Kuntï Jehová Diosax juma layku lurawayki ukanakat lupʼiñamawa

CRISTOX jaktxäna ukat mä jukʼaruxa, pä arkirinakapaw Jerusalenat Emaús markar sarasipkäna. Kunas pasäna ukxa akham sasaw Lucas librox qhanañchi: “Jupanakax parlasis ukhamarak chʼaxwasa sarapkipanwa, Jesús pachpa jikxati, ukat jupanakamp chika sarawayi. Jupanakax Jesusarux uñjapchïnsa, ukampis janiw jupan khitïtaps amuyapkataynati. Ukapachaw Jesusax jupanakar jisktʼäna: ‘¿Kunxats jumanakax thak sarkasax chʼaxwapxta?’” sasa, ukat jupanakax wal llaktʼasipxäna. Jupanakax Jesusaw romanonakan apnaqäwipat qhispiyistani sasaw suyasipkäna, ukampis jiwayapxänwa. Ukatwa ukham llakit jikxatasipxäna. (Luc. 24:15-21; Hech. 1:6)

Jesusax “jupa tuqit taqi qillqatanakax parlki ukanakata, Moisesan libropat qalltasina, profetanakan taqi qillqatanakapat” arkirinakaparux amuytʼayäna. Ukatxa, Diosan arupat yatiykäna ukhax kunanaktï paskäna ukax kunjamsa chʼamañchtʼäna ukwa arkirinakaparux amtayäna. Jesusan arunakap istʼkasinsti, llakisiñat sipansa kusisitäxapxänwa. Ukat uka arumpachaw jupanakkam akham sasipxäna: “¿Janit qhanpacha chuymanakasax nakkistänxa thak jiwasamp chik jutaskäna, ukhamarak Qillqatanakat amuytʼayaskistäna ukkhaxa?” sasa (Luc. 24:27, 32). ¿Kunsa Jesusan uka pä arkirinakapat yatiqassna?

Kuntï suyktan ukax jan phuqasxi ukhax kunjamtʼayistaspasa

Jesusan arkirinakapax kuntï suyapkäna ukanakax janiw phuqaskänti ukatwa llakisipxäna. Proverbios 13:12 qillqatax akham siwa: “Kuna suytʼäwinakatix jan phuqhaskxi ukasti chuyma usuyasiñakiwa” sasa. Ukhamarakiw jikxatassna, jichhakamax ‘jachʼa tʼaqhisïwix’ niyaw purinxañapäna ukat niyarakiw paraisonkxañasäna sasaw yaqhipax amuyassna, ukat jukʼampis khitinakatï walja maranak Diosar yupaychapki ukanakaw ukham amuyapxaspa (Mat. 24:21; Rev. 7:14). Chiqas kunanaktï suykayätan ukanak jan phuqasir uñjasax llakisiñax utjaspawa.

Amtapxañäni, kuna profecianakatï phuqasxäna ukanakat amuytʼayäna ukhaxa, janiw llakisxapxänti, kunjamsa yaqhip profecianakax phuqasïna ukxa jupanak pachpaw uñjasipkäna. Jiwasatï ukham lurañänixa, janirakiw llakisxañäniti, ni llakimpis  aynachtʼkañäniti. Kunjamtï Michael sat irpir chuyman jilatax siskänxa: “Kuntï Jehová Diosax janïr lurki uk lupʼiñat sipansa kuntï lurawayxi uk lupʼiñamawa” sasa. ¡Ukax suma iwxtʼapuniwa!

Kunsa Jehová Diosax lurawayxi

Kuna muspharkañ amtanakapti Diosax phuqawayxi ukanakat lupʼiñamawa. Jesusax sänwa: “Khititix nayar iyawskitu ukaxa, lurarakiniwa kuntix nayax lurktxa ukanaka, jukʼamp jachʼa luräwinakampwa lurani” sasa (Juan 14:12). Jïsa, jichha tiempon jakir cristianonakaxa, Uraqpachanwa yatiyasktanxa, janiw kunapachas ukham lurasiwaykänti. Jichhürunakanxa, paqallq millonat jila cristianonakaw jachʼa tʼaqhisïwi pasañ suyasipki. ¡Janipuniw nayrax ukham walja markanakan Jehová Diosar walja yupaychirinakax utjirikänti! Chiqas Jehová Diosaw Yuqapan arunakap phuqasiñapatakix yanaptʼawayi. Jïsa, markapax Jesusat sipansa “jukʼamp jachʼa luräwinakampwa” phuqawayapxi.

¿Kunampsa Diosax jiwas layku lurawayi? Suma chuyman jaqinakaruw aka ñanqha pachat mistuñ yanaptʼawayi ukat kawkintï jilat kullakanakampis alaxpachankir Awkisampis wali sum apastan uka markar mantapxañapatakiw yanaptʼaraki (2 Cor. 12:1-4). Kuna askinaksa Diosan markapankasax jikxattanxa uka tuqit lupʼiñasawa. Ukatakisti, jumankiri jan ukax Tantachasiñ Utan utjki uka bibliotecan yatxatasma. Ukat Índice de las publicaciones Watch Tower sat libro uñxattʼasma, jan ukax Watchtower Library siski ukatwa yatxatarakisma. Ukat Bibliat apstʼat dramanakax utji uka grabacionanakwa istʼkasinxa jichhak pasaski uka jachʼa tantachäwinx kunanakas istʼasïna ukat uñjasïna ukanak amtañamawa. Ukat jilat kullakanakampis kunja sumas jakastan uk lupʼiñamarakiwa. Jehová Diosax munasiñatwa Bibliat apstʼat qillqatanaka ukat munasir jilat kullakanak churistu. Chiqas markapanakwa jilat kullakasampisa ukat Diosampis sum apastanxa.

Salmonak qillqir Davitax sänwa: “[Jehová] Dios Tatay, muspharkañ luratanakamax waljawa, nanakat khuyapayasitamas waljarakiwa” sasa (Sal. 40:5). Ukhamasti alaxpachankir Jehová Dios Awkisax kuntï phuqawayki ukat kunanaktï jiwas laykux lurañ amtki ukanakat lupʼiñäni ukhaxa, kusisitakiñäniwa ukat taqi chuymarakiw yupaychañäni (Mat. 24:13).

[31 janan fotopa]

Kunanaktï Jehová Diosax jupanak laykux luratayna ukanakat lupʼipxañapatakiw Jesusax arkirinakapar yanaptʼäna

[32 janan fotonakapa]

Jichhak pasaski uka jachʼa tantachäwinx kunanakas istʼasïna ukat uñjasïna ukanak amtañamawa