Jehová Diosan Testigonakapar jukʼamp uñtʼañataki, kunsa lurapjje ukat kunjamsa Diosan markapajj nayrar sarantaski, ukanak aka folletot yatjjatañatak tiempo apstʼasitamajj wali askipuniwa. Kunjamtï amuypachätajja, Jehová Diosan Testigonakapakiw jichhürunakanjj Diosan munañap lurasipki. Ukhamajj Diosat yateqaskakim ukat familiaranakamaru, amigonakamaru kuntï yateqaskta uk yatiyam, ukat Jehová Diosan Testigonakapamp chika tantachäwinakapar sarañatak chʼamachasirakim (Hebreos 10:23-25).

Jehová Diosar jukʼamp uñtʼäta ukhajja, qhawqsa Jupajj munastam uk jukʼamp sum amuyäta, ukat jumajj taqe chuymarakiw Jupar munasitam uñachtʼayañatak chʼamachasïta (1 Juan 4:8-10, 19). Ukhamajj ¿kunjamsa sarnaqäwiman Diosar munasitam uñachtʼayasma? Yatichäwinakaparjam sarnaqañajja, ¿kunatsa jumatakejj wali askïspa? Jehová Diosan Testigonakapamp chika Diosan munañap jukʼamp lurañatakejja, ¿kunas yanaptʼiristam? Bibliat yatichirimaw uka jisktʼanak qhanañchañ yanaptʼätam, ukhamatwa jumasa ukat familiamasa ‘wiñay jakañ suyasa, Diosan munasiñapan jakasipjjäta’ (Judas 21).

Ukhamajj ¡Jehová Diosan cheqa thakhipanjam nayrar sarantaskakim! Ukatakejj aka librot yatjjatañaw wal yanaptʼätam: “Diosan Munasiñapan Jakasipxañäni”.