1. ¿Kawkirus Jonasajj sarañapäna, ukat kunjamsa jikjjatasïna?

JONÁS profetajj 800 kilometronakwa viajiñapäna, mä phajjsi jan ukajj jilaw kayuk sarañapäna, ukhamajj walja tiempow lupʼiñapatakejj utjäna. Ukatakiw mä thaki ajlliñapäna, cheqaki sarki uka thaki, jan ukajj jan waltʼäwinakajj jan utjki uka jaya thaki. Vallenaka ukat qollunak tayp sarañapänwa. Ukat Siria cheqan utjkäna uka wasar pampanaksa pasañaparakïnwa. Ukatjja, umanak wal sarir jachʼa jawiranaksa paskatañapänwa, maynejj Eufrates satänwa. Ukatsti Siria, Mesopotamia, Asiria markanakanwa jan uñtʼatanakampi qorpachasiñapäna. “Nínive markaruw sarä” sasinwa profetajj wal lupʼpachäna. Ukankirinakaruw Jonasajj wal ajjsaräna, jichhajj uka markaruw jakʼachasiskäna.

2. ¿Kunjamsa Diosajj kuntï Jonasar sawaykän uk phoqhañ yatichäna?

² Jonasajj janiw qhepar kutʼkasapänti ni jaltkarakisapänsa, nayraw uk luräna. Kunjamtï pasïr yatichäwin yateqaniwayktanjja, ukham luratapatwa Jehová Diosajj istʼasirïña ukat altʼat chuymanïñ yatichäna. Profetajj mä barcot sarkäna ukhaw Diosajj mä jachʼa thaya apayanïna ukat umamp jan ajjskatas jiwañapatakejja, mä jachʼa chawllampiw oqontayäna ukat kimsürutwa chawllajj qota lakar waqʼaqsüna. Ukajj Jonasatakejj jan armkañäpachänwa (Jon. 1, 2 jaljanaka).

3. ¿Kunjam chuymampis Diosajj Jonasar uñjäna, ukat kunsa jisktʼasiraksna?

³ Nínive markar sarañapatakiw Jehová Diosajj wasitampi Jonasar khitäna.  Uk istʼasajj jankʼakiw Jonasajj inti jalsu toqer wali jay saräna (Jonás 3:1-4 liytʼasiñapawa). ¿Diosan cheqañchatäsajj suma chuymanëjjpachänti? Jiwañat qhespiyasa, jan istʼasirïtapat jan castigasa ukat aruparjam phoqhañataki wasitat khitasaw Diosajj khuyapayasiñap Jonasar uñachtʼayäna. Ukampis ¿Jonasajj khuyaptʼayasirïñ yateqpachänti? Juchararätas laykojj mayninakat khuyaptʼayasiñajj chʼamakïspawa. Kunas Jonasampejj pasäna ukat kunsa jiwasajj yateqaraksna uk jichhajj uñjañäni.

4, 5. ¿Kunatsa Diosatakejj Nínive ‘markajj jachʼäna’, ukat kunsa ukajj Jupat yatichistu?

⁴ Jehová Diosajj janiw Nínive markarojj kunjamtï Jonasajj uñjkäna ukham uñjkänti. Kunjamtï Bibliajj siskejja ‘Jehová Diosatakejj Nínive markajj jachʼapunïnwa’ (Jon. 3:3, 4). Jonás libronjja, ‘jachʼa marka’ sasajj kimsa kutiw Diosajj ayti (Jon. 1:2; 3:2; 4:11). ¿Kunatsa ukham uñjpachäna?

 ⁵ Uma juicio pasatatwa Nimrod chachajj uka marka uttʼayäna, ukhamajj uka markajj wali jayanïnwa. Ukat wali jachʼapunïnwa, yaqha jiskʼa markanakas ukan utjarakpachänwa, ukhamasti markpach pasañatakejj niya kimsa uruw munasïna (Gén. 10:11; Jon. 3:3, 4). Suma lurtʼat templonakasa, jachʼa utanakasa ukat perqanakasa wali muspharkañänwa. Ukampis Diosatakejj uka markan jakirinakaw jukʼamp wakiskirïpjjäna. Uka tiemponjja, walja jaqenakaw Nínive markan jakapjjäna. Ukat jan walinaks lurapkchïnjja, Jehová Diosajj jupanakat llakisiskakïnwa, ¿kunatsa? Jupatakejj taqe jaqen jakäwipajj wali wakiskiripuniwa, ukatwa arrepentisisajj jan wali luräwinakapat kuttʼapjjañap munäna.

6. 1) ¿Kunatsa Nínive markajj Jonasar wal ajjsaraypachäna? (Qhanañchäwip uñjjattʼäta.) 2) ¿Kunjamsa Diosan arunakap yatiyasajj Jonasat yateqassna?

⁶ Jonasajj 120.000 jaqenakan Nínive jachʼa markar purïna ukhajja, jukʼampiw ajjsarpachäna. * Uka jachʼa markar purisaw mä uru jornalpach sarnaqäna, kawkhantï walja jaqenakajj tantachasipkäna ukar puriñatakiw ukham sarnaqpachäna, ukhamat Diosan arup yatiyañataki. Kunjamjjay yatiychïna uk janiw yatktanti. Inas asirionakajj parlapkäna uka aru parlchïna, jan ukajj Diosan yanaptʼapampiw uka arut parlpachäna. Inas jupajj hebreo arut yatiychïna ukat yaqhaw ninivitanakan arupar jaqokippachäna. Jonasajj akham sasaw qhana arunakamp kuntï jaqenakajj jan istʼañ munapkäna uk yatiyäna: “Akat pusi tunka ururojj Nínive markajj qʼala tukjatäniwa” sasa (Jon. 3:4). Profetajj jan pächasisaw uka arunak walja kuti yatiyäna. Ukhamatwa jan ajjsarirïtapa ukat wali iyawsäwinïtap uñachtʼayäna. ¿Janit jupat yateqasiñajj wakiskaspa?

7, 8. 1) Jonasan yatiyäwip istʼasajja, ¿kunsa ninivitanakajj lurapjjäna? 2) ¿Jonasan arunakap istʼasajj kunsa reyejj luräna?

⁷ Taqeniw Jonasan yatiyäwip istʼapjjäna. “Janiw istʼapkitaniti, nuwjañ munapjjetani” sasaw Jonás profetajj amuypachäna. Ukampis janiw ukhamäkanti, taqe jaqenakaw istʼapjjäna. Mä jukʼampitjja, taqenipuniw juchañchäwi arunakapat parlapjjäna (Jonás 3:5 liytʼasiñapawa). Chachanaka, warminaka, wayn tawaqonaka, jilïrinaka, qamirinaka, pisinkirinaka, taqenipuniw juchanakapat  arrepentisipjjäna. Ukat taqe chuyma arrepentisipjjatap uñachtʼayañatakejj janiw manqʼjjapjjänti. Taqe ukanakwa reyir yatiyapjjäna.

⁸ Reyejj uk istʼasaw Jehová Diosar ajjsarasa wal arrepentisïna. Ukat tronopat sartasaw suma isinakap apsusisajj khankha isinakamp isthapisïna, ukatsti llakip uñachtʼayañatakejj ‘qhelljjaruw qontʼasirakïna’. Ukat jilïrit uttʼayatäpkän ukanakampiw mä ley apsüna, ukhamat markankirinakajj ayunañ qalltapkän ukham taqenis lurapjjañapataki. “Taqe jaqenakaw khankha isimpi uchasipjjañapa” sasaw reyejj arsüna, uywanakampacha. * “Aka markajj jan walinak luriri ukat nuwasiri ukhamäpjjewa” sasaw reyejj altʼat chuymamp säna. Inas Diosajj arrepentisitas uñjasajj jiwasat khuyaptʼayaschini, sasin amuyasaw reyejj akham arspachäna: “Inach Diosajj perdonistani, jachʼa colerapsa apartayasjjarakispa, ukhamat jani jiwarañasataki” sasa (Jon. 3:6-9).

9. ¿Kunsa yaqhep yatjjatatanakajj ninivitanakat sapjje, ukat kunatsa ukajj janiw cheqäkiti sasin sissna?

⁹ “Kunjamarak ninivitanakajj jankʼak arrepentisipjjanisti” sasaw yaqhep yatjjatatanakajj sapjje. Ukampis nayra tiempon jakapkäna uka jaqenakajja, ukhamapuniw amuyunakapan jankʼak mayjtʼapjjerïna ukat kun istʼasas jankʼakirakiw iyawsapjjerïna sasaw Bibliat yatjjatatanakajj sapjje. Cheqas “ukhamapuniwa” sasin janiw sisksnati, ukampis pachpa Jesusaw ninivitanakajj arrepentisiwayapjjewa sasin säna (Mateo 12:41 liytʼasiñapawa). Ukat ukanakajj pasäna ukhajja, Jesusaw alajjpachat taqe ukanak uñjaskäna, ukatwa kuntï sawaykän uk sum yatïna (Juan 8:57, 58). Jaqenakajj jan walinaksa lurapkchejja, janjamakiw cambiapkaspati sasin amuyañajj janiw walïkaspati. Jehová Diosakiw kunas jaqen chuymapan utji uk sum yati.

10, 11. 1) Ninivitanakan arrepentisipjjatap uñjasajja, ¿kunsa Diosajj luräna? 2) Diosajj pantjasïnwa sasajja, ¿kunatsa jan sisksna?

¹⁰ Ninivitanakajj arrepentisipjjäna ukhajja, ¿kunsa Diosajj luräna? Jonasajj akham sänwa: “Diosasti uñjänwa Nínive markankir jaqenakarojj ukham luraskiri, jan wali sarnaqäwinakapsa apanukuskiri,  ukham uñjasinwa Diosajj jupanakat khuyaptʼayasjjäna, janirakiw kuna castigotejj jutañapäkäna uksa apayankjjänti” sasa (Jon. 3:10).

¹¹ ¿Kunatsa Jehová Diosajj ninivitanakar jan castigpachäna? ¿Juchañchasajj pantjaspachänti? ¡Janiw ukham amuyañasäkiti! Jupajj janiw maynir juchañchasajj pantjaskaspati. Kunjamtï Bibliajj siskejja, Jehová Diosajj cheqaparjamaw taqe kuns uñji (Deuteronomio 32:4 liytʼasiñapawa). Jehová Diosajj janiw ninivitanakatak coleratäjjänti. Uka jaqenakan taqe chuyma arrepentisipjjatap uñjasaw jan castigjjänti. Ukat sipansa, jupanakat khuyaptʼayasjjänwa.

12, 13. 1) ¿Kunjamsa Diosajj amuytʼirïtapa ukat sinttʼasirïtap uñachtʼayi? 2) Jonasan profeciapajj janiw kʼarïkänti sasajja, ¿kunatsa sissna?

¹² “Diosajj jan sinttʼasiri, qala chuymani ukat qhoruwa” sasaw yupaychäwi pʼeqtʼirinakajj sapjje. Ukampis janiw ukhamäkiti, Jupajj amuytʼiri ukat khuyapayasir Jehová Diosawa. Jaqenakar janïr castigkasajja, servirinakaparuw yatiyanipjjañapatak khiti. Ninivitanakjama, jan wali luririnakajj arrepentisisin jan wali luräwinakap apanukupjjaspa, ukwa Diosajj muni (Eze. 33:11). Mä kutejj akham sasaw Jeremiasar säna: “Nayajj mayakwa amtasta, mä marka jan ukajj mä reino jikʼinukuñsa, liwinukuñsa, jan ukajj qʼala tʼunjañsa. Ukampisa, uka markatejj ñanqha lurañanakata jitheqtjje ukapachasti kuna mutuyäwtejj wakichatäkäna ukjja janiw apayankjjti” sasa (Jer. 18:7, 8).

¹³ Ukhamajj ¿Jonasan profeciapajj kʼarïpachänti? Janiwa. Jupajj jachʼa juchanakapat amuytʼasipjjañapatakiw uka yatiyäwinak arsüna. Ninivitanakajj arunakapar istʼapjjänwa, ukampis jan wali luräwinakapar wasitat kuttʼapjjaspäna ukhajja, Jonasan arunakaparjamaw phoqhasispäna. Cheqas tiempompejj ukhamapuniw pasäna (Sof. 2:13-15).

14. Diosan ninivitanakar jan castigatap uñjasajja, ¿kunjamsa Jonasajj jikjjatasïna?

¹⁴ Diosan ninivitanakar jan castigatap uñjasajja, ¿kunjamsa Jonasajj jikjjataspachäna? Jupatakejj “janiw walïkänti kuntejj Diosajj lurkän ukajja, jupasti walipuniw mayjtʼasïna” sasaw Bibliajj qhanañchi (Jon. 4:1). Jehová Diosarus cheqañchañ munkaspa ukhamwa mayisïna. Pachpa oraqejan qheparañajja jukʼamp askïsapänwa sasaw säna. Jehová Diosajj janiw jaqenakar mutuykaniti sasajj sapuniyätwa, ukatwa pasïrejj Tarsis markar sarawayjjta sas kunaw säna. Ukat jakañap apaqjjañapatakiw Jehová Diosar mayisïna, “jiwjjañaw sumajja jakañat sipansa” sasaw säna (Jonás 4:2, 3 liytʼasiñapawa).

15. 1) ¿Kunatsa Jonasajj wal coleraspachäna? 2) ¿Kunjamsa Diosajj profetapar uñjaskakïna?

 ¹⁵ ¿Kunatsa Jonasajj wal coleraspachäna? Janiw yatktanti. Ukampis taqen istʼkataw ninivitanak contra mä juchañchäw arsüna. Taqeniw jupar istʼapjjäna, ukampis janiw kuna castigos utjkänti. Ukhamajj “nayat sawkasipjjaniwa, jan ukajj kʼari profetatwa uñtʼapjjetani” sasaw Jonasajj ajjsarpachäna. Ukat taqe chuyma arrepentisipjjatapata ukat Jehová Diosajj jupanakat khuyaptʼayaskäna ukatsa janiw kusiskänti. Jan ukasti jachʼa jachʼa tukusaw wal chuym ustʼayasïna ukat jupatakwa llakisïna. Ukampis Diosajj suma jaqerjamaw uka llakit profetar uñjaskakïna. Ukhamajj respeto jan uñachtʼayatap layku castigañat sipansa, amuytʼayañatakiw Diosajj akham jisktʼäna: “¿Walikïskiti jumatakejja ukham wali colerasitamajja?” sasa (Jon. 4:4). Kamspachänsa Jonasajj uk Bibliajj janiw siskiti.

16. ¿Kuna toqenakansa Diosat jan wal amuyañajj utjaspa, ukampis kunsa Jonasan sarnaqäwipajj yatichistu?

¹⁶ “Jonasajj pantjasïnwa” sasajja, jankʼakiw sissna. Ukampis awisajj jiwaspachpaw kuna lurañtï Jehová Diosajj amtki uk jan sum amuyktanti. Awisajj akham amuyunakaw utjaspa: “Uka chhiji jan utjañapatakejja, Diosaw jarkʼaqañapäna, jan ukajj Jupaw jan wali luririnakarojj castigañapäna. Ukatjja, aka pachan utjki uka jan walinakjja, nayraw Diosajj qʼal chhaqtayjjañapäna” sasa. Ukampis ¿kunsa Jonasan sarnaqäwipajj yatichistu? “Kuntï Jehová Diosajj lurawayki ukajj janiw walïkiti” sasin amuyktan ukhajja, cheqans jiwasaw pantjasisktanjja.

17, 18. 1) ¿Kunsa Jonasajj Nínive markat mistusajj luräna? 2) Calabaza vinatera sat alin wañsutapatjja, ¿kunjamsa Jonasajj jikjjatasïna?

¹⁷ Jonasajj wali chuyma ustʼataw Nínive markat sarjjäna. Ukampis utapar kuttʼañat sipansa, inti jalsu toqeru mä jachʼa qolluruw sarjjäna, uka cheqat sumwa Nínive markajj uñtasïna. Ukhanwa lupit jarkʼaqasiñatak mä jiskʼa carpa lurasisajj kunsa Nínive markampejj pasani uk suyäna. “Tʼunjasipuniniwa” sasaw jupajj amuypachäna. ¡Ukham jan istʼasir jaqestï! ¿Kunjamsa Jehová Diosajj sinttʼasirïñ yatichpachäna?

¹⁸ Jehová Diosajj mä arumanakwa calabaza vinatera sat ali jilayäna. Jonasajj ikit sartäna ukhajja, mä jachʼa ali uñjäna ukat sumwa ukajj jupar chʼiwjjatäna. Uk uñjasajj wal profetajj kusisïna. “Diosaw nayar munasitap layku aka ali ukham jilsuypacha” sasaw amuypachäna. Ukampis Diosajj janiw lupit jarkʼaqañ layku, ni jan colerjjañapatakisa uka ali jilaykänti, jan ukasti, chuymaparuw purtʼañ  munäna. Ukat mä laqʼompi uka alir mantayasaw qʼal wañsuyäna. Ukat ‘mä juntʼu thaya inti jalsu toqet thaytʼayanïna’, wali juntʼupunïnwa ukatwa Jonasajj ‘chʼamapan thayjtjjatap’ amuyaspachäna. Taqe ukanak uñjasajj ¿kunsa Jonasajj lurpachäna? Wasitat llakisisaw ‘jakañat sipansa jiwañaw sumajja’ sasin Diosar säna (Jon. 4:6-8).

19, 20. ¿Kunjamsa Diosajj amuytʼañapatak Jonasar yanaptʼäna?

¹⁹ Wasitatwa Diosajj amuytʼayañatakejj akham jisktʼäna: ‘¿Walikïskiti uka alin wañsutapat colerasitamajja?’ sasa. Ukat Jonasajj jan amuyañ munasaw akham säna: “Jïsa, walikïskiwa, coleratwa nayajj jiwaskta” sasa. Ukhaw jupar qhan yatichañajj wakisïna, ukwa Jehová Diosajj amuyäna (Jon. 4:9).

²⁰ Amuytʼayañatakejj akham sänwa: ‘Janejjay jumajj uka ali ayruskstatejja ni jilaykaraktasa; mä arumanakwa alsuwayi, mä arumarusti jiwjjakirakiwa. Ukampis jumajj uka alit khuyaptʼayastawa’ sasa. Ukat akham sasaw sarakïna: ‘Jukʼampiw nayan khuyapayasiñajajj Nínive markatak utjañapa, uka jachʼa markansti patak pä tunkani waranqa jaqenakaw utji, jupanakajj kupi amparampi chʼeqa  amparampi mayjätap janiw amuyapkiti. Ukat walja uywanakaw ukan utjaraki’ sasa (Jon. 4:10, 11, NM). *

21. 1) ¿Kunsa Diosajj uñachtʼäwipampi Jonasar yatichañ munäna? 2) ¿Kunjamsa Jonasan sarnaqäwipajj yanaptʼistaspa?

²¹ ¿Kunsa Diosajj yatichañ munäna? Jonasajj uka ali jilsuñapatakejj janiw kuns lurkänti. Ukampis Jehová Diosajj ninivitanakarojj jakañwa churäna ukat sum jakasipjjañapatakejj kunatï munasïna ukwa churarakïna. Jichhajj uka kikpwa taqe jaqenakamp luraskaraki. Jonasajj 120.000 jaqenakaru ukat walja uywanakaru wali askit uñjañat sipansa, ¿kunjamarak mä aliruk wali askit uñjasapänsti? Jupan askipakwa thaqhaskäna. Uka wañsut alejj janiw lupit jarkʼjjänti, ukatwa Jonasajj colerasïna. Ukat jupan askip thaqhatap laykurakiw ninivitanakatak wal colerasïna. Jachʼa jachʼa tukusaw janis pantjasirïkaspa ukham tukuñ munäna, ukat profetjam suma uñjatañ munasakiw ukham amuyarakïna. Jiwasan chuymasajj kunjamäskisa uk amuytʼasiñatakiw Jonasan sarnaqäwipajj yanaptʼistaspa. Qhana arunjja, taqeniw awisajj jiwasan askisak thaqhañ yattanjja. Ukampis Diosaw Jupjam khuyaptʼayasirïña, sinttʼasirïña ukat mayninakan askip thaqhañ yatichistu, ¡ukhamätapatwa wal yuspärtanjja!

22. 1) Diosatwa Jonasajj khuyaptʼayasirïñ yateqäna sasajja, ¿kunatsa sissna? 2) ¿Kunsa taqenis Jonasan sarnaqäwipat yateqsna?

²² Kuntï Diosajj yatichañ munkäna uk Jonasajj ¿yateqpachänti? Jonás librojj ukharukiw tukuyjje, ukhamajj janiw jukʼamp sisjjsnati. Yaqhep yatjjatatanakajj “janiw Jonasajj kuns kamskpachänti” sasaw sapjje. Ukampis Jonasajj Diosan yatichäwiparojj iyaw sispachänwa. ¿Kunatsa ukham jan pächasis sistan? Jonás libron utjatap layku. Jupaw uka libro qellqawayi. Jupajj markapar kuttʼasaw uka libro qellqañ qalltäna. Chuymankipstatäjjänwa, ukat jukʼamp yatiñani ukat altʼat chuymanëjjänwa. Mä jukʼa llakthapisisaw pantjasitanakapata, jan istʼasirïtapata ukat jan sinttʼasirïtapat Jonás libro qellqpachäna. Cheqas Jehová Diosajj khuyaptʼayasirïñ yatichkäna uk sumwa Jonasajj yateqawayäna. ¿Jiwasasti? ¿Yateqawayaraktanti? (Mateo 5:7 liytʼasiñapawa.)