Sum sarnaqer jaqenakajja, kunatï walïki jan walïkaraki uk qhanwa amuyapjje. Janiw suma sarnaqäwip mä kuns pasipanak mayjtʼayapkiti, jan ukasti kunjam yatichäwinipkitï ukarjamaw kuns lurapjje. Jan khitin uñjkatas sumwa sarnaqapjje.

Jichhürunakanjja, musicanakasa peliculanakasa televisionan programanakasa escuelan masinakapasa, wawanakarojj kunatï walïki jan walïkaraki uka toqet mayjtʼayat yatichäwinakwa yatichapjje. Uka yatichäwinakajja, wawanakar pächasiyaspawa.

Wayn tawaqetanakatakejj ukajj jukʼamp chʼamäspawa. Mä librojj akham siwa: “Masinakapasa, televisionasa, yaqha ukhamanakasa wali uñtʼatäñapatakiw waynitüsipki tawaqetäsipki ukanakar chʼamañchapjjani, ukar saykatañatakejja jupanakajj wakichtʼatäpjjañapawa. Amigonakapajj janis jupjam amuyapkchinejja, kunatï walïki ukarjamaw suma amtanakar puriñ yateqapjjañapa” sasa (Beyond the Big Talk). Cheqas awk taykanakaw wawanakaparojj ukanak jiskʼatpach yatichapjjañapa.

Kunatï walïki jan walïkaraki uk qhanwa yatichañama

BIBLIAJJ KAMSISA: ‘Jilïr jaqenakajja, kunatï walïki jan walïki ukanak amuytʼañjja yateqjjapjjewa’ (Hebreos 5:14).

• Kunatï walïki jan walïkaraki ukjja arunakampiw qhanstayañama. Kunanakatï sapür uñjaski ukanakampiw kunatï walïki jan walïkaraki ukanak wawamar yatichañama. Inas akham sischisma: “Akajj honradötamwa uñachtʼayi. Akasti jan honradötamwa uñachtʼayaraki”, “Akajj confiykayätamwa uñachtʼayi. Akasti jan confiykayätamwa uñachtʼayaraki”, “Akajj munasirïtamwa uñachtʼayi. Akasti jan munasirïtamwa uñachtʼayaraki” sasa. Tiempompejja, kunanak lurañas walikïski, kunanak lurañas jan walïkaraki ukanakwa wawamajj yateqani.

• Kunatsa mä kun lurañajj walikïski jan ukajj jan walïkaraki ukwa qhanañchtʼañama. Wawamarojj kunatï walïki jan walïkaraki uk sum amuytʼañapatakiw yanaptʼañama. Akhamwa jupar jisktʼasma: “¿Kunatsa honradöñajj wakiskiri?”, “¿Kunatsa kʼarisisajj amigonak aptʼassna?”, “¿Kunatsa lunthatasiñajj jan walïki?” sasa.

• Sum sarnaqasajj kuna askinaksa jikjjatsna ukwa amuytʼayañama. Akhamwa sasma: “Honradoyäta ukhajja, mayninakajj confiyapjjätamwa”, “Munasiñampi mayninakar uñjäta ukhajja, jupanakajj amigomäñwa munapjjani” sasa.

Familiamajj sum sarnaqer jaqenakat uñtʼatäñapawa

BIBLIAJJ KAMSISA: “Kunjam jaqëpjjtasa uksa uñakiptʼasisipkakim” (2 Corintios 13:5).

•   Familianjja taqpachaniw sum sarnaqapjjañama. Ukhamatwa taqe chuym akham sapjjasma:

  • “Nanakajj janiw kʼarisirïpkti”.

  • “Familiajanjja, janiw nuwasiñas ni toqesiñas utjkiti”.

  • “Janiw khitirus jan wali arunakampejj toqepkti”.

Ukhamatwa, wawamajj sum sarnaqañajja jan aru mayakïtapa amuyapjjani. Jan ukasti familianpun ukham sarnaqerit uñtʼatäpjjatam amuyani.

• Familjam sum sarnaqañ toqet wawamar yatichañatakejja, kuntï uñtʼki ukampiw amuytʼayañama. Ukatakejja, masinakapajj kuntï lurapki, televisionan programanakas kuntï yatichapki ukanakajj walikïskiti janicha ukanakampiw amuytʼayasma. Akhamwa jisktʼasma: “¿Kunsa jumajj lurasmäna?”, “¿Familiasajj kunsa ukhaman uñjasisajj luraspäna?” sasa.

Kunatï walïki uk luraskakiñapatakiw chʼamañchtʼañama

BIBLIAJJ KAMSISA: “Suma conciencianïskakiñatak chʼamachasipjjam” (1 Pedro 3:16).

• Sum luratapat felicitañamawa. Wawamajj sum sarnaqani ukhajja, walik ukham lurtajja sasaw sañama. Ukatjja, kunatsa ukham luratapajj walikïna ukwa qhanañchtʼañama. Inas akham sischisma: “Honradötamwa uñachtʼaytajja, wal kusisiyista” sasa. Wawamatï jan wali luratap yatiyätam ukhajja, janïr cheqañchkasajj awisatapat yuspärañamawa.

• Jan wali luratapat cheqañchañamawa. Wawamatï jan wal lurani ukhajja, jupa pachpa uk askichañapatakiw yanaptʼañama. Wawanakajja, kunsa jan wal lurapjje, kunatsa ukajj familiapatak jan walïki ukwa yatipjjañapa. Yaqhep awk taykanakajja, janiw wawanakapar chuym ustʼayañ munapkiti. Ukampis kunatsa luratapajj jan walïki uk wawanakapar amuytʼayapjjani ukhajja, amuytʼasir conciencianïpjjañapatakiw yanaptʼapjjani, kunatï walïki jan walïkaraki uk amuyapjjañapatakis yanaptʼapjjarakiniwa.