1, 2. ¿Kawkirus Mariajj chachapampi viajäna, ukat kunatsa jupatakejj chʼamakïpachäna?

MARIAJJ mä asnur qonjjattʼataw wali jaya saraskäna. ¡Wali qaritapunïnwa! José chachapaw Belén markar puriñkama irpaskäna. Ukat mayampwa wawajj Marian purakapan onjjtäna.

² ‘Mariajj niyaw ususiñampëjjäna’ sasaw Bibliajj qhanañchi (Luc. 2:5, 6). Uk uñjasajj inas yapuchirinakajj “kunsa ukham usuri warmejj akan luraski” sasin jisktʼasipjjchïna. ¿Kunatsa Mariajj wali jaya sarpachäna? Jupajj Nazaret markanwa qamasïna.

3. ¿Kuna luräwsa Mariajj katoqäna, ukat kunsa jupat yateqañäni?

³ Uk sum amuytʼañatakejj mä qawqha phajjsinak nayrar kuttʼañäni. Mä angelaw Mariarojj Diosan Yoqapan mamapäyätawa sasin satayna, uka wawaw Mesiasäñapäna (Luc. 1:35). Mariajj niyaw ususiñampïskäna, ukampis ukhampachaw wali jayar sarjjaruwayäna. Kunjamtï uñjkañänejja, kunaymanin uñjasisaw iyawsäwipajj yantʼat uñjasïna. Diosat jan jitheqtañatakejj kunas wal yanaptʼpachäna uk uñjañäni.

4, 5. 1) ¿Kunatsa Mariampi ukat Joseyampejj Belén markar sarapjjäna? 2) Cesar Augusto apnaqerin mä kamachi apsutapatjja, ¿kuna profecias phoqhasïna?

⁴ Janiw Joseyampi Mariampikejj sarapkänti. Taqeniw qellqayasirejj markapar sarapjjäna, kunjamtejj César Augusto apnaqerejj siskäna ukhama. “Ukatwa Joseajj Galileankiri Nazaret markata mistusinjja Judea toqeruw saräna Belén markaru, kawkhantejj Davidajj naskatayna ukaru, Joseasti Davidan familiapat jutirïtap layku.” (Luc. 2:1-4.)

⁵ Ukampis uka marka apnaqerejj janiw mä akatjamataki uka kamachjja apskänti. Mesiasajj Belén markan nasini sasaw profecianakajj niya paqallq pataka maranak nayrajj sisjjatayna, ukhamasti ukaw phoqhasiskäna. Khä urunakanjja Belén sata yaqha markaw utjarakïna, Nazaretatjja 11 kilometronak sarañankakïnwa.  Ukampis Mesiasajj “Belén Efrata” markan nasini sasaw qhanañchasïna (Miqueas 5:2 liytʼasiñapawa). Nazaret markat uka jiskʼa markakamajja, viajirinakajj niya 130 kilometronakwa Samaria marknam pasasajj qollunak tayp sarapjjañapäna. Ukhamaw Joseyajj David nayra awkipan qamäwipar puriñkama Mariamp chika saräna, panpachaniw uka markatäpjjäna.

6, 7. 1) ¿Kunatsa Mariatakejj viajiñajj chʼamakïpachäna? 2) Joseyampi jaqechatäjjasajja, ¿kunatsa Mariajj nayrjam jan amuyjjpachäna? (Qhanañchäwip uñjjattʼäta.)

⁶ ¿Mariajj iyaw sasati Joseyamp chikajj uka kamachi phoqhañatakejj sarjjaruwaypachäna? Mariatakejj ukham sarañajj wali chʼamäpachänwa. Inas phajsa tiempojj niya tukuyañampïskchïna, ukhamasti niyaw jallojj sullantjjpachäna. Ukat kunjamtï Bibliajj siskejja, wali amstaruw sarapjjäna, uka jiskʼa markajj jachʼa lamar qotatjja niya 760 metronak altonkänwa. Walja urunakaw wali qarjata sarapjjpachäna. Ukat janiw kʼumar jaqjamajj jankʼaki sarapkpachänti, jan ukasti Marian mä jukʼa samartʼañapatakejj saytʼas saytʼasaw sarapjjpachäna. Yaqhep usuri warminakajj janiw ukham sarañ munapkaspati, utanak qheparjjapjjaspa. Familiaranakaw jan ukajj munat masinakaw uñjasipkitani ukat jupanakaw ususiñ yanaptʼasipkitani sasa. Ukhamasti uka markar sarañatakejja, Mariajj jan ajjsartʼirïpachänwa.

⁷ Ukhampachaw Joseyajj ‘Mariampi qellqayasiri saräna’ sasaw  Lucasajj qhanañchi. Ukatjja jaqechatäjjapjjänwa sarakiwa (Luc. 2:4, 5, NM). Mariajj jaqechatäjjasinjja janiw nayrjam amuyjjänti. Kunjamtï Diosajj warminakan chachanakapar yanaptʼapjjañap munkejja ukarjamaw sum phoqhäna, mä arunjja, Joseyarojj wali respetompiw uñjäna, ukatjja taqe chuymaw chachapan amtanakap phoqhañatakejj yanaptʼäna. * Ukhamasti iyawsäwinïñaw Mariarojj istʼasirïñatak yanaptʼäna.

8. 1) ¿Sarañatakejj kunas Marian chuymapan utjarakpachäna? 2) Diosar servirinakapatakejja, ¿kunatsa Marian sarnaqäwipajj yateqaskañajja?

⁸ ¿Sarañatakejj kunas Marian chuymapan utjarakpachäna? ¿Mesiasajj Belenan nasini siski uka profecía yatpachänti? Bibliajj janiw kamskisa. Inas yatchïna, kuna laykutejj ley yatichirinakasa ukat markachirinakas uka profecía sum yatipjjäna (Mat. 2:1-7; Juan 7:40-42). Ukatjja wali sumwa Mariajj Qollan Qellqatanak uñtʼarakïna (Luc. 1:46-55). Inas Mariajj chachapar istʼañ layku, marka kamachir phoqhañ layku, jan ukajj Jehová Diosan profeciapa phoqhañ layku sarchïna, janiw yatktanti, inas uka kimsa toqet sum phoqhañatak sararakchïna. Ukhamatwa jiwasan yateqasiñjam sarnaqäna. Khititejj chachatsa warmitsa taqe kunan istʼaski  ukat altʼat chuymampiraki sarnaqe ukajja, wali askiw Jehová Diosatakejja. Jichhürunakanjja istʼasirïñajj janis askëjjäspa ukhamwa waljanejj amuyapjje, ukampis Diosatakjam sum sarnaqañ munktan ukanakajja, Mariat yateqasiñasawa.

9, 10. 1) ¿Kunsa Joseyampi ukat Mariampejj Belenar jakʼachaskasajj amtapjjpachäna? 2) ¿Joseyampi ukat Mariampejj kawkirukis puripjjäna, ukat kunatsa?

⁹ Mariajj Belén marka jayat uñtasajj chuymsa qhanartayaspachänwa. Olivo sat qoqanak taypi makatasipkäna, uka qoqan achupakiw qhep apthapisïna. Ukat niya markar purkasajj kunjamsa jaqenakajj nayratpach ukan jakasipjjäna taqe ukanakwa amtasipjjpachäna. Uka markajj wali jiskʼakïnwa, kunjamtï Miqueas profetajj siskänjja, janiw Judá markanak taypin jakhutäkänti. Ukampis uka jiskʼa markanwa Booz, Noemí ukat David sat wali aytat jaqenakajj niya waranq maranak nayrajj nasipjjatayna.

¹⁰ Waljaniw qellqayasirejj uka markar sarapjjäna, jaqejj wali phoqhapunïnwa. Waljaniw nayrtʼapjjatayna, ukhamasti Joseyampi Mariampitakejj janiw qorpachasiñ utajj utj-jjänti. * Uk uñjasajj uywanak jaytañ cheqararukiw uka arumajj puripjjäna. Joseyajj wal llakispachäna, niyaw warmipajj partompi tʼaqhesiñ qalltäna. Cheqansa, ¡ususiñampëjjänwa!

11. 1) Kunjamakis Mariajj jikjjataspachäna ukjja, ¿kunatsa niya taqe warminakajj yatipjje? 2) ¿Kuna toqenakansa Jesusajj jilïr wawänjja?

¹¹ Kunjamakis Mariajj jikjjataspachäna ukjja niya taqe warminakaw yatipjje. Jehová Diosajj niya pusi waranqa maranak nayraw Adanampina ukat Evampin juchachasipjjatapatjja, ususir warminakajj tʼaqhesipjjaniwa sänjja (Gén. 3:16). Mariajj tʼaqhesirakpachänwa. Uka toqet Lucasajj janiw añch qhanañchkiti, “jupajj tayna yoqall wawap wawachasïna” sasakiw qhanañchi (Luc. 2:7). Ukaw jilïr wawapänjja, qhepatjja yaqha sojjta wawanakanïnwa (Mar. 6:3). Ukampis uka wawajj janiw jilïr wawapakïkänti, jan ukasti, ‘uka yoqapajj taqe kunatejj utjki ukanakatjja nayrïrïnwa’, mä arunjja, ¡Diosan Jilïr Yoqapänwa! (Col. 1:15.)

12. ¿Kawkharusa Mariajj wawap iktʼayäna, ukat kunjamsa pintatanakasa, teatronakasa uk uñachtʼayapjje?

¹² Kunjamtï yatktanjja, “wawa isinakamp kʼirtʼasaw mä uywa manqʼañawjaru iktʼayäna” sasaw Bibliajj qhanañchi (Luc. 2:7). Jichhürunakanjja, Jesusajj wali sumsa naskaspäna ukhamwa pintatanakansa, teatronakansa jan ukajj yaqha cheqanakansa kʼachachtʼañ  yatipjje. Ukampis janiw ukhamäkänti. Uywa manqʼajj mä cajonjaruw uchasïna. Ukat Joseyampi Mariampejj kawkhantï uywanakajj ikipkäna uka cheqankapjjänwa, uka cheqajj qʼañuraki ukat thujsaraki ukhamäpachänwa. Janiw khitis wawasan ukham nasiñapjja munksnati. Awk taykanakajj wali sum wawapar uñjañ munapjje. Yämas Joseyampi Mariampejj Diosan Wawap nasiñapjja wali sum munapjjpachäna.

13. 1) Kuntï lurirjamapkän ukarjamajja, ¿kunjamsa Mariampi Joseyampejj wawapar sum uñjapjjäna? 2) ¿Kunjamsa awk taykanakajj Mariampita Joseyampit yateqasipjjaspa?

¹³ Jupanakajj janiw ukhaman uñjasisajj sinti llakisipkänti, jan ukasti kunatejj lurañjamäkän ukarjamaw wawapar sum uñjapjjäna. Mariajj wawapar sum kʼirtʼasaw uywa liwañäki ukawjar iktʼayäna, ukat jan thayjañapatakis sum uñjarakïna. Kunatejj lurañjamäkäna ukarjam lurañatakiw wal chʼamachasïna. Jupanakajj ak amuyapjjäna: Diosar munasiñ yatichañaw taqe kunat sipansa wali wakiskirïnjja (Deuteronomio 6:6-8 liytʼasiñapawa). Jichhürunakanjja janis jaqenakajj Diosat kunsa yatiñ munjjapjjchejja, suma chuyman awk taykanakajja Joseyampit Mariampit yateqasisaw kunatï jukʼamp wakiskirïki uk wawanakapar yatichañatak chʼamachasipjje.

14, 15. 1) ¿Kunatsa uywa awatirinakajj naskäna uka wawar wal uñjañ munapjjpachäna? 2) ¿Kunsa awatirinakajj Jesusar uñjasajj lurapjjäna?

¹⁴ Mä akatjamatwa uywa awatirinakajj uka cheqar jankʼaki mantapjjäna. Uka familiar uñjiriw puripjjäna, cheqas uka wawar uñjaniñäni sasaw wal tʼijunipjjatayna. Uñjasajj wal kusisipjjäna, uñnaqanakapansa wali qhanaw kʼuchisipjjäna. Uka qollu parkinakanwa uywanakap uñjasipkäna, ukhamasti jaypachatwa tʼijunipjjatayna. * Mä angelaw uka arumajj jupanakar uñstatayna, ukwa Joseyampir Mariampir yatiyapjjäna. Jehová Diosan jachʼa kankañapampi qhantʼataw uka angelajj akham yatiyatayna: Mesiasaw jan ukajj Cristow Belén markan nasjje, ukat mä pañompi kʼirtʼataw uywa manqʼañäkis ukan ikiski sasa. Ukatjja jukʼamp muspharkañaw pasarakïna, walja angelanakaw ukar muyuntata Diosar jachʼañchapjjäna (Luc. 2:8-14).

¹⁵ Ukatwa Jesusar uñjirejj wal tʼijupjjäna. Uka awatirinakajj wal kusisipjjpachäna, kunjamtï angelajj siskäna ukhampunwa  nasirirojj jikjjatapjjatayna. Ukampis janiw uka suma yatiyäwinakampejj ukhamak qheparapkänti, jan ukasti “kuntï angelajj wawatjja jupanakar siskataynas ukwa yatiyapjjäna”. Istʼirinakasti wal muspharapjjäna (Luc. 2:17, 18). Khä urunakanjja, yupaychäwi pʼeqtʼirinakajj uywa awatirinakarojj wal jiskʼachapjjpachäna. Ukampis Jehová Diosajj ukham altʼat suma chuyman jaqenakarojj wal munasïna. ¿Uka awatirinakan purinitapatjja Mariajj kamspachänsa?

16. Istʼasaw Mariajj lupʼirakïna sasajja, ¿kunatsa sissna, ukat kunjamsa ukajj yanaptʼäna?

¹⁶ Mariajj ukhakiw ususiskäna. Ukampis kuntï mayninakajj sapkäna ukjja sum istʼäna ukat amuytʼarakïna. “Mariajj taqe akanakjja wal lupʼisaw chuymaparu imäna” sasaw Bibliajj qhanañchi (Luc. 2:19). Uka chʼikhi tawaqojj jankʼakiw angelan arunakapat amuytʼäna. Ususkäna uka wawajj khitin Yoqapasa ukat ukajj kunja wakiskiris uk yatiñapwa Jehová Diosajj munäna. Mariajj janiw aleqak istʼkänti, jan ukasti wali sumwa chuymapar katoqasïna ukhamata jutïr phajjsinakas jan ukajj maranakas uk sum amtasiñataki. Ukham lupʼisaw jupajj jukʼamp iyawsäwinïpachäna (Hebreos 11:1 liytʼasiñapawa).

17. ¿Kunjamsa Mariat yateqassna?

¹⁷ ¿Jumajj Mariat yateqasirakïtati? Bibliajj Jehová Diosan wali suma yatichäwinakapaniwa. Ukampis ukanak jan liykañäni ukhajja, inamayäniwa. Ukhamajj sapüru Biblia liyiñaw wakisi, janiw aleq librokïkiti, jan ukasti Diosan amuytʼayat Arupawa (2 Tim. 3:16). Ukatjja uka yatichäwinakjja chuymar katjjäsiñasawa, ukat kunjamtï Mariajj lupʼkänjja ukham lupʼiñasarakiwa. Jiwasatejj wali amuyumpi yateqañäni ukat ukarjam sarnaqañataki wal chʼamachasiñäni ukhajja, jukʼampiw iyawsäwisajj jiljjattani.

18. 1) Jesusajj naskäna ukhajja, ¿kunjamsa Mariampi Joseyampejj Moisesar churat Leyinak phoqhapjjäna? 2) Sacrificio Diosar loqtapkäna ukajja, ¿kunsa Mariampit Joseyampit uñachtʼayistu?

¹⁸ Wawajj kimsaqallq urunëjjäna ukhajja, Moisesar churat Leyinakarjamaw circuncidayapjjäna, ukat kunjamtï Jehová Diosajj siskänjja, Jesús sasaw sutiyapjjäna (Luc. 1:31). Ukat wawajj pusi tunka urunëjjäna ukhajja, Belenatwa Jerusalenar apapjjäna,  ukajj 10 kilometronak sarañankänwa. Ukanwa qʼomachatäjjañatakejj Diosar mä ofrenda loqtapjjäna, kunjamtï Moisesajj katoqkäna uka Leyinakanjja pisinkirinakatak siskäna ukhama, pä paloma jan ukajj pä jiskʼa jamachʼinak apapjjäna. Inas jupanakajj mayninakjama mä uwijampi mä palomampi loqtañ munapjjchïna, ukampis janiw uka llakimpejj aynachtʼapkänti. Cheqas uka yupaychañ utanjja wal jupanakarojj chuymachtʼapjjäna (Luc. 2:21-24).

19. 1) ¿Kunjamsa Simeonajj Marian jukʼamp lupʼiñapatakejj amuytʼayäna? 2) ¿Kunsa Anajj Jesusar uñjasajj luräna?

¹⁹ Wali iyawsäwini Simeón sat mä chuymankipstat jaqew ukankaskäna, ukatjja wali muspharkañ arunakwa jupanakar säna. Ukjja wali sumwa Mariajj chuymapar imjjasïna. “Janïr jiwkasajj Mesiasaruw uñtʼawayäta” sasaw Diosajj Simeonar satayna, ukat jutaniw sat qhespiyirejja, uka wawaw sasaw qollan ajayojj qhanañcharakitayna. Ukat Simeonajj Mariar akham sarakïnwa: ‘Mä urojj mä jachʼa cuchillompis jununtapkiristam ukhamwa usuyasïta’ sasa (Luc. 2:25-35, NM). Uka arunakajj kimsa tunk maranak pasatatwa phoqhasïna, ukampis uka arunak amtasaw Mariajj uka jan waltʼäw aguantpachäna. Ana sutini mä chuymankipstat warmirakiw uka wawar uñjäna, ukatjja wali kusisitaw khitinakatejj Jerusalenan qhespiyasiñap suyapkäna ukanakar Jesusat yatiyäna (Lucas 2:36-38 liytʼasiñapawa).

20. Jesusar templor apasajja, ¿kuna bendicionanaksa Joseyampi Mariampejj katoqapjjäna?

 ²⁰ “¡Walikpun wawar Diosan utapar apantanjja!” sasaw Joseyampi Mariampejj sapjjpachäna. Uka wawajj janiw uka may kutiki Jerusalén templorojj aka Oraqenkkasajj sarkänti, jan ukasti walja kutiw saräna. Joseyampi Mariampejj jukʼaksa Diosar sacrificio loqtapkchïnjja, wali chuymachtʼata ukat amuytʼayataw jikjjatasipjjäna. Uka urojja, lupʼiñataki chuymas wali suma yatichäwinakan phoqtʼata, wali iyawsäwini ukhamaw Mariajj jikjjataspachäna, ukat yaqhanakar yatichañatakis walja askinakwa yateqäna.

21. ¿Kunjamsa iyawsäwis jukʼamp jiljjattaysna?

²¹ Jichhürunakanjja, yaqhep awk taykanakajj ukhamwa sarnaqapjjaraki, ukajj wali kusiskañawa. Jehová Diosan Qhanañchirinakapajj wawanakapar tantachäwinakar irpapjjapuniwa. Kuntï lurirjamäpki ukanak phoqhañatakiw uka awk taykanakajj wal chʼamachasipjje, jilat kullakanakaruw suma arunakapampi chʼamañchtʼapjje. Ukatjja wali kusisitarakiw uka tantachäwinakatjja utanakapar sarjjapjje, ukhamata suma yatiyäwinaka yaqhanakar yatiyañataki. ¡Jehová Diosat jan jitheqtir familianakar uñjañajj wali kusiskañawa! Jupanakamp tantachasktan ukhajja, iyawsäwisajj jukʼampiw jiljjatti, kunjamtï Marian iyawsäwipajj wal jiljjatkän ukhama.