Jehová Diosajj Abraham wawanakapatwa mä marka Jupatak uttʼayäna ukat leyinak churarakïna. Uka markajj Israel satänwa, jupanakakiw cheqa yupaychäwirjam Diosar yupaychapjjäna ukat jupanakarukiw Diosan Arup churasirakïna (Salmo 147:19, 20). Ukhamatwa taqe markankirinakajj walja bendicionanak katoqapjjasapäna. Génesis 22:18 liytʼäta.

Jupat qhanañchapjjañapatakiw Diosajj israelitanakar ajlliwayi. Kunjamtï uka markan sarnaqäwipajj uñachtʼaykejja, Diosan leyinakaparjam sarnaqañajj wali askiwa (Deuteronomio 4:6). Cheqas israelitanak toqew yaqha markankir jaqenakajj cheqpach Diosar uñtʼapjjasapäna. Isaías 43:10, 12 liytʼäta.

Tiempompejja, israelitanakajj janiw Diosamp suma uñjatäjjänti, ukatwa Jehová Diosajj jupanak lantejj cristiano tamar ajlliwayi (Mateo 21:43; 23:37, 38). Ukhamajj jichhürunakanjja, cheqpach cristianonakaw qhanañchirinakapjam Diosar servipjje, janiw israelitanakäjjeti. Hechos 15:14, 17 liytʼäta.

Oraqpachan Diosan arunakap yatiyapjjañapataki ukat jupan arkiripar tukuyapjjañapatakiw Jesusajj arkirinakapar wakichatayna (Mateo 10:7, 11; 24:14; 28:19, 20). Aka qhepa urunakanjja, jan tiemponiw jaqenakar yatiyasiski ukat yatichasiskaraki. Diosajj millón millón jaqenakaruw taqe markanakat tantachthapiski, ukhamat kunjamtï jupar yupaychañäki ukham yupaychapjjañapataki, janiw kunapachas ukham uñjasiwaykiti (Apocalipsis 7:9, 10). Ukham yupaychasaw cheqpach cristianonakajj maynit maynikam yanaptʼasipjjaspa ukat chʼamañchtʼasipjjarakispa. Ukat oraqpachankir jilat kullakanakajja, janiw may may yatichäwinak yateqapkiti, jan ukasti pachpa yatichäwikwa tantachäwinakapan yateqapjje. Hebreos 10:24, 25 liytʼäta.

Khä 1870 maranakanjja, mä qhawqha Bibliat yatjjatirinakaw Biblian cheqa yatichäwinakapat yatjjatañ qalltapjjäna, uka yatichäwinakajj walja maranakaw imantataskäna. ¿Kunsa amuyapjjäna? Diosan arunakapat yatiyapjjañapatakiw Jesusajj cristian tamar wakichatayna, uk amuyasaw aka Oraqpachan Diosan Reinopat yatiyañatak wal chʼamachasipjjäna. Ukat 1931 maranjja, Jehová Diosan Qhanañchirinakapa sat sutimpi uñtʼatäjjapjjänwa. Hechos 1:8; 2:1, 4, 11, ukat 5:42 liytʼäta.

Nayrïr maranakanjja, mä qhawqha jilatanakaw jilïr irpirinakjam irnaqtʼapjjäna, jupanakajj Jesusaruw cristian taman pʼeqtʼirjam uñjapjjäna. Taqe markankir cristian tamanakatakejja, uka jilatanakampi yanaptʼatäñajj wali askïnwa (Hechos 16:4, 5). Jichhürunakanjja, ukhamarakiw Oraqpachan Jilïr Irpirinakajj Jehová Diosan Qhanañchirinakapar yanaptʼasipki, uka Jilïr Irpirinakajj suma yatjjattʼatäpjjewa, ukat jupanakaw kunjamsa oraqpachankir sucursalanakan irnaqtʼasiski uk uñjapjjaraki. Uka sucursalanakanwa, Bibliat apstʼat qellqatanak imprimisi, tamanakar lakirasi ukat 600 jila arunakar jaqokipasiraki. Oraqpachan Jilïr Irpirinakajja, 100.000 jila tamanakaruw Biblian yatichäwinakaparjam chʼamañchtʼapjje ukat yatichapjjaraki. Uka tamanakanjja, yatjjattʼat jilatanakaw utjaraki, jupanakaw wali munasiñampi Diosan tamap uñjapjje. 1 Pedro 5:2, 3 liytʼäta.

Jehová Diosan Qhanañchirinakapajja, Biblian suma yatiyäwinakap yatiyañataki ukat Jesusan arkiripar tukuyañatakejj suma wakichtʼatäpjjewa. Apostolanakjamaw utat utat yatiyir sarapjje (Hechos 20:20). Ukat cheqa yatichäwinak yatiñ munapki, ukanakarus yatichapjjarakiwa. Ukampis janiw mä aleq tamakïpkiti, jan ukasti maynit maynikam wali munasir jilat kullakanakamp chikaw mä familjam jakasipjje, ukat Jehová Dios Awkipampi suma uñjatäpjjarakiwa (2 Tesalonicenses 1:3). Ukat niyakejjay jupanakajj Diosan munañap lurañataki ukat jaqe masipar yanaptʼañataki wal chʼamachasipjjchejja, wali kusisitapuniw jakasipjje. Salmo 33:12 ukat Hechos 20:35 liytʼäta.