna? ¿Kunsa uka sarnaqäwit yateqsna? Elías profetan iyawsäwipat yatjjatañäni ukat kunjamsa ukajj yanaptʼistaspa uksa amuyarakiñäniwa.

5, 6. 1) ¿Kuna jan waltʼäwis Israelan utjäna? 2) ¿Kunjamsa Acab reyejj kunatï Dios nayraqatan jan askïki uk luräna?

⁵ Cheqa yupaychäwejj wali jiskʼachata jan yäqata ukhamakëjjänwa, ukwa Eliasajj jan kun lurirjamäsajj uñjäna. Walja maranakaw israelitanakajj yaqha markankir diosanakar yupaychañ laykojj  Jehová Diosar jaytanukupjjäna. Ukat Eliasan tiempopanjja, jukʼampïnwa.

⁶ Acab reyejj Jezabel warmimpiw casarasïna, jupajj Sidón markankir reyin phuchapänwa. Ukajj janipuniw Diosatakejj askïkänti. Uka warmejj Jehová Diosar yupaychañwa qʼal chhaqtayañ munäna ukat taqenis Baal diosar yupaychapjjaspa ukwa munarakïna. Ukspachaw Acab reyejj warmipar istʼasajj Baal diosar yupaychañataki mä templo ukat mä altar lurayäna. ¡Jupaw nayraqat uka kʼari diosar yupaychäna! (1 Rey. 16:30-33.)

7. 1) ¿Kunatsa Baal diosar yupaychañajj sinti jan walipunïnjja? 2) Machʼajj qawqha tiempönsa uka toqet Bibliajj janiw may may parlkiti sasajja, ¿kunatsa sissna? ( Recuadro uñjjattʼäta.)

⁷ ¿Kunatsa Baal diosar yupaychañajj sinti jan walipunïnjja? Nayraqatjja, cheqa Diosar serviñatwa jaqenakar jitheqtayäna. Ukat Baal diosar yupaychirinakajj jan sinttʼasiri qʼañunak lurir jaqenakäpjjänwa. Uka diosar yupaychasaw wachoq juchanak lurapjjerïna ukat uka juch lurañatakiw chach warminakas cuerpop aljasipjjerïna, wawanak kunwa sacrificiot loqtapjjerïna. Ukatwa Jehová Diosajj machʼa tiempow utjani sasin Acab reyir yatiyañapatak Elías profetar khitäna, ukat ‘nayajj siskä ukhakamäniw’ sasaw jupajj sarakïna (1 Rey. 17:1). Elías profetajj mä qawqha maranakatwa Acab reyin ukar wasitat saräna, “taqe markpacharu ukat Baal diosan taqpach sacerdotenakaparu Carmelo sat qollun tantachtʼam” sañataki. *

8. Baal diosar yupaychañ toqet yatjjatañajja, ¿kunjamsa yanaptʼistaspa?

⁸ Baal diosar yupaychañ toqet yatiñajj janiw kunans yanaptʼkistuti sasaw yaqhepajj amuyapjje. Jïsa, uka diosar yupaychañatakejj janiw templonakasa ni kuna altaras utj-jjeti. Ukampis ukajj janiw jan yäqkañ sarnaqäwikïkiti (Rom. 15:4). Baal sutejj “dueño” jan ukajj “uywiri” sañ muni. Jichhürunakanjja, taqe chʼamani Diosar “uywiriparjam” uñjañat sipansa, jaqenakajj yaqhanakaruw “uywiripäpkaspas” ukham uñjapjje. ¿Kunapachas uk lurapjje? Kunapachatï jaqenakajj qollqe jikjjatañaru, jachʼa yateqañ utanakar sarañaru, kusistʼañanakaru, wachoq juchanakaru ukat yaqha ukhamanakar chuym uchapjje ukhajja, ukanakarus diosaparjam uñjapkaspa ukhamawa (Mat. 6:24; Romanos 6:16 liytʼasiñapawa). Baal diosar yupaychasa jan walinak lurapkäna ukanakjja, jichhürunakan lurasiskakiwa. Ukhamajj kuntï  khä arunakan paskäna uka toqet lupʼiñajja, khitirus taqe chuym servisktan uk amuyasiñatakiw yanaptʼistani.

9. 1) Baal diosar yupaychañajj inamayätap uñachtʼayañatakejja, ¿kunatsa Carmelo qollojj wali askïpachäna? (Qhanañchäwip uñjjattʼäta.) 2) ¿Kamsänsa Eliasajj markarojja?

⁹ Carmelo sat qollu patatjja, wali sumwa taqe kunas uñjasïna. Mediterráneo sat jachʼa lamar qota, Cisón cheqankir suma vallenakapa ukat alay toqenkir Líbano sat cheqan utjki uka qollunakas uñjasirakïnwa. * Ukampis Inti qhantankipan uka cheq uñjañajj wali llakkañänwa. Jehová Diosaw Abrahaman wawanakaparu uka suma  oraq churäna, ukampis janiw nayrjamäjjänti, chʼusa, lupins wañsuta wasar pampakëjjänwa. Diosan markapaw jan sum amuytʼasirïpjjatap laykojj ukham uka oraq qʼal tukjjapjjäna. Uka cheqan tantachatapkäna uka israelitanakar jakʼachasisaw Eliasajj akham säna: “¿Kunapachkamasa jumanakajja pä chuyma sarnaqapjjätajja? Tatitutejj cheqa Diosächi ukajja, jupar arkapjjam, jan ukajj Baal diosatï cheqächi ukajja, juparuwa arkapjjañamajja” sasa (1 Rey. 18:21).

10. ¿Kunatsa israelitanakajj ‘pä chuyma sarnaqapjjäna’ sistanjja, ukat kunsa armasipjjäna?

¹⁰ “Pä chuyma” sasajja, ¿kunsa Eliasajj sañ munäna? Israelitanakajja, Jehová Diosarut yupaychapjjani, jan ukajj Baal diosaruch yupaychapjjani uk ajllipjjañapjja janiw amuyasipkänti. Paypacharuw yupaychañ munapjjäna. Jan walinak lurasa yupaychasaw Baal diosar kusisiyañ munapjjäna, maysa toqetsti, Jehová Diosan yanaptʼapwa munapjjarakïna. Baal diosaw yapunakasarusa ukat uywanakasarus bendicini ukat ‘ejercitonakan Jehová Diosaparakiw’ nuwasïwinakan arjjatistani sasaw amuyapjjpachäna (1 Sam. 17:45). Ukampis ¡Jupa saparuk yupaychsna ukwa Jehová Diosajj muni! Israelitanakajj uk armasipjjänwa, jichhürunakanjja waljaniw uk armasipjjaraki. Taqe kun Luriri Diosarukiw yupaychañasa, ukat ukwa Jupas mayirakistu. Ukhamajj idolonakampi, jan ukajj yaqha ukhamanakampi Diosar yupaychañajj janipuniw Jupatakejj walïkiti ukat chuym ustʼayaraki (Éxodo 20:5 liytʼasiñapawa).

11. Kuntï Eliasajj Carmelo qollun siskatayna uka arunakajja, ¿kun lurañatakis chʼamañchtʼistu?

¹¹ Israelitanakajj Jehová Diosaru ukat yaqha diosanakaruw yupaychañ munapjjäna. Jichhürunakanjja, waljaniw “baal” diosanakarus yupaychapjjaspa ukham sarnaqasajj Diosar serviñat saranukupjje. Kunjamsa Jehová Diosar yupaychasktan ukat kunas jiwasatakejj jukʼamp wakiskirïki uk amuytʼasiñasatakiw Elías profetan arunakapar istʼañajj yanaptʼistani.

12, 13. 1) ¿Kun lurañsa Eliasajj amtäna? 2) ¿Kunjamsa Eliasjam Diosar atinisitas uñachtʼaytanjja?

¹² Baal diosatak mä altar lurapjjam ukat ukanwa mä sacrificio loqtasajj nina apayaniñapatak mayisipjjäta, sasaw Eliasajj kʼari sacerdotenakar säna. Jupas ukhamarakiw lurañapäna, ¿kuna amtampis uk lurañ munäna? Jupa pachpaw akham säna: “¡Kawkïr diosatejj nina apayankani, ukawa cheqpacha Diosänejja!” sasa. Khitis cheqpach Diosajja uk Eliasajj sum yatïna. Cheqas wali iyawsäwinïtap laykuw fácil nina aqtañapatak uka sacerdotenakar jaytäna. Jumanak qalltapjjam sasaw säna. Ukhamajj sacrificio lurañataki mä  toro ajllisaw uka sacerdotenakajj Baal diosapar rogtʼasiñ qalltapjjäna (1 Rey. 18:24, 25). *

¹³ Janiw ukham milagronakajj utj-jjeti. Ukampis Jehová Diosajj pachpakïskiwa, kunjamtï Eliasajj Jupar taqe chuym atiniskänjja, ukhamarakiw jiwasajj atinisiñasa. Sañäni, maynitï Bibliat jan wal parlani ukhajja, janiw ajjsarayasisajj jan parljjañapatak jarkʼañasäkiti. Eliasat yateqasisajja, Diosaw uk sum qhanstayaskani sasaw atinisiñasa. ¿Kunjamsa uk lurañäni? Jiwasan amuyusaki parlañat sipansa, Diosan amuytʼayat Aruparuw atinisiñasa, ukaw jan walinak ‘cheqañchani’ (2 Tim. 3:16).

14. ¿Kunjamsa Eliasajj kʼari profetanakar phenqʼachäna, ukat kunatsa ukham luräna?

¹⁴ Kʼari profetanakajj sacrificio loqtasaw “¡istʼapjjetay Baal!” sasajj kutin kutin diosapar arnaqasipjjäna. Ukampis walja horanakas pasjjchïnjja, “janiw kuna arusa istʼaskänti” sasaw Bibliajj qhanañchi. Chika uröjjäna ukhaw Eliasajj uka profetanakar phenqʼachañ qalltäna. Baal diosajj jumanakar istʼañatakejj janiw tiemponïkpachati. ¡Inas bañonkaskchi! Jan ukajj ikiskpachawa, sartayañatak “jachʼat artʼapjjam” sasaw säna. Cheqansa, Eliasatakejj Baal diosar yupaychañajj inamayakïnwa, kʼari diosätapjja taqen uñjkataw uñachtʼayañ munäna (1 Rey. 18:26, 27, NM).

15. Jehová Diosat sipansa yaqha diosanakar arkañajj inamayakïtapjja, ¿kunjamsa Baal profetanakan sarnaqäwipajj uñachtʼayistu?

¹⁵ Eliasar istʼasajj jukʼampiw uka profetanakajj arnaqasipjjäna, “ukhamarak cuchillompisa, lancetampisa kharinoqasipjjäna, kunjamatï jupanakajj lurapjjerïkäna ukhama, wilamayjtaki lurjasiñkama”. Ukampis inamayakïnwa, “janiw kuna arusa utjkänti. ¡Janiw khitis istʼankänti, ni jayskarakïnsa!” (1 Rey. 18:28, 29.) Janiw kuna Baal diosas utjkänti. Jaqenakaru Diosat jitheqtayañatak Supayan uñstayat mä diosakïnwa. Cheqansa, Jehová Diosakiw suma uywirïsäspa. Yaqha diosanakar arkapki ukanakajja, phenqʼachata chuymas pʼakintata ukhamaw jikjjatasipjjani (Salmo 25:3 ukat 115:4-8 liytʼasiñapawa).

16. 1) Eliasajj altar askichkäna ukhajja, ¿kunsa israelitanakajj amtapjjpachäna? 2) ¿Kunjamsa Eliasajj Diosar taqe chuyma atinisitap uñachtʼayäna?

¹⁶ Jaypʼöjjäna ukhaw Eliasajj sacrificio loqtañatak wakichasïna.  Nayraqatjja, Jehová Diosan mä altarapwa askichäna, cheqa yupaychäwir uñisirinakaw uk tʼunjjapjjpachäna. 12 qalanakampiw uka altar luräna. Moisesan tiempopanjja, Israel markajj 12 tribunïnwa, jupanakaruw Diosajj Leyinak churäna. Jichhajj 10 tribukiw utj-jjäna, ukampis Diosan Leyiparjamaw sarnaqasipkakiñapäna, uk amtayañatakiw Eliasajj 12 qalanakamp uka altar lurpachäna. Sacrificio wakichasajja, umampiw qʼal warjjatäna. Uka umajj Mediterráneo sat jachʼa lamar qotatäpachänwa. Ukat altar muytpacharu mä qʼawa lurasaw umamp phoqtʼayäna. Nina jan ratuk naktañapatakejj kunaymaninakwa luräna. Ukhamatwa Diosar taqe chuyma atinisitap uñachtʼayäna, janipuniw amtap phoqhasiñapatakejj kunas jarkʼkaspati (1 Rey. 18:30-35).

17. Kunas llakisiyäna ukjja, ¿kunjamsa Eliasajj oracionapan uñachtʼayäna, ukat kunjamsa jiwasajj Diosat mayisajj jupat yateqassna?

¹⁷ Kunas llakisiyäna ukwa Eliasajj altʼat chuymampi Diosat mayisïna. Nayraqatjja, “Jehová Diosakiw Israelan Diosapajja”, sasin taqenir uñachtʼayañaw Eliasatakejj jukʼamp wakiskirïna. Janiw Baal diosäkänti. Jupajj Diosan mä servirikïtapwa uñachtʼayañ munarakïna, ukhamajj taqe jachʼañchäwejj Diosatakïñapänwa. Ukat israelitanakat llakisiskakïnwa, ukatwa arrepentisipjjañapatak ‘jawsam’ sasin Jehová Diosar säna (1 Rey. 18:36, 37). Jan iyawsäwinïpjjatapatjja, kunayman jan walinakwa utjayapjjäna, ukampis Eliasajj jupanakat sinttʼasiskakïnwa. ¿Oracionanakasajj ukhamarakiti? Diosar taqe chuyma munasitassa, altʼat chuymanïtassa ukat yanaptʼa munapki ukanakat khuyaptʼayasitassa ¿uñachtʼayarakiti?

18, 19. 1) ¿Kunjamsa Jehová Diosajj Eliasan mayisitapar istʼäna? 2) ¿Kamsänsa Eliasajj israelitanakarojja, ukat kunatsa Baal diosan sacerdotenakapajj jiwayatäpjjañapäna?

¹⁸ Eliasajj oracionan mayiskäna ukhajja, “¿Jehová Diosajj uka kʼari Baal diosjamäpachati?” sasaw waljanejj jisktʼasipjjpachäna. Ukampis mayisiñ tukuyäna ukhaw taqe kunas sum qhanstjjäna. Jehová Diosan ninapaw ‘saraqanïna, ukatsti naktayañatak loqtäwirojj qʼal nakhantäna, lawanakarusa, ukhamarak qalanakamppacha, laqʼamppacha, ukhamarak qʼawankkäna uka umamppachawa wañsuyäna’ (1 Rey. 18:38). ¡Wali muspharkañapunïpachänwa! ¿Israelitanakajj kamsapjjpachänsa?

¹⁹ ‘¡Jehová Tatituw cheqpach Diosajja! ¡Jehová Tatituw cheqpach Diosajja!’ sasaw artʼapjjäna (1 Rey. 18:39). Ukhakiw amuyasipjjäna. Ukampis alajjpachat nina saraqanir uñjasaki Jehová Diosaw  cheqpach Diosajja, sañajj janiw cheqpach iyawsäwinïpjjatap uñachtʼaykänti. Ukhamajj Diosan Leyinakap phoqhasa iyawsäwinïpjjatam uñachtʼayapjjam sasaw Eliasajj mayïna. ¡Ukwa nayratpach lurapjjañapäna! Uka Leyinakarjamajja, kʼari profetanakasa ukat idolonakar yupaychirinakasa jiwayatäpjjañapänwa (Deu. 13:5-9). Baal diosan sacerdotenakapajj Jehová Diosaruw wal uñisipjjäna ukat amtap jan phoqhasiñapatakejj wal chʼamachasipjjäna. Baal diosaru jakkir jiskʼa wawanakar loqtapjjäna ukhajja, jupanakajj janiw akchʼas sinttʼasipkänti. Ukhamajj ¡janiw kuna sinttʼasiñas jupanakatakejj utjañapäkarakïnti! (Proverbios 21:13 liytʼasiñapawa; Jer. 19:5.) ¡Uka kʼari sacerdotenakajj jiwapjjañapänwa! Ukatwa Eliasajj “jiwarayapjjam” sasin säna ukat israelitanakajj istʼapjjänwa (1 Rey. 18:40).

20. Baal diosan profetanakapar jiwayañajj janiw walïkänti sirinakan amuyunakapajja, ¿kunatsa jan walïki?

²⁰ Kuntï Eliasajj Carmelo qollun lurkäna ukajj janipuniw walïkiti sasaw jichha tiempon yaqhep yatjjatatanakajj sapjje. “‘Yaqha diosanakar yupaychirinakarojj ukham lurañasawa’ sasaw yaqhep kʼari yupaychirinakajj lurapjjaspa” sasaw yaqhep jaqenakajj amuyapjjaraki. Cheqas ukham lurir jaqenakajj utjiwa. Ukampis Eliasajj janiw jupanakjamäkänti. Jehová Diosar istʼasaw uka jan wali jaqenakar jiwarayäna. Maysa toqetsti, jichhürunakajj janiw cheqa cristianonakajj jan wali jaqenakamp nuwasipjjañapäkiti, jan ukasti, kuntï Jesusajj Pedror siskäna ukarjamaw sarnaqapjjañapa, jupajj akham sänwa: “Espadamjja imañaparu imasjjam. Espadampi nuwasirejja, espadampi jiwayatarakïniwa” sasa (Mat. 26:52). Jutïrinjja, Jehová Diosaw Jesucristo yoqap toqejj taqe kunsa cheqaparjam uñjani.

21. ¿Kunatsa Eliasan iyawsäwipat yateqasiñajj taqenitak wali askejja?

²¹ Sum sarnaqasaw cheqa cristianonakajj iyawsäwip uñachtʼayapjjañapa (Juan 3:16). Eliasajj wali sum uka toqet yatichawayistu. Jupajj Jehová Diosarukiw yupaychäna ukat ukham lurapjjañapatakiw yaqhanakar chʼamañchtʼarakïna. Baal diosar yupaychañajj inamayakiwa, jaqenakaru Jehová Diosat jitheqtayañatak Supayan uñstayat mä diosakiwa, sasaw jan ajjsaras qhanañchäna. Ukampis ukham lurañatakejj janiw jupapachparuk atiniskänti, jan ukasti Diosaruw atinisïna. Cheqansa, Eliasajj cheqa yupaychäw arjjatäna, jupan iyawsäwipat yateqasiñajj wali askipunïspawa.